پایی گؤرسه‌نیر
انصار قره‌داغی
گؤیلر ایپک کاغیذ، ایشیقلار قلم،
آللاها گون وئرمیر شعر یازا، مریم.
گونشلر وئرمیشلر قارانلیغا لم،
بو گون گهگشانین تویو گؤرسه‌نیر.
مجلیس آشیقسیزدیر، مغنی‌لر پیر،
یانیق کرمی‌یله اصلی اویناییر،
سنین ده بو تویا مئیلین وار، بویور!
عشقین اون دؤرت گونلوک آیی گؤرسه‌نیر.
بیر اولدوز ساچ تؤکموش یاریندان گیزلی،
باخیریق تئللره، باخ سیزلی ـ بیزلی،
دَردی هندوستانلی؛ جانی تبریزلی،
گؤزلره بال ـ شیرین سویو گؤرسه‌نیر.
دنیزلر اوزونه بیر اوزوک دوشموش،
قاشی خالیص آلماس، سوله‌سی گوموش،
گوهرلر ـ دریالار یییه‌سی درویش،
هانسی پادشاهین پایی گؤرسه‌نیر ؟!
بیر گؤزوم گوناهدیر، بیر گؤزوم ثاواب،
عکسیم سایه ـ روشن، گالئری خاراب !..
نه دؤورانا اویغون، نه دووارا قاب!
هر آلتی جهتده بویو گؤرسه‌نیر .
داغلارین ایلقاری بیر یاد قوچاقدا،
بیلیر بو اسرای اوددا ـ اوجاقدا،
«انصار» آغ ایلانلی قیزیل چاناقدا
اووچو پیریم اوخو ـ یایی گؤرسه‌نیر !…
۹۴/۱۱/۳
