دؤنوش
قاسیم پناهی
(بیرینجی بؤلوم)

لاچین هر سحر کیمی‌قهوه آلتیسینی تئز بیتیردی. آیاغا قالخاراق دا بارداقداکی پورتاغال سویونو بیر اودومدا ایچیب ماسانین اویانیندا تلسمه‌دن یئمه‌گینی یئیَن رامیزین یانینا کئچدی. آرخادان قول‌لارینی بوینونا سالیب اوزوندن اؤپوب سنی چوخ سئویرم دئدیکدن همن سونرا قارشیسینا کئچیب اؤتکم‌لی دوروشویلا قونوشدو.
لاچین ـ بو ایلین ان یاخشی ژورنالیستی من اولاجاغام.
رامیز ـ _ اونو آشاغیلادیغینی گؤرسه‌دن ایبلیس‌ واری گولوشویله _ وئریلن اون‌سکگیز اؤدولدن سون دؤردونو من قازانمیشام. منیم اوستومه اؤلکه‌ده ژورنالیست یوخدور . سیزلر ایکینجی‌لیگه یاریشین.
لاچین ـ _قاپیدان ائشیگه چیخاراق_ گؤره‌جه‌ییک.
رامیز مطبخده ماسانی ییغیشدیراندان سونرا قارا کوتونو گئییب سالونون قاپیسی‌نین یانینداکی دولابا بنزَر باشماق یئرینین اؤنونه گلیب اوست بؤلومونده‌کی سی‌ییرمه گوزگوده شابالیدی ساچ‌لارینی داراییب آت قویروغو باغلادی. بیغینی ایکینجی ویلهئلم کیمی‌ائشیب اؤلگون گؤرکمینی آیاقدان_باشا سوزدو. دوغرودان دا یولداش‌لارینین دئدیک‌لری کیمی‌آجیماسیز بیرینه اوخشاییردی. اونو ایلک کز گؤرن بوتون اینسان‌لار آجیق‌لی بیری اولدوغونو دوشوندوک‌لرینه باخمایاراق چوخ اورگی یوموشاق ایدی. زهم‌لی گؤرکمینی سوزوب اؤزونه بیر گؤز آتیب سئودیگی آغ کؤینه‌گینین اوزَریندن آل بویون باغیسینی آسدی.
گوزگونون سول بوجاغیندا حیات یولداشیندان بیر فوتو وار ایدی. رامیز هر گون اونو گؤره بیلسین دئیه گوزگویه یاپیشدیرمیشدی . هر سحر ده اونو گؤرونجه ائولی‌لیک‌لرینین ان دادلی گون‌لرینی تامسیناراق ایلک اؤدولونو او فوتولارین یاردیمی‌ایله قازاندیغینی خاطیرلاییردی.
ائولندیک‌لریندن سونراکی ایلک گزینتی‌لری ایدی. شهرین قالابالیغیندان اوزاقدا، اؤزلریندن باشقا کیمسه‌نین اولمادیغی بیر یئرده زامان کئچیرتمک ایسته‌ییردی‌لر . رامیز ساوالانین اتکگینده‌کی آتا_بابا یایلاق‌لارینی اؤنردیگینده لاچین دا کؤنول وئردی. بیرلیکده یولا دوشدولر. آخشام باشی یایلاغا چاتیب یام‌یاشیل یاماجدا چادیر قوردولار. یئمک سونراسی چادیرین اؤنونده، چیمَنین اوستونده اوزاندی‌لار. ان بالاجا اولدوزلار بئله گؤرونوردولر.
لاچین ـ سنجه منیم اولدوزوم‌هانسی دیر؟
رامیز ـ سنین‌کینی بیلمیرم. آنجاق منیم اولدوغونا گؤره آیین یانینداکی او ان پارلاق اولدوز منیم اولمالی دیر.
بیرلیکده اولدوزلاری سایاراق یوخویا دالدی‌لار. ائرته‌سی گون بالیق‌لی چایدا چیمدی‌لر. سونرا دا قایایا چیخماغی کسدیردی‌لر. قایانین باشیندا رامیز حیات یولداشیندان فوتو چکمک ایسته‌دی. لاچین اوچورومون آغزیندا ال‌لرینی ایکی طرفدن ده آچیب ساچ‌لارینی یئله وئردی . قارتال اووونو جایناق‌لاییب آن ایچینده قالدیردیغی کیمی‌،سانکی او دا قایانی یئریندن اویناداجاقدی. لاچینین فوتودا بللی اولمایان کسکین ماوی گؤزلری ده رامیزده بئله بیر ایمگه‌نین یارانماسینا یاردیم ائدیردی. سونرالار رامیز فوتولاری اینجه‌له‌دیگینده لاچینین آرخاسیندا بیر کؤهول اولدوغونو آنلادی. یئنیدن اورایا گئدیب او زامانا دک گیزلی قالان کؤهولو ایچینده‌کی سلجوق‌لو دفینه‌سی ایله آچیغا چیخارتدی. همن ایلده ایلین ان یاخشی ژورنالیستی سئچیلدی.
اوزونو یاناشدیریب _ سنی یئنمک زوروندایام سئوگیلیم _ دئیه‌رَک فوتودان اؤپدو.
ائودن چیخماق اوچون تام آنیق اولدوغوندا تئلفونو کوتونون ایچری جیبینده تیترَ‌دی. قزئت بوروسوندان یولداشی زنگ ائتمیشدی.
ـ سلام آیخان گون آیدین قارداشیم.
آیخان ـ گون آیدین رامیز. قولاق آس گؤر نه دئییرم.
ـ ائشیدیرم سنی.
آیخان ـ گئجه بلدییه ایشچی‌لری ارک قالاسینین چئوره‌سینده‌کی قازینتی‌لاردا کوتله‌وی گور تاپیب‌لار. اؤزونو تئز اورایا یئتیر یوخسا بیرینجی‌ سالیق لاچیندان اولاجاق بیله‌سن.
ـ تامام.
رامیز چئویک آددیم‌لارلا اؤزونو آرابایا یئتیریب یولا دوشدو. چاتدیغیندا اوندان باشقا کیمسه یوخ ایدی. ائولری ارک قالاسینا یاخین اولدوغوندان دولایی باشقا ژورنالیست‌لردن تئز یئتیشدیگینی دوشوندو.
قازیلان یئرین چئوره‌سینه اون_اون ایکی قوروق‌چو قویموشدولار. رامیز ژورنالیست‌لیک کارتینی گؤرسه‌دیب شکیل چکمک اوچون یاخینلاشدی. اوچ کوادرات مئتره یاخین چالادا اون‌یئددی اینسان ایسکلئتی وار ایدی. اونلاردان اونو ائرکک ، یئددیسی ایسه قادین سوموگو کیمی‌گؤرسن‌سه ده هئچ بیرینین قافا تاسی یوخ ایدی. رامیز یوبانمادان رئپورتاژ ایشله‌ییب آیخانا گؤندردی.تام اورادان آیریلماق ایسته‌دیگینده سوموک‌لرین آراسینداکی سامانلی پالچیغا بنزر اسکی کاغیذ ایلگیسینی چکدی. گؤزتچی‌لرین گؤزونو اوغورلاییب چالایا ائندی. سوموک‌لره توخانمادان اسکیمیش مکتوبو گؤتوروب چتین‌لیک‌له چالادان چیخدی. کیمسه‌نی ماراقلاندیرمادان دا کئشیک‌چی‌لرله ساغ اوللاشیب اورادان آیریلدی.
