Home / شعر / سئوگی پیچیلتی‌لاری / کریم قربان‌زاده

سئوگی پیچیلتی‌لاری / کریم قربان‌زاده

karim
سئوگی پیچیلتی‌لاری
کریم قربان‌زاده

(۱)
یازدا یاغیش-
قیش دا تونقال-
قوربتده وطن-
وطن ده سفر-
ساواشدا باریش
و قارانلیقدا
ایشیم ایشیم ایشیلتی کیمی‌سئویرم سنی!
من سوکوتون ان درینلیگینده
ایکی‌جه سئوگی سؤزو کیمی‌سئویرم،
سئویرم سنی!

(۲)
ایسلاق بولودلار دنیزه،
جادار – جادار تورپاق یاغیشا
و من سنه باغلی‌یام ،
سنه!

(۳)
گل
بیر آز ایشیق گتیر
قارانلیغین ائوین ییخماغا!
گل
بیر ساز گتیر
بیر سؤز گتیر
بو حسرتدن چیخماغا!
گل
گولوش گتیر
اوره‌ک گتیر
بیر ال گتیر سیخماغا!

(۴)
سنی اود کیمی‌سئودیم
سئودامیزدا یاندیم
آلوولاندیم
کوله دؤندوم
کوله!

(۵)
بئینیمین قاپ باجاسینی آچاجاغام
سیل سوپور ائده‌جه‌یم قارانلیق دالان‌لاری،
اپریمیش دوشونجه‌لری
یالنیز
و یالنیز
بیر اتک یاغمور
بیر قوجاق گونش
و بیر دونیا سئوگی ساخلایاجاغام-
سنی سئومک اوچون.

(۶)
لیماندان لیمانا یول چکیر گؤزوم
او سنسیز گمی‌لر-
توستودور
سس دیر!

(۷)
گل
چیچک‌لری باغچالاردا،
چیراق‌لاری تاقچالاردا
ایشقلاندیر!
گونش اول ساریل منه،
یاندیر
یاندیر
منی آلوولاندیر!

(۸)
گونش داغلارین دالیندا
و دالغالار
ساحیلده ایتن کیمی
گؤزلرینده ایتمک
و گوپ- گوپ چیرپینان اوره‌یینده
بیتمک ایسته‌ییرم.

(۹)
بیر آز آغاجلار آییلسا
بیر آز اللریمیز بیر- بیرینه اوزانسا
و بیر آز گونش قیزدیرسا جانیمیزی
یاز دؤیر قاپینی؛
پنجره چیچک‌لره آچیلار
و تار ائیواندا چالینار.

(۱۰)
پاییز قلینجینی اوینادیر مئشه‌ده
اوره‌ییم قیریلیر دوشور؛
یارپاق بهانه‌دیر
اوچوش دا کؤچور
ماهنی دا بوردان.

About ایشیق

۲ comments

  1. بسیار زیبا
    ممنونم
    آرزومند آرزوهایتان هستم
    ای بهترین بهترینها❤️❤️❤️❤️❤️❤️

  2. yazda yağış
    qışda tonqal
    qürbətdə vətən
    vətəndə səfər

    daha nə olsun əəla əəla*******

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *