بوتون گؤزللیک‌لر…
مسعود اسلامی
بوتون گؤزللیک‌لر
گؤزل گؤزلریزده گؤرونور
منه قالان شهرین کوچه‌لرینه بوراخیلان
کؤهنه یالان‌لاردیر
یازمادیغیم یازدیغیمدان شیرین‌دیر!
یازدیقلاریم آغری‌لارین آجیسی
آغزیز آجی اولسا
توپورون…
***
اوخودوغوز گونده‌لیک‌لرین
شیرینلیک‌لرینی اودمایین
قند خسته‌لییی چوخالیب‌دیر
تورکو یازاندا دا،
احمد کسروی بئیی اونوتمایین
یازیلاریزا یئر بؤجه‌یی داراشسا
مندن دئییل
وزیر بئی یالان دانیشماز
بوتون یئییب ایچدیکلریمیز خرچنگ خسته‌لیک‌لری دئییل
واقتیز اولاندا اورمییه دنیزین چوخ دا قاریشدیرمایین
آشیمیزین شورلوغو،
ایشمه‌لی سولاریمیزین دوزسوزلوغوندان‌دیر
شعر-مئرده یازاندا منی ایته‌له‌یین قاباغا
قورخمایین لوطفن
“بیری اؤلمه‌سه، بیری دیریلمز”
یادیمدان چیخدی دئیَم بو نوسخه‌لری ساخلایین
خئییری ده اولماسا،
ضرری اولار!
