چئویرن: ایشیق
ترجمه: ایشیق
ایشیق

«آ»نان کیمی بیرلشدیریرسن؟
اولدوز صادق

گولمکدن آز قالا معده، باغیرساقلاریمیز آغزیمیزا گله؛ یان – یانا دوشموشدوک؛ او قدر ایکی اللی دیزلریمیزه چیرپمیشدیک اللریمیزین ایچیله بیرده دیزلریمیزین اوستو قیپ – قیزارمیشدی.
آیتن بیر سؤزو آز قالا اون سئری تکرار ائدیردی. بیزلر هر اون سئریده ده گولمکدن قیریلیردیق.
– سن کیمینن کیمی بیرلشدیرمیسن؟ «آ»نان «م»یی بیرلشدیرمیسن؟
ساناز، گولمکدن کئچینیب گؤم – گؤی اولوردو؛ اوست دوداغی قاتلانیردی بورنونا ساری؛ گؤزلرینین ایچی قیپ – قیرمیزی اولوب، پیر- پیر سو آخیردی. بیردن سسی کسیلیردی؛ گوج ایله اؤزونه قاییدیب: «سن آللاه بسدی اؤلدوم، آخی نفسیم دا گلمیرها اوره. . ییم آجیدی» یئنه قاققیلتی‌ایلا دئییردی: «آیتن آخی بو سؤزلری هاردان چیخادیسان؟».
سانازین ائوی دینج ائودی. راحاتجا سؤز – سوو اولمادان اوردا ییغیشیب گولوب- دانیشیریق، گاهدان سیگار دا آلیشدیریریق.
هر بیریمیز قاپیدان ایچری گیریب، باشماقلاریمیزی چیخاردارکن، ارلریمیزین نئجه چیلتیک چالمالاریندان دئییریک. اولکرین، گولمکدن گؤزلری ایشیلداییر؛ دئیه‌سن گلیرکن، یولو باشا- باش گولوبدو. اییلیب آدیداس باشماقلارینین باغینی آچارکن چالخالانیب بیر یانینی دووارا دایاییب اوزو پؤرتوشه – پؤرتوشه بیر آز گولوب، دئدی:
– جانیزا آند اولسون، ساناز زنگ ویرماق همن، اریم گوشینی اوستونه قویوب قویماز، گؤزلری ایشیلدییه – ایشیلدییه دئدی، تئز اول، گئجه ساناز گیلده‌سن، حاضیرلان بیله‌وی قویوم ساناز گیله یوباتما تئز اول–تونتونمه!
اولکر بیر باشماغینی چیخاردیب، قاپینین ایچری یانینا قویارکن دئدی:
– بیلمه‌دی نه سرعتینن منی بورا چاتدیرا
منی، سونرادا سانازی قوجاقلاییب اؤپدو.
من هامیدان تئز سانازگیله گلمیشدیم. اونو گؤرور – گؤرمز گؤزوم اَینینده کی دونونا ساتاشدی. نارینجی – قیرمیزی بویالی چیت پارچادان پیلیسه‌لی بیر دون ایدی. گئیملرده ان چوخ دونو سئودییم اوچون، هر یئرده اولورسا گؤزوم دونلارا دوشر. قوللاری حلقه‌ای، اته‌یی دیزلریندن اوسته دایانمیشدی. دئدیم:
– یانامییه‌سن بو دونو گینه هاردان آلمیسان؟نییه من‌نن بئله ائلیرسن آخی، بیلمیسن من دون دلیسی‌یم؟
سانازگؤزلرین سوزدوروب، دونونون اوتای بوتاییندان یاپیشیب، بیر فیرلانیب دئدی:
– اریم آلیب با!.
چوخ زامانلار اولور، آرتای‌لا بیرگه دولاشماغا، بازارا، یادا ساده بیر یوروشه بئله چیخمامیشام.
دویونون سویونو اوجاق اوستونه قویدوم؛ فندکی چیققیلدادیرکن، قاپینین زنگی سسلندی. ساناز قاپییا ساری گئدیب تصویری آیفوندان باخیب دئدی:
– نازلی دا گلدی.
من، اولکر، ساناز، قاپی قاباغیندا دایانیب نازلی‌نین یولونو گؤزله‌دیک. نازلی ائله آسانسوردان چیخماق همن ساغ الین دؤیدو سول الینین اوستونه، سونرا سول الینین ایشاره بارماغینی دیشلری آراسینا آلیب، دیشله‌ییب، دئدی:
– اؤلمییه‌سیز کیشیلر!
اولکر دئدی:
– هن بالا سن ده دردلیسن؟.
نازلی مانتوسونون دویمه‌لرینی آچیرکن، منی هم ده سانازی اؤپوب:
– هن بالا من دئماق همن دئدی، دور گئت من ده بیر گؤروم اوشاقلار هاردادیلار ییغیشاق شاهگؤلو ده، بیزده بیر استکانلاشاق. ائله بیل آلـلاهلارینناندی بیزی اؤتورسونلر بیر نفس آلسینلار.
اولکری اؤپنده، اولکر دئدی:
– نییه، پیچاق قویموشوق بویونلارینا؟
آرتا هئچ اوتاغیندان ائشییه چیخمادی دا؛ ائله اوردان سسله‌نیب دئدی:
– خوش اول، اؤپدوم
اوزون زاماندیر منی اؤپمه‌ییب آرتا.
نازلی مانتوسونو قاپی دالیسینداکی آسماجایا آسیب، آسماجانین یانیندا اولان گوزگویه باخیب، تئللرینی ساغ طرفه ییغیب دئدی:
– توهلریم نئجه اولوب قیزلار؟دوز دئیین هابویون آرایشگاها گئتمیشم دئییرلر تئل تازاشدان مد اولوب آخیمن ده چوخدانیدی تئل ویردیرمامیشدیم دئدیم قوی بیر حال- هاوام ده‌ییشسین.
نازلی یئنیدن بارماقلارین تئللرینین آراسیندا گزدیردی.
ساناز، نازلی‌نین یان ساچلارینا ال چکیب، اونلاری چیینلرینه سره‌له‌ییب دئدی:
– عجب ده گؤزه‌ل ویریبدی، هانسی آرایشگاها گئتدین؟
اولکر آتیلدی سؤزون اورتاسینا:
– ساغول ارگؤر نه ده خش قویور آروادینا.
نازلی دوداغین بوزوب، گؤزلرین سوزدورورکن، دئدی: «هن» اولکر، دیوارا دایانیب، اللرینی بیر- بیرینه قیفیللاییب: «بالا یاشاسین ائله قدیم کیشیلر» ساناز: «هن آهئچ اولماسا کیشیدیلر. واه- واه ایندیکیلر نه کیشیلیقلاری وار. . نه پوللارینمنه اوزونلوقدادا دیللری وار» هامیمیز گولدوک. ساناز: «ایندی بس یاشاسین فئمینیستلر» دئدی.
اولکر لنگرین او بیری آیاغیندان بو بیری آیاغینا سالیب:
– اولار دا ایسته‌دیلر ثواب ائلییهلر کباب ائله‌دیلر دابو کیشیلرین کیشیلیخلاری لاپ هئچ اولدی نه اولسون کی؟.
قیزلارا بیر گؤز دولاندیریب دئدیم:
– حتمن «فریماه»دا توهلرینی ویردیرمیساناو گون یولداشلاریمین بیری ده اوردا ویردیرمیشدی، چوخ گؤزه‌ل‌ایدی.
نازلینی یاخشی تانیرام، بئلنچی ایشلرین پوزونو وئرمه‌یه جان آتار، دییه بیلمهسه‌ده ویرنیخار سؤزونو دئسین. بیلیردیم نازلی او آن بوغولوردو.
اولکر گؤزلرینی برلتدی نازلییه، دئدی: «دوغوردان؟».
نازلی گؤز اوجو گوزگویه باخیب، دئدی:
– ههههندا گئده‌جاغام فریماهین یانینابیر آز باهادی آمما ایشی گؤزه‌لدی.
اولکر، یؤنهلیب کاناپه‌‌لره ساری:
– گلین اوتوراق داواللاه ننه اوره‌یی ایستر اورا گئتماخچوخ چوخ باهادی، جانیم چیخیر پولی قازانیرام تؤکنمه‌رم اولارین جیبینه؛ اؤزوده بوردان توکی ویریب اوردان اوزاناجاق»
ساناز: «هن، گلین اوتوراقاوشاقلاردان فریماهگیلینن یاخین دوستلوقلاری وار، دئییردی فریماهی باهالادان دوره پوللولار اولوبلاربی کارخانادارین قیزی گلیر دئییر پایه نرخین بیر میلیوندی، منی ایکی میلیونلوق بَزه، سورا او بیری کارخانادارین قیزی بحثه- بحث ائلیر، دئییر اونو ایکی میلیونلوق بزه‌میسن منی اوش میلیونلوق بزه!».
اوزون زاماندیر بَزَک سالونونا گئده بیلمهمیشم؛ وقت اولماییب؛ چوخ زاماندا پولوم اؤزوم اوچون اولماییب، بعضن ده هئچ ماراغیمی چکمه‌ییب. اولوب او زامانلاریم دا، هر دن هیجانلانیب گوزگوده اؤزومو سئویب، ایسدهمیشم اؤزومه یئتیشم، بزک سالونونا گئدیب اوز-گؤزومه باخمیشام، سونرا ائوه گلیب ایین- باشیما یئتیشیب، آرتانی گؤزلمیشم. آرتا قاپیدان ایچری گیریب، هئچ اوزومه باخمادان بیرینن جنگ ائدن کیمی قاش قاباقلی: «اؤلدوم خسته‌لیقدانبیر شئی وار یئماغا» دئییب، هوسدن دوشموشم. آرتا دئییر:
– ائله سن بوجور گؤزه‌لسنجانیم چیخیر پولو قازانماغا، آپاریب قر- قهبه‌لرین جیبینه تؤکمه.
اولکر دئدی:
– آللاه بالام دئییب دا بو جور آداملارا.
اولکر شهردن بیر ساعاتلیق اوزاقدا اولان سلیمی شهرکینده آیران کارخاناسیندا ایشلهییر، سحرساعات ۷ ده ائودن چیخیب آخشام ساعات ۵ قده‌ر، ائولرینه چاتدیغیندا ۵/۶-۷ اولور. هر گؤروشوموزده گؤزلری آخینار، ائله سره‌لنر کاناپه‌‌یه، هردن ده بیر یاشیل گؤزلری یوخویا دالار، زورلا اؤزونو ساخلار یوخوسو درینلشمهسین. رنگ به رنگ دؤرد خانالی کؤینکلری واردی، قاباقدان دویمه‌لنن کؤینکلردن. آت قویورغو ساچلارینی کؤینهیینین رنگینده‌کی کئش ایله باغلایار. اوسته‌لیک اؤزو توخودوغو قولباقلاری دا کؤینهیی، جورابلاری‌ایلا اویغون اولار. هر بازارا چیخدیقدا بیر بسته ساده رنگلی کئش، بیرده اونلارلا بیر رنگده جوراب آلماق اونون ده‌ییشیلمز عادتیدی.
دویو بیر آز آرتیق سودا قاینامیشدی؛ سانازی چاغیریب بیر آز دویولردن کفگیره ییغیب دئدیم:
– بیر باخ گؤردییهسن خمیر اولدیهن؟
ساناز نئچه دانا دویولردن آتدی آغزینا، دوداقلارین ییغیب: «هنتئز سوزاخباشیمیز قاریشدی» بیرآز دا سسین قیسیب دئدی:
– یانی نازلی پاتداردی ها دئمه‌سئیدی.
من گولومسه‌دیم. سوماخپالانی سینک-ین ایچینه قویدوغوم کاسانین اوستونه قویوب، اوردان قیزلارا سسلندیم:
– قیزلار دویونون سویونو ایستهمیسیز؟ بوتون ویتامین ب دی ها
قیزلار گولوشوب، نازلی دئدی:
– ال چکتازا بزک – دوزک ائله‌میشوخ سن ده ائله ویتامین فیکرینده اول.
هر بیر یئمهیین ویتامینین اؤلچوب بیچرم. آرتا باش قوشماز، تکجه یئمک اولسون دئییر. «سفئه اولمویینساخلادیم گئجه یاتان وقته» دئدیم.
آرتا نه قده‌رده واختی هئچه وئرمه دئسه ده، من ائله اؤز ایشیمده اولارام. بیر ویتامینلی یئمک یا مئیوه سویو عاغلیما تاخیلسا، اونو حاضیرلامایاناجان، ال چکمه‌رم.
نازلی دئدی:
– بو اوغلان بیر دیقه ده مهلت وئرمیرها بیلهمه، ائله آیاق اوسته ایشینی گؤردی باشیم پوزولدو. . نه قدر دئدیم پوزما بیله‌می، قولاغی هئچ ائشیتمهدی کی!
دویونون ایستی سویونون بخاری اوزومو بورودو.
آرتا دئدی:
– اؤزون بیلرسن گلیرسن، قالیرسانفرق ائتمز بیر شئی تاپیب یییه‌رمکئفینده اولمنیم ده بیرآز اوخومالیم وارگلسن اؤزون فیکرینده اول ها
دونن گوزگو قاباغیندا باشاردیغیم قده‌ر اؤزومه نازلاندیم.
دویودن قالخان بخار گؤزلریمی یاشلاندیردی!
آیتن، آلتی ایله یاخیندیر تبریزده دولتی دانشگاهدا حقوق ریشتهسینده درس اوخویور، عاییله‌‌سی «اورمو» شهرینده یاشاییرلار. بیر باشقا اورمولو قیزایله «آبرسان» دا گلگشت خیابانیندان مارالانا ساری، بیرگه ائو کرایه ائدیبلر. ایلک گؤردویونده اؤزونو ائله توتوب اوتورار، تانیمایان ائله ظن ائده‌ر چوخ جدی، کیمسهیه قووشمایان بیر وکیل خانیمدیر. اوجا بویلو، ائنلی کورکلی قارا ساچلیدی. دانیشیغی آستا-آستا، هیکلینه یاراشمایان اینجه سسی وار. اوزون قیچلارینی بیر- بیرینین اوستونه آشیریب دوببه-دوز اوتوراجاغین دایاناغینا دایانییب، ایکی اللرینین ایچینی ساغ طرفینده بیر بیرینین اوستونه قویار. بو طرز اوتورماق آیتن-ین ایلک گؤروش فیقورلارینداندی. بئله گؤرکم اونون دیش گوبودلوغونو بیر آز آلیر. بیر نئچه ساعات کئچدیکدن سونرا ، بیر آز آرا صمیمیلشدیکجه آیتن- ین بوزو آچیلیب داها ساخلاماق اولماز. دائما قول چانتاسیندا اعصاب قرصلاری واردی، ایکی ایل اؤنجه‌دن اعصاب دوقتورونا گئدیر. عاییله‌‌سی «اورمو» شهرینین آدلیم عاییله‌لریندن ساییلیرلار. آیتن ایکی چای آراسیندا قالانا بنزه‌ییر، بیر یاندان عاییله‌‌سینی داها زیروهلره قالخیزماق ایسته‌یر، بیر یاندان اؤزو ایستهدییی کیمی یاشاماق ایسته‌یر. دئیهسن اؤزونو، عاییله‌‌سی قوران چرچیوییه یئرلشدیرنمیر.
ایکی ایل یاریم اؤنجه ایدی اردبیللی بیر اوغلانلا تانیش اولموشدو، آیتن اونا ائله ویریلمیشدی آز قالا بیله‌سینی دانشگاهدان ائشیه سالسینلار. نه اؤزویدو، نه ده عاییله‌‌سینه باغلی اولان اخلاقی طرزلریدی، تام بام باشقایدی آیتن. هرآن اوغلان ایسته‌سه‌یدی اونون ائویندهیدی، هر گون توکان – بازارلاردا دولاشیب اؤزونه رنگ به رنگ آلت گئییملری آلیردی، قاپ باجاسیندان سوتیین شورت آسیلیدی، دئماق اولاردی عاییله‌‌سی یوللایان هر نه پول واریدی ائله آلت گئییملرینه خرجله‌ییردی. ایشی اؤزویله اوغراشماق اولموشدو. جانینین توکلری ایله، ساچلاری ایلا، قاشلارین نازیک آلدیریب، اوجلارینی تیغهایله قاشییب، قاش مدادی‌ایلا دوببه دوز اؤزونه قاش چکیردی، هئچ ده اوزونه یاراشمیردی. آیاغین تَپیردی بیر باشماغا، ایللاه- بیللاه یاراشیر، سئوگیلیم دئییر: «چوخ چکیجی اولورسان». ایشلری اورا یئتیردی کی، اوغلان دا داها بو ایشه معطل قالدی. بیر نئچه آی سونرا اونا ائویمه گلمه دئییردی. آیتن سه اونون قاپیسی اؤنونده آغلاییب یالواریردی. هئچ بیریمیزینده سؤزونه قولاق آسمیردی. ساده‌جه گؤزلرینین سویو آخیردی.
ایکی ایل اؤنجه پاییزین ایکینجی آیینین اورتالاریدی؛ آیتن، دانشگاهین حیطینده اوتورموشدو. پاییزین اود رنگلی یارپاقلاری یئل ایله سئویشیردیلر، من آیتن-ین یانینا اوتوردوقدا هئچ آنیمسامامیشدی. منله آیتن بیر کیلاسین اؤیرنجیسی‌ایدیک. آزچوخ بیربیریمیزنن دوستلوغوموز وار ایدی. آمما سون زامانلاردا آیتن پوزونتولارا دوشندن، هر گون کناریندایدیم. آیتن دئییردی:
– سن اولماسئیدین من دیرچله بیلمزدیم.
آرتا دئدی:
– سن ائله بو قیز اوسته زندگانلیغیمیزی باده وئره‌جکسن.