بیری‌نین آرخاسینجا گلمه‌دیگیندن امین اولدوقدان سونرا آرابانی خیابانین قیراغینداکی آغاج‌لارین کؤلگه‌سینده ساخلاییب مکتوبو گؤتوردو. کاغیذین آراسیندان بئیین چاتلادان ایرین قوخوسو گلیردی. آن ایچینده رامیز باشینی پنجره‌دن ائشیگه چیخاردیب قوسدو. داشبوردداکی مندیلی گؤتوروب بورنونا باغلادیقدان سونرا یئنیدن کاغیذین قاتینی آچدی. اوزرینده دیش‌لرین آراسیندا یئرلشه‌جک قدر بالاجا اولان اَت دیدیک‌لری وار ایدی. تام اورتاسیندا قانلا ” من اولدوغوم سوره‌جه سیزه حیات یوخ. ” آلتیندا ایسه “بذ قالاسی‌نین تام اؤنونده‌کی تپه‌نین آرخاسیندا بیر داخما وار. سنی اورادا گؤزله‌ییرم. ” یازیلمیشدی. مکتوبون کیمدن اولدوغو، نه زامان، کیمه یازیلدیغی بللی دگیلدی. آیریجا ایسکلئت‌لر آراسیندا اولدوغو داها دا گیزم‌لی ایدی. رامیز بونون سیرّینی آچیغا چیخارتماق اوچون مکتوبدا‌کی بولوناقا گئتمه‌گی کسدیردی. اونون اوچون ده واختینی کورلامادان آیخانا بیر مئساژ آتیب یولا دوشدو.
آخشام چاغی بذ قالاسینین اؤنونده‌کی بؤیوک تپه‌نین آرخاسینا یئتیشدی. یولون قالانینی آیاق‌لا گئتمک زوروندا ایدی. جیب تئلفونویلا ، مکتوبو گؤتوروب یولا دوشدو. بیر آز آرالاندیقدان سونرا گئری قاییدیب آرابانین صاندیغیندان ال فنرینی ، بیر ده اوو توفنگینی آلیب مئشه‌‌نین اورتاسینا دالدی.
هارا گئده‌‌جه‌گینی بیلمیردی. گؤز ایشله‌دیکجه گؤی اوزونه اوزانان پالید آغاج‌لاری گؤرسه‌نیردی. اورایا قدر گلدیگینه باخمایاراق گئتدیکجه ایچینه قورخو چؤکوردو. ماهنی اوخوماق‌لا اؤزونه اورَک وئرمه‌گه چالیشسا دا بارماغینی چیگینینده‌کی توفنگین ماشاسیندان آییرا بیلمیردی.
هاوا قارالمیشدی. رامیز تیترَک آددیم‌لارلا ایره‌لی گئده‌‌رَک دونقولداییردی. هردن اؤزونو دانلاسا دا ان یاخشی ژورنالیست اولماق اوچون بونو ائتمک زوروندا اولدوغونو دا دوشونوردو. آددیم‌لارینین آلتیندا ازیلن یارپاق‌لارین سسیندن باشقا بیر سس ائشیتمیردی. مئشه‌ده‌کی آغیر سس‌سیزلیک اور‌گینی آغزینا گتیره‌جک قدر قورخونج ایدی.
گئتدیگی آغاج‌لیق آچیغا چیخدی. بالاجا داخما بؤیرونده‌کی قوجا چینار آغاجی ایله اوزاقدان گؤروندو. رامیز اؤزونو بیر آز آرالیدا اولان کولون دیبینه وئریب چئوره‌نی یوخلادی. گئجه اولدوغونا باخمایاراق داخما قارانلیقدا قالمیشدی. اولا بیلسین بورادا کیمسه یوخدور دئیه دوشوندو. آنجاق مکتوبو آنینجا _ کسکین‌لیک‌له بیریسی داخمادا دیر _ دئیه‌رَک میزیلدادی. آنورمال بیر شئی گؤرونموردو. ایره‌لی‌له‌مک اوچون بیر_ایکی دؤنه درین نفس آلدی . سونرا فنرینی قولتوغوندا ساخلاییب توفنگینی ایکی اللی یاپیشیب داخمایا دوغرو یولا دوشدو. گوموشو آی ایشیغی آلتینداکی دورومونو پلی‌استیشن اویون‌لاریندا زامبی‌لرله ، خورتدان‌لارلا ساواشان ایگیدلره بنزه‌دیردی. آنجاق نه قدر ده کوماندولار کیمی‌اوستالیق‌لا اورا_بورانی کونترول ائده‌رَک آددیم آتیب اؤزگوونینی ایترمه‌مک اوچون چالیشسا دا ، داخمایا ساری آتدیغی هر آددیم سانکی اونو بلیرسیز بیر یئره گؤتوروردو. هردن قورخودان نفسی کسیلیب باییلاجاق کیمی‌اولوردو. او آن آغزیندا زورلا بیر اودوم توپورجَک توپلاییب بوغازینی ایسلادیردی. آرتیق داخمایا چاتمیشدی . اؤزونو چتینلیک‌له آیاقدا توتاراق بالاجا پنجره‌نین آلتیندان سوزولوب قاپینین آغزینا یئتیشدی. توفنگینین اوجویلا قاپینی ایتَله‌‌ییب آستا_آستا ایچری گیردی. داخمانین دیبینده دیوار بویونجا اوزانان لمه وار ایدی. رفده بیر شئی‌لر اولسا دا نه اولدوق‌لاری سئچیلمیردی. دیوارین اؤنونده ماسایا اوخشار بیر یئشیک اوستونده ده اورتادان بؤلونموش بیر شئی گؤرونوردو. رامیز اورکله‌نیب بیر آددیم داها ایره‌لی گئتدی. تاختا قاپی تاراق‌لا باغلاندی .
قاپی آچیلدی. لاچین آلیشقانلیق اوزوندن ایچری گیرر_گیرمز دانیشماغا باشلادی. آردیجیل اولاراق بیر نئچه سورغو وئردی. بیر سس ائشیتمه‌یینجه باشماغینی چیخاردیب مطبخه گیردی. اورادا دگیلدی. همن چیخیب اوتاغا باخدی. اورادا دا یوخ ایدی. رامیزین ائوده اولماماسیندان شاشیردی . بئش ایل اؤنجه‌دن بری هر گئجه ایشدن قاییداندا اونو ائوده گؤروردو. اونون اوچون ده ائوده اولماماسی دوزگوسوز گلدی.
جیب تئلفونونو گؤتوروب نئچه دؤنه نؤمره‌سینی ییغدی. آنجاق باغلانتی قورولمادی. باغری یاریلدی. اورگی آز قالیردی دؤشونو یاریب ائشیگه آتیلسین. آیخانین نؤمره‌سینی توتدو.
آیخان ـ الو
لاچین ـ سلام آیخان بَی. رامیز اورادا دیر؟
آیخان ـ سلام. بورادا دگیل.
لاچین ـ ائوده ده دگیل.‌هارادا اولدوغونو بیلیرسیز می؟
آیخان ـ سحر ائرکن واتس‌آپ‌’دان منه بیر رئپورتاژ گؤندرمیشدی. مئساژیندا بلدییه ایشچی‌لرینین ارک قالاسینین چئوره‌سینده تاپدیق‌لاری کوتله‌وی مزاردان سؤز آچمیشدی. من داها آرتیق بیلگی اوچون بلدییه باشچیسینا زنگ ائتدیم. آنجاق او بیلیک‌سیز اولدوغونو سؤیله‌دی. باشقا ژورنالیست‌لردن ده سوراق توتدوم . کیمسه ائله بیر شئی اولدوغونو دوغرولامادی.
لاچین ـ بو نئجه اولا بیلر؟
آیخان ـ منی ماراقلاندیران باشقا بیر آنورماللیق دا وار. رامیزین منه گؤندردیگی رئپورتاژداکی فوتولارین‌هامیسی قارانلیق دیر.
لاچین ـ من ، من … سرسم اولماق اوزرَ‌یم. بو ، بو، بونلار نئجه اولا بیلر؟ سیز نه‌دن بونلاری او آن منه بیلدیرمه‌دینیز؟
لاچین آیخانین سؤزلرینین آردینی دینلمه‌دن باغلانتینی کسدی. همن قاپییا ساری یئرییب باشماق یئریندن باشماق‌لارینی گؤتوروب اگیلمه‌دن یئره آتدی . آنجاق گئیمه‌ییب گئری قاییتدی. نه‌سه دوشونوب یئنه ده قاپییا دوغرو گئتدی . یئنه ده گئری دؤندو. او دوغرودان دا نه ائده‌جه‌گینی بیلمیردی.
قاپی دؤیولدو. لاچین کیمسینیز دئیه سسلندی. قاپینین آرخاسیندان آیخانین سسینی ائشیدینجه گئجیکمه‌دن قاپینی آچدی.
آیخان ـ سلام. تئز اول گئدیریک.
لاچین ـ‌هارا؟
آیخان ـ رامیز منه باشقا بیر ساوجیق دا گؤندریب. اونو گؤرمه‌میشدیم.
لاچین ـ نه یازیب؟
آیخان ـ بذ قالاسینین تام اؤنونده‌کی تپه‌نین آرخاسیندا بیر داخمایا گئتدیگینی یازیب.
گونشین ایلک ایشیق تئل‌لری قارانلیغین باغرینی سؤکدوکده تپه‌نین آرخاسینا چاتدی‌لار. رامیزین آراباسینی گؤرونجه سئویندی‌لر. لاچین تئز ائنیب آرابانی یوخلاماغا باشلادی.
سحر شئحی مئشه‌ده باشقا بیر اورتام یاراتمیشدی. اورک اوخشایان سرین یئل اسیردی. آغاج‌لارین،چیچک‌لرین اوت‌لارین قوخوسو اینسانین عاغلینی باشیندان آلیردی. آیخان درین بیر نفس آلیب قول‌لارینی قوینونا قویوب آرابایا سؤیکندی. او اوزاق‌لارا باخاراق کئچمیش گون‌‌لره قاییتدی. بئش ایل بوندان قاباق رامیزله لاچین ائولنمه‌میشدن دوز بیر آی اؤنجه رئپورتاژ اوچون لاچین‌لا آستارایا گئتمیشدی‌لر . ایش‌لرینی بیتیردیکدن سونرا قاییدان باش حئیران گَدیگین قیراغینداکی مئشه‌یه دالدی‌لار. آیخان اورک سؤزونو دئیه بیلمک اوچون بیله‌رَک‌دن اونو آغاج‌لارین اورتاسینا چکمیشدی. آنجاق سنی چوخ سئویرم دئییب ائلچی‌لیک ائتمک اوچون اؤزونو زورلاسا دا او ایشی باجارمامیشدی. او گوندن بئش ایل کئچسه ده آیخان حله ده لاچینی سئودیگینی دوشونوردو.
آیخان ـ تانری بورانی اینسان‌لار روح‌لارینی آریندیرا بیلسین‌لر دئیه یارادیب دیر.
لاچین ـ سن ائله بیل گزمه‌گه گلیبسن!
آیخان ـ ایندیکی گلمیشیک دوغانین دا دادینی چیخارتساق پیس اولماز. ائله دگیل می؟
لاچین ـ دگیل. آرابادا اؤنملی بیر شئی یوخ. تئز یولا دوشمه‌لی‌ییک.‌هارادان گئده‌جه‌ییک؟
آیخان اورا_بوارنی آختاردیقدان سونرا_آیاق ایزلری بو یانا گئدیب_ دئیه‌رَک مئشه‌نین اورتاسینی گؤرستدی .
آرتیق گونشی گؤی اوزونده گؤرمک اولوردو.‌هاوا قیزمیشدی. آغاج‌لاردان سورو_سورو چیخیب اونلارا سالدیران آغجا قانادلار آمان‌لارینی کسمیشدی. سحر چاغی اینسانین روحونو اوخشایان دوغا یاواش_یاواش سرت اوزونو ده گؤرسه‌دیردی. اونلار آیاق ایزلرینین دالینا دوشه‌رَک ایره‌لی‌له‌‌ییردی‌لر. آچیقلیغا چیخینجا لاچین داخما اورادا دیر دئیه‌رَک باغیردی. آیخان تئز الینی اونون آغزینا آتیب سوسدورماغا چالیشدی .
آیخان ـ هیییس. اورادا کیم‌لرین، نه‌لرین اولدوغونو بیلمیریک. ساقین رامیز اورادا دیر دئیه دویغوسال داورانمایاسان.
لاچین ـ کیم اولاجاق کی؟
آیخان ـ ائله بیل رامیزین اؤلولرله اوغراشدیغینی اونوتموسان!؟ سن بو کولون دیبینده گیزلن. من داخمانی یوخلایاجاغام. تهلوکه‌لی بیر شئی اولماسا فیشقیریق وئره‌جه‌یم.
لاچین ـ تامام.
آیخان چکینجه‌لی آنجاق یئگین آددیم‌لارلا اؤزونو داخمانین پنجره‌سینه یئتیردی. گیزلیجه باشینی شوشه‌یه سؤیکه‌ییب ایچرینی گؤزدن کئچیرتدی. سونرا لاچینا ساری دؤنوب فیشقیریق چالاراق الی ایله گل دئیه ایشارت وئردی. بیرلیکده ایچری گیردی‌لر. لاچین چیغلیق آتیب دیزلرینین اوستونده اوتوراراق الینی باشیندا داراقلاییب گؤزلرینی یومدو. گؤوده‌سینین تیتره‌ییشیندن آشماسین دئیه زورلا اؤزونو دیک توتماغا چالیشیردی. آیخان گؤزلرینین گؤردوگونه اینانا بیلمیردی. هر یئر ایرین قوخویوردو. پالچیق‌لا سووانمیش دیوارلار، یئر، تاوانداکی آغاجلار‌هامیسی سانکی قان‌لا بویانمیشدی‌لار. اَت دیدیک‌لری هر یئرده گؤرسَنیردی. دیوارین دیبینده رَف بویونجا قافا تاسی دوزولموشدو. ساغدا بیر یئشیک سولدا ایسه اوست_اوسته قالانمیش جیر_جیندیرلار وار ایدی. آیخان یئشیگه یاخینلاشدی. اوستونده ساخسیدان دوزلینمیش یاریم دایره بیر دامغا وار ایدی. کسکین‌لیک‌له اونون باشقا بیر یاریسی دا اولمالی ایدی. دامغانی گؤتوروب او یان_بو یانینا باخدی. اوزرینده بیلمه‌دیگی الیفبا ایله نه‌سه یازیلمیشدی. اونو جیبینه باسیب حله اؤزونو اله آلا بیلمه‌ین لاچینا ساری گئتدی. دیزلرینین اوستونده اوتوروب اونو اووتماغا چالیشدی. آچیق قالان تاختا قاپی تاراق‌لا قاپاندی. آن ایچینده داخمانی قارانلیق بورودو. یئشیگه ساریدان یوکسه‌لن قاییم چیغلیق یئرینی قاه_قاهایا وئردی. آیخان لاچینی قوروماق اوچون قول‌لارینی بئلینه ساردی. سس گلن یئردن ایستیسی اوزلرینی قارسالایان آلوو قالخدی. آلوو گئتدیکجه اینسان گؤوده‌سینه دؤنوردو. لاچینین دیرناق‌لاری آز قالیردی‌لار آیخانین بؤیرونو دئشسین‌لر. ایکیسی ده باییلماق اوزره ایدی‌لر. کیشی گؤوده‌سینه بنزر آلوو بوغونوق سس‌له: _حله سیزین واختینیز گلمه‌میشدی. آنجاق اؤزونوزو دامویا آتدینیز. من اولدوغوم سوره‌جه سیزه حیات یوخ_ دئدی .
لاچین بوینونون آغریسی ایله اؤزونه گلدی. بوینونو اوواندان سونرا اوزاندیغی یئردن قالخیب ساغینی_سولونو آختاردی.آیخانی داخمادا گؤرمه‌یینجه آلنیندا سویوق تر مونجوق‌لاندی. گوجونو توپلاییب یاریم آچیق قالان قاپییا ساری یئریدی. گئجه اولموشدو. قوجا چینارین یارپاق‌لارینین آراسیندان گوموشو آی ایشیغی ساچیردی. آغاجین دیبینده کیمسه وار ایدی. یئردن بیر دگه‌نک گؤتوروب سس‌سیزجه آرخاسینی چینارا سؤیکه‌ین آداما یاخینلاشدی. تام دگنه‌گی بوینونا ائندیره‌جک آندا اونون آیخان اولدوغونو آنلادی. قارشیسینا کئچیب دانیشماق ایسته‌دی. باییلمیشدی. لاچین داخمانین دیوارینین یانیندا گؤردوگو سو قاپچاغیندان بیر اووج سو آلیب آیخانین اوزونه سپدی. آیخان قورخویلا اؤزونه گلدی.
آیخان ـ نه اولدو؟ اؤلدوک مو یوخسا؟
لاچین ـ اؤلمه‌میشیک. سن بورادا نه آختاریرسان؟ ایکیمیز ده داخمادا دگلدیک می؟
آیخان ـ داخمادایدیق. گئریسینی خاطیرلامیرام.
لاچین ـ رامیزدن سوراق یوخ. ایندی نه ائتمه‌لی‌ییک؟
آیخان _شهره دؤنمه‌لی‌ییک_ دئیه‌رَک جیبیندن یاریم دامغانی چیخاردیب اونا گؤرسَتدی .
آیخان ـ رامیزی تاپماغین یولو بو دامغادان کئچیر. بونو دا اینجه‌لمک اوچون سهندین یانینا گئتمک زورونداییق .
لاچین کؤنول‌سوز اولسا دا باشینین ایشارتی ایله اونا قاتیلدیغینی بیلدیردی.
گلدیک‌لری یؤندن آرابالارا ساری یولا دوشدولر. جیرجیرامالار باسقینا کئچمیش مونقول اوردولاری کیمی‌سس‌لریله یئری_گؤیو تیتره‌دیردی‌لر. یولا چیخدیق‌لاری اوزون سوردو. قاییتدیق‌لاری جیغیر اونلارا تانیش گلسه‌ ده آرابالارینی قویدوق‌لاری یئری تاپا بیلمیردی‌لر. آیخانین ایچی فیرتینالی دنیز کیمی‌چالخالانسا دا لاچینین الینی سیخاراق اونا اورک وئرمه‌گه یئلته‌نیردی. توتدوق‌لاری یولون سونوندا یولون آیریمینا چاتدی‌لار. گلرکَن اورانی گؤرمه‌سه‌لر ده ایکیسی ده ساغدان گئتمه‌گی سئچدی‌لر . بیر آز گئتدیکدن سونرا داخمانین اولدوغو آچیقلیغا چیخدی‌لار. داخمایا یاخینلاشمادان همن یولو گئری قاییتدی‌لار. یول آیریمینین سولوندان گئتدی‌لر. یئنه ده داخمانین اولدوغو آچیقلیغا چاتدی‌لار. لاچین قوروموش دیل دوداغینی چتین‌لیک‌له ایسلادیب. دیلی توتار_توتماز بیر نئچه کره سو سؤیله‌ییب باییلدی. آیخان ایلک دؤنه ان چوخ سئودیگی آدامی‌قوجاغینا آلیب چینارین دیبینه گؤتوردو. بیر آن باش وئرن اولای‌لارا باخمایاراق گؤزلرینی لاچینین قاپالی گؤزلرینه دیکیب یاشادیغی موتلولوغون دادینی چیخارتماغی دوشوندو. آنجاق اونون سو ، سو اینیلتیسینی آنینجا داها یئگین آددیم‌لار آتدی. چینارین آلتیندا لاچینی یئره اوزادیب داخمانین بانینداکی قاپچاقدان سو گؤتورمه‌گه گئتدی. قاییدارکَن لاچینی یئرینده گؤرمه‌دی.
