چئویرن: رقیه کبیری
ترجمه: رقیه کبیری
رقیه کبیری


سالام آژدان
رقیه کبیری

قاسیم آقا قازاق گوله-گوله سوروشدو: «بویون آتمسفر نئجه‌دی، میرزه؟»
علی قهرمانی بیغ‌لارینی ائشه- ائشه دئدی: «او دی…ث شاه‌بختی تربیزدن ایتیلیب گئتسه‌یدی، رادیو سهلدی، قیرام دا گتیره‌ردیخ زیندانا.»
میرزه باغیر چیلتیک چالیب، بئلینی بورجودا بورجودا اوخودو: «آژدان آژدان آژدان! سن منه دئیرسن یامان- من سنه دئیرم مامان!»
«دئمه‌دین بویون آتمسفر نئجه‌دی میرزه؟»
«قاسیم آ، گؤزله سالامیمین جاوابینی آلیم، سورا دئییم کی بویون گونش شرقدن چیخاجاق یوخسا قربدن.»
علی قهرمان قاشلارینی ییغدی: «قادام او سالامین جاوابینا گلسین، بیر رادیوموز اولسایدی…»
میرزه باغیر چیلتیک چالا-چالا زیندانین حیطینه چیخیب، سو شیرلرینین قیراغیندا دایانیب، کئشیک‌لرین ده‌ییشیلمه‌سینی گؤزله‌دی. میرزه باغیر سیاست عرصه‌سینین هانسی سمته مئیل گؤستردییینی پاسیبان‌لارین سالام آلیش- وئریشی ایله اؤلچردی. میرزه باغیرا گؤره پاسیبان‌لار اونون سالامینی اوجادان آلان گون‌لر سیاست عرصه‌سی شرق قدرتینه ساری، سلام جوابی ائشیتمک یئرینه یامان یوُووز ائشیدن گونلر ایسه، سیاست عرصه‌سی غرب قدرتینه مئیل گؤستررمیش.
میرزه باغیر أل- اوز یومامیش، گؤزونو قاپی‌یا زیلله‌میش، کئشیک پاسیبانینی گودوردو. ائله او آن قاپی آچیلیب، پاسیبان بادیمجانی زیندانین حیطینه گیردی. هله هئش زاد اولمامیش، پاسیبانین اوز- گؤزوندن قضب یاغیردی. پاسیبان قضب‌لی باخیشینی اونا تیکنده، ایشین یاش اولدوغونو باشا دوشدو. پاسیبانین گؤزوندن ایتیلمه‌لییدی. اؤزونو گؤرمه‌مزلییه ویریب، سلام وئرمه‌میش، حیطده یئری‌ین زیندانی‌لارین آراسینا سوزولوب، یئریمه‌یه باشلادی. آمما پاسیبان ‌اونو قره‌له‌میشدی. آجیقلی باخیش ایله اونو دولاندیریردی. پاسیبانین سرت باخیشی میرزه‌نین کوره‌یینی ده‌لیردی دییه‌سن. اونون باخیشیندان قاچماق اوچون تووا دوشدو، یئریمک یئرینه حیطده قاچماغا باشلادی. بیر ایکی دؤروه قاچمامیشدی کی قیچی بورخولدو. أییلدی قیچینی اووشدورسون، قضادان ائله او آن بیر طیّاره زیندان حیطی‌نین اوستوندن اووولتویلا اوچدو. پاسیبان زیندانی‌لاری قیراغا ایته‌له‌ییب، قفیلدن میرزه باغیری سیلله- تپیک آلتیندا سالادی.
«کؤپک‌اوغلو وطن‌سیز، اوروس نؤکری، خائین دئمقرات ، دئیرسن بَه گؤزوم کوردی؟ گؤرومورم؟ ایشین اورا چاتیب کی یئردن داش گؤتوروسن، آرتش‌ین طیّاره‌سینی داشا باغلییاسان؟»
میرزه باشا دوشدو کی یالتاقلار راپورتوتو پاسیبان بادیمجانی‌یه وئریبلر. گون یوخ ایدی نومایش‌لرینده پاسیبانلاری یانسیلاییب، زیندانی‌لاری گولدورمه‌سین. آمما ایسته‌میردی ایش اوزانسین، أل- اوزونو یوماق ماهاناسی ایله دینمز- دانیشماز سو شیرلرینه ساری گئتدی. زیندانین سو شیرلری هئچ زاما باغلانمازدی، بولاق سویو کیمی گئجه- گوندوز چالاسره آخاردی؛ میرزه ألینی سویا اوزالتمامیشدی کی، یئنه پاسیبان تپیک‌لرینی اونون جانینا دؤشه‌دی.
«قانماز گئده، بولموسن شیری ائله آشمازلار؟!»
میرزه باغیر هئچ زاد اولمامیش کیمی سوروشدو: «سرکار آژدان، سیز بویورون بو آچیق شیرلری نئجه آچارلار، من ده ائله‌سی آچیم داااا»
«ائشک اوغلو ائشک، ایشین اورا چاتیب کی دؤولت مأموروننان حساب سوروشوسان!؟»
پاسیبانین أل چکن گونو یوخ ایدی. گؤرونوشه گؤره بویون جین آتینا مینمیش، یئنمک قصدی ده یوخ ایدی. میرزه باغیر اؤزلویونده دوشوندو: «من قاراقاباخلی قابانلاری گؤلدورورم، بو آژدانی جین آتیندان یئندیرمه‌یه نه وار کی!»
قفیلدن چیلتیک چالیب، پاسیبانین قاباغیندا بئلینی بورجودا بورجودا اوخودو: «آژدان آژدان آژدان! …سن منه دئیرسن یامان- من سنه دئیرم مامان!… سن منه دئیرسن یامان- من سنه دئیرم مامان!»
پاسیبان بادیمجانی‌نین نریلیتیسینه ایچریده‌کی زیندانی‌لار حیطه تؤکولدولر.
«قیرجانما گئده… قیرجانما قیریشمال!…قیرجانما دئمقرات تؤره‌مه‌سی!»
زیندانی‌لار اورتایا گیریب، میرزه باغیری پاسیبانین تپیک‌لرینین آلتیندان قورتاردیلار. قاسیم‌آقا قازاق قاش- گؤزو ایله میرزه باغیرا گؤزدن ایتیلمه‌یینی اشاره ائتدی. میرزه اطرافا گؤز دولاندیریب، قورتولوش یولو آختاردی. گؤزو موستراحا ساتاشاندا، قورتولوش یولونو تاپدیغینا گؤره سئوینجک موستراحلارین بیرینه تپیلیب، قاپینی باغلادی. آمما پاسیبانین أل چکن گونو یوخ ایدی، قضب ایله موستراحا ساری گئدیب، قاپینی تپیک آلتینا سالدی.
«بئیار کؤپک‌اوغلو، بئقئیرت دئمقرات، بولموسن موستراحدا ائله‌سی اوتومازلار؟»
میرزه باغیر قاپینی یاریمچیلیق آچیب، دئدی: «سرکار آژدان، سیز بویورون نئچه اوتورماغی منه گؤرسه‌دین من ده سیز بویروردوغوز کیمی اوتوروم.»
پاسیبان قاپییا هجوم گتیرنده میرزه باغیر در حال قاپینی باغلادی. پاسیبانین حیرصی هله ده سویومامیشدی، یئنه قاپینی تپیک‌لرکن دئدی: «گئده کؤپک‌اوغلو ائله‌سی اوتورماغین بس دئییل، بو سس‌لر ندی چیخاردیسان؟»
میرزه باغیر یاشاییشینین هر آنیندا تیاتر صحنه‌سینده اولدوغونو حیس ائدیردی، پاسیبانین قره قورخو گلمه‌سیندن اوزونه توز قوندورمادی، یئنه قاپینی یاریمچیلق آچیب دئدی: «سرکار آژدان، مه‌یر خبریز یوخدو شاهنشاهین آرتشی دئمقراتلاری خلع سیلاح ائله‌ینده توفح‌لرینی سویدولار، توپخانالارینی آلمادیلار!…»
زیندانی‌لارین گولمک سسی گؤیه قالخدی. پاسیبان بادیمجانی وار گوجویله قاپییا بیر تپیک یاتیردیب، زندانیلاری یامانلایا یامانلایا اوزاقلاشیب، میرزه‌نین تیاتر صحنه‌سیندن ائشییه چیخدی. میرزه باغیر مستراح قاپیسینی آچیب، اوغرو پیشیک کیمی ساغ- سولونا باخاندان سونرا ائشییه چیخیب، قاسیم‌آقا قازاغا دئدی: «آتمسفر گؤیلووه دوشموشدو، بویور بو دا بویونون آتمسفری، ایندی سن دئنه گؤروم، بویون گونش شرقدن چیخیب، یوخسا قربدن؟»

۹۶٫۹٫۱۷

بو حئکایه سعید منیری‌نین یازدیغی، میرزا باقر حاجی‌زاده کیتابینین روایت‌لری اساسیندا یازیلیب.

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سالام آژدان / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

سالام آژدان / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

سالام آژدان / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی