said qaflan
وطنده اؤله‌سی‌یم
سعید قافلان

ایتی قانادلی بیر قوش اولوب،
گزسَم بو دونیانی دیار- دیار؛
دولاشیب اوبالاردا،
ائل‌لرده
یورد سالسام؛
قیش، باهار
یئنه وطنه قاییدیب
وطنده قالاسی‌یام.

قارا بولوت
گلیب قارا پرده‌سینی
چکسه اوستومه،
شیمشک کیمی‌چاخیب،
نور ساچاسی‌یام؛
یئنه وطنه قاییدیب
وطنده قالاسی‌یام.

اوشاقلیقیمدا، گنجلیگیمده،
ساچلاریما دن دوشوب
وطنیمله وداعلاشان گونومده
منه دوغما اولان،
باشی گؤیلره اوجالان-
«بابک»لر قالاسیندا قالاسی‌یام؛
من بوردا چیچک‌لنیب،
بوردا سولاسی‌یام….