۶۱- بیری وار اوره‌ییمه آفتافا گؤتوروب
گؤره‌سن گئجه یاریسی بو اولایان یئل پاییز یارپاقلارینی یئردن قوپاردیب هارا آپارماق ایسته‌ییر؟!!
من سیگاریمین توستوسونده دالغالانیرام، دالغالاندیقجا کوله چئوریلیرم، کول اولورام کول باشیما.
گؤره‌سن بو گؤز یاشلاریما قاریشان بو سیگارین توستوسو گؤزلریمه دولوب، گؤزلریمی گؤینتمکدن نه نیتی وار؟!!
من گؤینه‌ییرم، یالنیز اؤلومه دوشوندویومده، اؤلدورمه‌یه دوشونورم.
بیری وار اوره ییمه آفتافا گؤتوروب، گؤره‌سن گئجه یاریسی هانسی «لجن کئش» اویاق اولا بیلرمی؟!!
یوخ اویاق اولماز، گئجه یاریسی توالئت اولورام، دولورام، اییله‌نیرم.
۶۲- دوشوندورمک
هر زامان بیرینی زورلا دوشوندورمه‌یه چالیشاندا، بونا هئچ دوشونمه‌میشم کی من نه قدر دیکتاتور اولا بیله‌رم. سونرا بونا دوشونموشم کی دوشوندورمک اوچون دوشونمک لازیمدیر.
۶۳- حسین و من
حسین و من اوتورموشوق، بیر ـ بیریمیزی سایاقلاییریق. یوخ، من سایاقلاییرام؛ حسینین عاغلی باشیندادیر، منیم عاغلیم باشیمدا دئییل؛ منیم عاغلیم باشیمدان چیخیب؛ حسین عاغلیمی باشیما قایتارماق ایسته‌ییر؛ عاغلیم باشیما قاییتماق ایسته‌میر. عاغلیم حسینه دئییرکی من گئدیرم باشقا یئرلرده سومسونم، مندن ال چک قاداسی!، قوی ایشیمده اولوم! حسین غضبله‌نیر؛ عاغلیما دئییرکی الیم ده‌یمه‌میش قاییت یئرینه، یوخسا منیم ده عاغلیم باشیمدان چیخار، سنی قاباغینا قاتار. هه دوغرودور، عاغیل عاغیلدان اوستون اولار. حسینین عاغلی منیم عاغلیمدان اوستوندور.
۶۴- امین دئمیشکن
بو گئجه باشقا بیر گئجه؛ گئجه اولدوغونا هئچ بیر سؤز یوخدور. سؤز اوندادیر کی سیز ائله بیلیرسینیز کی گئجه دئییل. واللاه گئجه دیر؛ حضرتاباس حاققی گئجه دیر. نییه آخی اینانمیرسیز بو گئجه، دوغوردان گئجه‌دیر. بو گئجه‌نین گئجه‌لیینه هئچ بیر سؤز یوخدور؛ سؤز اوندادیر کی سیز گئجه ایله بئچه‌نی چاشباش سالیبسیز. گئجه بئچه دؤیوشدورمک اولماز؛ بونو نییه باشا دوشمورسوز، ائله هئی خوروزلانیب بئچه‌نیزی دؤیوشدورمک ایسته‌ییرسیز. آند اولسون قاریشقالاریمین قارا جانینا دوز دئییرم؛ یالان دئیه‌نی قیر قازاناندا قایناتسینلار، اینانمایانلارین دا گؤزلرینه قاریشقانین یومورتاسی دوشسون.
۶۵- شعر قازانی
من ایندی‌یه کیمی بو سیرری هئچ کیمه دئمه‌میشدیم، آنجاق ایندی دئییرم: منیم بیر شعر قازانیم وار، کلمه‌لری تؤکورم اونا، بیشندن سونرا گؤتورورم چکیرم اوخوجولاریمین قاباغینا. یوخسا من هارا شعر هارا، هئچ بیلمیرم شعر نه‌دیر، نه یاخشی کی شعر قازانیم وار.
۶۶- سیم
گئجه یاریسی آدامین سیملری قاریشاندا، هر نه دن چوخ گؤزونه گؤرونن سیم اولور. ماراقلی‌دیر، ائله بو سیملر اولماسا، یئنه آدامین سیملری قاریشار. ائله بوردادیر کی آدام اودلا سویون آراسیندا قالیر، نه اویانا گئده بیلیر نه بویانا.
۶۷- اده حامبال!
