چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح

اوزاق‌لاردا گؤی اوزو قارالدی بیردن. گلیب پنجره‌نین قاباغیندا دایاندیم. نه‌ده‌ن بئله توستولوایدی هاوا؟ بلکه‌ده بیر یئر اود توتوب یانیردی؟ نفسیمی دالی قایتاردیم. پنجره‌نی باغلادیم. اوسگورمه‌یه دوشسه‌یدیم اگر، قورتارماق بیلمزدی.
گؤزومو قیرپمادان حیرت‌له گؤیه باخیردیم. قارالیق گئت- گئده یاخینلاشیردی. توستونون بونجا قارالیغینا، اؤزوده بو سرعت‌له یاخینلاشماسینا اینانا بیلمیردیم. وای! ایندییه‌دک بو قده‌ر قارا قوشو بیر یئرده گؤرمه‌میشدیم. قوش سئل‌ایدی، آمما نه بیر یئری ییخیردی،نه اؤزو ایله بیر شیی آپاریردی.

قارانقوش‌ایدیلر یوخسا؟ گؤیده دالغالانیردیلار. جیککیلتی‌لری گؤیه یئرله‌شمه‌د‌ن یئره دولموشدو. من سئون قوش‌لار، اوره‌ییمده بیر زادی قاینادیردیلار. بعضی‌لری گئری قالیردیلار. اؤزونو ایتیرمیش‌لر کیمی اوچوردولار؛ دالغالار گئری قاییتدیقدا قاریشیب اونلارا گئدیردیلر. بعضی‌لری هوندور بنالارین اوستونه قونوب، بیر آز دینجلدیکد‌‌ن سونرا قانادلانیردیلار. اوزاق یئرلردن گلیب اوزاق یئرلره گئدنلره بنزه‌ییردیلر. قار چوخ تئز باشلامیشدی، چوخ تئز. منسه اوشویوردوم. چوخ اوشویوردوم. اوستومه نئچه یورغان چکه‌- چکه، یئنه‌ده اوشویوردوم. سوبایا دایانیردیم، گؤوده‌م یانیردی، ایچیمده کی بوزلار قاتی‌لاشیردی آمما.

اونلارلا اوچا بیلسیدیم اگر! اونلارلا اوچماغا قرارلاندیم. گونئی‌دن باشقا گئده‌جک‌لری یئر اولا بیلمزدی. اونلار یالنیز گونش یوردونون یولچولاریدیلار.

پنجره‌نین هره‌سینه چیخیب، قوللاریمی آچدیم. قالدیریب، ائندیریردیم. بیر آز سرعت‌لندیردیم. گؤزلریمی یومدوم. بیریسی منی توتارکن باغیردی، دلی‌نین بیری دلی دوش یئره. سؤزونه باخمادان ایشیمه دوام ائله‌دیم.
قوش‌لارلا برابر، گؤیده دالغالانیب گؤنئی‌یه ساری اوچوردوم. گؤیون اوزوندن هر شئیی گؤرمک اولوردو. ایچیمده‌کی بوزلار یئرین وئرمیشدی قاینار بولاغلارا، ایستی دولوردو جانیما.
قوش‌لار منی احاطه‌لییب، جیککیلده‌یه- جیککیلده‌یه گلین آپاریردیلار گونئی‌یه دوغرو . آشاغییا باخدیم. پنجره‌نین هره‌سیندن ایکیسی‌ده منه باخیردیلار.

چاپ

2 پاسخ

  1. سلام
    بو دویغوسال حکایه نى کئچن گون، عزیز اوستادیم «رضا همراز» جنابلاری وئردیگى بیر اؤزل درگى ده اوخودوم. بورادا گؤردویومده دئدیم بو واسیطه ایله «روح‌انگیز خانیم پورناصح»-ه اؤز تشککورومو بیلدیریم.
    ایشیق سیته سینى دولاندیران لارا ایسه ساغ اولسونلار. گئت-گئده چوخ گوجلو ایله دگرلى اولور.
    درین سایغی-حؤرمتله

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

گونئی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

گونئی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی

گونئی

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی