چئویرن: حسین واحدی
ترجمه: حسین واحدی
حسین واحدی

اؤزونو چوخ بیلیجی بیر انسان بیلیب، جمع ایچینده هانسی قونودان سؤز آچیلسایدی، یئردن–گؤیدن سؤز ییغیب اؤزونو بیلگیلی بیریسی گؤسترردی. قوهوملار و تانیشلار گولونج اوزوندن آدینی «چوخ بیلمیش قولو» دئییردیلر!

گئییمی‌ده چوخ ماراقلی ایدی، یایین لاپ ایستی گونلرینده‌ده، کوْتونو چیخارتمازدی. بو ایشله اؤزونو کلاسلی و بیلیجی گؤسترمک ایسته‌ییردی!!

قولونون دیشلری‌ده اؤز یئرینده دقت ائله‌ملی ایدیلر. اونون دیشلری ایللر ایدی دیش فیرچاسی(مسواک) گؤرمه‌میشدیلر، لاپ موزه‌یه قویمالی ایدیلار و حسابلاسایدیلار لاپ بئله گینئس کتابیندا یازیمالی ایدی! آخی بیری یوخ ایدی دئیه‌: آرواد– اوشاغین گوناهی نه‌دی سنین او پاسلی دیشلرینی تحمل ائده‌لر؟!

چوخ دانیشماغی آروادی‌دا دیغلاتمیشدی. قولو چوخ دانیشدیغی زامان، آرواد؛ «قیریق رادیو قورتار» دئیه‌ردی! گونلرین بیرینده، بحث ائله‌ینده، آروادا قاییدیب «هئچ سن بیلیرسن من گونده نئچه درگی(مجله)،  گونده‌لیک(روزنامه)، … اوخویورام؟» دئدی. آرواد ایسه «آخی قیریق رادیو، نییه بیز اونلاری گؤرموروک، هاردا گیزله‌دیبسن؟» جاواب وئردی!

قولو : «آرواد چوخ دانیشما!، اونلار دکه‌لرین قیراغیندادی، من گونده اداره‌دن قاییداندا، یاریم ساعات دکه‌لرین قاباغیندا یئریمی سالیرام» دئدی!!

ار-آروادین داعواسی، نه دئیه‌رلر؟ بلی، عینی یازین هاواسی! قولو کیشی بیر گون ایشدن ائوه قاییداندا، اوره‌گی آیران ایسته‌ییر و یول اوستونده بیر باققال دوکانیندان دؤرد کیلو آیران آلیر.

ایندینین‌ده آیرانلاری چوخ ایچمه‌لیدیرلر! آیراندان سونرا، هر نه‌یین دادین تاپماق اولار!!

دوکانچی دئییر: آغا دببه وارینیزدی؟ قولو: «دده‌م دببه‌نی نئیلیرسن؟ من آیرانی بؤرکومده ائله آپارارام بیر دامجی‌دا یئره تؤکولمز» دئدی!!

کیشی آیرانی موشامبایا تؤکنده اوره‌گینده «اینشالاه تؤکولر اوست–باشییان، اوندا بللی اولار نه جور آپارارسان؟» دئییب، آیرانی قولویا وئردی!

قولو گونده‌کی کیمین یولو اوستونده اولان دکه‌دن بیلگی(معلومات) ییغماغا گئدر! آیرانی‌دا اوینادا–اوینادا بو الیندن او بیری الینه وئره–وئره دکه‌چینین یئره سردیگی نشریه‌لرین باشی اوستونده دورار.

ائله بیل بوگون فرقلی گوندور و بیر آز چوخ بیلگی دالیسیجادیر و درگیلری و گونده‌لیکلری واراقلاییردی، اورادان قاچان بیر اوغلان اوشاغینین اویونجاغی(اسباب بازیسی) آیرانین موشامباسینا ایلیشیب، اونو ییرتار. قولو اوغلانا دؤنوب باخاندا، آیران نشریه‌لرین چوخونون اوستونه سپیلیب ایسلادار. دکه‌چینین هارایی گؤیه گئدر و اوغلان اوشاغی دا آرادان یوخ اولار!

ایندی قولونون یاخاسی اوجا بویلو و قوللو–بویونلو دکه‌چینین الینده قالیب، گؤزلوگوده یئره دوشوب، آیاقلاری آلتیندا ازیلر!

دکه‌چی هاوار چکیب دئیه‌ر:‌ آخماق کیشی! سنین ۵۰۰ تومنین یوخدو گونده‌لیگی آلیب ائوه آپاریب، آرخایینچیلیقلا اوخویاسان؟! قورخوسوندان ال–آیاغی تیتره‌ین قولو: «آغا، گوناه او قاچان اوغلاندایدی، منی باغیشلا، هامیسینین پولون وئره‌جگم» دئدی!!

دکه‌چی قولونو دکه‌نین ایچینه سالیب، آیرانلی نشریه‌لری آییریب، قیمتلرین چیخاردیب، قولونو ائشیگه چکیب: « آخماق کیشی ۱۰ مین تومن ائله‌دی، تئز پولو وئر و یوخ اول!!» دئدی.

چوخ بیلمیش قولو! هر جیبدن بیر آز چیخاردیب جریمه‌نی وئرر و دکه‌چی: « ایندی جانین راحات اولدو؟ جریمه وئردیگین نشریه‌لر سنیندیر، گؤتور آپار ائوده اوخو!» دئییب، ایشینه گئتدی.

قولو دا توبه ائدیب اللری، آیاقلاریندان اوزون یولا دوشدو، یولدا گئده–گئده، اؤز–اؤزونه : «اوجور اولار ها، ۴۰۰–۵۰۰ تومنی هر گون وئریب، گونده‌لیگی آلیب ائوه آپاریب راحاتجا اوخوسایدین، بیر یئره ییغیشیب ۱۰ مین تومن اولمازدی» دئییردی!!

دئییرم نه اولار دکه‌لر قاباغیندا صف چکیب نشریه‌لره فقط باخانلارین!! هامیسینین الینده آیران اولایدی!!

————————————————————-

آچیقلاما:

مؤللیفین یازدیغینا اساسا، بو حیکایه، ۱۳۹۱جی ایلین یاز فصیلینده، “نسلی از آفتاب” فستیوالیندا، طنز حیکایه بؤلومونده بیرینجی حیکایه سئچیلیب دیر. بو فئستیوال، ۶ اوستانین آراسیندا شمال-غرب ده دؤرد ایلدیر، قورولور.

چاپ

4 پاسخ

  1. ایندی ماشاللاه چوخ بیلمیش قولویا تای چوخ بیلمیش آدام چوخ چوخدور
    اللرییز آغریماسین تورکجه یازانلاریمیز

  2. گؤلؤش غنچالارین اؤزؤمؤرده اکدین اؤزون گؤلسؤن بی.

    بو حیکاینی یاراتماغینیزا گؤره آیریجا تشکؤز ائدیرم.

  3. سلاملار
    یاشاسین بیزیم استعدادلی گنجلریمیز….حسین بگ واحدیه تشکرلر….. یازسین…یاراتسین..اورمونو اوجالتسین…..چوخ ساغ اولون…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

چوخ بیلمیش قولو

حسین واحدی
www.ishiq.net

آذربایجان ادبیات و اینجه‌صنعت سایتی

چوخ بیلمیش قولو

حسین واحدی
www.ishiq.net

آذربایجان ادبیات و اینجه‌صنعت سایتی

چوخ بیلمیش قولو

حسین واحدی
www.ishiq.net

آذربایجان ادبیات و اینجه‌صنعت سایتی