masoud azer
نار گلیب، سن‌ده گل!
مسعود آذر
“احمد اسدالهی‌نین عزیز خاطیره‌سینه”

 عزیز دوستوم!
سن یوخویدین
او گئجه قوناقلارین بیزده دوشدولر؛
سنسیزلییی دویماسینلار –دئیه
سن وئره‌ن شراب‌دان سوزدوم اونلارا؛
آمما سرخوشلوغوموز
اسگی سرخوشلوق دئییلدی؛
آخساییردی دویغولاریمیز
اوشویوردوک‌هامیمیز.
– اورتالیقدا ایچیلمه‌میش بیر باده –
پوزولدو احوالیم،
سنسیزلیک یاغیشی چیرپدی اوزومه،
آجی زهه‌ر کیمی
آخیب …، آخیب …، دولدو گؤزومه…

گل …!
گل …سئویملی یولداشیم
گل قارشیلا قوناقلارینی!
قالدیر ایچیلمه‌میش باده‌نی-
خاطیره سرخوشلوغوموزا!
گل … بیرده گل!
الین چاتماسادا یازا
یارپاقلار تؤکولنده گل!
مئشه‌لر بویالی تابلویا چئوریلنده گل!
یوبانسان قار گله‌جک؛
باشقا زامان دئمیره‌م
اشی، نار گلنده گل!

۱ آذر ۱۳۹۳