آیتن بیر دؤنه اؤزونو اؤلدورمک ایستهمیشدی، آمما ائو بیر یولداشی بیلیب تئزلیکجه اونو مریضخانایا گؤتورموشدو. سونرا آیتن دپروسیانا گیردی. ائله او زاماندان علاج یئمهیه باشلادی؛ دائما اویویوردو. یئنیدن عادی یاشاما باشلاماغی بیر ایل چکدی. اؤزونو توپارلاییب، درسینی بیتیریب، یوکسک لیسانسدان قبول اولدو. اولدو بیزیم ایندیکی دادلی دوزلی آیتن، اولورسادا گؤزلرینین او درین گولوشلریندن خبر اولماسا بئله!
آیتن ده گلدی، سئویل هر زامان هامیدان گئج گلر.
کاناپه‌‌لرده یایلاندیق. دم آلمیش شمال دویوسونون قوخوسو قیزارمیش سوغانلا زعفرانلی تویوق ائوی بوروموشدو. یاواش- یاواش قارینلار قورولداماغا باشلاییردی. آیتن دن باشقا هر بیریمیزین الینده بیر موبایل واردی. ساناز یاناکی اوزانیب، اوزون قهوه رنگینده بویامیش ساچلارینی کاناپه‌نین دسته‌سینه یایمیشدی. دونونون اتکلرینی باجاقلارینا چکمیشدی:
– هر نه قدر زنگ ویریرام گؤتورمور، گؤره‌سن ننه‌سی‌گیله زنگ ویریم اودا ایندی بازرسلیغی توتاجاق. . کیم وار؟ نییه گلیبلر؟ نئچه نفردیلر؟ ایندی آییری قالاجاقسیز؟ ویر – ویر دییهجاق دا
موبایلینی میزین اوستونه تولازلاییب، مطبخه ساری گئده- گئده: «قالار –قالار زنگ ویرار، نئینیم دا» دئدی.
منیم موبایلیم قولاغیمدایدی. آرتانین سسی گلرکن ایشاره بارماغیمی دوداقلاریما قویوب، قیزلارا دانیشماسینلار دئیه، گؤزلریمی برلتدیم:
– الو سلام نئجه‌سن؟ یاخچیسان؟ نئینیسن؟ شامینی یئدین؟ سوفره‌نی یغیشدیر ها. آیاق آلتیندا بیر شئی قالماسین ائله ائوده سن؟ درسلرینی اوخودون؟
بیردن بیر های گوشو آرخاسیندان قوپدو، «بسدی دا» گوشومو تئز خاموشلاییب قیزلارا گولومسندیم. مطبخه ساری گئتدیم: «یانمییهسن بیر گون شیرین اول دا» اؤز-اؤزومه دئدیم. اوتقوندوم، گؤز یاشلاریم آخماسین دئیه، دویو قابلاماسینین قاپاغینی گؤتوردوم بخاری اوزومه ویردی. اولکر صوراتینی آسیب سسسیز اوتورموشدو. قیچلارینی کاناپه‌نین دسته‌سی اوستونه آشیرمیشدی. تئز – تئز موبایلینین دویمهلرینه باسیردی. ساناز اولکره اوز دؤندریب دئدی:
– چوخ حیرصلیسن، گئیم اوینورسان؟
اولکر اوزونو موبایلیندان چکمزدن: «گؤر ایندی فیسبوکدان ال چکیب منه بیر زنگ ویرار، یوخ واللاهی من بیلمیرم دا بو زهلم گئدمیش فیسبوک دا نه آختاریر. دئییرم لپ تابی گؤتوروب پنجره‌دن تونله‌ییم آشاغایا. من یادا توشمورم کی!» نازلی موبایلین دیزلری اوسته قویدو. اولکره دئدی:
– سن آللاه نییه او جور دئییسن آخی چوخ دا یاخچیدی، من چوخ کئف ائلرم، ائوده باشیمی قاتیر، گؤروسن اوچ- دؤرد ساعات اونون قاباغیندییام. تئز- تئز ایشلریمی گؤررم، غذامی پیشیررم قاچام اوتورام فیسبوک باشیندا.
اولکر:« بئکارسان دا زهلم گئدیر» دئدی. « مجازی دوستلوقلار اوچون پیس ده‌ییر یازیلاریوی اوخویورلار» دئدیم.
ساناز دئدی:
– بیز ار – آرواد گیریشمهمیشوق بئله زادلارا.
سوفرا سالیردیق سئویل گلدی: «چکیش- برکیشنن گلدیم ها، دئییردی یوخ کی یوخ. دئدیم باغریم ائوده قالماخدان چاتدادی. ایکی ساعاتلیق گتیردی دئدی دؤوره ده فیرلانیرام، شامینی یئه زنگ ویررام».
ساناز: «ادا وئرمه ها، من اؤزوم بیلهسینن دانیشارام. بو گئجه بورداسان» دئییب، یئمک بشقابلارین سوفرایا دوزدو.
سئویل گؤزلرین قییدی: «یوخ ناراحات اولور، قول آلیب مندن»
«بو سئویلین هر سئری عادتیدی دا، تازا ایش ده‌ییر کی» دئدیم.
سئویل نازلانا – نازلانا منه باخدی.
آرتا موبایلینی سؤندورموشدو، ائو تلفونونا دا جواب وئرمیردی، یئنه مندن آجیقلانمیشدی. هم نیگران ایدیم، هم ده ایچیمده اونونلا بوغوشوردوم. سسی گلمسه اؤله‌رم. اؤزو بیلیر ان آجی گونلریم اونونلا کوسولو گونلریمدی.
یئمک ماساسینین دؤوره‌سینه ییغیشدیک. سانازین یئمکلرینین سؤزو یوخویدو.
ساناز رقص اؤیرتمنیدی. چوخ دوروشوغلو گؤزه‌ل بیر هئیکلی واردی، اوشاقلیقدان رقصه ماراقلیدی، تویلاردا ایلک سانازی رقصه دعوت ائدرلر.
گئچن زامانلار رقص اؤیرتمک اوچون اؤیرتمن آدلی کیمسه یوخ ایدی، ماراق گؤسترن ائوده گیزلیجه باکی ویدیو فیلملریندن اؤیرهنردی. تکه – توک آذربایجانی رقصینی اوینایان اولوردو، بیری سئویب، بیری دوداغین بوزوب، کتدی رقصی دئیردی. آمما ایندی آذربایجان رقصینی چوخ سئونلر وار، لاپ دا چوخ تبریز شهرینده، هم اؤیرنجیلرین سایی آرتیب، همده اؤیرتمنلرین. قیزلارگلین اولماقلاری اوچون کیلاسلارا گلیب یاخشی اویناماق ایسته‌یرلر، بو اوزدن سانازدا یاخشی بیر اؤیرتمن اولدوغونا گؤره یاخشی دا اؤیرنجیلری وار، همده یاخشی پول دا قازانیر.
اؤز تویوندا ائله گؤزه‌ل اوینادی، سالون آیاغا قالخدی. «واغزالی» رقصینی ائله اینجه، گؤزه‌ل ایفا ائتدی کی، سالونداکی قوناقلارین آغزی آچیق قالمیشدی.
من ده سانازین یانیندا رقص اؤیرنمیشم، آمما آرتا رقصی چوخ دا سئومز، هردن نازلانماقدان اؤتورده اولموش اولسا، بیر فیرلانیب رقص ائتدییمده آرتا بیر بالاجا گولومسه‌نیب، «ساغ اول» دئیه، یئنه اوتاغینا ساری یؤنهلر. ساناز «گل اوزون دره‌نی ده اؤیردیم» دئدی، دئدیم: «آرتا سئومیر کی».
سانازین دادلی یئمکلرین یئیندن سونرا سوفرانی یغیشدیرماغا باشلارکن آیتن دئدی:
– یاخچی گلین هله اوتورون بیر دانیشاق، دوراروق یغیشدیراروق. دئیهسن بویوموزا بیچیلیب ایشله‌مَخ. دوغوشدان دا بو آرواد راحات دورانمیر. بیر موضوع دئییرم هر کس اؤزوین یالان دانیشمادان دئسین
ساناز دئدی:
– یانی دئییرسن سوفره‌نی یغیشدیرمییاق؟
آیتن: «هَیه دا» دئدی. «بیر آز ایلش بیرلیخده دوروب یغیشدیراریق» سونرا یئرینده بیر آز ترپه‌نیب، دوببه- دوز اوتوراجاق دا اوتوردو، قارا ساچلارینی یانا وئریب: «گؤروم دوغوشدان نئجه دییهجهسیز؟» بیر آز گولومسه‌نیب، دئدی:
– ایندی کی اؤزویزو بو قده‌ر بوغورسوز، دئیین گؤرح، گئده‌سیز ائوه گؤره‌سیز اَریز بیر باشقا آروادیناندی، نئینرسیز؟ نوبتینن هرکس دوز دئسین ها، سانسور یوخدی.
آرتا دئییر:
– عقلین یوخدو دا، سفئه‌سن، منیم کیمی اوغلانا هئچ شک ائلرلر، باشیم اؤز ایشیمده.
آرتانین او قدر گیزلین پالانج ایشلری اولور کی نئجه شک ائتمه‌ییم؟ نئچه دؤنه‌لر ائوه یئتیشیرکن تئزلیکجه موبایلین جئبیندن چیخاردیب، تئز- تئز دویمهلرین باسیبدی، مطلق بیر شئیلری سیلیردی. ائله ظن ائدر من گؤرمورم، آمما منیم گؤزومدن بیر شئی گیزلینده قالماز. بیر – ایکی دفعه‌لر سوروشاندا دیل دوداغین بیر- بیرینه دولاشدیریب: «گینه سفئه‌لدین؟ اوشاقلار سر- سفئه اس ام اس‌لر یوللاییرلار، اولاری سیلیرم».
آیتن، اوتوراجاقدان قالخیب، تؤکدویو چیینلرینه شلاله‌لنمیش ساچلارینی ییغیب، دئدی:
– هیه دوغوشدان دا ایش ایندیدی. اول من باشلیرام.
اولکر دئدی:
– سنین ارین یوخدی کی!
ساناز: «اولسون دا، نییه نیشتر ویریسان؟ اولاجاق دا، منی ده آلان اولاجاق» دئدی.
نازلی ایسا هیجانلا دئدی:
– یاخچی باشلا، گیریسن ائوه بیردن ارینی بیر باشقاسینان گؤروسن؟.
آیتن: «اول میریدارام بیر اریمین اوزونه، بیرده قهبه‌نین اوزونه. سورا یاپیشارام اریمین یخه‌سیندن، بوغا – بوغا دییهرم، دوز دانیش سن کیمینن کیمی بیرلشدیرمیسن؟سن «آ»نان مثلن «م»یی بیرلشدیرمیسن؟ سن منی ، منی بوننان بوننان بیرلشدیرمیسن؟»
آیتن، اؤزونه بیر جددی گؤرکم توتموشدو، ائله ده قشنگ رولون اویناییردی، ساغ الینین ایچی ایله سینهسینه چیرپیب، تکرارلاییردی: «سن «آ»یی «ر» نن بیر لشدیرمیسن. هر دؤنه ده بیر باشقا حرفی «آ» حرفینین یانینا قویوردو. سسی گولملی اولوردو. بیز گولوردوک. سونرا اؤزونون گولمکلری گئچینمهیه دؤنوشوردو. گؤلمکدن گؤزلریندن سو آخیردی.
– سورا یاخشی چالخالییندن سورا، اوزومو اوندان دؤندریب، او جیندانین اوزونه ده باخمارام، قاپینی چیرپیب گئدرم. آمما ال چکمه‌رم کی. زنگ زنگ اوسته ویرارام. سن «آ»نان «د»یی بیرلشدیرمیسن. دئییم ها، یولو باشا باش زیریلدارام. بیلیندیرمهدن»
آیتن آیاق اوسته دولانیب اَدایلا بیر گوشی الینه آلیب، اوتای بوتایا گئدیب، اؤزونو یامسیلاییب، گولوردو؛ سونرا گلیب اورتادا یئره اوتوروب، ایشینه دوام ائدیردی. بیزلر ده اؤلوردوک گولمکدن. من اؤزومله، سانازین دیزلرینه چیرپماقدان اللریمین ایچی قیپ قیرمیزی اولموشدو. نازلی: «دایانین من دیییم» دئدی. گؤزلریمیزی، بورنوموزو کاغاذ دستمالی‌له سیله –سیله دئدیک: «یاخچی سن دئ گوراخ»
نازلی ساچلارین دالیدان ییغیب، چؤهرایی سانجاغ‌ایلا سانجاقلاییب، دئدی: «من ائوه گیریب، بئله بیر صحنه گؤرسم» بیر قاشین یوخاری قووزاییب سونرا آرتیردی: «بیر باخارام اریمه، بیر باخارام آروادا. ائله دوغروجا اوتاغیما ساری گئدیب قاپینی چیرپارام اوستونه، اونلار اوتانیب گئدسینلردا، من نییه ائویمی ترک ائلییم کی».
من اؤزومو توتا بیلمه‌دیم:
– یانی حیرصدن پاتداماسان؟
– پاتداسام دا ائویمی ترک ائله‌مرم مئیدانی اولارا وئرم. دا باور ائلیین نواری دا آچارام، اوجادان اولسا اوینارام. دا سایمامازلیغیمی گؤرسه‌درم، اولسا سورا ائله عوض ده آچارام. اولار غلطی دارتیبلار من بوغولوم؟ من ؟ جهنمین گورونا، اَر واریدی، اولماز اولسون!» دئدی نازلی.
اولکر دوداغین دیشلهدی:
– قیز ائله دئمه، دؤزماغی آغیردی، آخی نئجه یانی؟ بو راحاتلیغا؟ دوزدو ها، منیمکی ده ائله قاباقدان گلمیش اَدالار وئررکی من قالارام معطل. اولوب دا بیر سئری حرکتلری، سورا ائله ادا وئریب، من بیلمیرم، ائله تئز هر بیر شئیلره اینانمارام، گرک دقیق اولام، دقت ائلییم. بیلمیرم قالیب کی اونلاری نئجه گؤرم، مثلن گیریب گؤرم اوتوروبلار.
اولکر بیر آز گؤزلرین ییغیب، یئنه دئدی:
– سلام وئریب اوتورارام یانلاریندا.
دئدیم:
– هن جانیزا آند اولسون، بو اولکر ایکینی سایینجا آروادینان دوست دا اولار، خوشا بئش اون بئش. سورا گؤررسن جیجی باجی دوست دا اولوبلار
ساناز گوله- گوله دئدی:
– هن گونده‌ده ائولرینده اولار، دییندهده دییر، سن آللاه بیر سؤز دئمیین ها، گوناهدی. چوخ دا یاخچی قیزدی.
نازلی ایسا دئدی:
– هن آرواد بیر آز ائله بوجور اولار دا دییرلر عقلی آز.
اولکر چیینلرین آتیب:
– آخی منیم اَریمین هردن بیر ائوده شاگردی اولار، بلکه شاگردیدی. اوتورارام، گؤزلریمی زیللرم اوزلرینه، باخیشلارینا، سؤز سوروشارام، گؤرم نه‌یین نسیدی؟
آیتن چیرپدی ایکی دیزلرینه، گوله-گوله دئدی:
– هَیَه دا، گؤروم دوغوشدان خیانت ائلیرلر یا یوخ. سن آللاه اؤلدوم سانجیدان، بیر آزدا گولسوق ایشییهجه‌یم تومانیما. بیر آز دایانین گلدیم.
سئویل ائله دانیشمیردی، آز دانیشانایدی، ائله خیمیر- خیمیر گئچینیردی گولمکدن. اولکر اونا باخیب دئدی:
– هن سئویل ایندی سنین نوبندی ها!
آیتن-ین هایی توالتدن چیخدی:
– سن آللاه دایانین من گلیم سورا!
توالتدن چیخیب چیخماز دئدی:
– یاخچی ایندی سئویل دئ بالامدی.
سئویل اینجه سسی ایله دئدی:
– آخی بیلمیرم کی، من همیشه ائودییم دا. فیکرینده ائله‌مه‌میشم.
آیتن ایسه: «مثلن ایندی بورداسان، نه بیلیسن نه خبر اولوب ائویزده؟»- دئدی.
سئویل، اوزونو جیرماخلادی. بیر آز اوتوراجاغیندا ترپه‌نییب: «یوخ آ، اوجور دئمیین دا» دئدی.
ساناز منه گؤز ووروب، دئدی:
– مثلن دا چوخ اوجور دئمیین ها، بیر دن گؤردوز سئویل اوتوروب زیریلدادی.
سئویل آجی گولومسه‌ایله:
– هن آ منیم ظرفیتیم بئله ایشلره یوخدی. یوخ منیم اریم بئله ایشلردن گؤرمز. من بیلیرم بئله زادلاردان ایرگنر، منیم اوندان سورا بیر کسیم یوخدی کی چوخ ظولم اولار دا، اوندا گرک اؤلم دا»
آیتن آتیلدی سئویلین سؤزونون آراسینا دئدی:
– یاخچی دا سئویل بسدی! دئمه‌دوق کی یاسنامه اوخویاسان. ایستهمدوق، هیه دا ایستهمدوق. ‌سن دئ ساناز.
ساناز الیندهکی قاشیغی اوینادا- اوینادا بیر نئچه تاققا بشقابا ووروب، سونرا بشقابین ایچینه قویدو:
– من دا، منه، نم‌نشیئدی، زاتدی، واللاه فیکر ائلیرم بئله بیر ایش اولسا ائوده بیر های قوپار هاااا سؤز دئماغیما قادیر اولا بیلمرم. فیکر ائلیرم ائله قاباخدان گلمه‌لیخ ائلر، ائله های قویار کی آز قالار منی او آروادینان یاتیدا، آنجاق اؤزون تبرئه ائلییه، دییه من همجنس‌بازام، آمما او بلکه ده اعتراف حدینهجه
ساناز اللرین قوزادی گؤیه، باشین آلدی چیگینلری آراسینا:
– تسلیم، پوخ یئمیشم، هر نینیسن ائله. دییرسیز من ده گلیم ائله قاریشاق، آمما یوخ، اونودا چکنمز. بیر های گینه قوپارار. گرک دیییم سیز ساغ من سلامت. من گئتدیم، آمما فیکر ائلیرم اونودا چکنمز کی پوخ یئییرسن، هارا ایستیسن گئده‌سن؟ اوتور ائوده آمما…
بیزلر اؤلوردوک گولمکدن. سئویل: «ایش پیس یئرلره چاتدی، من داها گئدیرم» دئدی.
ساناز گوله-گوله گؤزلرینین گوشه‌سیندن آخان یاشی سیله-سیله گؤزونون ریملی گیژگاهیناجان یاییلدی:
– هارا اَدا وئرمه. قورخما بیر زاد اولماز. نیگران اولما. گئدرسن قالارسان قاپیدا، زنگ ویر هله بیر آز دا اوتی بیر چای گتیریم!
سئویل یئریندن قالخدی:
– یوخ، یوخ مئیلیم یوخدی.
آیتن: «قیز بس نییه بئله ائلیسن؟ باخ هله آز قالا آغلایا» دئدی. سئویل گؤزلرین آیتن-ه سوزدوردو:
– بسدی دا آیتن!
ساناز سئویلین دالیسیجا قاچا-قاچا، دئدی:
– قیز نمنه اولدی سنه آخی؟ بیر شئی اوره‌یوه ده‌یدی؟
سئویل مانتوسونون دویمهلرینی باغلایا- باغلایا، دئدی:
– یوخ واللاه، قاپیدادی، حیواندی دا، چوخ معطل ائله‌مییم. اوره‌ییم قیزیشدی بیر دن.
سئویل ائله قاپی اؤنونده دایاندی. الین بیزلره ترپدیب: «قیزلار اؤپدوم ساغ قالین!» دئییب، بیزلر قاپییا یاخینلاشانجان، سانازی اؤپوب، تله‌سیک پیللهلردن آشاغی ائندی.
اولکر «آی جانین یانماسین آیتن، اوشاغین اوره‌یین لاپ اوزدون» دئدی.
آیتن باشین دؤندریب، کاناپه‌یه ساری گئدیرکن دئدی:
– اوشاغین باشی باتسین ده ال جن قودوخ دی ائله بیل. ساناز اؤزوین چای سوزورسن منه ده سوز قاداسی!
نازلی بشقابلاری مطبخه ساری آپاریرکن منه ساری دؤنوب دئدی:
– دوغوردان آخی سن هئچ بیر شئی دئمه‌دین؟
آرتا دئییر:
– ائله دیلین منه اوزوندی. هر یئرده سون دانیشان سن اولوسان. ائوده آمما منیم باش بئینیمی آپاریسان.
آرتا، ساده‌جه قولاق آسار، هر دن ده بیر سیگاراسین آلیشدیرا-آلیشدیرا باشینی ترپدر، سونراداکی گونلر، دئدییم سؤزه گؤره بیر شئی سوروشسام دئیر: «ناواق دئدین کی منه؟»
من دئدیم:
– منیم اریمه اعتمادیم سونسوزدی. هئچ شک ده ائله‌مرم. باخمیین اؤزوزه!
دونن آرتا، یاتاندا موبایلین آختاریردیم. اس ام اس‌لرینی اوخویوردوم. آرتا دئییر:
– دوز ار- آرواد اولاردی کی، بیر- بیرلرینه او قده‌ر اعتمادلاری اولا، فیکیرلرینه ده گلمیه بیر لحظه ده بیر- بیرلرینین شخصی وسایللرینی قوددالییالار.
آرزوم اودی بیر گون فیسبوک صفحه‌سینین پسوردی الیمه دوشه.
اولکر دئدی:
– باش بئنیمیزی گئنه آپارما. بیلدوق سن اریوی هامیمیزدان چوخ سویورسن، ائله بیل بیز سویموروق. دییروق بس اعتمادیمیز یوخدی.
آیتن دوداغین بوزدو:
– دوز دئییر، ائله بیر سئویل دی دازلانیر، ایستهمه‌یینی ساخلا ائویزه!
آیاقلاریمی کاناپه‌ اوستونده آلتیما قویوب قارنیمی شلواریمین دویمه‌سی سیخدیغینا گؤره، اوست دویمه‌نی آچا-آچا دئدیم:
– واللاه او اوزدن کی من چوخ تئز اینانان آدامام، یوخ یوخ نییه یالان دانیشیم! دوزدی ها آرتانی چوخ سئویرم، آمما آند ایشمیشم، ایندی یادیما گلدی، دوغوردان اؤز گؤزومونن گؤرم آرتانین خیانتین مطلق من ده اونا خیانت ائلییم.
آیتن دئدی:
– دئمیسن بس، دوز دئ گؤروم سن کیمینن کیمی بیرلشدیرمیسن؟
هامیمیز گولدوک. ساناز معصوم قیافه ایله دئدی:
– یازیق کیشیلر! ایندی اؤز ایشلریندهدیلر، بیزلر دلی کیمی گلمیشوق بوردا…
آیتن:
– دازلانمایین، دئدوق بیر گولاخ دااااااااا.
«دایانین سیزه بیر چای گتیریم» دئییب یئریمدن قالخدیم.
سانازدئدی:
– باخ گؤر سماورین سویو قورتولمییب، قورتولسا دولدور، آیاغین قووزا، بئش دیقییه قئینییر.
سوفرانی بیرلیکده ییغیشدیریب، باتیق قابلاری قاب یویان ماشینینا یئرلشدیریب، لم وئردیک کاناپه‌لره.
آرتا سس‌سیز – سمیرسیز ائوده دولاشیر، تلویزیونو یاندیریب سؤندورور، بوز دولابینی آچیب باغلاییر، مطبخده دولاشیر، اوتاقلاردان تنه‌بییه، اوردان اوتاقلارا وار- گل ائدیر. الین ساچلارینین آراسیندا دولاشدیریب، بوینونو اؤوکله‌ییر، سونرا اوزونو الینین ایچی ایله اؤوکله‌ییر، سونرا دیوارداکی رسمیمیزین قاباغیندا دایانیر. دئییرم:
– هن اؤزومه باخماق عوضینه عکسیمه باخیسان، اولمییه گؤیلون ایستییب منی؟.
