421__320x240_ganjali-sabahi-02
سونسوز محبّت و گوذشت
گنجعلي صباحي

رشيد ايييرمي ياشا دولموش اوجابويلو، دولو صيفت، ايري گؤزلوٍ، گوٍلر اوزلوٍ ورزيشکار بير جاوان ايدي. او، ايکي ياشيندا ايکن آتادان يئتيم قالميشدي. عميسي‎نين سونسوز قايغي‎سي و پري خانيمين توٍکنمز محبّتي، يئتيم‎لييي اونون ياديندان چيخارتميشدي. ائله‎جه ده او بو سونسوز عايله‎نين سونوٍک حياتـيندا اوٍميد دوغورموش، ائوده شن‎لييه سبب اولموشدو. ندنسه سون گوٍنلرده رشيدين رفتار و اخلاقي بوٍس‎بوٍتوٍن دييشيلميشدي. شادليق ساچان ايري گؤزلري، گوٍلر اوٍزوٍنوٍ غم- کدر بولودو اؤرتموٍشدوٍ. اونون بو حالي آسلان کيشي‎ده، داها آرتـيق پري‎ده حئيرت و نيگران‎ليغا سبب اولموشدو.
آخشام ايدي.‌هاوا قارالميش اولسا دا، لامپالارين ايشيغي اؤز نورو ايله هر يئري گوٍندوٍزه دؤندرميشدي. رشيد ايش‎دن ائوه دؤننده پري خانيم گوٍلر اوٍزله اونو قارشيلادي. نوازيشله حاليني سوروشدو. او، دوداق اوجو پري‎نين سوآليني رد ائده‎رک، ميزين دؤوره‎سينده دوٍزوٍلموٍش صندلي‎لردن بيري‎نين اوٍزه‎رينده اوتوردو. توتقون، کوٍسگوٍن حالينا قلبي سيخيلان آنا دايانا بيلمه‎دي. رشيدين قارشيسيندا اوتوروب،
– سنه نه اولوب، قادان آليم؟ بو گوٍنلر نييه پريشان‎سان؟ آدام کي، درديني آناسيندان گيزلتمز. بير دي‎ء گوروٍم اوٍره‎ييني سيخان نه‎دير؟ آخي من سني بئله توتغون، غملي گورنده دوزه بيلميرم. اوٍره‎ييم اود توتوب يانير- دئديکده رشيد باشيني قالديريب معنالي باخيشلارلا گؤزلريني آناسي‎نين گؤزلرينه زيلله‎دي. توتغون سسله:
– ناراحات‎ليغيمين سببيني بيلمک ايسته‎ييرسن؟
– البتّه کي، بيلمک ايسته‎ييرم.
– چوخ گؤزل، دئيه‎رم. آناجان! من کي، اوشاق دئييلم. دئييلن‎لردن معلوم اولور کي، منيم دايي‎لاريم، بابام، ننه‎م ده واردير. سيجيلليم‎ده، آنامين آدي ترلان‎دير. دئمک آنام دا واردير، ساغ‎دير. نه اوٍچوٍن گرک من اونلاري تانيمايام؟ اونلارين مندن گيزلي ساخلانيلماسي‎نين معناسي ندير؟- دئيه آناسيني سوآلا توتدو. بو سوآلدان پري خانيم برک توتولدو. بدنينده سويوق بير گيزليتي حيسّ ائتدي. اونون اوٍچوٍن بو ساده بير سوآل دئييلدي. هميشه اونون فيکريندن کئچيردي: «بير گوٍن او دوغما آناسيني تانيسا، مني آتاجاق؟ اونون آيريليغينا نئجه دوزه‎رم؟»- دئيه روحو عذاب چکيردي. سانکي، او گوٍن گليب چاتميشدي. اينجيک بير حالدا:
– بس بئله!……- دئييب، بير آز فيکره دالدي. سونرا هيجانلا -آديني چکدييين قوهوملارين سني ايسته‎سه‎يديلر، بو واختا کيمي دالينجا گلر، سني يوخلار، فيکرينده اولارديلار. آنان، آنا اولسايدي کؤرپه واختـيندا سني آتـيب اره گئتمزدي. سنين زحمتيني چکن، گئجه – گوٍندوٍز پروانه تک باشينا دولانيب اودونا يانان ترلان اولماييب، من اولموشام، من! ايندي من آنا دئييلم، ترلان آختاريرسان؟…- دئييب, هؤنکورتو ايله آغلاماغا باشلادي. ائله بو آندا آسلان کيشي قاپي‎دان گيردي. پري خانيمي آغلار، رشيدي توتغون، دولغون گؤردوٍکده حئيرتله:
– سيزه نه اولوب، نه خبردير؟ – دئيه سوال وئردي. پري باش اؤرتوٍيوٍنوٍن اوجو ايله گؤزلريني سيله- سيله:
– نه اولاجاق، اوغلون ترلان آدلي آنا آختارير!- دئديکده آسلان کيشي گوٍلوٍمسه‎دي:
– نه عئيبي وار، قوي آختارسين. بوندان اؤتروٍ آغلاماق، ياس قورماق لازيم دئييل کي, – دئييب، رشيده دوغرو يؤنه‎لدي. مهربان‎ليقلا:
– اوغلوم! موضوع ندير؟ آچ، منه ده دي‎ء- دئدي. رشيد اؤزوٍنوٍ دوغرولداراق:
– ائله بير مهم مسئله يوخدور، عمي جان! من فقط اؤزوٍموٍ تانيماق ايسته‎ييرم. کئچميشيم مندن گيزلي ساخلانيلماسي بئينيمده مين جوٍر دومانلي فيکيرلر دوغورور. بابامين، ننه‎مين، دايي‎لاريمين، آنامين مندن گيزلي ساخلانيلماسينداکي معمّا ندير؟ آتامين اؤلوموٍنده اونلارين الي‎مي اولوب؟ قان دوٍشمن‎چي‎ليييميزمي وار؟ نييه گرک من بيلمه‎يم؟- دئديکده آسلان کيشي قاه- قاه چکيب گوٍلدوٍ.
– يوخ گوٍلوٍم، يوخ!- دئدي. بئله فيکيرلري باشيندان چيخارت.
– دوغرودان‎مي آنام مني آتـيب گئديب؟
– هئچ ده يوخ! قولاق آس، من قضيه‎ني اولدوغو کيمي سنه سؤيله‎ييم: سن ايکي ياشيندا ايکن، آتان بير تصادوٍف‎ده اليميزدن چيخدي. آنان جاوان ايدي. بير مدت اوتوردوقدان سونرا سني ده گؤتوٍروٍب آتاسي‎ ائوينه گئتدي. سن صاحيب‎سيز دئييل ايدين، بيز سني اونون اليندن آلديق. سندن آيريلماق اونون اوٍچوٍن ائله ده آسان دئييل، آغير بير درد ايدي- دئييب گؤزلريني يومدو. سانکي کؤرپه رشيدي آغلايا- آغلايا ترلان‎دان آييرديقلاري آنلار، ترلانين گؤزلريندن ياز ياغيشي کيمي آخان داملالار، اونون پريشان حالي گؤزوٍنوٍن اؤنونده جانلاندي. درين بير آه چکه‎رک، سؤزوٍنه بئله ايدامه وئردي:
– بيزيم ائولاديميز اولماديغيندان سني اوغول‎لوغا گؤتوٍردوٍک. پري خانيم عؤمروٍنوٍن ان قيمتلي، جاوانليق دؤورلريني سنين تربييه‎نه، راحات‎ليغينا، بوي آتـيب ياشا دولماغينا صرف ائتدي. سن گوٍلنده گوٍلدوٍ، آغلاياندا آغلادي. بير آنا قايغيسي ايله کئشييينده دوردو- دئييب، اليني جئبينه سالدي. بير سيغار آليشديريب مؤحکم سوموردو، توٍستوٍسوٍنوٍ‌هاوايا بوراخدي. مأيوس بير حال آلاراق، – بيز اوٍميدوار ايديک کي، سن اونو آنا، مني ده آتا کيمي قبول ائده‎جکسن- دئدي.

آسلان کيشي‎نين سؤزوٍ بو يئره چاتاندا رشيد تاب گتيرمه‎دي.

