akbar rezai_2
بال بیبر، آجی بیبر
اکبر رضایی مولان

هامینیز بیلدیگینیز کیمی‌شهرلرده بازاردا دؤشه‌مه ساتانلار‌هامی‌دان چوخدولار. اؤزوده کی اونلار همه‌شه اوجوز شئی‌لر ساتارلار و بعضی واختلار چوخ اینسانلار لازیم اولان شئی‌لرینی اونلاردان آلارلار. حتتا رحمتلیک آتام همه‌شه دئیردی کی آیاق اوسته آل وئر ائدنلردن لازیمی‌وسایلینیزی آلین کی یاشاییشلاری کئچسین، آل وئرلری یاتماسین.
آنجاق بیر گون یولوم بازاردان دوشدو و ائله او باشدان بو باشا گلینجه ساتیجی‌لارین موختلیف سسلرینی ائشیدیردیم:
جورابلار موفته‌دی‌هااااا
کیربیتلر قوتوسو مین تومن!!
ایستیکاننار نشکن دی‌ها!!
دفتر، خودکار، میداد، باربی، بن تن!!
روسری، روسری، بیرین آل ایکیسین آپار!!
کت پنیری تپ تَزه‌دی، کره یاغی، ساری یاغ، آیران!!
دؤردو مین تومن باطری‌لار، قلمی‌نیمه قلمی!!
صابین، لیف، روشور، کیسه، دابان داشی!!
کؤپئن کؤپئن، یانمیش کؤپئن‌لری ده آلیرام!!
سااااعت سااااعت، ادکلن همه رقم خارجی، بیا ببر عجله کن(ساعات ساتان کورد)
و …
هر سسی ائشیده‌ن کیمی‌اونا ساری دؤنوب و نه ساتدیغینی دا اؤیره‌نیردیم. اؤز- اؤزومه دئییردیم آی آلله کاش لازیم اولوردو منده بونلاردان آلیردیم.
آنجاق یولومو گئده- گئده گؤزوم بیر بیبر ساتانا دوشدو، باخیب گؤردوم کی، آریق، اوزون و گؤزه‌ل دولما بیبری ساتیر. جاماعاتین آراسیندان دارتینا- دارتینا، اونلارلا چیینله‌شه- چیینله‌شه و ساغا سولا دؤنه- دؤنه آنجاق اؤزومه یول آچیب گوجله بیبَر ساتانا یئتیشدیم.
بیری مندن قاباخ دوروب هئی سوروشور:
– بو نئچه دی؟
– او نئچه دی؟
– او بیریسینی کیلوو نئچه دی؟
– بونون پونزاسی نئچه دی؟…
منده بیبَر ساتانین حوصله‌سینه چوخ ماراقلانیردیم کی عجب بو کیشی‌نین حوصله‌سی وار…
باش آغریسی وئرمه‌ییم سیزه، بیر آز دوراندان سونرا نؤوبه منه یئتیشدی. دئدیم:
– منه ده بیرآز بیبَر وئره‌سن…!
کیشی باشلادی بیبری بیر نایلون کیسه‌یه ییغماغا، ائله بو حالدا من سوروشدوم کی:
– نه جوردی، بیبَرلرین دادی نئجه دی؟!!!
کیشی دئدی:
– سؤزو یوخدو بال کیمی‌دی.
دئدیم:
– آی کیشی نه بال کیمی!!! بیبَر کی بال اولماز. بیبَر گره‌ک آجی اولسون، بوشالت یئرینه من بیبَر آلیرام کی منی یاندیرسین، ایچیمی‌آلوولاتسین، بلکه بئینیمین گؤینرتیسیندن بیزآزدا اولموش اولسا منی آییرسین.
و دوزَلدیم یولا حرکت ائله‌دیم. یازیق کیشی ائله بیل یوخودان آییلدی. دئدی:
– آی آغا، آی قارداش، سن آللاه بیر دایان! سن بونلاردان بیرینی وور آغزینا.‌هامیسی زه‌هَر کیمی‌دی … آمما نئیله‌ییم بو جاماعاتا دئینده کی آجی دی هئچ بیرینیده آلمیرلار. واللاه‌هامیسی چوخ پیس آجی‌دی. گل نه قده‌ر سئوسن آپار. سن بیرینجی آدامسان کی دوزونو دئسم مندن آلاجاقسان، باشقالارینا دوزونو دئینده آلمیرلار… چاراسیزلیقدان یالان دانیشیرام کی بلکه آل- وئریم یاتماسین.
سؤزونو کسمه‌ییب دئدی:
– بو جاماعت نییه دوز سؤزدن آجیغی گلیر. بیلمیرم کاش آجی‌نین دا آجیسینا دؤزه‌ن و اونون آجیلیغینی سئوه‌نلر چوخ اولایدی…
9/5/86