نازلی کاناپه‌دن کیفینه ساری اَییلیب بیر قارا تئل سانجاغینی گؤتوروب، تئللرینه سانجاقلاییب دئدی:
– بولار دا لاپ اعصابلاریم اوسته‌دیلر ها.
اولکر کاناپه‌ده اوزانیب گؤزلری خومارلانا – خومارلانا باش آیاق بارماقلاریلا چالیشیردی جورابلارین چیخارتسین:
– گؤر نه جانیمی جیجیشدیریر بو جورابلار. کیفلی کیشییه دئدیم ها نایلون اولماسین».
ساناز مور رنگیده گئجه‌لیین گئییب دئدی:
– یاخچی یئرلرینیزی سالیم؟
«دوغوردان دا گئجه نی قالیروق؟» دئدیم.
ساناز: «هن بس نه» دئییب اولکره باخدی. اولکر: «بیزی ایتیرن تاپاندان چوخ سؤیونر، کیمدی ایندی بیزلره گئجه‌نین بو واقتی قاپی آچا» دئییب گولوشدولر.
آیتن آرخایینلیقلا گرنشدی:
– دوغوشدان ها، من کی یئددی دؤولتدن آزادام.
نازلی موبایلین قوردالایا- قوردالایا دئدی:
– منیمکی فیکر ائلیرم شاهگؤلی دن هله ییغیشیب ائوه دؤنمیییب، آللاهدان خاطیر بیر موبایلینادا جواب وئرمیر.
آیتن:
– هه دا، تزه قولاقلاری دیری- دیریدان خلاص اولوب، دینجلیر.
نازلی«بلکه دا نه بیلیم» دئییب، صوراتینی آسدی. اوزون قیوریلدیب: «زهلمی آپاردی ها بو تئللر، دلی شیطان دییر یولام قویام یئره» دئییب، سانجاغی تئللرینده برکیتدی.
تئللریمی، آلینیما تؤکوب ساچلاریمی سئشوار چکیب، چیینلریمه تؤکموشدوم؛ گوزگویه گیرمیشدیم؛ اؤزومده کی لاپ نارین توکلریمی ماققابلا چکیردیم. آرتا اوزده اولان توکلردن ایرگنر، دئییر: «آروادین لاپ زهلم گئتمیش زادلاریندان دی بو اوز توکی» من ده گوزگونون اوستونده کی ایشیغین دا یاندیرارام قویمارام اوزومده بیر تئل توک قالسین. آرتا ائوه گیرمک همن اوز کؤککه‌مینن اوزومو تمیزلهدیم. ایکی ایلدیر ائولیییک. یئنه ده هردؤنه آرتا آچار سالیب ائوه گیردیینده قلبیم دؤیونور. اوتاغدان قاپییه قاچارکن یادیما دوشدو عطریمی ویرمامیشام. تله‌سیک گوزگو قاباغیندان گؤتوروب قولاقلاریمین دالیسینا فیسیلداتدیم. آرتا: «سلام هئچ کیم یوخدی» دئینده، نازلانا- نازلانا قاچدیم قاباغینا: «سلام یوریلمییه سن»دئدیم. «سلام بیر چای واریندی؟». دئدیم: « اول بیر باخ منه نئجییم؟» قاشلارینی ییغیب دئدی: «نه اولوب کی؟» دئدیم: «اولسون آرتا تئللریمه باخ!»
« اونه مدل دی بغیشله‌ها، هئش سؤیمه‌دیم» دئدی. «آخی دونن تلویزیونا باخاندا او قادینین تئللرینی دئدین، نه گؤزه‌لدی من ده ائله»
«یاخچی بابا، اؤلورم خسته‌لیخدان. سنده حوصلییه باخ، بی چای گتی» دئدی آرتا.
نازلییه دئدیم:
– دوغوردان دلی‌لیخ ائله‌دین توهلریوی وئردین اللرینه یولوب توکدولر یئره!
ساناز گؤزلرینی منه برلتدی. نازلی سوسدی. اولکر کاناپه‌دن قالخیب، ایلشدی:
– قیزلار بیلیسیز ناوار، من فیکیرلشدیم دوغوردان دا اریم منه خیانت ائله‌سه دوز پیچاغی سوخارام قارنینا»
ساچیندان چوهرایی کئشینی آچیب آتدی میز اوستونه.
آیتن دئدی:
– هله باخ ، ال چکمه‌میسن؟
ساناز:
– دو بالامسان یاتاخ ، اعصابلاریوی پوزما، یئرلری سالمیشام.
یادیما دوشدو دویو سویونو قویموشدوم کنارا، یاتاندا اوزوموزو یویاق. بیر یؤنلدیم مطبخه ساری؛ قاییتدیم «توالته گئدن یوخ؟» دئدیم.
آرتا هر اوزومو دویو سویوایلا یودوغومدا دئییر:
– اه نمنه ایی گلیر، دوز باشماقدا اییلهنن جوراب ایی دی!
سانازین ائوینین تلفونو چالیندی، سانازین سسی یاتاق اوتاغیندان گلیردی:
– گئجن خئیر عزیزیم. بغیشله دا تک قالدین. هن دوزدی مامانینانساندا. من بئواق یادیوا توشموشم. سن ال چک، من نه بیلیم.
آیتن: «من یاتدیم، سحرتئزدن دانیشگاها گئده‌جییم» دئدی.
سو دامجیسی بئینیمه گوپون ووروردی. نازلی یاتدیغی یئردن سسلندی:
– آی ساناز دامجی سسی هاردان گلیر؟ بئینیمی دَلدی آخی؟!
آیتن-ین خورولتو سسی قالخدی.
۱۳۹۲

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

«آ»نان کیمی بیرلشدیریرسن؟ / اولدوز صادق

ایشیق
www.ishiq.net

آذربایجان ادبیات و اینجه‌صنعت سایتی

«آ»نان کیمی بیرلشدیریرسن؟ / اولدوز صادق

ایشیق
www.ishiq.net

آذربایجان ادبیات و اینجه‌صنعت سایتی

«آ»نان کیمی بیرلشدیریرسن؟ / اولدوز صادق

ایشیق
www.ishiq.net

آذربایجان ادبیات و اینجه‌صنعت سایتی