چئویرن: بؤیوک‌آغا افندی
ترجمه: بؤیوک‌آغا افندی
بؤیوک‌آغا افندی

بیلمیرم بیزیم دیلی شیشمیش آروادین هاردا آغزیندان قاچمیشدی:
– بیزیم دولت‌دن بئش آلتی تومن آلاجاغیمیز وار، چوخدان‌دیر آلابیل‌میریخ.
آنام دئییردی:
– آللاه دولتین تیفاغین داغیتسین؛ من ائشیدن‌نن گؤزومو یوممامیشام. ایشی گره‌گ دوزلدن اؤزو دوزت‌سین. دونن گئجه ناماز اوسته آغلامیشام، آللاها یالوارمیشام، دئمیشم اینشاللاه سنین ایشین دوزلسین من اون ایله‌جن هر ایل رغئییب‌دن رغئییبه محله اهلینه نذیر آشی وئریم.
آنامی اؤپودوم. آشین بوتون خرجین بوینوما آلدیم. بیر اوندا گؤردوم باجیم گؤزلرین سولاندیردی، دئدی:
– من ایسته‌میردیم دییه‌م. دونن یوخودا منه آگاه اولوب بیز گره‌ک بالا مئیدانین مچیدینده سکگیز ایل، ایلده اون گون موشگول‌گوشا مرثیه‌سی اوخوتدوراق، یوخسا سن او پولا چاتمیاجاقسان.
باجیمی‌دا اؤپوب دئدیم:
– من اؤلمه‌میشم کی نییه آغلاییرسان؟ سن اوخوتدور، بوتون خرجی منیم آیاغیما.
یاواش-یاواش خالامدان توتدو بالدیزا، هابئله قونشولاریمیزین دا نذیرلرین قبول ائله‌دیم. ییرمی اوتوز قوربانلیق، مکه مدینه زیارتی، اوچ دؤرد مچیده فرش، ۴۰ امامزادایا آیاخ‌ یالین گئدیب شام یاندیرماق، گئچی دره‌سینده آغلایان توت آغاجینا دسمال باغلاماق، قوربانی اولدوغوم ایمام آیاخ‌لارینا ساختمان تیکمکدن توتدو هابئله. گونو گوندن‌ده اومودوم چوخالیردی هر تازا نذیرده دئییردیم دای بو نذیرنن حتماً بو هفته، یا بو آیین باشیناجا او پولو آلارام.
بیر گون سحر تازا یوخودان دورموشدوم تلفونوم سسلندی. تلفونو آچدیم، او طرفدن سس گلدی:
– مستر مئشه رسول؟
لاپ دوزو بیر آز ال- آیاغیمی ایتیردیم؛ هاندان هانا دئدیم:
– بلی، اؤزومم، بویورون!
طرف دئدی:
– من اینگیلیستانین سفیری‌یم. تهراندا بیلیریق سیزین حقوقی بشری دموکراسینانی آیاخ‌لیان دولتینیزدن نه قدر طلبینیز وار و ایندیجه‌ده سیزین حاقینیزی وئرمیب. بیز حاضیریق اینسان حاخ‌لاریندان مودافعه ائتمک اوچون، سیزه کومک‌لیخ ائلیاق اؤز حاقینیزا چاتاسیز. ایمکانی اولسا بیزه مینت قویون، لوطف ائله‌یین بیزیم سفارتیمیزه باش وورون و بو باره‌ده هئچ کیمینن دانیشمایین. قودبای میستر مئشه رسول.
تلفن قطع اولدو. آرواد سوروشدو:
– کیمیدی زنگ ووران؟
بیردن بیره قولتوقلاریمین آلتی شیشدی، اوزوم پورسوخلاندی. دئدیم:
– هئچ کیم بابا، اینگیلیستانین رییس جمهوریسی‌نین ایشی واریدی.
اوچ دؤرد گونودو آدیم‌دا یادیمدان چیخمیشدی. سحردن آخشاماجا بو ایداره‌دن او ایداره‌یه قاچیردیم. هر هارا گئدیردیم باغلی بیر قاپی‌یا راست گلیردیم. تاکسی‌دا اوتورموشدوم، یئره گؤیه آغزیمدان چیخانی دئییردیم .تلفونوم اوچ دؤرد دفعه زنگ چالدی. جواب وئرمه‌دیم. حؤصله‌م یوخودو دده‌م‌له‌ده دانیشام، هله قالا تلفونونان. شوفر دئدی:
– آغا سن ‌آللاه او تلفونا جواب وئر. باش بئینیمیزی قازدی، به‌یه بیرینین واجیب ایشی وار.
ائله تلفونی آچان کیمی، سس گلدی:
– آقای رسول؟
– بلی!
– پرزیدنت اوباما سیزینن دانیشیر!
دیل دوداغیم قورودو. آغزیمدا بیر میثقال توپورجک قالمادی. دیلیم توتار توتماز دئدیم:
– بویورون پرزیدنت اوباما.
بویوردو:
– مئشه رسول! من ائشیتدیم کی سنین حاقیندا نئجه ظولم اولوب. ناراحاتلیقدان گئجه سحره‌جن کاخ سیفیدی مین دؤره وورموشام. سنین حاقیندا بئله حاقسیزلیق منی ائله ناراحات ائله‌دی کی ائله گئجه‌ینن امریکانین آلتینجی ناوگانینا دئمیشم سن‌نن حیمایت ائله‌مک اوچون خلیجی فارسا گلسینلر. باخ او ناوگان سنین ایختیاریندادیر. بودا منیم شخصی نومرم‌دیر. هر واخت ایشین اولدو منه زنگ ائله! من اؤلوم، سنی بالالاریوین جانی اوتانما ها!
ائوه یئتیشمیشدیم قاپینین قاباغیندا بیر قارا لیموزین بنز ساخلامیشدی. بیر ایکی نفرده موتورونان دربندین باشیندا شوش دوروموشدولار. اؤز اؤزومه دئدیم: گؤره‌سن دای بو کیمدی گلیب قاپی‌دا اعلام حمایت ائله‌سین. ماشیندان یئنمک همن، بیر نفر بنزدن آشاغا دوشدو. بویوردو:
– مئشه رسول سنسن؟
ائله بعلی! دئمه‌ییمی بیلدیم. ایندی دؤرد آی‌دیر به جرم «تشویش اذهان عمومی»، «توهین به مقدسات» و «همکاری با عوامل بیگانه» زینداندایام. گئنه‌ده ایش تازادان باشلانیب. آرواد اوشاق ائشیکدن، من ده ایچریده هر گون نذیر دئییریک، پول جهننم هئچ اولماسا من وثیقه‌یله زینداندان چیخام.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

نذیر

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

نذیر

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی

نذیر

بؤیوک‌آغا افندی
www.ishiq.net

آذربایجان ادبیات و اینجه‌صنعت سایتی