– عمي جان! مگر من سيزين حاققينيزي دانيرام؟ ياخود سيزدن آيريلماق فيکرينده‎يم؟ من اؤلنه‎دک سيزدن آيريلمارام. سيز منه آتادان، آنادان عزيزسينيز. سيزين قايغي و محبّـتلرينيزي اونودا بيله‎رم‎مي؟ منيم سؤزوٍم بوردادير کي، نييه گرک اوز قان قوهوملاريمي تانيمايام؟ هم ده بيليرسينيز کي، سربازليق واختيم‎دير. گئتسم، بو جنگ مووقئعينده‌هاردان معلوم‎دور کي، ساغ قاييدام! آرزيلاريمي گورامي آپارمالي‎يام؟- دئديکده آسلان توتولدو، متاثر اولدو. بير آنليغا فيکره دالدي. پري خانيم دؤزوٍم‎سوٍز بير حالدا،
– آمان آللاه! بو اوغلان دلي اولوبدور، ندير، نه‎لر دانيشير؟- دئدي. البتّه بو سؤزلري ايله او رشيده اولان درين محبّتيني يئتيريردي.
آسلان کيشي آلتميش ياشيندا اورتا بويلو، ساچلاري آغارميش، دولو انداملي، ساغلام بدن بير آدام ايدي. دونيانين ايستي- سويوغونو دادميش، جاوانليغين جوشغون، باريشماز غوٍرورونو ارخادا قويموش، بلکه ده اونوتموشدو. فيکريني ياخشي‎ليغا، خئيره ايشلتمه‎يه چاليشيردي. بير خئييرخاه شخصیت کيمي تانينميشدي. فيکرينده رشيده حاق وئريردي.
– دوٍز دئييرسن اوغلوم! حاق سنينله‎دي. من چوخدان قوهوملاريميزلا سني تانيش ائتمه‎لي ايديم. تقصير منيم‎دير- دئديکده رشيدين توتغون چؤهره‎سي قيزيل گوٍل کيمي آچيلدي. يئريندن سيچراييب عمي‎سيني قوجاقلادي. دؤنه- دؤنه اؤپدوٍ.
– قوربان اولوم عمي جان! ائله من ده اونو ايسته‎ييرم. آيري بير سؤزوٍم يوخدور- دئدي. آسلا کيشي اليني اونون کوٍره‎يينه ووراراق،
– گؤروش اوٍچوٍن حاضير اول! صاباح سني حسن بابانين يانينا آپاراجاغام- دئدي. آلينان بو نتيجه‎دن پري خانيم داريلدي. بئينينده يئر سالميش اعتمادسيزليقلا دولو شوٍبهه اوٍره‎ييني سيخدي. قهرلنميش بير حالدا دوروب اوتاقدان چيخدي.
٭٭٭
تبريز قيشي‎نين سرت سويوقلاريندان خبر يوخ ايدي. باهارين اوره‌ک آچان سرين نسيمي تئل‎لري اوينادير، آرزي و ديلکلر ساچان ايشيقلي اوٍزلري اوخشاييردي. گوٍنش ايليق، قيزيل شوعالاريني هر يئره يايماقدا ايدي. کؤچری قوشلار گئري دؤنموٍش، شور و هيجانلا قاناد چالير، دوٍزلر، باغلار، ياماجلار آل ياشيلا بوٍروٍنموٍشدوٍ. گوٍل- چيچکلرين عطري هر يئره ياييلماقدا، بوٍلبوٍل‎لر شووقه گله‎رک جهجه وورماقدا، سانکي اينسانلاري روحلانديرماق، حياتي سئومه‎يه، مهر و محبّت عالمينه چاغيريردي.
حسن بابانين ائوينده ده شادليق ايدي. اون سککيز ايل اوٍزوٍنه حسرت قالميش، بلکه ده اونودولموش نوه‎سي رشيد، اونون کيچيک کوٍمه‎سيني ايشيقلانديرميشدي. بو گؤروشدن دوداقلاردا تبسّوم، گؤزلردن محبّت نورو ساچيليردي. اورتادا مئيوه‎لر، شيرني‎لر دوٍزوٍلموٍشدوٍ. قاباقلاريندا تزه سوٍزوٍلموٍش، بوغلانان عطيرلي چايلار اوتورانلارا گؤز وورودو. آنجاق، هئچ کس اليني بير شئيه اوزاتميردي. چوٍنکي، وورغونون «آذربايجان» ترانه‎سي‎نين ناواري قويولموشدو.
چوخ کئچميشم بو داغلاردان،
دورنا گؤزلوٍ بولاقلاردان،
ائشيتميشم اوزاقلاردان،
ساکيت آخان آرازلاري،
سيناميشام دوستو، ياري
٭٭٭
ائل بيلير کي، سن منيم‎سن،
يوردوم يووام، مسکنيم‎سن.
آنام، دوغما وطنيم‎سن،
آيريلارمي کونوٍل جاندان؟
آذربايجان! آذربايجان!
٭٭٭
من بير اوشاق، سن بير آنا،
اودور کي، باغلي‎يام سانا،
هانکي سمته‌هانکي يانا،
هئي اوچسام دا يووام سن‎سن،
ائليم، گوٍنوٍم، اوبام سن‎سن.
– دئيه، اوجالان گؤزل سس اوره‌کلري اوخشاييردي. ترانه تزه‎جه قوتارميشدي کي، قاپي دويوٍلدوٍ. مريم تئز آياغا دوردو.
– حتمن ترلان‎دير!- دئييب، قاپي‎يا دوغرو يوٍيوٍردوٍ. آخي قيزي تهران‎دا ياشاييردي. بؤیوک قارداشي دؤنمز تئلفونلا دانيشميش، جرياني سؤيله‎ميش، اونو اوغلو رشيد ايله گؤروشه دعوت ائتميشدي. قاپي آچيلدي. قيرخ ياشيندا، اوجا بويلو، خوش انداملي، گؤزل بير قادين ايچري گيردي. آنا ايله بالانين قوللاري آچيلدي. قوجاقلاشيب، گؤروشندن سونرا گئديب اوتاغا گيرديلر. ترلان آتا و قارداشلاري ايله گؤروشندن سونرا اوزوٍنوٍ ياد بير جاوان قارشي‎سيندا گؤروٍب داياندي. اوره‌ک چيرپينتي‎سي آرتميشدي «يعني، بو منيم کؤرپه رشيديم‎دير»- دئيه، گؤزلرينه اينانميردي. رشيد ده مات- مات اونا باخيردي. حسن بابانين دوداقلاري قاچدي.
– اوغلوم! نييه مات قالميسان، آختارديغين دوغما آنان‎دير دا!- دئديکده، رشيد ياز بولودو کيمي دولدو. گؤزلريندن ياش آخماغا، ايشقيريقلار ايچري‎سينده،
– آناجان!… – دئييب، اؤزوٍنوٍ ترلانين قوجاغينا آتدي. هيجانا توتلدوغونو گؤرن آنا:
– آغلاما، منيم رشيديم آغلاما!- دئييب، اونو باغرينا باسدي. اوغلونون آراسي کسيلمه‎ين ايشقيريق سسي، اون سککيز ايل قاباق کؤرپه رشيدي زورلا، آغلايا- آغلايا اوندان آييرديقلاري آنلار گؤزوٍنوٍن اؤنونده جانلاندي. بوٍتوٍن ووٍجودو سارسيلدي. گؤزلريندن آخان ايري داملالار اوٍزوٍنوٍ ايسلاتدي. توتغون سسله:
– سن يئکه اوغلان اولموسان! کيشي ده آغلايارمي؟- دئيه، رشيدي توختاتماغا چاليشدي. ايللر اوزونو دوغما آنا حسرتيله چيرپينان اوره‌ک آسانليقلا توختايا بيلرديمي؟ بو منظره‎دن اوتاقداکي‎لارين‌هاميسي‎نين اوٍره‎يي کؤورلدي، گؤزلر دولدو، اوره‌کلر بوشالدي. بو گؤز ياشلاري غم- کدردن دئييل، ووٍصال بولودوندان تؤکوٍلن داملالار ايدي.
٭٭٭
سحر ساعات اون اولاردي. رشيد يئنه آناسي‎نين گؤروشوٍنه گلميشدي. آنا ايله بالا اوزون ايللر آيريليق اودوندا يانا- يانا ووٍصالا چاتميش ايکي سئوگيلي کيمي، اوٍز- اوٍزه اوتورب بير- بيرينه تاماشا ائتمکدن دويماييرديلار. ترلانين باشيندا کئچميش خاطيره‎لر قيميلدانيردي: ايلک اودلو عشقي اسن قارا بير يئلدن نئجه سؤندوٍيوٍ، گنج‎لييي‎نين آجي و شيرين آنلاري خياليندا رقصه گلميشدي. درين بير آه چکه‎رک:
– دوغرودان دا هره‎نين بير سرنيويشتي واريميش. کيم دئيه بيلردي کي، آتان گؤزله‎نيلمز بير تصادوٍف‎ده اؤله‎جک، ائويميز داغيلاجاق، اؤز جانيمدان ارتيق سئوديييم بيرجه بالامي اليمدن آلاجاقلار. اونو گؤرمکدن ده مني محروم ائده‎جکلر. بيزيم ده آلنيميزا بئله يازيلميش ايميش… دي‎ء گؤروٍم، نئجه اولدو کي، بيردن دوغما آنا فيکرينه دوٍشدوٍن؟ يوخسا، عميندن، پري خانيمدان ناراضي ايدين؟- دئيه سوآل وئرديکده، رشيد، يوخ آناجان! اونلار مني اوز جانيندان آرتيق سئوميش، هميشه نازيملا اوينايـيبلار. آغليم کسندن بويانا آتامين اؤلوٍموٍنوٍ درک ائتميشديم. آنام ساغ اولدوغونا دا اينانيرديم. سيزي گؤرمک هوسيله اوٍره‎ييم چيرپينيردي. بو آرزي گوٍنوٍ- گوٍندن شيددت‎لندي. سون گوٍنلرده لاپ دلي کيمي اولموشدوم. ناراحات‎ليغيمي گؤرن عميم معمّاني آچدي، مني حسن‎بابانين يانينا آپاريب تانيش ائتدي. دايي‎لاريملا گؤروشدوٍم، اوٍره‎ييم بير آز توختادي. دوٍنن گله‎جه‎ييني منه خبر وئرديلر. منه نه حال اوٍز وئرديييني دئيه بيلميرم- دئدي. ترلان:
– بيزيمله گؤروشوٍندن پري خانيم خوشحال‎دير يوخسا…
– متأسفانه يوخ! او گوٍندن کي، من گؤروش فيکرينه دوٍشموٍشم، اونون گوٍلر اوٍزوٍنوٍ غم بولودو اؤرتوٍبدوٍر. مني گؤرنده گؤزلري دولور، نه قدر دانيشديريرام، جاواب وئرمير- دئديکده ترلان فيکره گئتدي. سانکي اونون ناراحات‎ليغي‎نين عللتيني دويدو.
– يوخ! – دئدي. من گرک اونون نيگران‎ليقدان چيخاردام. دور اوغلوم! دور گئدک سيزه. من اونونلا دانيشمالي‎يام- دئييب آياغا دوردو. رشيد آناسي‎نين تصميميندن حئيرته دوٍشسه ده بير سوز دئمه‎دي. دوروب آناسييلا يولا دوٍشدوٍ.
يول اوزونو ترلانين بئينينده جوٍربه‎جوٍر قاريشيق فيکيرلر قايناشماغا باشلادي. بلکه پري منيله گؤروشه حاضير اولمادي. منيمله اوٍز- اوٍزه گله‎جکمي؟ رفتاري نئجه اولاجاق؟ بلکه ده هئچ ائوينه يول وئرمه‎دي. کيم بيلير ايندي او، نه دوٍشوٍنوٍر، فيکري‌هارادادير. و سايره… چوخ فيکيردن سونرا، بو قرارا گلدي کي، اوّل بؤیوک قايين خاتونون يانينا گئتسين. اونونلا بيرليکده پري‎نين يانينا گؤروشوٍنه گئتسينلر. بيليردي کي، زينب خانيمين اونون يانيندا چوخ احتيرامي واردير. ائله ده ائتدي. رشيدين اوٍچ عميسي واردي. ائولري بير- بيري‎نه ياخين ايدي. ترلان اوٍچ ايل بو خانواده‎نين کيچيک گليني اولدوغو، اؤز اخلاق و رفتاري ايله‌هاميسي‎نين محبّتيني قازانا بيلميشدي. اونو سئويرديلر. زينب خانيم اونو گؤرنده ائله بيل اوزون ايللر آيري دوٍشموٍش دوغما باجي‎سيني گؤردوٍ.
– آي قيز ترلان!… دئييب، اونو قوجاقلادي. اؤپوٍش- گؤروشدن سونرا:
– سن‌هارا، بورا‌هارا؟ باجي دا بئله وفاسيز اولارميش؟ هله دي‎‎ء گؤروٍم، نه عجب بيزي ياد ائتميسن؟- دئيه، بيلميردي نه ائتسين. اوتاغا کئچديلر، اوتوراندان سونرا ترلان گليشي‎نين سببيني اونا سؤيله‎دي. زينب اونون پاک، اينساني نييتيندن خوشحال اولدو.- آفرين باجي- دئدي. سن بونونلا اونون تلاطوٍمه توتولموش قلبيني توختادا بيلرسن. اؤزون بيليرسن کي، اونون بو دوٍنيادا هئچ کسي يوخدور. بوٍتوٍن محبّتيني رشيده ساليب‎دير. ياشاييشي اونا باغلي‎دير. اونسوز، او دلي اولار- دئييب، چادراسيني باشينا سالدي. هر اوٍچوٍ يولا دوٍشدوٍلر. رشيد قاپيني دويدوٍ. پري قاپيني آچديقدا زينب، ترلان و رشيدله اوٍز- اوٍزه گلدي. اونا عجيب بير حال اوٍز وئردي. قلبينده ترلانا قارشي نيفرت حيسبي دويسا دا، اؤزوٍنوٍ اله آلدي. ترلان گوٍلر اوٍزله اونو قوجاقلاييب اؤپدوٍ. آنجاق پري‎نين توتغون، دومانلي اوٍزوٍ آچيلمادي. اوتاغا کئچديلر. زينب گوٍلر اوٍزله:
– آي قيز! نه يامان قاش- قاباغيني ساللاميسان؟ ترلان باجي ائوينه گليب- دئديکده، پري کوٍسکوٍن بير حالدا،
– خوش گليبدير. آمما نه‎يه گليبدير؟…- دئديکده، ترلان اونا ياخين‎لاشاراق،
– باجي جان! سن نه فيکير ائديرسن؟ خيال ائديرسن کي، من رشيدي سنين اليندن آلماغا گلميشم؟ منيم نه حاققيم وار ائله بير فيکره دوشم؟ او گوٍندن کي، اونو منيم اليمدن آلديلار، اونو اؤلدوٍيه قويموشدوم، ديري‎لييينه باعيث سن اولموسان. گئجه- گوٍندوٍز ناز ايله اويناييب، زحمتينه قاتلاشان من اولماميشام، سن اولموسان! آيريلديغيم کؤرپه رشيدي ايندي بير ايييد اوغلان گؤردوٍکده سئوينديم. گلديم قايغي و زحمت‎لرينيز اوٍچوٍن سيزدن تشککوٍر ائدم. من دوغما آناسي اولسام دا، حقيقي آنا سيزسينيز. گلنده، يولدا اونا دئميشم: «مني ترلان, سيزي آنا سس‎لمه‎لي‎دير. سيز ايجازه وئرمه‎سه‎نيز، منيمله گؤروشه گلمه‎يه ده حاققي يوخدور. او، هميشه سيزنله ياشاياجاقدير»- دئديکده، پري‎نين غم بولودو ايله اؤرتوٍلموٍش اوٍزوٍ آچيلدي. سئوينجي‎نين شيددتيندن گؤزلري دولدو. دوروب دؤنه- دؤنه ترلاني اوپدوٍ.
– قوربان اولوم سنه ترلان! گرک مني باغيشلاياسان. حاققينيزدا پيس قضاوت ائتميشم- دئدي. زينب:
– آي خانيم! من سنه دئمه‎ديم‎مي، ترلان کيشي قيزدير. حالال سوٍد اميب، هئچ واخت سنين زحمتينه گؤز يوموب حاققيني پايمال ائتمز. خوش رشيد بالانين حالينا کي قلبلري سونسوز محبّت و گوٍذشتله دولو آنالاري واردير. رشيدين دوداقلاريندا تبسّوٍم، گؤزلرينده راضي‎ليق قيميلداندي.