بختیارلار
نریمان ناظیم
شهرین بؤیوٍک پارک‌لاریندان ساییلان «میللت پارکی» اؤز اوزون عؤمروٍ بویو، جوٍربه‌جوٍر اینسان‌لاری قارشی‌لاییب، اونلارین احوال- روحیه‌سینی، سئوینج و کدری‌نین دؤزوٍملوٍ شاهیدی اولوبدور. اونلاردان کیمی‌سی درد الیندن قورتاریب قاچمیش، پارکین بیر بوجاغینا سیغینان؛ کیمی‌سی اؤز ایستکلیسی ایله بیرلیکده بیر دینج یئر آراییب آختاریب، شیرین رؤویالارا دالان؛ کیمی‌سی اعتیاد جایناغیندا سیخیلیب، یئرسیزلیکدن بیر گوٍشه‌یه دالدالانیب گئجه‌له‌ین؛ کیمی‌سی گنج‌لییین قانادلی آرزیلاری‌لا کیتاب الینده آغاجلار کؤلگه‌سینده وار- گل ائده‌رک دانیشگاه عشقی ایله اوچوشان، کیمی‌سی… کیمی‌سی… آنجاق هره‌سی بیر درده دالان، هر بیری بیر رنگه چالان ایدیلر…
پارکین بؤیوٍک دروازاسی‌نین یانیندا یئرلشن قوجامان چینار، بیر آغ‌ساققال کیمی سانکی باشقا آغاجلارین هنده‌وریندن گلن‌لری قارشیلاییر، گئدن‌لری یولا سالیردی.
او گوٍن ایسه بو قوجامان چینار ال- اله وئریب قوشا گئدن بیر اوغلان ایله بیر قیزین شن‌لیکله گزیشمه‌لرینی، بختیارجاسینا اونون قاباغیندان سوٍزوٍب دروازادان چیخمالارینی ایزله‌دی. اونلار دئیه- گوٍله خییاوانا چیخدیلار.
اوغلان ایییرمی بئش، ایییرمی آلتی یاشار ایدی؛ اونون ائینینده‌کی قیسا قول ساریمتیل «تی‌شئرت»ین هر اوٍچ دوٍیمه‌سی آچیق ایدی. بوغازیندان آسیلان بویون باغی‌نین آلتین زنجیری ایشیلداییردی. کیبریتی مخملدن تیکیلمیش عنّابی دار شالواری اونون آریق و اوزون قیچلارینی داها آریق و اوزون گؤستریردی. او آغ ایسپورت باشماغی‌لا تلسمه‌دن ییرغالانا- ییرغالانا یئریییردی.
قیزین زولاق- زولاق نازیک مانتووا بوٍروٍنموش نومودلو اندامی یولدان کئچن‌لردن باخیش اوموردو. قیز، اوغلان‌لا قول- قولا گئدیر، آستا- آستا پیچیلداشیر، اونون نسه سؤیلمه‌سیندن نارین- نارین گوٍلوٍردوٍ. بعضن ده دایانیر اوغلانی احتیراصلی، چیلغین باخیش‌لاریلا سوٍزوٍب، سونرا باشین اونون چیینینه دؤیه‌رک اوغونوب گئدیردی.
اوغلان او بیری الی ایله ایکی ایتین مکسیگیندن توتوب چکیردی. ایتین بؤیوٍیوٍ قولاغی ساللاق، اتلی- جانلی بیر تازی ایدی. اونون زیل قارا بویالی دریسی پار- پار پاریلداییردی. بالاجا ایت اوزون و گوٍدک قیچ ایدی. یئرییه‌نده قارنی یئرده سوٍیروٍشوٍردوٍ. اوزون قولاق‌لاری اویناقلاییردی. آغیمتیل قیوریم توٍک‌لری اونو املیک قوزویا اوخشادیردی.
اونلارین قاباغینجا ایییرمی- اوتوز آددیم آرالی بیر کیشی گئدیردی. الینده‌کی بیرزئنت ساکی الدن- اله وئریر، گاهدان بیر گئری‌یه چئوریلیب بوغوق سسله «گئده یئیین اول»- دئیه، کیمسه‌نی سسله‌ییردی. بو سسی ائشیدجک اون- اون ایکی یاشار بیر اوغلان اوشاغی الینده‌کی توربانی دالینا آتیر، قاچا- قاچا گئدیب، اؤزوٍنوٍ کیشی‌یه یئتیریردی. آمما هله بئش- اون قدم گئتمه‌میش دؤنوٍب دالا طرف باخیردی. سونرا بیر آز گئدیر، یئنی‌دن دؤنوٍردوٍ. آنجاق ایستر- ایسته‌مز یاواش- یاواش کیشی‌دن آرا آچیب، ایت‌لره یاخین‌لاشیردی. گاه اونلارلا یاناشی گئدیر، گاه دا اونلاری آرخادان ایزله‌ییردی. هردن ده بیر الینی اوزادیب بالاجا ایتی تومارلاماق ایسته‌ییردی. آمما قارا ایتین میریلداماسیندان قورخوب گئری چکیلیردی. اوع بو ایشه دؤنه – دؤنه جان آتیر، آمما ایتین چیخیریغی اونو اوغورسوز قویوردو.
