چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی

اردیبهشت آیی‌نین سون گونلری ایدی. آلتینجی صینیفده درس اوخویوردوم. سحر ائودن چیخاندا هاوا قاش- قاباغین ساللامیشدی. شیرین –شیرین یاغیش یاغیردی. کلاسدا علوم معللیمی آغا صدری سینوس بولودلاریندان دانیشیردی. من جیم- جیلاق سو اولموشدوم. یئریمده هی ویرنیخیردیم. بیردن آغا صدری سسلندی:
– ستارزاده نه قوردالانیرسان؟! گل قاباغا گوروم!
یئریمدن قالخدیم. هله ایکی قدم گؤتورمه‌میشدیم باشماقلاریم باشلادی لارچ -لورچ، لارچ- لورچ. کلاس اهلی پیققیلدادی. آغا صدری گؤزلرین آیاقلاریمدان گؤتورموردو. باشماقلاریم دا نه اوتانیردی، نه خجالت چکیردیلر. لارچ -لورچ، لارچ- لورچ. هله لوحه‌نین قاباغینا یئتیشمه‌میشدیم معللیم دئدی:
– سیز الله باخین بونون قیافه‌سینه! گئده ائله بیل آرانقوتان میمونودو! ایاقلاری اوشاق قبرینه اوخشاییر. بو شیرتا- شیرت‌دا توپ باشماغی گئیب گلیب مدرسه‌یه. نییه بوجور ایسلانیبسان؟ نوودان آلتیندا دورموشدون؟
دئدیم:
– آغا باغیشلایین! بو سینوس بولادلارینین تقصیری‌دی.
بیردن آغا صدری قیشقیردی:
– کس سسینی دارقاشاییردین بیری دارقاشاییرد! هله بولبول‌زبانلیق دا ائله‌ییر. گئت ائشییه گؤروم!
سالوندا باش منیم باش مدرسه‌میزین مودورونون:
– هن، ستارزاده هارا ؟
دئدیم:
– آغا، یاغیش ایسلادیب. آغا صدری دئدی سویوقدی گئت آغا علی‌پوردان ایجازه آل، پالتارلارینی عوض ائله، گل!
آغا علی پور بیرآشاغادان یوخاری باخدی منیم قییافه‌مه، دئدی:
– قاچا – قاجا تئز گئت، تئز قاییت! کوچه‌لرده سولنمه ها!
گؤز قیرپیمیندا مدرسه‌دن سوزدوم ائشییه. بولودلارین ائله بیل دده‌سی اؤلموشدو. گؤی کیشنه‌دیکجه اولاردا زیر – زیر آغلاییردیلار. کوچه- باجادا هئچ بیر کیمسه یوخ‌ایدی. اوزاقدان چئری چپنداز بیر کامیون گلیردی. نامرد اوغلو ائله تنظیم ائله‌میشدی کی ائله منی ایسلادسین. یاغیش بس دئییلدی باشدان آیاغا پالچیغادا بلندیم.
قانووون سویو دا بیر قیرمیزی پلاستیک توپو فیرلانادیرا – فیرلانادیرا گتیریردی. فوری توپو سودان توتدوم. شوتلییه – شوتلییه ائوه طرف گئدیردیم. ساغ باشماغیم شرتا تایی اولموشدو. آلتی جیریلمیشدی. تئز – تئز آیاغیمدان چیخیردی. توپو گؤتوردوم؛ الیمده قشنگ میزان ائله‌دیم؛ ایستیردیم محکم هوائی بیر شوت وورام؛ توپوم ائلیکتیریکا تئللریندن اوجایا گئتسین. توپو بیر آز آتدیم اوسته؛ نه گوجوم وار توپا بیر شوت ووردوم. توپ‌دان قاباق باشماغیم آیاغیمدان چیخدی. مارال فوتوگرافییاسی‌نین یئکه جامین آشاغایا گتیردی.
تو دابانا، نه گوجوم واردی ائوه طرف قاچدیم. کوچه قاپیسی آچیق‌ایدی. اؤزومو فوری قاپینین دالینا سالدیم. قاپینی اؤرتدوم. قاپینین دالین سالدیم. قلبیم گوپ –گوپ دؤیونوردو. آز قالیردی یئریندن چیخسین. ننم پنجره‌دن باخیردی. فوری اؤزون حیطه یئتیردی. منی گؤرن کیمی یئرینده قوپ- قوری قورودو. دریندن قیافه‌مه باخاندان سونرا دئدی:
– به سن مدرسییه گئتمه‌میشدین؟ کیم سنی بو گونه سالیب؟ کیمله ساواشمیسان، هن؟ تئز اول دئ گؤروم! نییه به لال اولوبسان؟ اولمایا ایته‌لیبلر دوشوبسن قانووا؟ آی سنی یئتیم قالاسان! دور حیطده سویون آلتیندا گؤروم.
دئیینه- دئیینه قاییتدی ائودن بیر چایدان ایستی سو، بیرده حامامین تاسیلا لیفه کیسه‌سین گتیردی. منی چیمدیکلییه – چیمدیکلییه شیرین قاباغیندا سویوق سویون آلتیندا سکی‌نین اوستونده سویوندورودو. جیبیمده بیر آز لواشک قالیردی؛ اونو گؤرمک همان لاپ دلی اولدو. بیر ایکی بامباچادا یئندیردی باشیما، دئدی:
– سنه دئمه‌میشم بو آت- آشغاللاری یئمه، بولار میکروبدولار، ناخوشلارسان؟ آچ آغزینی، دیلینی چیخارت ائشییه، تئز اول گؤرم.
دیلیمی چیخارتدیم ائشییه؛ یاپیشدی دیلیمین اوجوندان موحکم چکدی. حامام کیسه‌سی ایله دوشدو دیلیمین جانینا. تئز – تئز دیلیمی کیسه‌له‌ییردی. آغزیما سو دولدوروب دئییردی:
– قور- قور ائله قوی میکروبلاری اؤلسون.
یازیق آز قالیردی آغلاسین. دئییردی:
– الله به من نه داش سالیم باشیما؟! بو ایاقلاری بیر هفته ده سورتسن تمیزلنمزلر.
هردن ده بیر شاپبا چالیردی یانبیزیما، دئییردی:
– قوی دده‌ن گلسین، گئجه سنینکین سنه وئرر. یازیق دده‌وین سحردن آخشاماجا ایشلمکدن جانی چیخیر؛ بئش ایلدی اؤزونه بیر جوت باشماق آلا بیله‌مه‌ییب. او واخت سن ده توپ میدانلاریندا گونده بیر جوت باشماق ییرتیرسان. باخ شالوارین دیزلرینه! هله بیر هفته دئییل با آلاندان.
قاپی دؤیولدو. ننم چادیراسین سالدی باشینا، اوزون توتدو. لیفه‌نی وئردی منیم الیمه، دئدی:
– بوردان دبریلمیه‌جکسن! دیلینی لیف‌له، گلیرم.
قاپی‌نین آرخاسیندا مارال فوتوگرافچیسی الینده بیر تای جیریق باشماق، بیر قیرمیزی پیلاستک توپ دایانمیشدی…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سینوس بولودلاری

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

سینوس بولودلاری

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

سینوس بولودلاری

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی