چئویرن: اکبر رضایی
ترجمه: اکبر رضایی
اکبر رضایی

سحر تئزدن چیخمیشدیم. گون اورتا واختی یورغون آرغین ائوه یئتیشدیم. حیات یولداشیم منی قارشیلادی: یورولما دئدی. سونرا بیر توی کارتی گتیردی. ائله کارتی گؤرن کیمی سئویندیم؛ تانریم موبارک ائله‌سین، خوشباخت اولسونلار. هابئله دادلی سؤزلردن دئدیم. آچدیم، اوخودوم و آخشام اوستو شام و موسیقیلی گئجه دعوتینی آچیقلادیم.

گئجه یاخشی گئیینیب، عطیردن، اودکلن‌دان زاددان ووروب خوش قوخولو اولوب، بیر نئچه دانا هدیه اولاراق کیتاب آلیب، باغلاییب گئتدیم توی ییغینتیسینا. موسیقی باشلاندی و سئویندیریجی بیر شرایط یاراندی. هامی‌نین گؤزو گولوردو، آمما اوتانماق اوزوندن هئچ کیم اویناماغا اورتایا گَلمیردی. بیر آز کئچدی. یاواش یاواش مجلیس قیزیشدی. اورتالیق ائله دولدوکی!!! هامان اوتانان آداملار یئکه‌لی، جاوانلی ائله بورجودوردولارکی هئچ عرب رقاصه‌لری ده ائله بورجودا بیلمز… آنجاق یئریندن قالخمایان آداملاری ایندی یئرلرینه اوتورتماق مومکون دئییلدی. یالوارا یالوارا قولوننان توتوب، یئرینه اوتوردوردولارکی شاباش وئرن وار…

شاباش وئره‌ن آغا مئیدانا چیخدی و میکروفون یانیندا دایاندی. هاممی بیرجه اونا باخیردی.

ایکی یوز تومن مجلیس ساغلیغینا،

ایکی یوز تومن یوخاری باشین ساغلیغینا،

ایکی یوز تومن آشاغی باشین ساغلیغینا،

ایکی یوز تومن بو طرفین ساغلیغینا،

ایکی یوز تومن او طرفین ساغلیغینا،

ایکی یوز تومن اوینایانلار ساغلیغینا،

ایکی یوز تومن قولاق آسانلار ساغلیغینا،

ایکی یوز تومن قوجالارین ساغلیغینا،

ایکی یوز تومن جاوانلارین ساغلیغینا،

ایکی یوز تومن به‌یین ساغلیغینا،

ایکی یوز تومن به‌یین قارداشلارینین ساغلیغینا،

ایکی یوز تومن به‌یین خالاسی اوغلانلارینین ساغلیغینا،

ایکی یوز تومن به‌یین داییسی اوغلانلارینین ساغلیغینا،

ایکی یوز تومن به‌یین عمیسی اوغلانلارینین ساغلیغینا،

ایکی یوز تومن اؤزومون عمی‌لریمین ساغلیغینا،

ایکی یوز تومن دایی‌لاریمین ساغلیغینا

ایکی یوز تومن دایی‌لاریمین اوغلانلارینین ساغلیغینا،

ایکی یوز تومن غربتده سرباز اولانلارین ساغلیغینا،

ایکی یوز تومن سوبای‌لارین ساغلیغینا،

ایکی یوز تومن قویون کَسَنین ساغلیغینا،

ایکی یوز تومن چای وئرنلرین ساغلیغینا،

ایکی یوز تومن علی نین داییسی اوغلو اوردا اوتوروب اونون عمیسی‌نین ساغلیغینا،

ایکی یوز تومن قونشوموزون اوغلو دونن ماشینیمی ایته‌له‌دی اونون ساغلیغینا،

ایکی یوز تومن اهبر باتری‌سازین ساغلیغینا، او اولماسا قیشدا بیر ماشیندا محله‌ده ایشله‌مز.

ایکی یوز تومن باققال ولی‌نین ساغلیغینا هر نه ایسته‌سن کؤهنه تَزه تاپار وئره‌ر.

ایکی یوز تومن یاغچی قولونون ساغلیغینا،

ایکی یوز تومن قره ممدین ساغلیغینا،

ایکی یوز تومن چالاننار ساغلیغینا،

ایکی یوز تومن فیلیمبردارین ساغلیغینا،

ایکی یوز تومن یادیمننان چیخدی قایین‌لاریمین ساغلیغینا،

ایکی یوز تومن دده‌مین ساغلیغینا،

ایکی یوز تومن دده‌مین قارداشلارینین ساغلیغینا،

ایکی یوز تومن دومباگؤز احمدینن ده‌لی کریم‌ین  ساغلیغینا، اولارین قورخوسوننان اوشاقلار محله‌یه چیخماز.

ایکی یوز تومن وانتچی حسنین ساغلیغینا،

ایکی یوز تومن اوردا دوروب رسولون دده‌سی‌نین عمی اوغلوسونون ساغلیغینا،

ایکی یوز تومن توی به‌یی‌نین ساغلیغینا،

ایکی یوز تومن حسنقلی اوغلو کریم مریض‌دی اونون ساغلیغینا،

ایکی یوز تومن حَیَطده دورانلارین ساغلیغینا،

ایکی یوز تومن تاروردی‌نین ساغلیغینا اوغلو ایندی گَلدی،

ایکی یوز تومن ده‌لی قولونون ساغلیغینا،

ایکی یوز تومن لوتو کریمین ساغلیغینا،

ایکی یوز تومن حامبال غلامین نوه‌لرینین ساغلیغینا،

ایکی یوز تومن فرش توخویاننارین ساغلیغینا،

ایکی یوز تومن آغ ساققال‌لار ساغلیغینا،

یادیما دوشدو ایکی یوز تومن بیبیمین اَرینین ساغلیغینا، اوغلاننارینین ساغلیغینا، قارداشلارینین ساغلیغینا، ایستییَن‌لرینین ساغلیغینا،

ایکی یوز تومن چوبان حسن قویوندادی گَلنمه‌دی اونون ساغلیغینا،

ایکی یوز تومن اوغرو ولی‌نین ساغلیغینا،

ایکی یوز تومن چولاق حسنین عمیسی‌نین یئزنه‌سینین ساغلیغینا،

ایکی یوز تومن دوستوم داشچی حمزه نین ساغلیغینا،

ایکی یوز تومن کئفلی داداشین ساغلیغینا،

ایکی یوز تومن تای قولاق جاوادین ساغلیغینا،

ایکی یوز تومن قیرقی رضانین بیرده بئساواد نعمتین ساغلیغینا،

ایکی یوز تومن خومار احمدین ساغلیغینا،

ایکی یوز تومن پیچاخ کئش عابباسین ساغلیغینا،

ایکی یوز تومن ریشوه خور قوروببان یئکه قارین عادیلین ساغلیغینا،

ایکی یوز تومن اوغلومون ساغلیغینا اییرمی ایل مدرسه‌یه گئتدی آدین یازا بیلمیر،

یاددان چیخان اولمادی سن آللاه، هه هه یادیما دوشدو

ایکی یوز تومن بیژ ممّدینن آژ تقی‌نین ساغلیغینا،

ایکی یوز تومن مال یوسوفونان دانقاز عسگرین ساغلیغینا،

ایکی یوز تومن پوتا ناصیرین ساغلیغینا،

ایکی یوز تومن قودوز صادیقین ساغلیغینا،

ایکی یوز تومن قانجیغ اسماعیل، پاخیل موسی، فیشقا سلیم، قارنی ییرتیخ کاظیمین ساغلیغینا،

ایکی یوز تومن اوش دوداق ابراهیمین ساغلیغینا،

ایکی یوز تومن خداوردی‌نین کارخانا صاحیبی کامبیز ایتالیا بنزینن گلیب محله‌میزه اونون ساغلیغینا،

