ishiq
ادبيات؛ توپلومون اورتاق ديلي، بؤلونمه­ ين توپراغي
آرش ساعي

آرتيق اون ايلدير عصريميز 21 ياشينا آياق قويوبدور. ايييرمينجي عصير بؤيوك دئوريم لرين، ساواش لارين و بو قدر بؤيوكلوك لردن عمله گلن بؤيوك ادبيات لارين عصري سانيليرسا، يئني عصير ثانيه لري سورعتيله چاشديران «ده­ييشيكليك»لرين عصيردير. دوغال اولاراق، ايستر – ايسته مز بيز ياشايان توپلوم ايسه بو سورعتلي ده­ييشيكليك لردن اوزاق قالماييب، اونلارين ائتگي­سيندن، موطلق قورتولماياجاق. هر عصير ده ده­ييشيكليك­لر هم دانيلماز، هم ايسه قاچيلماز دير. توپلومون ده­ييشيكليك­لري توپلومدا گرگين­ليك­لرله بيرگه اولاشيب ائريشه­جك. آنجاق بو آرادا آلتئرناتيولرين نئجه آرايا چيخيب توپلومو‌هانكي دوشونجه يه ساري يؤنه­لتمه­يي ان اؤنملي قايغي كيمي دوشونولور. ده­ييشيكليك­لرين توپلوما آياق قويدوغو آندان اوچ اساس قيشر آرايا گلير:

1-                  ده­ييشيكليك­لره قاتيلانلار

2-                  گلنك­لري(عنعنه‌لری) قورويانلار

3-                  ده­ييشيكليك­لردن يان كئچنلر

اوچونجو قيشر قارين ياشاييش­لريندن باشقا هئچ نه­يي اؤنملي سانماييرلار. بو تيپ قيشرلر دونيا توپلوملارينين‌هاميسيندا، عموميتجه، ياشام اولايلاريني‌هابئله قايغيلاريني مادي باخيمدان آراشديرارلار، يا ايسه هئچ آراشديرماييب يالنيز مادي ياشامي محور سانيب عؤمور سوره­رلر. اونلارا گؤره اودوب – اوتوزماغين اؤلچوسو پولدور. پولون وارسا خوشبخت اولورسان.دئمك اونلاردا خوشبخت­ليك، حقيقتدن گؤز يومماغا سانكي بير اؤرتوكدور. آنجاق بو قيشر توپلومدا معنوي قايغيلاري ائله­جه دغدغه­لري اؤنمسيز سايماق اوچون بو يازيدا يئر آلماييرلار.

توپلومون معنوي قايغيلاريني چكنلر بيرينجي‌هابئله ايكينجي قيشرلرديرلر. بونلار آيدين گلجه­يين دامارلاريندا توپلومون قاني اولان، باخيش – دوشونجه­ني آخيملانديريرلار. بو ايكي قيشردن هر‌هانسي­سينين حاقلي يا ايسه حاقسيز اولدوغونا حكم ائتمك بو يازينين مقصدي دئييل. آنجاق «ده­ييشيكليك­لره قاتيلانلار» لا «گلنك­لري قورويانلار»ين نئجه قارشيلاشمالاري ائله­جه داورانيشلاري دير اؤنم داشييير. بيرينجي قيشرين گؤزو قاماشديران اؤزه­للييي اونلارين عصيانچي­ليق­لاريدير. بو عصيانچي­ليغين اؤنونده آرتيق بير آيري عصيان دا دورور، گلنك­لري قورويان­لارين عصياني عصيانچي­لارا قارشي.

اينديسه توپلومون ايكي قارشيليقلي باخيش – دوشونجه­سي، اوز – اوزه دوروبلار. هر بيريسي اؤز منطيقي­نين اوغورونا چاليشير. كوتله­يه اؤز منطيقيني آنلاتماق ايسته­يير. كوتله­نين جمعي تفكورونده، قالارقي آخيما فيكيرلشير. اير بو آرا ايكي قارشيليقلي باخيش – دوشونجه، بيلينج­له دانيشيغا گيررلرسه، يارارلي ائله­جه سونوجلو بير آخيم ياراناجاق توپلومدا، ده­رين ائتگي­لر باغيشلاياجاق كوتله­نين جمعي تفكورونه، دئموكراسييانين تمريني اولاجاق. آيدين گلجه­يه توكنمز ايشيق قايناغي… يوخسا اير بو ايكي قارشيليقلي باخيش –  دوشونجه بيلينج دن اوزاق، منطيق­سيزليك­له بير – بيريني رد ائديب توپلومدان سيلمه­يه چاليشارلارسا، منطيق ائله­جه اوس گوجوندن ساوايي بير گوجه دايانارلارسا سونوجو توپلومون گرگين دورومودور، نظم­سيزلييي­دير. كوتله­نين جمعي تفكرونو قيلينج­لاماقدير. اؤز – اؤزونو بيچاق­لاماقدير. هر‌هانكي قونودا ياپيلان آشيري عمل­لر گرگينليك­دير، كسين. بو سوييه­ده داورانيش­لار آيدين گله­جه­يي قارانليق­لا ده­ييشمك­دير. سونوجسوز بير ساواش…

بئله بير دورومدا، قارشيليقلي باخيش – دوشونجه­لرين منطيق­له، سايقي­يلا دانيشيغا گيرمه­سينه بير اورتاق ديل گركير. كوتله­نين جمعي تفكورونده آخيملايان بير ديل. كوتله بو ديلين واسيطه­سي­له اؤزونو توپلومون بوتون يؤنلرينده گؤروب – گؤستره بيلسين. كوتله­نين چئشيدلي باخيش – دوشونجه­لري سربست آتموسفئرده، ته­تينمه­دن قورخمادان، راحاتجاسينا دانيشيغا اوتورسون.

بو اورتاق ديل ادبيات­دير. ادبيات بؤلونمه­ين توپراقدير اينسانلار آراسي. اينسانلارين ديشاري دونيالاريندا اولايلانان، ايچ دغدغه­لري­نين ايفاده­سيدير ادبيات. توپلومدا بئله بير آغير وظيفه­ني داشييان ادبياتين نه قدر ده­رين‌هابئله يوكسك سوييه داشيديغي دوشونولور.

ادبياتين يوكسك­لييي ، نه قدر يارادانلارينين‌هابئله‌هانسي سوييه ده ياراديجيليق­لارينا باغلي اولسا، او قدر ده توپلومون اجتماعي – سياسي دورومو، كوتله­نين جمعي روحو بيله تفكورونون اساسلي رول­لاري واردير. دوغال اولاراق، سربست دوشونجه اينساندا اؤزگور خاراكتئره سبب اولار. خاراكتئرين اؤزگورلويوسه، اينسانين اينانجيني قولاق واسيطه­سي ايله يوخ، بلكه اوس وارليغي يلا يارادار. بو حالدا كوتله، توپلومدا آخيملايان آنلاييش­لاري راحاتجاسينا قاوراييب يولونو سئچه بيلجك­دير. اؤزونه اؤزه­ل اؤزلوك قازانيب، دونيا گؤروشو اولاجاق. توپلومون دورومو، اجتماعي – سياسي باخيمدان ايسه، بير چوخ فاكتلارا باغليدير. اوست سطيرلرده آچيقلاديغيميز «كوتله­نين جمعي بيلينجي» بو فاكتلاردان بيريدير. ادبياتين سئيرينده ده­رين ائتگي بوراخان فاكتلاردان؛ كوتله­نين اكونوميك دورومو، ادبياتچي­لارين چاغداش آنلاييش­لاري قاورانمالاري، كيتاب­لارين ساتيشي، توپلومون سياسي – ايدئولوژيك دورومونو، سايماق اولار. آنجاق بو يازيدا نظرده توتولان قونو «كوتله ايله ادبياتچي­نين ايلگيسي­»دير.

دوغروسو بو ادبياتچي، يازيچي؛ شاعير كيمدير؟. اونون ايشي – امه­يي نه­دير؟. قازانجي‌هارادان­دير؟. توپلومون‌هانسي قيشرينه عاييددير؟.

شاعيرلري نظره آلاق. شاعير آدلانديرديغيميز بيريسي، اثريني و شعريني ياراتمادان اؤنجه، حاياتين اؤزه­ل ائله­جه سوسيال بؤلوم­لريني، توپلومون توم اينسانلاري كيمي، ياشايير. توپلومداكي سس­لري دويوب، اؤز ايچينده اونلارلا دانيشير، تارتيشير. اؤزوندن كوسور، باريشير. شعر ياشايير، شعريني ياشايير و سونوج شعريني يارادير. دئمك شاعير توپلومون لاپ ايچينده، ده­رين­ليكلرينده ياشايان بيريسي­دير. توپلومدان، كوتله­دن آيري دئييل. اونون ايشي ده امه­يي ده ادبياتدير، شعردير، يازماقدير.

آما تأسوفله كوتله­نين باخيشيندان؛ ادبياتچي­ليق، يازيچي­ليق، شاعيرليك ايش – امك سانيلمير. اونلارجا، ادبيات ايله­نجه­دير. گون بويو آرتيق قالان واختي ياخشيجا دولدورماقدير. بو باخيش كولتورو ان ييخيجي – داغيديجي باخيشدير. شاعيرلرين بيريسي، كيتابي­نين ايشيندن اؤترو، اداره­لرين بيريسينه مراجعت ائتميشدير. بو شاعيردن «ايشين نه­دير؟» سوروشموشدولار. جاوابيندا «شاعيرم» سؤيله­ميشدي. «يوخ، دئييرم ايشين نه­دير؟» بير داها سوروشولموشدو.

داها بير آيري آچيدان بو پروبلئمه ياناشماق ايسته­سك، بوگونوموزده اينساني – بيليملرين دورومونو توپلومدا سئير ائتمه­ييميز گره­كير. 1300 – ونجو گونش ايلي، تخمينن دونيانين بوتون اؤلكه­لرينده اينكيشافلارين ايليدير. آيدين بير گله­جه­يين گره­ييني دوشونن اؤلكه­لر، صنعتي دئوريم­لردن اؤنجه  اينساني اؤزه­لليك­لري اساسيندا، اينساني – بيليم­لري، توپلومون لاپ آلت قاتلاريندا سرت بير قورمولا دوشونوب، قورموشدورلار. بو اوزدن 1300 – ونجو گونش ايللرينده صنعتي دئوريم­لره باشلاديلار. آما تأسوفله همين ايللرده توپلوموموزدا دمير ماشين تئخنيكا اوزره صنعت­لر، اينساني – بيليم­لري قاباقلاييب داها تئز اينكيشاف دؤنه­مينه آياق قويدولار. هله توپلوم، ميللي كيملييي مسئله­لري اوزره يئتگين تعريف­لره چاتمادان، سوسيال داورانيش­لاري كاناليزه ائتمه­دن، ايچ دونيالاريني تانيماييب دونيا گؤروش­لريني يازيب ياراتمادان، صنعتي دئوريمي باشلاديلار.

بو آرادا عاييله­لر ايسه­ ان يانليش ائتگي­لرين قايناغي اولدولار. زامان سوردوكجه، يئني عاييله­لر حايات قوروب ياشاديقجا، يانليش­ليق­لار دا بؤيودولر. اوشاقلاري مين ايلليك حايات درسلي ياشام قايدالاريندان، ناغيل­لاردان، شعرلردن اوزاقلاشديريب، ايكينجي اولويت داشييان ياشام قونولارينا اؤنم وئرديلر. اوشاقلار رياضياتين فلسفه­سيني دوشونمه­دن، ايكي ايكي­نين، دؤرد ائتمه­سيني اؤيره­نديلر.

سونرالار بو فاجعه داها بؤيودو. اورتا مكتبدن اينساني – بيليم­لره باشلاييب ماراق گؤسترن اؤيرنجي­لر كوتله­نين غاليب تفكورو طرفيندن تحقير اولدولار. دفعه­لرله ائشيتديك: «درس اوخويان دئييلدي، اينساني بيليم­لرده تحصيل آلماغا باشلادي». بو كيمي سؤزلر يونگول سؤز دوشونولسه­ده، او قدر آغيردير توپلومون ده­رين­ليك­لرينه آغناييب، كوتله­نين جمعي تفكرونده آخيملانير.

دمير ماشين­لار تئخنيكاسي اوزره صنعت­لرين عمله گلمه­سي اينسان­لارين راحات ياشامالارينا سبب اولور، آنجاق اولماماغي اينسانلاري ياشام پروسئسينده آخساتماز. اولماسي ياخشي­دير، گركلي اولسادا يئترلي دئييل. آنجاق اينساني – بيليم­لرين اؤتمه­سي اينسان­ليغين اؤتمه­سي دئمكدير. اينسانين، ائوره­نين يئتگين­ليك سيرريني داشييان دوشونجه، ائله­جه دوشونجه­ني اينكيشاف ائتديرن اينساني – بيليم­لر؛ مين ايل­لر بويو و بونجا ايللر گلجكده­ده؛ اينسانين، ائوره­نين آنلاييش پازئليني بير اوس – بير اوس ترتيب ائديب، ائدجك. اونوتماياق، اينساني بيليم­لرين گوجلو گليشمه­سي، اينسانين حقيقي قورتولوشودور.

كوتله­نين بئله بير سونوجا وارماسي، ادبياتين دورقونلوغوندا ان بؤيوك رولو اولدو، ادبياتچي ايسه توپلومون يوكسك قاتلاريندان آشاغي ائنديريلدي. عموميتجه هنر بئله بير حالا دوشدو. نه شاعيرين كيتابي آلينيب اوخوندو؛ نه ده رسامين تابلوسو دوواردان آسيلدي. ادبيات بير زنگين معنوي وارليق اولماسينا رغمن، توپلومون دوشونجه­وي آخيميندا يئر آلانمادي. كيتاب ايسه ياشامين گونده­ليييندن ديشاري قويولدو. آنجاق بو آرادا ادبياتچي­نين باشينا نه­لر گلمه­سيني يانليز ادبياتچي­لار گؤروب، آنديلار.

گؤره­سن توپلومون، توپلومدا ياشايان بيزلرين‌هابئله كولتوروموزون سونو نه اولاجاق؟ گلجه­ييميز نئجه؟. گونوموزون ادبياتي يارانماسا، گلن نسيل­لرين باخيشيندان ديلسيزلريك، چونكو توپلومون، نسلين، اورتاق ديلي اولان ادبيات آرتيق آرادا يوخدور. سون سؤز، ادبياتين اينكيشافي توپلومدا آخيملايان دوشونجه­لرين اينكيشافي­يلا پارالئل­دير.