susen navade
هانی او تبریز؟
سوسن نواده رضی

هانی او گون؟
هانی او بیز؟
هانی او تبریز؟
هانیلار قالدی گئدیب گلمز یوللاردا…
گلمزسن،
شعیرلر یئتیم قالار
آلمالار قارا لچک باغلار
و یول چکن گؤزلر
قورودولار اورمو گؤلونه تای…
باخ! بیر دیلک توتورام؛
هر نار داناسی بیر نار قیزی اولسون،
هر نار قیزی بیر حسرتی گئدرسین،
هر حسرتین بیتیشی
بیر دیله‌ک گتیرسین،
و بیر آخشام چاغی
ساعات قاباغینداکی آبمیوه‌چیده
نارسویو ایچک بیزلردن اولان هر کسین ساغلیغینا.
هانی او گون؟
هانی او بیز؟
هانی او تبریز؟