۸ مارت؛ دونیا قادین گونو موبارک
Nigar-Xiyavi
گؤزلوکسوز دونیا
نیگار خیاوی

گؤزلویونو ایتیریب دونیا اؤز ایشینده دئییل
سوخولور بؤیرومه بورنویلا، بوینوزویلا
آراق چکیرم باشیما یورغانی چکیرم سو کیمی
دوداغیما گولوشو ساتین آلماغا دوکان‌هانی؟
بول تاماتلی ماکارنا دمله‌دیم تئلویزیونا زیلله‌نن گؤزسوز اوشاغیما
قونداغینا توفنگ دویومله‌دیم
فداکار آنایام چونکو
آمان چکیرم، بو میکروبفونلار الیندن آمان!
هانسی سنگرین نئچه‌نجی سونگوسوندن
هانسی ایلین نئچه‌نجی چووغونوندان توشلانیب آغزیما بیلمه‌م
یوخ اولماییر یوخولاریمدان، اولمایاجاق دیلیمین آچیلیشی
نییه بیله بیلمه‌ییر بو یوبانمیش آلقیشی دئسم اؤلمه‌م
بونجا کی، گؤبه‌ییم آتیلیر خزره گئدن گمیلره
بونجا کی، جنازه‌م باتیر شاه گؤلونون حیرانلیغینا
و نامازی هئی چاره قیلیر «میگرن»لی آخشاما آغلایان قادینلیغینا
سیقارلارین کؤزو بیر- بیریندن کوچه ده قبیر آدرئسی سوروشور
و قولاغیم وورهای مئییت نامازی قیلیر
هله باخین یئددی کفن چوروتموش آتاما
کامیونلا بئل-کولونگ داشییر تلسه-تلسه
من بیلمیرم کیمدن کوسه-کوسه:
«بولدئزر کیرالامیشیق آتاجان!»- دئیه، ایچقیریرام
آنام تک جانینا باغلی-باغاتلی بیر پنجره‌دی
اوره‌یین آچیلار اونو گزیب دولانسان
اوره‌یین توتولار دیندیریب دانیشدیرسان:
«نه افسرلر، نه افسرلر… اؤلوم ننه‌لریندی، ننه‌ن قوربان سنه، ننه‌لرین…»!
هله ده بو سؤیودون، او کؤه‌ره‌نین کؤلگه‌سینده
قاراسو آخیر آنامین گؤزلرینده
بوداقداکی جنازه‌لرین دیزیندن یوخاری
باخمیر
باخانمیر آنام.