alirza
بیر دورنا آیریلدی اؤز قاتاریندان
علیرضا میانالی
هاشیم ترلانین خاطیرەسینه

بیر دورنا آیریلدی اؤز قاتاریندان
اوزاق کئچمیشلره آپاردی منی.
سون کره آردینجا یولا چیخمادیم
او گئتدی ، اؤزومدن قوپاردی منی.

قوپاریب آپاردی ائله یئره کی،
یولوم کئچید آلدی ناغیل دونیاما.
بو یولدا اورەییم سفربر اولدی
ائحتیاج دویمادیم آغیل دونیاما.

آغیللی اینساندان دانیشیر‌هامی.
کؤنوللی بیریندن دانیشان یوخدی.
یولداییق، یولچویوق دئمک‌هامیمیز
یوروین چوخ دئییل، سورونن چوخدی.

یوخدی اونون کیمی‌بیری باغلاسین
دورنا قاتارینا اؤز قانادینی.
آغلی واز کئچسەده سونادک آنجاق
اورەیی یاشادی اؤز اینادینی.

داها جیغیر آچیب، ایز سالمایاجاق.
داها قانادلانیب او اوچان دئییل.
دورنا قاتارینا قوشولوب بیرده
یئنی صاباحلارا یول آچان دئییل.

یوزوده کئچەجک، یوز دوخسانیدا
گوموشی بویاسی سولمایاجاقدی.
اوندان یاخشیسیدا اولاجاق یقین
دی گل کی،کیمسه او اولمایاجاقدی.

بیر دورنا آیریلدی اؤز قاتاریندان
اوزاق کئچمیشلره آپاردی منی.
سون کره آردینجا یولا چیخمادیم
او گئتدی ، اؤزومدن قوپاردی منی.
۲۰ نوامبر ۲۰۱۴