آنام
دیلیمین اوستونه سپدی
کلمه – کلمه سؤزلر
شعر ، گؤیردی
ایندی
آغلار – گوله‌ین آغاجین غم عطیرلی گول‌لری
آیاغینا یاراشیر
عمران صلاحی
عمران صلاحی اؤلکه‌میز ایرانین دونیا شهرتلی شاعر و ساتیریکی و معاصر آذربایجان شعری‌نین گؤرکملی و دیرلی نماینده‌لریندن بیری‌ایدی. او دونیایا، انسانا، حیاتا یئنی باخیش‌لا باخدی، او یئنی دویوملارلا دویدو، دؤرونون، یوردونون باشینا گلن حادثه‌لری آچیق گؤزله، درین دوشونجه ایله قاورادی، یاشانتی‌لارینی، دویدوق‌لارینی بدیعی اثرلرده جانلاندیردی. آذربایجان و فارس دیللی ادبیاتا، یئنی سسلی، یئنی نفس‌لی اثرلر باغیشلادی. شعرمیز عمرانین بدیعی گوزگوسونه چئوریلدی. بیز او گوزگوده اؤزوموزو گورور و دویوروق. دونیانی یئنی بیر باخیش‌لا سیر ائدیریک، حیاتی یئنی‌دن معنالاندیریریق.
عمران صلاحی، طنزلرینده زمانه‌سی‌نین اوزونه گولدو، لیریک شعرلرینده، دؤرونون روحونو، جانینی ترنم ائتدی. او، گولوشو حیاتین اؤزوندن اؤیرندی و اونو، توفیق‌چی‌لرین اوسلوبوندا سیناقدان چیخارتدی و ملانصرالدین مکتب‌ینده یئتگین‌لشدیردی. بئله‌لیک‌له اؤزونون ساتیریک اوسلوبونو یاراتدی و بو ساحه‌نین اونودولماز سیمالاریندان اولدو. او ساتیرا حاقینداکی یازی‌لاری و آراشدیرمالاری‌لا دا بو ساحه اوه‌زرینده چالیشان‌لارین یولونا ایشیق ســــاچدی. بو چوخ یؤنلی فعالیت عمران صلاحی‌یه اؤلکه میقیاسیندا اوغور قازاندیردی و اونو ایران ادبیاتی‌نین گؤرکملی سیمالاری سیراسینا داخل ائتدی، دونیایا تانیتدیردی.
عمران نادر بیر شخصیته مالک صنعتکار‌ایدی. او لیریک شعرلرینه بنزه‌ییردی. آلچاق کؤنول‌لو، اینجه روحلو، بؤیوک قلب‌لی، شریف بیر انسان‌ایدی. داها دوغروسو او انسانلیغین جانلی آبده‌سی‌ایدی و بیر پارچا صفاایدی. ایچی‌نین دورولوغو، گونش‌لی گؤزلرینده پارلایاراق، محبتی‌نین ایشیغی آخیب اوره‌کلره جالانیردی. او شعرلرینده چیچکلنیر، گولوش‌لرینده گول‌لندی. وارلیغی گؤزه‌ل‌لیک‌لرین پارلاق جیلوه‌سی‌ایدی.
او صفاسی ایله، گولوش‌لری ایله ، اوره‌ک‌لردن غم – کدری سیلیب، قارانلیق‌لاری ایشیق‌لاندیریب، اؤلومو بئله، گؤرونمزلیک‌لره‌جن قووالایاردی. کؤنلونون گؤی قورشاغین چتیـــر کیمــی آچــاردی، کــی انسانلار طاغی‌نین آلتیندان کئچه – کئچه، اونون شعر، صنعتی‌نین ایشیغینا بلنه – بلنه، دورولوب و انسان اولماق‌لارینا گوونه بیلسین‌لر:
بولوتلار، یارپاق – یارپاق
اولدوزلار پاریلداییر
یارپاق‌لارین اوستونده
اوره‌کلر یارپاق – یارپاق
ایستکلر پاریلداییر
یارپاق‌لارین اوستونده
اولدوزلار ، بولوتلار، ایستکلر ، اورکلر
عمرانین شخصیتی بیللور کیمی پارلاق‌ایدی. اوزاقدان باخاندا، شخصیتی‌نین پاریلتی‌سینا غبطه‌ایله باخا – باخا شاشیب قالیردین، یاخین‌دان باخماق ایسته‌دیین زاماندا، بیللورونون قیراق بوجاغی‌نین چوخلوغوندان، اونون کیم‌لییینی سئزه بیلمیردین. او، یئنه‌ده سنین اوچون ال چاتماز، آچیلماز قالیردی. گؤره‌سن اؤزو، بو گؤزه‌ل‌لییینه واقف‌ایدی‌می؟بیلمیرم. اولسایدی بئله اوزه چیخارتمازدی. اونون داورانیشی، دویوم – دوشونجه‌سی، یازی‌لاریندا، شعرلرینده اولدوغوکیمی ایدی: مهربان، اوتانقاج و ادبلی. عمران چوخلاری‌ایلا دوستلاشمیش، بعضی‌لری‌ایله قایناییب قاریشمیش، کیمسه‌لر‌ایله ده باغیرداش اولموشدو. آنجاق هرحالدا او، اؤزوایدی. اوزو اوتانقاج‌لیغین، اینجه، یوموشاق ایپه‌یینین پاریلتی سی‌ایله بورونن زاماندا یا خود اوره‌ییندن پرهیز پرده‌سی آتیلان زامانلاردا، همان تواضع‌کار، پاک، شریف و سئوینج باغیشلایان انسان ایدی. اونون وارلیغی باهارکیمی ایدی. آمما اگر سن بیرآز آییق اولسایدین، کؤنول کؤنوله اونونلا یاشاسایدین، گؤرردین کی، هانسی‌سا بیر مزه‌لی احوالاتین، گولمه‌لی بیر سؤزون، بیر آتماجانین آردینجا، اوتانجاق‌لیغیندان، گولر‌گولمز، گولوش دوداقلاریندان قاچیب، گؤزلرینده اویناشاردی. او بو وضیعتدن یاخا قورتارماق اوچون ایچینده چالخالاناردی، بو دؤنه گولوش اونون اللری‌نین ایتی و تله‌سیک حرکت‌لرینده چیرپینا – چیرپینا سوساردی … بیر آندا سنه ائله گلردی کی نه ایسه اونون جانینی جایناقلاریندا سیخیر. کؤنلونون کدری جانی‌نین دیبینه یاتا – یاتا او دا یاواش یاواش دورولاردی. جانی‌نین ایشیغی اوزوندن سوزولرکن سیماسی ایشیق‌لاناردی. بیردن – بیره سن دویاردین کی بو سئوینجین درین‌لیینده نه بویدا کدر گیزلنیب:
کوچه‌لری دولانیر
قاپی‌لاری دؤیور
پیله‌لردن چیخیر
غم
بیر یئکه مجمعه ده
آی، منه پای گتیریر.
عمرانین شعری حیات کیمی‌دیر. ساده و چالیشقان انسانلارین حیاتی اونون شعرلرینین قایناغی‌دیر. اونون سئودییی و شعرلرینده تصویر و ترنم ائتدییی انسانلار، زمانه‌نین چتین‌لیک‌لرینه، آجی‌لیق‌لارینا دؤزورلر، آجی‌لارینا، غم‌لرینه، زارافاتلارین، لطیفه لرین شیرین‌لیین قاتیب یاشایا – یاشایا، دونیانی گؤزه‌ل‌لشدیریرلر. تاریخین باشلانغیجیندان گونوموزه قدر دونیانین مادی و معنوی ثروت‌لرینی یارادان انسانلار. شعر، صنعت، اونلارین وارلیغی‌ایله معنالانیر. اونلار بو اثرلری منیم‌سه‌ییب یاشادیرلار. هانسی صنعت اثری اولورسا اولسون، اگر بو اثر اینسانلارین آرزو و ایستکلرینی، رؤیالارینی، حسرت‌لرینی اؤزونده یاشاتمیرسا دئمک تاریخین توزاناغیندا ایتیب گئده‌جک. هئچ اولاجاق:
گمی لر
یئلکن‌لرین آچیرلار
فقیرلرین آه‌یندا
یا خود:
قوجا آروادلار
نفتی قورتارمیش چیراقلار کیمی
اوتوروبلار، پنجره قیراغیندا
ائله‌جه ده:
بولود گلیر
تولوق کیمی زهر تؤکور
چیچک بو باغدا قورخودان
سحر دوراندا، تر تؤکور
بو پارچادا:
یاشیل آغاجلار
بیر بیرین گورمه‌میش ده تانیرلار
آغاج‌لارین دیلی بیردیر
یام‌یاشیل‌دیر
خلقی‌لیک عمران صلاحی‌نین شعرلرینین باشلی‌جا سجیه‌لریندن‌دیر. بو شعرلر خالق حیاتیندان، خالق روحوندان مایالانیب، اینسان‌لیق ایشیغی ساریلان، جانینی خالق جانینا جالایان، دویغو و دوشونجه‌لرینی، خالقین آرزو و ایستکلری‌ایله یوغوران بیر شاعیرین یارادیجیلیق سوزگجیندن سوزولوبدور. بو شعرلر هئچ بیر ادبی تحلیله ، یوزمایا احتیاج اولمادان خالق کؤنلونه یول تاپا بیلیرلر. بو قوه‌دیر کی عمرانین ان محرم و خصوصی حس و هیجانلارینی ایفاده ائدن اثرلرینی ده عمومی‌لشدیریب، اوخوجولارینین دویغو و دوشونجه‌لرینه جالاییر.
عمرانین شعرلرینین «لیریک منی»، اوشاق تخیل‌لو، اوشاق دویغولو، یارادیجی بیر وارلیق‌دیر. اونون آیدین ، پارلاق ، تمیز ، مهربان قلبی، ایچ دونیاسینا یاد اولان عیبجرلیک‌لری ، پیس‌لیک‌لری گولوش‌له اریدیب یوخ ائتمه‌یه جان آتیر. او آجیغینی، نیفرتینی، داخیلی چیرپینتی، چاخناشمالارینی ایفاده ائدنده ده، کسکین، سرت ایفاده‌لردن دئییم طرزلریندن قاچینیر، بو آن اونون لحنینده، سؤزونده قیناق اوزه چیخیر.
او ان آجی، ان دؤزولمز آغیر غم‌لرینی، داخلی سارسینتی‌لارینی، سانجی‌لارینی ائله دییشدیریب، باشقالاشـــــدیریر و گولوشـــــه، زارافاتا، شیرینلییه چئویریردی کی سن مات قالیردین، عمرانین ان بؤیوک باجاریغی، گوجوده باخ بو ایدی.او آغلاییشدان گولوش توره‌ده بیلیردی:
غنچه، معطل قالیب دیر
باهار یئلی اونا دئییر:
گئج اولار ، بیر آز تلس
هاوا ائله آغیردیر کی
قوشلار اوچماق ایسته‌میر
آچیق قالسا دا قفس!
ایکی داغین دؤشوندن، ایکی قاینار بولاق، جوشوب چاغلار، بیر بیرینه قوووشار، آرخ اولار، چایلارا، دنیزلره دوغرو آخار، بو ایکی بولاغین قوووشاغیندان قایناق‌لانیر عمرانین شعری.