بیر آن اوشاق دایاندی، سونرا سئوینجک چؤمبه‌لیب، الینده‌کی پیلاستیک توربانی قوردالاییب بیر تیکه چؤره‌ک چیخارتدی. قاراش- قاراش- دئیه چؤره‌یی ایته ساری اوزاتدی. ایت ایسه اونو سایمادی. موچ- موچ ائله‌ییب چؤره‌یی ایتین قاباغینا آتدی. ایت چؤره‌یی ایی‌له‌دی، آمما یئمه‌دی.
اوشاغین اوٍزوٍنه کده‌ر چؤکدوٍ. قارا ایت اؤزوٍنوٍ قیزا ساری وئردی. اونون قیچینا ساری سوٍرتوٍشوٍب کوٍچوٍک‌لنمه‌یه باشلادی. قیز ایته دوغرو دؤندوٍ. الینی اونون باشینا چکیر، «ائی وآآ… نه نازدی بووو»- دئیه، اونون ایکی قولاغیندان یاپیشیب اؤزوٍنه ساری چکدی. اوشاق تعجّوٍبله قیزی سوٍزدوٍ. قیز ایتین کمسییین اوغلاندان آلدی. ایندیسه ایتین بیری بو الدن، بیری او الدن گئدیردی.
اوشاغین قیریشیغی آچیلدی. گؤزلری گوٍلدوٍ. او فوٍرصتی فؤوتا وئرمه‌ییب؛ قانوو قیراغی ایله بالا ایته یاخین‌لاشدی؛ آمما اوغلانین ایتی باخیشیندان چکینه‌رک یئنه ده ایت‌دن آرا آچدی.
کیشی‌نین «گئده، یئیین اول!» سسی یئنی‌دن ائشیدیلدی. اوغلان ایکی کؤنوٍل‌لوٍ اولان کیمی بیر کیشی‌یه طرف، بیر ده ایته باخدی. سانکی سون دفه اولاراق بیر داها ایتی تومارلاماق ایسته‌یی ایله تله‌سیک ایته یاناشدی.
هامان لحظه‌ده قارا ایت بیردن- بیره اونون اوٍستوٍنه سیچرادی. کمسیک قیزین الیندن چیخدی. اوشاق قانوودان آتیلیب خییاوانا ساری قاچدیقدا، یوخاری باشدان گلن ماشین اونو حاخلادی. بوق سسی، سونرا تورموز قیژیلتی‌سی ائشیدیلدی… موٍسافیرلر ماشین‌دان یئنیب اوشاغا طرف قاچدیلار؛ سوٍروٍجوٍ ایسه «آخ‌‌خ…» دئیه‌رک، ایکی الی ایله گؤزلرینی اؤرتوٍب باشینی فرمانا سؤیکه‌دی.
سوٍروٍجوٍ بیر نئچه لحظه او حالدا قالدی، سونرا جاماعاتین های- کوٍیوٍندن اؤزوٍنه گلمیش کیمی ماشین‌دان یئنیب، قیچ‌لاری دالینجا سوٍروٍنه- سوٍروٍنه اؤزوٍنوٍ صحنه‌یه یئتیردی. جاماعاتی یاریب، اوشاغا باخان کیمی ایکی الی ایله باشینا دؤیوٍب «وای‌ی…»- دئیه یئره چؤکدوٍ.
اوغلان اوجادان بیر فیشقا وئریب چیغیردی:«Blacky!!». ماشینین سسیندن هوٍرکن قارا ایت سسه دوغرو دؤندوٍ. اوغلان قاچیب اونون کمسییین توتدو. قیز اؤزوٍنوٍ اوغلانا یئتیریب، تعجّوٍبله سوروشدو «ائوآآآ… نه اولدو؟». اوغلان «نه اولاجاق ایدی، حامبال اوغلو حامبال، آز قالمیشدی Blacky –نی اؤلوٍمه وئرسین»- دئیه، قیزین قولوندان یاپیشیب چکدی. سونرا یوٍیوٍروٍب قانوو قیراغیندا دوٍشوٍب قالمیش برزئنت ساکا بیر تپیک ووروب، قیزی دالیجا چکه‌رک بوروغو بورولدو.
بالا وای- دئیه اینیلده‌ین آتانین آرزولاری «بختیارلار»ین هارین- هارین گوٍلوٍش‌لرینده بوغولوردو. اوشاغین اوٍستوٍنه آغ پرده چکیلدیکده گؤی اوٍزوٍنوٍ سانکی قارا بولودلاراؤرتوٍردوٍ.
قوجا چینار یئنه ده دونوخوب قالمیش نظره گلیردی…
