قار یاغیر
مهدی خالد قراملکی
قار!
آزادلیق یولونون شهیدلرینین
یوخ کفنلرینی خاطیرلایاراق
یاغیرسان بو گون؟،
یا دا،
گلین قیزلارین آغ دونلارینی اؤزلرکن
دؤشه‌نیرسن بوتون کوچه‌لره؟
قار!
سن یاغا یاغا
ائله بیر حسرت دولو دویغولار ایچیمده جوشور کی،
سانکی یوز ایللردی
آغلیق، ایشیقلیق
و قار ایشیلتیسی گؤرمه‌میشم هئچ!
قار!
سن یاغیب
مرهم اولورسان یوردومون قارالمیش یارالارینا!
یوردوم گؤزللشیر سن کیمی:
شهیدلرینه کفن،
قیزلارینا گلینلیک دونوسان؛
داغ زیروه‌لرینده اسن،
تاریخ بویو آل قانیله قیزاران،
آزادلیق بایراغی‌سان!
قار!
سن یاغینجا،
من‌ده یاغیرام؛
سن یوردوما،
من ایسه دفترلریمه.
سن آغ آپپاق یاغدیقجا
قارا قارقالاری تئز گؤرمک اولور،
و من یاغدیقجا ……!