بو بولاق‌لارین بیری آذربایجان خالقی‌نین، خالق یاردیجی‌لیغی ایله چاغلایان، بایاتی‌لی، قوشمالی، نغمه‌لی سینه‌سی‌دیر، دیگری ایسه، فارس دیللی خالق‌لارین ترانه‌لر، مثل‌لر، دوبیتی‌لر، تصنیف‌لرله بزه‌نمیش سینه‌سی‌دیر. بو بولاق‌لارین جوهری، مایاسی عینی اولسادا، آنجاق بو جوهر بدیعی بیچیم‌ده تظاهر ائدنده، اونلارین بویالاری، معنا چالارلاری، لحنی، آهنگی، هر دیلین اؤزونه مخصوص سجیه‌لری ایله، ایفاده اولونور. هر دیلین اؤز گؤزه‌ل‌لییی ایله جیلوه‌لنیر. عمرانین فارسجا شعرلرینه، آذربایجان دیلینین موسیقی چالارلاری، ایفاده الوانلیغی، آناسی‌نین اوره‌ک دؤیونتولری‌ایله سس‌لشن آنا دیلینین ایشیغی دوشور. اونون فارسجا شعرلرینین دیلینی شیرین‌لشدیریر. آذربایجانجا شعرلرینده فارس دیلینین گؤزه‌ل‌لیک‌لری، فارس شعری‌نین بدیعی قورولوش یؤنلری، ایفاده طرزی، شعرلرینین بدیعی – ایسته‌تیک قورولوشوندا، بدیعی تصویر واسطه‌لرینین توخونوشوندا، ایفاده‌لری‌نین رنگارنگ‌لیینده، اؤز عکسینی تاپیر. بئله‌لیک‌له عمران فارس دیللی شعرلرینی باشقا فارس دیللی شاعرلرین اثرلریندن فرقلندیریر. ائله‌جه ده آذربایجانجا شعرلری عینی وضعیت‌ده‌دیر. بونلار هر ایکی دیلده اؤزونه مخصوص بیر بدیعی اوسلوبا مالک‌دیرلر. عمرانین یاردیجی‌لیغیندا ، ایکی مدنیت‌ین، ایکی دیلین بیر بیرینه قارشی‌لیقلی تاثیری گؤزه‌ل، دولغون عکسینی تاپا بیلمیشدیر:
بیر دسته گول
چیراق یانیر اوزاق‌لاردا
اولدوز یانیر اوزاق‌لاردا
هر اولدوزدا بیر سئوگی وار
هر سئوگی‌ده بیر دسته گول
هر گول‌ده بیر عطیر
هر عطیرده بیر کپنه‌ک
هر کپنه‌ک‌ده بیر شاعیر
یک دسته گل
در هر چراغ دوری
ستاره‌ای می‌سوزد
در هر ستاره‌ای عشقی
در هر عشقی گلی
در هر گلی عطری
در هر عطر پروانه‌ای
در هر پروانه شاعری
عمرانین شعرده ایلک معلمی، اونون «لیلا ننه»سی اولموشدور. او سؤزلو، کؤزلو سینه‌سین نوه‌سینه آچیب، اونو سیرلی سئحیرلی عالمه آپاریب، او عالمین آل الوان فضاسیندا گزدیریب اوره‌یینی مین بیر رنگه چالان، مین بیر نغمه قونداغینا بوکوب، روحونو قاینار سؤز چشمه‌سینده، یویوندوروب، دورولدوب، اونا ساده، صاف، صمیمی و آیدین بیر دیل، باغیشلاییب، عمران یارادیجی‌لیغی بویو بو عالمین فضاسیندان آیریلا بیلمه‌ییب.
سینه‌نده‌کی خاطره‌لر، بؤیوک باغدی
گؤزلریندن بولود کئچدی
یاغیش یاغدی
«لیلا ننه» گل بایاتی اوخو منه
بایاتی لارلا، بیر کؤینک توخو منه
ناغیل دئنه کئچمیش‌لردن
…
«لیلا ننه»
قوربان سنه
قویما یانام
آچ گؤزونو، من عمرانام!
عمران بو ساده، دورو، آخیجی دیلی تکجه آناسیندان، ننه‌سیندن دئییل، یورد یواسیندان قووولوب دیده‌رگین دوشموش، تهرانین حاشیه‌سینده مسکن سالان، وطن‌داش‌لاریندان دا اؤیرنمیشدیر. او بو یول‌لا، بو دیل واسطه‌سی‌ایله زنگین خالق یارادیجی‌لیغی‌ایله تانیش اولموش، اونلاری اؤیرنمیش، منیمسه‌میش و شعری‌نین آیریلماز بیر حیصه‌سینه چئویرمیشدی.
عمرانین شعری، یاشادیغی دؤرون اجتماعی سیاسی حادثه‌لریندن تأثیرلنمه‌سی ایله برابر اوشاق‌لیق دؤرونون، اوشاق‌لیق عالمی‌نین آب و هواسی‌ایله ده دولودور. عمران شاعرلیی‌نین ایلکین چاغلاریندان، فولکولوردان دورلو – دورلو فایدالانمیش‌دیر، ایلک اثرلرینده شفاهی خالق ادبیاتی‌نین ان ساده، اویناق و اوشاق دونیاسینا داها یاخین داها اویغون اولان نمونه‌لریندن، او جمله‌دن دوزگولردن چوخلو استفاده ائتمیشدیر:
یاشارام من، یاشارام
گونش کیمی ، یاشارام
گونش کیمی سحرلر
داغدان، باغدان آشارام
بو ماراقلی و گؤزه‌ل شعرلرله برابر، بایاتی‌لاریمیزدان، بایاتی‌لارین بدیعی عالمیندن، روحوندان، بو یارادیجیلیق نوعونون تؤرتدییی احوال – روحیه اوزرینده بیر چوخ شعرینی قوشموشدور:
میدان چیخیب‌دیر آیا
آی ائنیب‌دیر میدانا
توزلو آی ایشیغیندا
«آتین اویناتدی گئشدی.»
عمرانین شعرلرینده خالق ماهنی‌لاری‌نین ، بسته‌کار نغمه‌لری‌نین ده تاثیری آچیق – ساچیق گؤزه چارپیر. عمران ماهنی‌لاردان بیر یارادیجی کیمی بهره‌لنمیش‌دیر:
سن گلنده پنجره‌لر آچیلیر
یئل اویناییر پرده‌لرین تئلینده
«پنجره‌نین میل‌لری
آچیر قیزیل گول‌لری.»
بونلارین هامی‌سینا رغماً، عاشیق دونیاسی عمران اوچون باشقا بیر دونیادیر. منه ائله گلیرکی عمرانین شعرلرینده ان گؤزه‌ل سس‌لنن موتیولردن بیری ده عاشیق شعری، موسیقی‌سی‌دیر. عمرانین شعرلرینده سس‌لرین چوخ مهم رولو وار، اونون شعرلرینده سس‌لر، سانکی رسم‌ده‌کی رنگ‌لرین رولونو اویناییر. اونو سس ترپدیر. سس اونو گؤزه‌ل عالم‌لره چاغیریر، گؤزه‌ل‌لیک، شیرین‌لیک، آیدین‌لیق عالمینه چکیر. بو سس‌لرین چوخو عاشیق‌لارلا باغلی‌دیر. البته بو طبیعی بیر حال‌دیر. چونکی عاشیق دونیاسی آذربایجان خالقی‌نین زنگین و رنگین معنوی دونیاسی‌نین گوزگوسو دئمک‌دیر. عاشیق یاردایجی‌لیغیندا انسان گؤزه‌ل‌لییی ایله طبیعت گوزه‌ل‌لییی بیر بیرینه قوووشور. بیر بیرینی تامام‌لاییر بوسازلی – سؤزلو دونیادا اورکلرین ان درین قات‌لاریندا گیزلنن حس‌لر، دویغولار، چیچکلنیر، روحا قیدا وئریر، اونو اؤز عطرینه بورویور، اؤز رنگینه بله‌ییر:
محبت
عاشیق لارین سازیندا
چالینیردی
محبت نغمه‌سی شاعیری ، شعر دونیاسینا چکیر:
عاشیق‌ین سسی چؤلده یانیر
سسی اوجالیر، شعریم اویانیر
او اوره‌یینی بو سسین صدا لارینا آچیر:
عاشیق‌لارین سسینی من ایچرم
عاشیق لارین سسینده من اوره‌ییمی سره‌رم
عاشیق‌لارین نفسیندن قیزیل گول دره‌رم.
بوســس سانکی دنیزدیر. بوسس گؤزه‌ل‌لیک عالیمیندن قاوزانان موسیقی‌دیر:
بوسسین ساحیلینده
گؤزه‌ل باغ لار، باغ لاردا
شیرین – شیرین میوه‌لر
بو سسین ساحیلینده
بیری منی گؤزله‌ییر
یئلکن‌لریم دومانلاردا آچیلیر
و گئتدیکجه سازین سسی ، عاشیغین آوازی اونون روحونون، قلبی‌نین، دویغو و دوشونجه‌لری‌نین چاغلار و جوشغون احوال روحیه‌سی‌نین ترجمانینا چئوریلیر:
سازین سیمی دالغالانیر
دالغالار داشا دییر
جالانیر
ایندی منیم اوره‌ییم
یئلکن‌سیز بیر گیمی کیمی
دالغالارین ایچینده.
عمران صلاحی‌نین اجتماعی شخصیتی و صنعتی‌نین فورمالاشماسیندا ان اؤنملی رول اوینایان عامل‌لردن بیری ده، اونون یاشادیغی، ادبی – مدنی محیط اولموشدور. بو محیط ۴۰ نجی ایللردن باشلامیش ۸۰ – نجی ایللره قده‌ر تاریخی – اجتماعی بیر دورو احاطه ائدیر. بو ایللرده ایرانین اجتماعی، مدنی، سیاسی، اقتصادی ساحه‌لرینده، بؤیوک دییشیکلر اوز وئرمیش‌دیر. ادبیات و اینجه صنعت ده بو دییشیکلرین تاثیریندن اوزاقدا قالمامیش، بلکه ان درین ایزلری گوجلو تاثیرلری‌ایله اجتماعی حادثه‌لر بو ساحه‌لرده داها آرتیق اؤزونو عکس ائتدیرمیش‌دیر.
عمران بئله بیر چاغلار قاینار، ادبی – اجتماعی محیط‌ین یئتیرمه‌سی‌دیر. اونون یارادیجی‌لیغی، اجتماعی شخصیتی بو دورده یئتگین‌لشمیش، بو فضادان شعرلری تأثیرلنمیش‌دیر. عینی حالدا اونون اؤزونون ده بو فضانین یارانماسیندا اؤنملی رولو اولموشدور. بو دؤرده عمران اؤلکه‌میزین بیرچوخ تانینمیش و آپاریجی ادبی، مدنی شخصیت‌لری، صنعتکارلاری ایله سیخ علاقه‌ده اولموشدور. بو شخصیت‌لر مختلف دونیا گؤروشلو، باشقا – باشقا آداملارایدیلار. اونلارین یارادیجیلیق عالم‌لری، فیکیر و دوشونجه طرزلری، مختلف و بعضاَ ده تضادلی‌ایدی. عمران بونلارلا علاقه ساخلایاراق، اؤز نادر شخصیتی‌ایله اجتماعی حیاتیندا یاشاما میدانی‌نین دایره‌سی‌نی گئنیش‌لندیرمیشدیر. هر هانسی بیر شخصیت‌ده، داورانیش و گؤروشده انسانی سجیه‌لری سئچیب، اونلاری قابارداراق، اؤزونون معنوی عالمی‌ایله، انسانی دیرلری، اولچولری‌ایله اویغونلاشدیرا بیلمیشدی. اؤز من‌لییینی بئله بیر رنگارنگ ، مختلف دوشونجه‌لر، داورانیش‌لار ایچیندن گیزلی و گؤرونمز بیر خط کیمی کئچیریب اونلاری بیر – بیرلرینه جالامیشدی. منیم فیکریم‌جه، عمران صلاحی ایندیه‌جن گؤروب، تانیدیغیم شخصیت‌لر ایچینده ان دموکرات، آلچاق کؤنللو، بؤیوک اوره‌کلی، بؤیوک آمال‌لی، قدرتلی بیر شخصیت‌ایدی. بونا گؤره ده هامی اونو سئویردی. اونونلا فخر ائدیردی. بو یگانه بیر محیط، اؤزونه مخصوص بیر فضاایدی. بئله بیر خاص موقعیت چوخ آداملارا نصیب اولمور.
عمران بو فضادان باشقا ، آیری – آیری دونیالار، یارادیجی‌لیق‌لار، شخصیت‌لرله، اثرلری واسطه‌سی‌ایله تانیش اولور، او چوخ اوخویان، اطرافلی معلوماتی اولان بیر شخص‌ایدی. عمران اوخودوقلاریندان یارادیجی بیر شاعیر و یازیچی کیمی فایدالانیردی. اونلاردان اؤیرنیردی اؤیرندیکلرینی منیم‌سه‌ییر و شعرینده، یازیسیندا، اونلاری ایفاده ائدیردی.
عمرانین شعرینه ان گوجلو تاثیر بوراخان، ایکی بؤیوک نهنگ شاعیری خصوصی ایله قید ائتمه لی‌یم، ناظم حکمت و رسول رضا، بو ایکی استاد شاعر، بؤیوک صنعتکار عمرانین یارادیجی‌لیغیندا چوخ مثبت تاثیر بوراخمیش‌لار. عمران اونلاری تقلید ائتمه‌ییب، بلکه اونلاردان یارادیجیلیق سیرلرینی اؤیرنیب و اثرلرینی معاصر دونیاایله سس‌لشدیره بیلیب‌دیر. شعری پخته‌لشیب، چوخلو تجربه‌لری ییه‌لنیب، دویغو و دوشونجه‌لرینی حیات، انسان و وارلیق حاقدا درین‌لشدیریب. بویول‌لا بدیعی – ایسته‌تیک عالمی‌ده زنگین‌لشیب، شعری‌نین بدیعی تصویر واسطه‌لر، ایفاده، معنا چالاری الوانلاشیب، آیدینلاشیب و معاصر دونیانین قاباقجیل شعری‌ایله آیاقلاشماغا، سس‌لشمه‌یه حاق قازانیب‌دیر.
عمران بؤیوک شاعرلردن، خالقدان، حیاتدان اؤیرنه– اؤیرنه،بیللورلاشیب ، شعری ده ساده‌لشیب ، آیدینلاشیب. عینی حالدا درین‌لشیب و حیاتی‌لشیب‌دیر. ایللر بویو آراییب آختاردیغی بیر عالمه چاتیپ. افق‌لری گئنیش‌لنیب یارادیجیلیق دونیاسی بؤیویوب. او افق‌لردن کئچه – کئچه، شعری‌نین یئرسیز بیر بزه‌یی تؤکولوب، اونون روحونون چیلپاق‌لیغی‌ایله بدیعی عالمی‌نین گؤزه‌ل‌لییی وحدتیندن، قوووشماسیندان یئنی بیر عالم یارانیب، بوتون اینجه صنعت اثرلری‌نین، شعرین، ادبیاتین، سو ایچدییی بیر عالم. دوم – دورو، بیللور، ایشیق‌لی نغمه‌لر عالمی! «نغمه لشمک»، اوره‌کلرین ان صمیمی حس‌لری‌نین، دوم – دورو دویغولارین، جانلاندیغی بیر عالم‌دیر. عمرانین شعری بو بولانماز صنعت بولاغی‌نین گؤزوندن سو ایچیردی. آرزولارین، گؤزه‌ل‌لیک‌لرین، شعریتین، بیرلشدییی، سئحیرلی صنعت بولاغی:
ال لریمی اوزالتدیم
آی ایشیغینی یئره سردیم
سبد سبد آلما دردیم
دانیشسام، سپه‌لنر
آیین دورو بولاغینا، گول چیچک
هاوا نه ایچمه‌لی‌دیر
آلما‌لارین عطری کیمی بیر سئوینج
کؤینییمده گیزلنیب… .
باخ بئله نغمه‌لری اؤته – اؤته، بیزیم گؤزه‌ل سسی‌لی «دورنا» میز شرقین گؤی‌لرینده اوچاراق سئوگی نغمه‌سی‌نین ان اوجا زیروه سینه اوچدو. بو «یاشیل باش سونا» یاشیل دریالارا، یاشیل آدالارا اوزدو، شرقین باشلانغیجیناجان، کی عومرونون ان گؤزه‌ل نغمه‌سینی اوخوسون. دونیا شاعرلری ایله بیرگه، انسانلیق نغمه‌سی اوخودو. انسان سسی‌نین، انسان نفسی‌نین ان گؤزه‌ل نغمه‌لرینی آلچاق‌لیق‌لار عیبجرلیک‌لر، یارامازلیق‌لارین حؤکوم سوردویو بیر زمانه‌ده، شعری یاخشی‌لیق‌لار، گؤزه‌ل‌لیک‌لر، دوستلوق‌لار، قارداشلیق‌لارین، گؤزه‌ل انسانی خاصیت‌لری‌نین، گوزگوسونه چئویررک، دونیا قاباغینا توتاراق، شعر و ادبیاتی صلحون، دوستلوغون بایراغی کیمی قالدیردیلار، اؤزوده دونیانین ان اوجا یئرینده، شرقین دامی آدلانان پامیرده (اورادا بیزیم بیر گؤزه‌ل انسان‌میز دا ابدی خاطره‌سی‌ایله اویوماقدادیر: حسین حراستی) نغمه اوخودو، پکن دانشگاهیندا، کاشغرده، اورمجی‌دا، آنا دیلنده شعرلر اوخودو. قارشی‌لاندی سئودی، سئویلدی. شاعرلر ایچینده پارلادی. او شعر اوخویا اوخویا او دیاری اوره‌یی‌نین ایشیغینا بویادی. بیرده یوردوموزون سسی، نفسی، ایپک یولونون، مدنیت‌لرین قوووشدوغو بیر دیاردا سس‌لندی، عمرانین شعرلرینده جیلوه‌لندی:
آییلیر
یاتان باغ
باهارین نفسینده
آچیلیر
چیچکلر
قوش لارین دورو سسینده
یئل اسیر
کول‌لره
اود یوخوسوندان اویانیر
قوشولور
گؤل‌لره
پاریلداییر جاوانلیق
پرده‌لری تیتره‌دیر.
نه یازیق کی، اونون نجیب جانیندا قیوربلیب یاتان اؤلوم واخت‌سیز باش قالدیریب، شاعیرمیزین مهربان قلبینی چالدی، زهرله‌دی. عمران هله «چین سفری»نین شعرلرینی قوشمامیش، خاطره‌لرینی یازمامیش (یازماغا باشلامیشدی) اؤلومونون شعرینی قوشدو. غملی پاییز گئجه‌سینده، اؤلوم‌ایله حیاتی اوزلشدی. اولوم ایله اؤلوم چاتیشدیلار. اونون بدنینی پاییز خزانی‌نین ساری‌لیغینا ساریدیلار. گئدر‌گلمز عالمه آپاردیلار.
بودور: «خانه هنرمندان ایران» سارایی‌نین سکی‌سی. سول طرفده خطابت کورسوسو. ساغ طرفده عمرانین بؤیوک بیر تمثالی. او تمثال‌دا عمرانین همیشه‌کی مهربان باخیش‌لاری انسانلاری سوزمکده‌دیر. اونون عزیز خاطره‌سی یول‌داش‌لاری‌نین، دوستلاری‌نین، سئون‌لری‌نین توپلاشدیغی جومالارا باش چکیر. بیر شیرین سؤز، بیر آتماجا ایله اونلارین دوداق‌لاریندا گولوش اکیپ و یوخا چیخیر. حسرتلرین، کدرلرین ایچینده ایتیر. اونسوزلوغون آغیر غمی جاماعاتین ایچینده دالغا‌دالغا یاییلیر.
منی گؤی‌لردن سوروش
بلکه سنه دییه‌لر
بوردا بیر یارالی دورنا ایزلندی
دیمدیگینده بیر دامجی یاش
سوروشسان هاراگئتدی
دییه جکلر: ناغیل لاردا گیزلندی… .
یک پاسخ
فراخوان شعر و مقاله
در دفتر عشق، هست نام “آرش”
خوشبختی خلق است مرام ” آرش ”
خلقی اگر آگاه شود یا خندان
آن وقت جهان شود به کام ” آرش ”
——————————————————————–
در آستانه سومین سالگرد درگذشت ” حمیدآرش آزاد” روزنامه نگار، مترجم، نویسنده و شاعر و طنزپرداز کشورمان تصمیم داریم تا با انتشار ویژه نامه ای تحت عنوان ” بررسی آثار و نوشته های حمید آرش آزاد” یاد و نام آن عزیز از دست رفته را گرامی بداریم.
لذا از همه دوستان،اساتید،شاعران ونویسندگان عزیزدرخواست داریم ،تابا ارسال آثار ارزشمند منظوم ، منثور وطرح های خود ما را در این راه یاری فرمایند.
مهلت ارسال آثار دوستان تا آخر تیرماه ۱۳۹۲ می باشد.از الطاف بزرگوارانه ای که خواهید فرمود پیشاپیش سپاسگزاریم.
برای ارسال آثار ارزشمندتان می توانید از طریق:تلفاکس :۵۲۴۳۴۸۷-۰۴۱۱
ایمیل:arashazad_si@yahoo.com
وآدرس : تبریز- خیابان فارابی شمالی-نرسیده به پل منصور-نبش کوچه بنفشه- پلاک ۱۱۸- دفتر نشریه پیام آذربایجان اقدام فرمایید.
با تشکر
آرش آزاد ۰۹۱۴۳۱۳۵۷۶۴