سندلی اوزون حیکایه
چئویرن: نریمان ناظیم
ترجمه: نریمان ناظیم
نریمان ناظیم

گؤزلرینی آچمامیشدان اوول اوزون- اوزون دوشونوردو. آیاقلاری‌نین آلتیندان قوپان زوققولتونون سسینی سانکی ائشیدیردی. آیاق‌لاری، ایچیندن آلیشیب یانیردی. آناسی‌نین کؤمور اوتوسو یادینا دوشدو. «ایندی بو آیاق ایله لاپ پالتار دا اوتوله‌مک اولار» فیکری‌له ذوداغی قاچدی. بیرجه آن “گتیرین آ یولداش‌لار، گتیرین پالتارینیزی اوتوله‌ییم!” باغیرماق ایسته‌دی. سونرا آجی- آجی گولومسه‌دی. «اوندا قطعاً منه ده‌لی آدی قویارلار. یوخ، اوندا دئیرلر بو دا داها چکنمیر، دایانا بیلمیر».
آیاقلاری‌نین زوققولتوسو یئنی‌دن ذهنینی بورودو: «گؤر نه ویر-‌سیندیردی آیاقلاریمین آلتیندا؟! باخ بورا، باخ قانیمداکی آغ گلبول‌لارا، گؤر نه کیشی کیمی دایانیبلار؟! اونلار بیرجه- بیرجه قیریرلار میکروب‌لاری. ایندیجه‌‌دیر کی بوتون قان- قوخونو کوره‌ییب، ائشییه تؤکه‌لر…». بو فیکیردن قات- قات گوجلندی؛ آغری‌نین ذره- ذره جانیندان چیخدیغینی حیس ائله‌دی. «آخ نه قده‌ر کئفی وار بو حالین! آغری نه قده‌ر آجی‌دیرسا، اونون جاندان چیخماسی‌دا ائله او قده‌ر لذتلی‌دیر.  ائله بیل آدام تازادان دونیایا گلیر!».
گؤردویو ایشدن هئچ ده پئشیمان دئییلدی. حتی فیکیرله‌شیردی کی «برکه قیسناسالار، بو یول اوندان‌دا پیسینی دئیه‌جه‌یم. ائله قیشقیراجاغام کی  دؤرد قاتین دؤردو ده ائشیتسین»
گؤزلرینی آچارکن دیوارا دوشن ایشیغی گؤردو. همیشه کی کیمی ایدی: شیریم-شیریم. چوخدان بری هر گون یوخودان آییلارکن گؤزلرینی دیوارا زیللردی؛ «هاچان ایشیق دوشه‌جک گؤره‌سن؟» آنجاق واختی گلیب چاتاردی. اوول سککیر دانا ایشیق لکه‌سی- آلتی- یئددی سانت بیر-بیریندن آرالی- یان – یانا دوزولردی. سونرا ایشیق لکه‌لری آستا-آستا آشاغی ساری اوزانماغا باشلاردی؛ اولاردی سکگیز دانا شیریم، دیب- دیبه، بیر ایستیقامت‌ده. ایشیق شیریم‌لاری اوزاندیقجا اونون‌دا اوره‌یی آچیلاردی، ایشیقلاناردی. آمما بیر مئتردن آرتیق اوزانمازدی شیریم‌لار؛ باشلایاردی گودلمه‌یه. گوده‌لیب، گوده‌لیب یئنی‌دن اولاردی سککیز دانا لکه؛ نهایت، ایشیق گلدییی یولدان قاییدیب، گئده‌ردی. اؤز- اؤزونه دوشونردی: گؤره‌سن ایشیق نئچه دقیقه اونون قوناغی اولور؟ بیله بیلمزدی. بیرگون آنجاق یولون تاپدی. ایشیق دوشجک، باشلادی سایماغا: «هه ، بس بئله…، آلتی یوز اللی‌نی سایانا قده‌ر دایانیر، آمما هله یئددی یوزه چاتمامیش یاواشجا سوزولور گئدیر. دئییرم آی ظالیمین بالاسی، قوی هئچ‌اولماسا یئددی یوزو ساییم باری! آخی سندن ساوای کی منیم گؤروشچوم یوخدو»
کئچن گئجه یئدیگی کؤتک اونو بورا گلمه‌سی‌نین ایلکین هفته‌لرینه چکیب آپاردی. آجیلی- شیرینلی گونلرینه. او زامان بئله دوشونردی کی بوندان داها آجی گونلر اولا بیلمز، البته آجی‌ایدی‌دا او گونلر، آپ- آجی. اونا گؤره کی ساعات باشی سورغو- سووال‌ایدی، گؤزله‌نیلمر قده‌ر یامان- یوووز، شیلله- ته‌پیک، آمما ان آجیسی شاللاق‌ایدی. خصوصیله آیاق آلتیندان ورولان شاللاق؛ اؤز- اؤزونه « لاپ آدامین آخیرینا چیخیر بو یولسوز!» دئیه‌ردی.
کیمیسیندن ائشیتمیشدی کی «شاللاق آدامین دریسینه دئییل، دری‌نین آلتیندا قیوریلیب یاتمش بیر ایلانا ده‌ییر سانکی؛ ایلانی یئریندن سیچرادیر. ایلان‌ایسه زهرینی آدامین بوتون ووجودونا چیله‌یه‌یرک، فیشک کیمی گؤزلریندن چیخیر»
دوز دئمیشدی ائله‌ایدی شاللاق. بونونلا بئله هر نه ایدی، کئچری‌ایدی. اوزاق باشی هوشدان چیخانا قده‌ر ایدی، یاخود آیاقلارین کئیمه‌سینه قده‌ر. آغریسی دا قالارقی دئییلدی، کؤچری‌ایدی. آجی- آجی گلیردیسه، شیرین- شیرین‌ده گئدیردی. بونلارین هامیسی بیر یاندا قالسین؛ اوندا، او تک دئییلدی. او گونلرین شیرینلییی‌ده ائله بوراسیندایدی.
اوولجه اوچ نفر ایدیلر. سونرا گئجه‌لرین بیرینده نسه بیردن- بیره بند شولوقلاشیر؛ گل-گئت سسی، آپار-گتیر همهمه‌سی قووزانیر. سئللول‌لارین قاپیلاری جیرا- جیر‌لا آچیلیب اؤرتولور؛ چوخ چکمیر، آنجاق اونلارین دا سئللولونون قاپیسی آچیلیر؛ بئش نفر ایچری باسیلیر؛ قاپی اؤرتولور.
بیر اون ایکی مئترلیک اوتاق اولور، سککیز نفر آدام؛ هره‌سی بیر یاندان، هر بیری بیر یولدان، آمما دیلک‌لر بیرگه‌ایدی، اورک‌لر ده. خصوصیله گئجه‌لر یاتاندا اوره‌ک‌لر او قده‌ر یاخینلاشاردی کی بیر-بیرلری‌نین دؤیونتو سسینی ده دینله‌یه بیلردیلر. یاخینلاشمالی‌اید‌ی‌لار دا، اوره‌ک، اوره‌یه دیره‌ک اولمالی‌ایدی اوردا.
گئت- گئده سینیشیردیلر بو سککیز نفر. دردلرینی، کدرلرینی بؤلوشوردولر. سورغو- سووالا گئدیب قاییدان آدام هر نه قده‌ر ده ایشکنجه‌یه معروض قالمیشدیسا، سئللولا گیرجک دردلرینی باشقالاری‌لا پایلاشیردی. کیمیسی سیگار آلیشدیریب الینه وئریردی، کیمیسی قول- قیچین اوووردو. بیریسی شعر ایله، او بیریسی نغمه ایله روحون اوخشاییر، باشقا بیریسی قولتوغونا گیریب، او بالاجا اوتاقدا اونو گزدیریردی و …
سؤزسوز کی اورادا سئوینجدن خبر اولا بیلمزدی، امما اونلار ویریشیب سئونجی ده تاپیردیلا. گولمه‌لی لطیفه‌لر، شیرین – شیرین خاطیره‌لرله؛ بایاتی‌لار، دوبیتی‌لر، قوشمالارلا؛ حزین- حزین اوخونان ماهنی‌لارلا. اللری ده بوش قالمیردی البته. چؤره‌ک ایچیندن چیخان خمیره لیوان دیبینده قالمیش شیرین چایین آرتیغینی قاتیردیلار. ساعاتلارلا، گونلرله اونو الده ورزله‌ییردیلر؛ یاری‌یا بؤلوردولر. یاریسینی لوله‌له‌ییب وردنه کیمی سئللولون دیواریندا هرله‌دیردیلر. خمیر دیوارین هیسینی جانینا چکیردی؛ قارالیردی. یاریسی‌ایسه اؤز آغلیغیندا قالیردی. خمیر الدن- اله دولانیر؛ ورزله‌نیر؛ قیر- ساققیزا چئوریلیردی. بو خمیردن حوصله ایله، سلقه ایله شاهمات مؤهره‌لری، نرد مؤهره‌لری دوزه‌لیردی. دوزلمیش مؤهره‌لر گؤزلری اوخشاییردی؛ اونلارا لذت باغیشلاییردی.
«یاخشی، بس هانی بونلارین صفحه‌سی؟» او دا اولان ایشی‌ایدی. یولون اؤیرنمیشدیلر. بیرجه دانا ایشلنمیش، سورتولوب تیغه‌یه چئوریلمیش صابین لازیم ایدی. اونو دا یاواشجا تووالت‌دن چالیب گتیریردیلر. قارامتیل عسگرلیک پتوسونون اوزه‌رینده ائله بیر ناخیش سالیردیلار کی، لاپ اولوردو کؤنلوندن کئچن صفحه. بئله‌لیک‌له اویون قورولوردو؛ یاریش‌لار گئدیردی…، زامان دیزه چؤکوردو.
*   *   *

آمما روزگار بو سایاقدا قالمامیشدی. یاریسینی اؤتوب کئچن بیر گئجه‌ده سئللولون شاققیلتی ایله آچیلان قاپیسی‌نین سسینه هامی یوخودان داشلانمیشدی. یاری یوخولو- یاری آییق گؤزلر ایله ازگین- اوزگون، بوکولوب یوماغا دؤنموش بیر آدامین ایچری‌یه یووارلانماسینی گؤرموشدولر؛ سونرا دا قاپی‌نین باغلانماسینی. باشلانیشی بئله اولموشدو.
بیر ساعاتا یاخین تازا گلن آدامین نه دانیشماغا دیلی وار‌یدی، نه گؤرمه‌یه گؤزو. گاهدان بیر قیچین قارنینا چکیر اینله‌ییردی. سئللولون ایستی، بوغوناق هاواسی نفس آلماغا ایمکان وئرمیر، کیمسه‌دن سس چیخمیر. ذهن‌لر یوزلرجه سووال ایله مشغول‌ایدی‌لار. قاپی‌دان یوخاری مفتیلدن توخونموش قفس‌جیکده حبس اولونان لامپانین اینجارسیز ایشیغی آدامین اوزونو ایشیقلاندیریر. نئچه دقیقه‌دن بری سلیمانین گؤزلری آدامین اوزونده مینجیقلانان ترین ایشیلتیسینا تیکیلی قالمیشدی. بیردن یئریندن قالخیر، اینینده کی قارا کؤینه‌یینی چیخاریب، آدامین باشی اوستونه گلیر؛ کؤینه‌یی ایله اونون آلنی‌نین، بوغازینین ترین دریر. سونرا همن کؤینک‌له آدامی یئلپیله‌ییر. آدام گؤزلرین آچیر؛ قارا، شه‌وه گؤزلریندن سانکی سلیمانا نور ساچیر. سلیمان ایاغا قالخیب، فئرینج‌ینین جیبیندن سئللولون گونده‌لیک پاییندان قالمیش تکجه سیگاری گؤتورور؛ یاندیریر؛ الینه وئریر. آدام تامارزیلامیش کیمی اوچ- دؤرد قولاب‌دا سیگاری یاری‌دان کئچیریر. سلیمان مهربان- مهربان اونو سوزوب، یاواشجا سوروشور: “سنین آدین نه‌دیر؟ سن کیمسن؟” آدام گؤرله‌نیلمز بیر سووال ائشیتمیش کیمی گؤزلرین آچیب دیققتله سلیمانا باخیر. در حال قالخیر، اوتورور. ایتی باخیشی ایله دؤرد دؤوره‌نی سوزور. – “بورا هارادی؟ نومره‌سی نئچه‌دی بوسئللولون؟”- دئیه سوروشور. سلیمان،-“اون یئددی” دئییر. کیشی “بس نییه منی بورا گتیریبلر، من یئددینجی نومره‌یه گئتمه‌لی‌ایدیم”- دئیه، قاپی‌یا ساری یؤنه‌لیب قالخیر، آمما آیاغا دورا بیلمیر. سلیمان درحال کؤینه‌یی اینینه چکیب، قاپینی چالیر. گؤزتچی گلیر؛ قاپی‌نین ال بویدا دربه‌چه‌سین آچیر؛ “هَه، نه اولوب گئجه‌نین بو واختیندا؟”- دئیه، سوروشور. سلیمان “بو آدامی بورا سهوا گتیریبسیز”- دئییر. گؤزتچی قاپینی آچیر؛ “سهوا گتیرمیشیک؟ یا سهو گلیب‌دی؟”- دئدیکده، سسینین تیتره‌ییشی بلله‌نیر. ال- آیاغینی داغیتمیش حالدا قاپینی باغلاییب، گئدیر. آدام قاپی‌نین آغیزیندا قول‌لارینی دیزلرینه، باشینی‌ایسه قول‌لارینا دایامیش حالدا اوتوروب، گؤزله‌ییر.
سلیمان آیاق اوسته، باشقالاری‌ایسه اوتوروب، سوکوتا دالیرلار. کیمیسی سلیمانا ایشاره ائده‌رک، “گل اوتور!”- دئییر. سلیمان اوتورانلارا قاریشیر. چوخ چکمیر سئللولون قاپیسی آچیلیر، گؤزتچی، قارا بنیز، فئرباش هیئوه‌ره‌نین بیریسی ایله یاناشی قاپینین آغیزیندا دایانیرلار. فئر باش کیشی، “کیمدی او آدام، هانسی‌دی؟” –دئیه، سوروشور. آدام اوتوردوغو حالدا باشین قالدیریر. فئر باش کیشی اونو گؤرجک قودوزلاشیر، “بو بیجلیک تکجه بو اووره‌شین الیندن گله بیلر”- دئیه، توپو شوتلایان کیمی ته‌پیگین آتیر. ته‌پیک آدامین هاراسیندان – سینه، بوغاز، یوخسا آغیزیندان- توتدوغونو کیمسه بیلمه‌ییر؛ آنجاق او آرخایا قاوریلیب ییخیلیر. فئر باش کیشی بیر آن دایانیر، سونرا “یوخ…، بو منیم ایشیم دئییل، دوکتور گره‌گ اؤزو گلسین”- دئیه، قاییدیب، گئدیر.
دوکتور یولدایکن هله گلیب- چاتمامیش یامان- یوووزو باشلامیشدی، “بو گیج قورومساغی کیم گتیریب، آزدیردی بورا؟”- دئیه‌رک یاخینلاشیر. یئتیشجک گؤزتچی‌نین اوستونه شیغاییر، “سن اووره‌شه من دئدیم بونو هارا آپار، هآرا؟” – دئییب، باغیردیقدا، گوزتچی‌نین قولاغی‌نین دیبینه ائله بیر شیلله قویور کی، که‌بلله‌نیر. اونون آردینجا یئدیگی یوموروق‌ایله گؤزتچی اؤزونو داها ساخلایا بیلمه‌ییب یئره سریلیر. دوکتور تکجه «یئددی‌یه دئمیشدیم یا اون یئددی‌یه» جومله‌سینی تکرار ائده‌رک قودوزجاسینا گؤزتچینی ته‌پیک آلتیندا ازیب، جنازه‌یه چئویریر. سونرا اونو او حالدا بوراخیب، ایچری یوگورور. بیرینجی ته‌پیک‌ایله دیزلرینی قوجاقلاییب اوتورموش آدامی یئره اوزادیر؛ آیاغینی اونون بوغازینا قویوب باغیریر، “من سنین دیلینی آچماسام، سندن اووره‌شم. دیللن! دی گؤروم کیمله دانیشدین؟ بو بیر ساعاتی بوردا نه پوخ یئییردین؟” – دئیه، دوکتور بیر نئجه یول آیاغین گؤتورور، قویور. آدامین دانیشماغینادا آمان وئرمیر. اونون، چاناغیندان چیخمیش گؤزلری آلا- قارانلیقدا ایشیلداییر. دینمه‌مه‌سی، حتی بیرجه «آخ»دا بئله دئمه‌مه‌سی دوکتورو داهادا قودوزلاشدیریر. دوکتور آیاغی آلتیندا خیریلتی‌یا دوشموش و ال-آیاق چالان آداما فیکیر وئرمه‌دن، تکجه «دیللن بی‌ناموس، دیللن!» دئیه- دئیه، باغیرماقدا‌یدی. نهایت فئرباش کیشی “اؤلدو دوکتور، اؤلدو، بوراخ!”- دئیه، اونو اؤزونه گتیریر. دوکتور کیشی‌نین بوغازین بوراخیر، آمما هله تؤوشه‌یین آلمامیش ال آتیر آدامین توپوغوندان یاپیشیر. وحشیجه‌سینه ائشیگه چکیب، بند اوزونو قاپی‌یا ساری سورویور.
دوکتورون باغیرتیسی اوزاقلاشدیقجا، یئرده قالمیس گؤزتچی‌نین اینیلتیسی ائشیدیلیر. او هردن بیر «قارا کؤینک‌لی، قارا کؤینک… »- دئیه، قیمیلدانیردی.
*   *   *
سوکوتا دالمیش سئللولدا سس‌سیزلیک گئت- گئده آغیرلاشیردی. گؤزتچی‌نین آغیزیندان چیخان سؤزون معناسی و اوندان دوغولا بیلن فاجیعه هامینی دوشوندوروردو. کیمیسی تحککوم ایله «دور سلیمان، دور چیخارت او کؤینه‌یی!”- دئییر. سلیمان آیاغا دورور؛ دوداقلارینی بیر- بیرینه سیخاراق کؤنولسوزجه‌سینه کؤینه‌یی اینیندن چیخاریر. کؤینک الینده، سوروجو باخیشی اوزلرده دولانیر. کمیسه‌دن جاواب آلمادان بیر نقطه‌ده دونوب، دایانیر. زامانین سورعتله کئچمه‌سینی هامی دویوردو؛ هامی فیکیره دالیب دوشونوردو: “نئیله‌مه‌لی‌دیلر، بو شوقریبی هارادا ایتیر- باتیر ائتمه‌لی‌دیلر؟”.
اونلاردان کیمیسی آیاغا دوروب، هامینی بیر طرفه چکیلمه‌یه چاغیریر. سیمئنت دؤشه‌مه‌یه سالینیب، ایللر بویو سو اوزو گؤرمه‌میش قارامتیل کیلیمی قووزاییب، قاتلاییر. کؤینه‌یی سلیماندان آلیب، یئره سریر؛ صافلاییب، شوماتلاییر. کیلیمین یئرینه قایتاریلماسی‌لا برابر کؤکس‌لر قالخیب، ائنیر؛ نفس‌لر آچیلیر. بعضا دوداقلارادا گولوش قونور….
سحر ائرکن قاپی لاپدان آچیلیر. فئرباش کیشی‌دی. سئللولداکی‌لاری بیر به بیر گؤزدن کئچیریر. سونرا سوروشور: «هانی او قارا کؤینک؟» هیچ کیم دانیشماییر. فئر باش کیشی “سوروشدوم، هانی او قارا کؤینک آدام؟”- دئیه، باغیریر. یئنه‌ده جاواب چیخماییر. فئرباش کیشی‌نین دیش‌لری آغاریر،- “بس، دانیشماق ایسته‌میرسیز؟ دئمه‌لی ال بیر اولوبسوز؟ سیزین قارینیز ایشله‌میر، یوخسا بئیینیز؟!”- دئیه، قینشایا- قینشا قاپینی چکیب، گئدیر.
چوخ چکمیر یئنی‌دن قاییدیر، دوکتور و باشقا بیریسی ایله. دوکتور سئللولا گیرجک “فئرینج‌لریزی سالین باشیزا، چیخین ائشیگه؛ یاللاه!”- دئیه، باغیریر. هامینی ائشیگه چیخاریب، کوریدوردا اوزو دیوارا دایاندیریرلار. آختاریش باشلانیر. نئچه دقیقه‌ده سئللول آلت- اوست اولور؛ یئنی‌دن اونلاری ایچری قایتاریرلار. دوکتور بیر الی بئلینده اورتادا دایانمیش، کؤینه‌یی قالدیریر: “بو کؤینه‌یین یئیه‌سین ایستیرم، گلسین قاباغا!»- دئییر. یئریندن ترپه‌نن اولماییر. دوکتور بیر نئچه آن هیچ نه دئمه‌دن یوخوسوزلوقدان قانلانمیش گؤزلرینی قیییب، اونلاری نظردن کئچیریر. سوکوته دالمیش فضادا اونون دیشلرینین قیجیرتی سسی ائشیدیلیردی. او یئنی‌دن دیله گلیر، توختاق لحن ایله دانیشماغا چالیشاراق “بو آخیر دفه‌دیر سوروشورام، بو کؤینه‌یین یئیه‌سی کیمدیر؟”- دئیه، هده‌له‌ییر. کیمسه‌دن سس چیخماییر. دوکتور عصبی گولوش‌ایله اؤزوندن چیخماسینی گیزلتمه‌یه چالیشیر. “قوردلا چووالا گیرمک ایسته‌ییرسیز؟ اولسون، آخیری خوشدور. آنجاق منیم ده اؤزومه گؤره تخصوصوم وار. من آنادان اولما لال‌لارین دیلینی آچارام”- دئیه، فئرباش کیشی‌یه خطاباً باغیریر: “بیربه‌بیر بو جاکش‌لری قولاقلاییب، گیتره‌جکسن اوسته، من دری- بوغاز ائله‌رم بو اوورش‌لری، دری- بوغاز!»
بیرینجی آدامین گؤزلری قارا دسمال ایله باغلانیر. آپاریب-گتیریلمه‌سی بیر ساعات چکیر. اونو اؤلومجول حالدا قایتاریب، سئللولا سالیرلار. ایکنیجی آدامی چاغیراندا سلیمان یئریندن قالخماق ایسته‌ییر، آمما یانینداکی آدامین تحککومله اونون دیزیندن باسیب، ترپنمه‌مه‌یه چاغیرماسی اونا ایمکان وئرمیر. ایکینجی آدامی دا آپاریرلار.
سئللولدا هامی ایشکنجه اولونموش آدامی دؤوره‌له‌ییب، اونون دردیندن پای اومدوغو حالدا تکجه سلیمان دیزلرینی قوجاقلاییب، آغیر گوناه حیسی ایله قیراقدا قالیب، دوشونوردو. اونو او حالدا گؤرن یولداشی قاییدیب، یئنی‌دن یانیندا اوتورور؛ گوله- گوله دئییر:
-نه دی، نییه توما گئدیبسن، اولمویا کؤتک‌دن قورخورسان؟
-نییه قویمادین من اؤزوم گئده‌م هامی‌نین جانی قورتارا؟
-نوبت سنه چاتاندا گئده‌رسن، تلسمه!
– منیم گوناهیمین آغاجین باشقاسی نییه یئسین؟
– بوردا گوناه- ثاواپ دان سؤز گتمیر، بورا دؤیوش میدانی‌دیر. بونلار بیزیم بیرلیگیمیزی پوزماق ایسته‌ییرلر. ایسته‌ییرلر بیریمیز دئیه‌ک کیمدی او قارا کؤینک. اوندا توی- بایرام ائله‌ییب دئیه‌لر، باخ! بودور سیزین یولداشلارین قئیرتی. سیزلر بئله‌سیز. بس، بئجاها بئل باغلامایین بیر- بیریزه. نقشه‌لری بئله‌دیر سلیمان، آییق اول چاشمایاسان
سلیمان هئچ نه دئمه‌ییر، آمما دردی بیر ایدیسه، ایندی ایکی اولور: «بس بئله! بس بیری داوام گیتره بیلمه‌ییب دانیشسا، او بو جمع ایچینده بی‌قئیرت تانیناجاق، باشی آشاغی اولوب عذاب چکه‌جک، هامینی بیر-بیرینه بدبین ائده‌جک؟ … بس بئله ایمش.”
ایکینجی آدامی‌دا قایتاریرلار. آیاق‌لار تیلیت قان. ذوداق‌لار شیشیب، پارتلاق- پارتلاق اولموش، گؤزلرین آلتی قارالمیش و…
فئرباش کیشی اوچونجو شیکارینی سئچمه‌یه گؤز گزدیریر، بیریسینی قاباغا چاغیریر، گؤزلرین باغلاماق ایسته‌ینده، سلیمان یئریندن قالخیر،: “بوراخ اونو! منم کؤینه‌یین یئیه‌سی- دئیه، قاباغا گئدیر. هامی حئیران-حئیران صحنه‌نی سوزور؛ تکجه فئرباش کیشی،: “هه هه، آخی قرار ایدی دانیشمایاسیز، بس نئجه اولدو؟- دئیه، قینشاییر. سلیمان دئییر: “گؤردون کی، دانیشمادیلار، آنجاق من أوزوم ایسته‌مه‌دیم اونلار منیم اودوما یانالار.” فئرباش کیشی آغیر بیر شیلله‌ایله سلیمانی قارشیلاییر، آمما سلیمانین غضبلی باخشیندان چکینیرمیش کیمی درحال دسمالین چیخاریب گؤزلرینی باغلاییر.
*   *   *
او گوندن اعتباراً دوققوز گون تامام سلیمان کؤتک آلتیندا ایدی. جور به جور ایشکنجه‌لره معروض قالمیشدی . چئشیدلی سیناق‌لاردان چیخاریلمیشدی. بو دوققوز گونده سلیمان اولموشدو بیر دری، بیر سوموک. حتا او دانیشماق ایسته‌سه‌یدی ده، داها دانیشماغا دیلی قالمامیشدی. اصلینه باخاندا دانیشماغا بیر سؤزو‌‌ده یوخ‌ایدی. بو جان سیخیجی دورومون مثبت بیر جهتی واردی‌سا، ائله اودا بوراسیندایدی:
یوکو یونگول‌ایدی سلیمانین. او تکجه بیر جبهه‌ده دؤیوشوردو، ائشیک جبهه‌سینده. اونو ایچه‌ریسینده نئیلیم- نئجه ائله‌ییم دردی دئشمیردی. جیسماً عذاب‌ چکیردیسه، روحاٌ توختاق‌ایدی. اونا گؤره کی بو وضعیته سون قویماغین مسئولیتینی او داشیمیردی. او دئییلدی کی سؤزلرین دیله گتیرمک‌ایله اؤزونو قورتارا بیله. بوراسی یاخشی‌ایدی، آمما او تایدان‌دا یاخاسین بوراخمیردیلار.
ایلک گونلر، «قوی دانیشماسین او اوورش، بو گه‌ده‌دن بوتون سؤزلری چکیب چیخارداجام»- یانیلماسی ایله، دوکتور اؤزونه چوخلو اومودلر بسله‌میشدی. اوزون- اوزادی سورغو- سووالا معروض قالان سلیمان‌ایسه اوولجه هویوخوب، سونرا گیجلمیشدی. «بونلار نه‌دن دانیشیرلار؟» – دئیه، اؤزونه سووال وئریردی. آمما گئتدیکجه اونون اؤزوده او آدامی، تانیماغا ماراقلانیردی: «کیم دیر بو، نه ته‌هر آدام‌دیر گؤره‌سن، بو اویونلاری کی منیم باشیما گتیریرلر، گؤر اونون اؤزونه نئیلیرلر،…؟» او اؤز سوواللارینا جاواب تاپا بیلمه‌ییردی. اونا وئریلن سوواللاردان معلوم اولوردو کی اونو او آدام ایله یاخین بیر موناسیبتده سانیرلار. یقین ائله‌ییبلر کی بونلار، ایکیسی بیر گروپدا ایشله‌ییرمیشلر. دوکتور ایسته‌ییردی کی شاللاق گوجونه هر شئیی ایچ ائله‌سین، آمما بالا-بالا سانکی اونون دا اوره‌یینه داممیشدی کی بیر شئیی اله گتیره بیلمه‌یه‌جک.
دوققوزنجو گون، آغیر بیر ایشکنجه‌دن سونرا گلیب سلیمانین باشینین اوستونده اوتوران دوکتور بیر سیگار یاندیریب، اونون الینه وئریر: “گه‌ده سن نه قده‌ر کؤتک یئیه‌جکسن؟ ایت جانی وار سنده مگر، دانیش اؤزوو قورتار! عینادین دا بیر حددی وار. دئمیشم یئنه ده دئییرم، نامردم اگر بوراخماسام سنی. قیچلاریوین یاراسی توختاسین قوی گئت ایشیوه، گئت زیندگانلیغوا. سنی اوسته یوللایاندا واللاه من اؤزوم ده عذاب چکیرم. آخی سن منیم اوغلوم یئرینده‌سن. آمما مجبورام. آخی منیم ده بوینومدا وظیفه وار، ایش ایستیرلر مندن، یولداشین هر بیر شئیی دانیشیب، سنه بیر سؤز قویماییب قالا. آمما من ایسته‌ییرم سنین اؤز آغزیندان دا ائشیدم. ایکی سؤز بیر اولسا دای قورتاردی. او یازیق دا سنی گؤزله‌ییر، ایکیزی ده باهم بوراخاجام گئده‌سیز. دوزه زاوال یوخدو، جاوان‌سیز، نادان‌سیز، بیلیرم، آمما اینشاللاه بوردان گئدندن سونرا داها اونون- بونون فئلینه اویمازسیز. البته گره‌گ منه سؤز وئره‌سیز. اوغلان گل گؤروم، گل کؤمک ائله”- دئیه، گؤزتچینی چاغیریر.
ایکی نفر گلیر. سلیمانی دبردیب، اوزو دیوارا قویولموش بیر دستکلی صندلین اوستونه اوتورتدولار. دوکتور ایکی صفحه کاغاذین آراسینا بیر کاربون قویوب سانجاقلاییر. گیتریب قویور سلیمانین قاباغینا: “من‌ده گئدیرم، هئچ کیم بوردا یوخدور، اوتور توختاقلیقلا سؤزلریوی یاز قورتار!»
سلیمان یئنی‌دن سؤزلرینی یازیر. دوکتور قاییدیب ورقه‌نی آلیر؛ اوخوجاق قودوزا دؤنور.-“حققا کی زینازاده‌ایمیشسن. گه‌ده من سنه بیر قورانلیق سؤز دانیشدیم قیریغین بیری قیریق! منی ساریمیسان؟ بو یالان- یولانی نئچه یول منیم قافاما باساجاقسان؟”- دئیه، “نئچه یول، نئچه یول؟” سؤزونو تکرارلایاراق یوگورور، آرخادان سلیمانین قولاقلارینی چنگه‌له‌ییب، دبردیر. اونون صیفتینی اوچ- دؤرد دفه دالبادال دیوارا ووروب قایتاریر. قان سلیمانین بورنونون دئشیک‌لریندن فیشقیریر. دوکتور اونو دالی- دالی چکه- چکه گتیریب بیر صندلین اوستونه سالیر. سلیمانین گؤزلری قارالیر، اوچونوب هوشدان چیخیر.
بیر وئدره سویون باشینا تؤکولمه‌سی‌ایله، سلیمان سیلکه‌له‌نیر. هاچاندان- هاچانا گؤزلری گوج‌ایله آچیلیر. اونون قان- قیرمیزی گؤزلرینده هئچ بیر حیس، حتا نیفرت حیسی‌ده دویولمور. اونون اوچون سانکی دونیا سونا چاتمیشدی. دوکتور میزین آرخاسیندا دایانیب سیگار چکیردی. او سلیمانین آییلماسین گؤرجک اؤزو ایله دانیشیرمیش کیمی سلیمانا ائشیتدیریر: “منی یاندیران بوراسیدی کی قاباق یازدیقلارینین‌دا گونه بیر باش- قولاغین ویریب، قیسالدیر. معلوم دئییل گیج‌دی بو دیوس، یوخسا بیج‌دی؟ ائله‌دیر یا یوخ؟ سننه‌نم، دیللن! دی جاواب وئر منه!”- دئیه، باغیریر. سلیمانین آغیزی توتار توتماز:
–          نه‌یی یازمامیشام؟
–          چوخ شئیی. بو یول نییه گه‌ده‌نین آدین یازماییبسان؟
–          آدین؟! من اونون آدین بیلمیرم، نئجه یازیم؟
–          “نئجه؟ سن اونون آدین بیلمیرسن؟ گه‌ده اوورش، منیم اؤز اوزومه یالان دانیشیرسان؟ بیلمیردین بس نئجه یازدین؟ اولمویا یاهالیرسان؟ قان قوسدوررام سنه من. دئدیگینی دانیرسان؟” دئیه، سلیمانی وئریر شیلله‌نین آغیزینا. سلیمانین بورنونون قانی یئنی‌دن آچیلیر.
بو آن قاپی آچیلیر. باشقا بیریسی ایچری گیریر. سلیمانی دوکتورون الیندن آلیر: “بابام نه خبردی؟ چوخ عصبی‌سن دوکتور! بئله گئتسه سکته ائلرسن. خواهیش ائلیرم سن بویور گئت، اجازه وئر قوی من حل ائله‌ییم؛! –دئیه، دوکتورو اوتاقدان چیخاردیب، قاپینی اؤرتور. دسمال قوطوسونو گؤتوروب سلیمانا ساری اوزادیب-“گؤتور، گؤتور آغیز-بورنووو تمیزله!”- دئییر. سلیمان دسمالدان گؤتوروب بورنونون قاباغینا توتور. کیشی ایسه قوطودان بئش- آلتی واراق دسمال چکیب، میزین اوستونده‌کی بارداغین سویو ایله ایسلادیر. سلیمانین یانینا گلیر؛ باشلاییر اونون اوز- گؤزون سیلمه‌یه. اوزده داها اوزلوک قالمامیشدی. ذوداق‌لار هؤرولوب اولموشدو بیلک یوغونلوقدا. بورون شیشیب قیزارمیشدی. گؤزلرین آلتی، یاناق‌لار گؤم-گؤی گؤیریب، قولاق‌لاردان ایسه، یاریشدان چیخمیش خوروزون پیپیگی تک، قان- ایرین سیزیردی. کیشی سلیمانین اوزون سیله-سیله، “بابام گؤر أوزوو نه گونه قویوبسان؟ اؤزوندن ساوای دوکتورو ده ده‌لی ائله‌میسن. کیشی آز قالمیشدی سکته ائله‌یه. پیس آدام دئییل او، آمما متأسفانه چوخ عصبی‌دیر. اؤزوندن چیخاندا بیلمز نه ائله‌ییر”- دئییر. آغیزین سلیمانین قولاغینا یاخینلادیب پیچیلداییر: “ایکی اوچ نفر ایندییه‌دک الی‌نین آلتیندا اؤلوب. شانس گتیردین من گلدیم چیخدیم؛ یوخسا آللاه بیلیر نه اولاجاق‌ایدی. یاخشی، ایندی دئی گؤروم جریان نه‌دیر؟
–          منی قارالاییب کی او کیشی‌نین آدین یاز، دئییر قاباق یازیبسان، ایندی نییه یازمیرسان.
–          یاخشی، یاز دای، اودا بیر سؤز دور.
–          آدین بیلمیرم، نئجه یازیم؟
–          بس قاباق نئجه یازمیشدین؟
–          من یازمامیشام، یازا بیلمزدیم.
–          بابام گوناه بو دوکتورده‌دی واللاه. از بس کی ویریر، هامینی گیجلدیر. یاخشی فیکیرلش اوغلوم، یازماسایدین کی او دئمزدی. اولمویا اؤزوو ایتیریبسن؟ ال- آیاغیوی نییه داغیدیرسان؟
–          بو نه سؤزدو؟! ایمکانی یوخدور من یازمیش اولام. من بیلمه‌دیگیم آدی نئجه یازا بیله‌رم؟
–          قوی من باخیم گؤروم، آدین نه ایدی سنین؟
–          سلیمان
«سلیمان، سو، لی، مان» دئیه- دئیه پوشه‌لری آلت- اوست ائله‌ییر، بیرین گؤتورور، آچیب ورقلره بیر-بیر باخیر.
–          یاخشی، دئمه‌دیم سنه، بابام یازماسان کی دئمز. «بویور، بودا سنین اؤز خطین!”
سلیمان هویوخور، ایسته‌مه‌دن یئریندن قالخیر:
–          بو اولان ایش دئییل، ایمکانی یوخدو، هانی؟ گؤسترین!
–          گؤستره‌جه‌یم، تلسمه! آمما بونو دئییم کی سنده ده بیجلیک وار هاآ… بس بئجاها کؤتک یئمیرسن. معلوم اولور کی ائله بئله‌سی بیر آد یازمیسان، سونرا یاددان چیخاردیبسان، ایندی اؤزوو تولکولویه ویریب، ایسته‌ییرسن کی آدی اؤیره‌شیب، دوباره اونو یازاسان، هاآ؟ بو اولماز، یوخ، بونو دوکتور قبول ائله‌مز
سلیمان داها اؤزون ساخلایا بیلمه‌ییب، سسین اوجالدیر:
–          هئچ ده ائله دئییل. هر آد اولور اولسون، آنجاق منیم یازدیقلاریمدا بیر آدام آدی گلسه، من حاضیرام…
–          الینی گتیر آشاغی! قابان اوغلو قابان! دوکتور بیلر، سن بیلرسن، اصلاً منه نه ربطی وار؟ هله منه الین‌ده اؤلچور قودوخ…
ائله بو آن‌دا دوکتور آدامجیل بیر قورد کیمی ایچری یوگورور: “من تانیرام بو ایت امجه‌ییندن سوت اممیش قورومساغی، تانییرام بونو من!”- باغیرتیسی ایله دوشور سلیمانین جانینا. “منه عنتر اوینادیرسان، قورتاررام بو اویونو من. گه‌ده گل، گل آپار بو اوورشی، بو گئجه یا منه وئرن آللاه‌دیر یا بونا، گل آپار اوسته، گه‌ده گل!”
دوکتور بو سفر سانکی دوغرودان‌دا ده‌لی اولموشدور. اومودونو اوتوزموش، شکسته اوغرامیش بیر آدامین سون چالیم- ویریم‌ین نوماییش ائتدیرن دوکتورو اونون امکداشی، قولوندان چکیب سیلکه‌له‌مک ایله اؤزونه گتیریر، و تحککوم ایله اونو ایته‌له‌ییب ائشیگه آپاریر.
یئره سریلمیش سلیمانین ذهنی هوشلو- هوشسوزلوق سرحدینده دولاشیردیسا، او، قاپی دالیندا دانیشیلان سؤزلری سئچه بیلیردی:
–          بابام سن نه ائدیرسن؟ اؤلدوردون گه‌ده‌نی. سؤز چکمک هنر دی بابام، زور دئییل. بو دفه‌ده بونو یوخاری یوللاسان، بیل کی اؤلوسو قاییداجاق. بابام سیشدیغین پوخو هله یومامیشیق. او قده‌ر اطلاعاتی الدن وئردین، ایندی یاپیشیبسان بو بدبختین یاخاسیندان؟ بابام سؤزو یوخدو دانیشا، باشا دوش!، من ییرمی ایل‌دی بو ایشده‌یم.
–          من، آخیر اونون دیلین آچارام.
–          سندن بؤیوگو ده اونون دیلین آچا بیلمز. بیلیرسن نییه؟ چون سؤزو یوخدو. سال الدن دئدیم! بو، بیر دستوردو سرهنگ!

(بیرینجی بؤلومون سونو)

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سندلی اوزون حیکایه

یالقیزلیق، دویغولار، دوشونجه‌لر (۱)

نریمان ناظیم
www.ishiq.net

آذربایجان ادبیات و اینجه‌صنعت سایتی

سندلی اوزون حیکایه

یالقیزلیق، دویغولار، دوشونجه‌لر (۱)

نریمان ناظیم
www.ishiq.net

آذربایجان ادبیات و اینجه‌صنعت سایتی

سندلی اوزون حیکایه

یالقیزلیق، دویغولار، دوشونجه‌لر (۱)

نریمان ناظیم
www.ishiq.net

آذربایجان ادبیات و اینجه‌صنعت سایتی