– هه، تعریفله‌ییردین!
– سونوندا خالا قیزیم اره گئتدی.
– یوخ بابا. کیمه گئتدی؟
– جانیم سنه دئسین. بیلیرسن منیم خالاقیزیم، محلله‌نین آی پارچاسیدی. گؤزللیگینین حددی حئسابی یوخدو.
– دئمه یینه گرک یوخ بابام،  بونو محلله‌ده هر کس بیلیر. او قیز سانکی یئر اوزونده بیر ملک‌دی.
– هله، یازیق خالامین اَری باققال آغا قولی، بورون پوخو ایله، بانک دان بورج آلماقلا و خالام دا قیزیللارینی ساتماقلا، اونو بیر تهر، زورلا دانیشگاه دا درس اوخوتدولار. قیز درس اوخوماق ایسته میردی کی. گؤزللیگینه گؤره، گله‌جه‌یینین خوشبخت اولماسیندان آرخایین ایدی. کئفینه باخیردی. شعر اوخویوردو. گزیب دولانیردی.
– منجه ده قیز حاقلی ایدی. بو زامانه ده او خوشبخت اولمایاجاق بس منمی اولاجاغام؟
– خولاصه، درس اوخورکن ده، ائلچی لر دال به دال خالامین ائوینه گیریب چیخیردی. آمما خالا قیزیمین بیر یاندان، گؤزو بیر طیب طلبه‌سی اوغلاندا قالمیشدی. اوغلانین بیر ایلی قالیردی درسین قورتاریب دؤکتور اولسون. بیر یاندان دا، میدانداکی ماشین ساتان ایسکندر وار ها، اونون اوغلو جلیل ده.
– هه، قارنی یوغون ایسکندری دئییرسن دا، گئچن ایل ده خانیمیسی اؤلدو. تازالیقدا دا بیسکیویت کرخاناسی آچیبدی، آدام بتر وار دؤولتلی‌دی.
– هله، حاج ایسکندرین اوغلو جلیل، بیلمیرم خبرین وار یا یوخ، شهریمیزین چوخ مشهور شاعیریدی. کیتابلاری هر یئرده ساتیلیر. آمما درسینی کی قورتادی، دده‌سی ایله ایشله مک، ایسته‌مه‌دی. اونا گؤره ده حاج ایسکندر بیر تپیک گؤ…نون اوستوندن ووروب ائودن ائشییه سالدی. ایندی ده یازیق جلیل، تاکسی ایشله دیر، شعر یازیر.
– هله ده گؤرک خالا قیزین نه ائتدی بو آرادا؟
– خالا قیزیم بیر طرفدن، دؤکتوره اره گئتمک ایستیردی، بیر طرفدن ده شعردن و شاعیرلردن ده خوشو گلیردی.
– یازیق قیز، بس سونوندا کیمه گئتدی. طیب طلبه‌سینه‌می، یوخسا حاج ایسکندرین اوغلو شاعیر جلیله؟
– یوخ جانیم، قارنی یوغون حاج ایسکندرین ائله اؤزونه اره گئتدی.