ایکی یوز تومن محله‌میزده پژو مینن‌نر ساغلیغینا،

ایکی یوز تومن قاتل کریم زنداندادی اونون ساغلیغینا،

ایکی یوز تومن دار گؤز قاسیمین ساغلیغینا،

ایکی یوز تومن حسن قمه‌نین، قداره ماحمودون، طبیل ناصیرین ساغلیغینا،

ایکی یوز تومن کار قاسیمین کور قارداشی‌نین ساغلیغینا،

ایکی یوز تومن جین میکاییلین عم اوغلوسو عزراییل رسولون ساغلیغینا،

ایکی یوز تومن دانقاز کامالین مال اوغلونون ساغلیغینا،

ایکی یوز تومن آیی نادر نن تولکو سعیدین ساغلیغینا،

ایکی یوز تومن شمچه ترلانین دده سی تخته قهرمانین ساغلیغینا،

ایکی یوز تومن قارپیز خلیل ین، خیار مرتضی نین، سارمساغ عبدالله‌نین ساغلیغینا،

ایکی یوز تومن سوسول ایوب نان خانم اکبرین ساغلیغینا،

بو ایکی یوز تومن ده عاشیق اژدرین اوغلو بالابانچی سیامکین ساغلیغینا،

ایکی یوز تومن توتک یعقوبونان قره‌نی  منصورون ساغلیغینا،

ایکی یوز تومن یانشاخ جامالین سفئه دده‌سی‌نین ساغلیغینا،

ایکی یوز تومن فالچی رقیه‌نین اوغلو سالاوات تیمورون ساغلیغینا،

ایکی یوز تومن بامادور حسن، اینه ممّد، گویچو ناصیر، تاباخچی غلامین ساغلیغینا،

ایکی یوز تومن لاواش صفرینن لبلبی رضانین ساغلیغینا،

ایکی یوز تومن محله‌میزین شیره کئشلری‌نین کیره کئش‌لرینین ساغلیغینا،

ایکی یوز تومن باشماخچیلار ساغلیغینا،

ایکی یوز تومن شاتیرلار و کونده یاپاننار ساغلیغینا،

ایکی یوز تومن کوکه پزلر ساغلیغینا،

ایکی یوز تومن ایت بهمنین قارداشی کوچوک شوکورون ساغلیغینا،

ایکی یوز تومن گئن کاظیم‌نان تومانچاق ایرج ین ساغلیغینا،

ایکی یوز تومن فیریلداق عابباسقولونون بالالارینین ساغلیغینا،

ایکی یوز تومن قیلیفتی جاوادین ساغلیغینا،

ایکی یوز تومن کار زینالین، کور صمدین، لال جعفرین ساغلیغینا،

ایکی یوز تومن جورو مجیدین چئری قارداشینین ساغلیغینا،

ایکی یوز تومن ائششک قادرینن قودوخ نقی‌نین ساغلیغینا، …

بو ایکی یوز تومن ده اؤزومون ساغلیغیما…

ایکی یوزتومنلیق آغا بیر بسته ایکی یوز تومن پولونان توی مجلیسینی الینه آلیب بوراخمادی کی بوراخمادی. گئجه ساعات بیردی و بیز توی مجلیسینده اوتورموشوق. نه موسیقیدن خبر وار نه شامنان. آجیمنان آز قالیر یئکه بوغارساغیم جیققیلی بوغارساغیمی یئسین. نئچه دفعه دورموشام قویماییبلارکی شام یئمه سن اولماز، اصلا قویماریق گئده‌سن، بیزه توهین اولار شامسیز قوناق یولا سالماریق بیز. گئجه ساعات بیر یاریما آز قالیر، یاواشجانا اَل یوما بهانه‌سیله دوردوم  و گَلدیم ائوه. باشیم ائله آغیرلاشمیشدی کی فقط اؤزومو آتدیم دؤشه‌یین اوستونه.

سحر چاغی اوشاقلار دئییردیلر: گئجه سحره جان ائله هئی ایکی یوز تومنلیق ساغلیق وئریردین، نه اولوب؟!!!

دئدیم: گئجه توی دا چوخ خوش کئچدی اونا گؤره.

۵/۱۰/۹۲ تبریز

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

توی آخشامی

اکبر رضایی
www.ishiq.net

آذربایجان ادبیات و اینجه‌صنعت سایتی

توی آخشامی

اکبر رضایی
www.ishiq.net

آذربایجان ادبیات و اینجه‌صنعت سایتی

توی آخشامی

اکبر رضایی
www.ishiq.net

آذربایجان ادبیات و اینجه‌صنعت سایتی