Home / شعر / دردلرین درمانی / میرحسین ریاحی‌فر(سیّد)

دردلرین درمانی / میرحسین ریاحی‌فر(سیّد)

riyahifar
دردلرین درمانی
میرحسین ریاحی‌فر(سیّد)

اینسان دوغولان چاغدا سن‌له ائکیز دوغولور
سنی اوندان آلاندا سوسوز یئرده بوغولور
سن‌له گؤیلره قالخیر سنسیز سینیر، اوغولور
سندن ال چکمه‌یه‌جک جان اولدوقجا بدنده
سنی‌هارایلایاجاق دردینه درمان سنده.

یوردون ایکی گؤزوسن بوتون وار یوخو سنین
گؤزللرین گؤزوسن، لالاسیسان چمنین
قارانلیغا قنیمسن، ایشیق ساچار بدنین
آدین دیللرده گزر ائل دؤیوشه گیرنده
سنی‌هارایلایاجاق دردینه درمان سنده

سنه وورغون اولارلار دونیا بویو قوچاقلار
سن اولسان یارپاقلانار لاپ قوروموش بوداقلار
سن اولاندا پوزولار یئرسیز اولان یاساقلار
باطل آرادان چیخار حق سورگوندن گلنده
سنی‌هارایلایاجاق دردینه درمان سنده

قیرمیزی بیر چای کیمی‌لاله دوزده آخاندا
بولودلارین دالیندان آی مارال تک باخاندا
قارا  قیشلار تورپاغین سینه‌سینی یاخاندا
تورپاق آغیر یارانین سانجیسینا دوشنده
سنی‌هارایلایاجاق دردینه درمان سنده

اووچو اوولاری بوسوب اوخ قویاندا کامانا
یاخشی‌لارین گوجلری چاتمایاندا یامانا
یالقوزاق توی توتاندا داغ باتاندا دومانا
یولچو یولوندان قالار قارانلیق یول کسنده
سنی‌هارایلایاجاق دردینه درمان سنده

سن یئره جان وئررسن آییلا اوزو گوله
دئمده یاغیشین سویو جان باغیشلار سونبوله
ارلر اؤلسه ده یاشار قوی بونو دونیا بوله
ائل اونو یاشاداجاق اولماسادا وطنده
سنی‌هارایلایاجاق دردینه درمان سنده

سنی دئییب  قورتولوش بایراغین ائل آچاندا
بوغونتو یارادانلار آیاق آلیب قاچاندا
دمیر قفسلر سینیب قوشلار آزاد اوچاندا
گونش ساچین هؤرنده دان یئری سؤکولنده
سنی‌هارایلایاجاق دردینه درمان سنده

سن یاندیران چیراغی سؤندوره بیلمز کولک
بیر گون یئنه گوله‌جک پاییزدا سولان چیچک
«سیّد» سنه سؤز وئریر قالسادا دونیادا تک
سندن ال چکمه‌یه‌جک جان اولدوقجا بدنده
سنی‌هارایلایاجاق دردینه درمان سنده

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *