حیکایه‌جیک‌لر
ایلقار مؤذن‌زاده
- بیر شه‌هر گؤز
سحر چاغی یوخودان کال کیمی دوردوم. گئجه‌د‌ن قالمیش قانلی پیچاغی یویوب، گیجه‌له- گیجه‌له گئییندیم، خییاواندا اوزو آشاغی دیغیرلانیردیم. بیر تاکسی‌چی اؤنومده ساخلادی؛ فرمانین آرخاسیندان باشینی آشاغا ایه‌ر‌ک، منه زیلله‌ندی.
-گئتمیر‌م قارداش، دئدیم.
دایانیب بیرآز منه باخدیقدا، باشینی بوللایاراق سوروب گئتدی. سوروجونون ایشینه شوبهه‌لندیکده، آرخاسی سوره ماشینا باخیردیم. قاباغدان ، اوشاغی‌نین الیندن یاپیشمیش بیر قادین گلیردی. منی گؤره‌ر‌ک دیسکینیب، دوداغینی دیشله‌ییب سوووشدو. دؤنوب قادینا باخدیم. یاواش-یاواش آددیملایارکن قادی‌نین گؤستردیییی تپکی، منی فیکیره دالدیردی. دؤرد نفر گنج قیز بیر-بیریله دانیشیب گوله-گوله، خیاوانین اوتاییندا یئریییردیلر. منی گؤره‌رکن دایانیب شاشقینجاسینا بیر-بیرینه باخیر، باشلارینی توولاییردیلار، سانکی اؤلو ییئه‌ن گؤروبلر! یاواش-یاواش اؤزومه شوبهه‌له‌نیب اوستومه-باشیما باخدیم! زیپیم آچیقدیر، یوخسا باشیمین توکلری بیز دایانیب؟ کؤینه‌ییمی ترسینه گئیمیشم، یوخسا شالواریمین آیاغی جورابیمدا قالیب؟
بوتون شه‌هر منه باخیر، هر یولدان کئچن، آراباچی، توکانچی …اؤزومله بیرگه، بیر شه‌هر گؤز داشیییردیم. خییاواندا یئریدیکده، بدنیمه تیکیلمیش گؤزلر، قیییق کیمی گؤوده‌مه سانجیلمیشدی.
فیکیره دالدیم. دونه‌ن یاپدیغیم جینایتی دویوب مو شه‌هر؟
شه‌هرین اورتا دؤرد یولونا یئتیشه‌ر‌ک، همه‌شه آچیق اولان قفه‌نی باغلی گؤردو‌م. قفهنین شوشه‌سینه بیر یازی یاپیشدیریلمیشدی. یازیدان هورکه‌ر‌ک، الیمده‌کی آلمانین چؤته‌لینی یاواشجاسینا آرخین ایچینه هئلله‌دیب آغزیمی سیلدیم.
قفه ایفطاردان سونرا آچیلاجاق…!
- پوشک
اؤنومده ۱۰ نفر قیز دوزولوب. سئودیییم قیزدا اونلارین ایچینده دیر. سئوگیلیمه پوشک آتیب، “شیرسن خط” اویناییرام. اویون بئله دیر: هر هانسی قیزا ایلک دؤنه شیر دوشورومسه، سئوگیلیم اولور و من اوینون سونونا کیمی اؤزومله ساواشیرام. اویون داوایا چکیر؛ “من”، “اؤزوم” له ال به یاخا اولوب ساواشیر. نیه کی سنه چاتینجا، ۹ دؤنه جئیران جئیران قیزلارا شیر دوشموشدوم و سنه شیر دوشه نه کیمی ۱۰ دؤنه دیغاللیق ائتمیشدیم.
- گیروگان
یئرین گؤیون ایشلرینی دایاندیرمیشام. بوتون کاینات منی ایزله‌ییر. باشقا دونیانین آداملاری بئله دالیم سوره گلیب‌لر. بیر هفته دیر نه اؤله‌ن وار نه یاس توتان؛ هله لیک آفریقادا هئچ کیمسه آجیندان اؤلمور. هئچ بیر اوغلان هئچ بیر قیزا دییه بیلمیر “سندن ساری اؤلوره‌م!”.
اؤلومه یاندی-قیندی وئریره م. دونیانی وورموشام بیربیرینه. قبریستانلار بیر هفته دیر تعطیل اولوب.
چوخ سینیرلیه‌م و چوخ کدرلی، آرتیق ۸ گوندور سئوگیلیمین اؤلومونه گؤره قانیم قارالیب و تانریلا ساواشدیغیمدا، عزرائیلی توتساق توتموشام!
