ansar qaradagli
ای آذربایجان
انصار قره‌داغی

اودلار ناغیل ـ ناغیل بیر قیز اوینادیر
یوز مین قرینه‌دیر یالقیز اوینادیر
تانری جامی جمی سنه آینادیر
آتش‌لر رقصینده سجده ده قورآن
جانان جوهری سن ای آذربایجان!

بو گئجه ظولمتله بیر اود دانیشیر
آللاه شعله ـ شعله کؤینک ده‌گیشیر
اولدوز دوغومونا ایشیق سؤز قوشور
قونوتون دعایا توتموش کهکشان
جانان جوهری سن ای آذربایجان!

آی‌لار آیناسیندا جانامازلی قیز
ساچینی داراقلیر تویسوز، آیناسیز ـ
هُمای‌لار مولکونون پریسی نرگیز ـ
ائولادین بوت‌پرست، اؤزون مسلمان
جانان جوهری سن ای آذربایجان!

قیز سارا ساز باسمیش سئل سینه‌سینه
سئگاه لار اوجالتمیش کرَم سسینه
اصلی قَریب‌لنیر یار له‌له‌سینه
یانیق کرمی‌یه نئی دَملیر چوبان
جانان جوهری سن ای آذربایجان!

پاییز آذانیندا آغ قیبله‌لی قیش
باهاری اون ایکی رکعته بؤلموش
بیاض شعر ازبرلیر قوجا دوورانیش
بیرینجی دیوانسان، ایکینجی رُمان
جانان جوهری سن ای آذربایجان!

دئمیرم هر سؤزو ، بو قلم دئسین
آللاه الده توتان جامی جم دئسین
یا داهی دریالار، یا عالم دئسین
قافلار نسلیندندیر سلطان ساوالان
جانان جوهری سن ای آذربایجان!

گونش کؤرپوسینده آیه سؤکولور
پئیغمبر شکیلی سویا چکیلیر
قوزوسو یانیندا باش بوکوب گلیر
مریم اللرینین دوزونا جئیران
جانان جوهری سن ای آذربایجان!

ملک‌لر سو چکیر باش چئشمه‌لردن
شقایق سوواریر سوسن ـ یاسمن
بیر گؤزه‌ل اولالی، ایکی گؤزده سن
عشقین رسّامینا بویالار حئیران
جانان جوهری سن ای آذربایجان!

« انصار » الرحماندیر، قلمی یاسین
یازیلی شعله‌لر قوی پوزولماسین
خالیقین، خیلقتین کیم وئرمیش درسین؟!
نسیم‌لر جانیسان جاهان با جاهان
جانان جوهری سن ای آذربایجان!

۲۳/۸/۱۳۹۳

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4