ramin
آزدان آز، چوخ‌دان چوخ(۴)
رامین جهانگیرزاده

۱۶- آدام ائله آداما اوخشایار
هردن اؤز اؤزومه دوشونورم کی، نییه آداملار بو قدر بیر ـ بیرینه اوخشاییر؟!! دوغروسو آدام آداما اوخشاماسایدی ایندی یئر اوزنده آدامدان یئر اولمازدی. آللاه بو یئر کوره‌سینین اوزونه باخیب، یوخسا بو قدر آدامی‌اؤزونده ساخلایا بیلمزدی، اؤز باشینا فیرلانماق یئرینه والای وئریب بو سود یولوندان دا چیخاردی، سونرا ایتیب باتاردی، ایندی گل کئچینی کؤرپودن کئچیرت. ایندی گل یئر کوره‌سینی آختار تاپ. یوخ ائله نه یاخشی کی آداملارین‌هامیسی بیر ـ بیرینه اوخشاییر.

۱۷- آزادلیق و لذت
آخی نه اوچون زور وئریم، مجمئیی جیرمایاجام کی، ایسته ییرم راحات اولام، آغزیما گله‌نی یازام، ایسته‌میرم گوج وئرم ایچیمدن بیر شئی چیخا سونوندا پئشمان اولام. ساده‌جه یازیرام و هئچ کیمین‌ده دوشوندویو منه اؤنملی دئییل. راحاتام، اؤزومو بئله آزاد حیس ائدیرم. کیمینسه خوشو گلدی یا گلمه‌دی اوچون یازمیرام، ساده‌جه بارماقلاریمدان لذت آلیرام. یالنیز لذت…

۱۸- جناب آللاه!
ماراقلی‌دیر هردن آللاهین ایشلرینه مات قالیرام، دئییرم نییه بو قدر اؤزونه زحمت وئریب بیزی یارادیبدیر؟!! بلکه آللاه دا ائله بیلیرکی ایشله‌مه‌سه دیشله‌یه بیلمز!!!
هر حالدا اللرین آغریماسین جناب آللاه! زحمت چکیبسیز! زحمتینیزه راضی دئییلدیک، زحمت حاققینیزی دا وئره بیلمه‌سک باغیشلایین جناب آللاه، بیز بو اؤز باشینا و باشقا شئی‌لرین باشینا فیرلانان یئر کوره‌سینده هله ده وار اؤزوموزو تاپا بیلمه‌میشیک.
آنجاق اؤز آرامیزدیر هردن ـ بیردن اؤزونه ایستیراحت وئرسن یاخشی اولار، هم سن دینجه‌لرسن هم ده بیز. آللاه سیزین کؤمه‌یینیز اولسون جناب آللاه!

۱۹- پولخانوف
بیز بونو اؤزوموزه ایناندیرمامالییق کی ساعاتین عقربه‌لرینی قاباغا چکمکله زامانی قاباغا چکه بیله‌ریک. «پولخانوف»
بو گئجه پولخانوفو اوخویورام؛ بعضن بعضی شئی‌لری اوخوماغا مجبورام، بو وحشیجه‌سینه اوخوماقدا بیلمیرم نه اله گتیره‌جم! هئچ اؤزومده اؤزومدن باش آچا بیلمیرم. آنجاق اوخوماقدان لذت آلماق ان بؤیوک لذتدیر.

۲۰- ساریماق
هه واللاه من ده اؤزومو ساریمیشام، دوز فیکیرلشیرسن، چالیشیرام سنی ده سارییام، قوی من اؤزومو ساریماقدان جانیمی‌قورتاریم سنی ده سارییاجام. قورخما ساریماغا هر نه دئسن وار منده.