بیری منه شیللاق آتیر؛ ائله فیکر ائله‌ییر کی دوه‌دیر. او دوغوردان دوه‌دیر. من قاریشقایام؛ دوه‌لر منه شیللاق آتاندا ساققیز چئینه‌یه‌رم. دوه‌لرین شیللاغی بوشا چیخاندا، ساققیزیمی چئینه‌یرکن اللریمی قولتوغوما ووروب، گولومسه‌یه‌رم. دوه‌نین قیچینین آراسیندان کئچیب، دال قیچیندان چیخارام. نه قدر شیللاق آتسا دا، قیر- ساققیز اولوب، دوشمه‌رم جانیندان. دئیه‌رم اده میر زوپبا چویوما! نه قدر چویوسان سنه پیس اولاجاق؛ تر تؤکوب قارا نفس اولاجاقسان.
دوه‌لر بیر آز اؤزلرینی اله آلمالی‌دیرلار. ایندی دای شیللاق آتماق جاواب وئرمیر، بیر آز مدنی اولماق لازیمدیر. هئچ اولماسا بیلیارد اویناماغی باجارمالی‌دیرلار. من قاریشقایام؛ من نه قدر قوجا اولسام ده‌یه‌رم مین جاوانا؛ بونون نه ربطی وارییدی اوسته کی سؤزلره؟!!
ـ قیزین ایکی آداخلیسی واردی!
ـ قوچاق سن اوردا نه ائدیرسن!
ـ قوچاق بس سن اوردا نه ائدیرسن!
ـ من قیزین آداخلیسی‌یام!
ـ من ده قیزین آداخلیسی‌یام!
ـ کس سسینی آخماغین بیری آخماق! اده حامبال!
ـ مشهدی بیر عابباس وئره‌جکسن بئلیمی شیکست ائله‌دین!
باغیشلایین! من بیلمه‌دیم مشهدی عیبادین فیلمینده کی کاراکتئرلر بوردا نه سومسونورلر؟!! هر حالدا گئجه‌نین بو واختی دوه لرین اوجباتیندان بئله اولور.
۶۸- سئوگی یا نیفرت
بیری وار هم اؤزونو سئویر هم ده اؤزونه نیفرت ائدیر. من نه اؤزومو سئویرم نه ده اؤزومه نیفرت ائله ییرم، ساده جه ائله ـ بئله خوش اولوب داوام ائدیرم. منجه نه سئوین نه نیفرت ائدین ساده جه سیز ده خوش اولون. دونیا بئش گون او دا خوش گون.
۶۹- منی قوران وار
سیز ائله بیلمه‌یین کی من اؤز باشیما یازیرام، بارماقلاریم اؤز الیمده دئییل، کئیبورتداکی حرفلر بارماقلاریمی قوروب یئنه ده سالیبلار مئیدانا. مئیداندا بیر آت وار، بارماقلاریم او آتی مینیب مئیدان اوخوماق ایسته‌ییر.
بیری باشینی ایچیندن چیخاردیب، بارماقلاریمی یامانلاسین، بارماقلاریم اؤز الیمه ایش وئره‌جک.
بیری مئیدانین او تاییندان دابانینی باشماقلاریندان چیخاردیب، عاغلینی منه گؤستریر. حئییف کی منیم عاغلیم یوخدور، یوخسا اونا گؤسترردیم کی عاغیل گؤسترمک نئجه اولار.
بیری مئیدانین او بیری تاییندان آغزینی قارنیندان چیخاردیب منه ـ کس سسینی آخماغین بیری آخماق! ـ دئییر.
من سسیمی کسیرم آتیرام قاباغینا؛ سسیمی گؤتوروب آتیر باشیما. سسیم باشیما دوشور یئنه‌ده.
۷۰- اینکار
• من سنی اینکار ائدیب، سنین یئرینه کئچمک ایسته‌ییرم. اینکار ائدیب کئچیرم ده، آنجاق بیر شئی وار، اینکارین تثبیتی اوچون گرک ایکی ساریلی قاریشقا یومورتاسینی یاغا چالیب یئمه‌لی‌یم.
• باشقالارینی اینکار ائتمک بیزی اینجیتمیر، بیز ساده‌جه بونا گؤره اینجییریک کی اؤزوموزو اینکار ائده بیلمیریک. بونا هئچ بیر چاره یوخدور. نه واختسا چاره‌سی تاپیلسا بیز چوخ راحات اولا بیله‌ریک.
