من جهننمه!
شریفه جعفری
یاخشی قورو اؤزونو،
سنه بیر شئی اولماسین
مؤحتاج- مؤحتاج یاشاسام دا سنه،
من جهننمه!
گؤزلرینی قورو
سالماسین بلایا اورک‌لری،
آلماسین آه‌لارینی؛
من آه ائتمه‌رم اؤلورسم ده،
هئچ منی حسابلاما، دوشونمه، دئمه!
من جهننمه!
چوخ چتیندیر اهانت؛
داغلار دؤشوندن سیزان سولارین عشقینه،
باغیشلاما شر یاخانی سئوگینه، سنه،
من جهننمه!
چیچک‌لردن نازیک،
قایالاردان سرت اوره‌یینی
قورو دا قیریلماسین،
قیرماسین او آدام یئنه،
من جهننمه!