ال‌لری تیتره‌مه‌گه باشلادی. سو داملا_داملا اووجوندان یئره آخیب اؤنونه تؤکولوردو. لاچینین دا رامیز کیمی‌آرادان یوخ اولاجاغی بئینیندن کئچدی. آدام‌جیق‌لار کیمی‌قورویوب قالمیشدی. قولاغینی کار ائده‌جک باغیرتیلا اؤزونه گلدی. اورگینین دؤیونتوسونو ائشیده بیلیردی. باغیرتی داها یوکسک سس‌له یئنی‌لندی. چینارین بوداغیندان ساللانان بیری یئره دوشدو. آیخان آیاق‌لارینی آددیم آتماغا زورلایاراق چینارا یاخینلاشدی. یئره دوشن لاچین ایمیش. تئز دامارینی توتوب قولاغینی اورگینین باشینا دایادی. داماری آتیردی. بارماق‌لارینی بورنون اوجونا توتدو. گوج‌سوز آنجاق آردیجیل نفس آلیردی. بیر داها سو قاپچاغینا ساری قاچیب سو گتیردی. لاچینین اوزونه سو ووراراکن بوینوندان آسلانان دامغانی گؤردو. الینی جیبینه آتیب دامغانی چیخارتدی. کسکین‌لیک‌له او بیری یارسی ایدی. لاچینین بوینوندان یاریم دامغانی چیخاردیب الینده‌کینه یاخینلاشدیردی. بیرلشینجه اوزرینده بیر خاچ ،چئوره‌سینده ایکی قیلینج، بیلمه‌دیگی الیفبا ایله ده بیر شئی‌لر گؤروندو. ایکیسینی ده جیبینه باسیب لاچینین باشینی دیزینین اوستونه آلدی. اونون سوچ‌سوز بنیزینی دویا_دویا سئیر ائده‌رَک ساچ‌لارینی سیغاللادی. ایسته‌مه‌دن لاچین‌لا تانیشدیغی ایلک گونو آنیمسادی. قزئت بوروسونون سالونوندا تله‌سه‌رَک‌هاراسا گئتمک ایسته‌ییردی. تیندن دؤنونجه لاچین‌لا گؤیوس_گؤیوسه توققوشدولار. ایکیسی ده ییخیلدی‌لار. آیخان تئز قالخدی. اونون دا الیندن توتوب دیکلتدی. سونرا دا باغیش دیله‌یه‌رَک اونون آیین_اویونونو توپلاییب چانتاسینا ییغیب الینه وئردی. لاچین هئچ بیر شئی دئمه‌دن چانتا ایله آیخانین تپه‌سینه چالیب یولا دوشدو. صاباحی‌سی امکداش اولدوق‌لارینی اؤیره‌نین‌جه لاچین نئچه دؤنه آیخاندان باغیش دیله‌دی. گون اورتا دا اونو یئمه‌گه چاغیردی. بیرلیکده بالیق یئمک خاناسینا گئتدی‌لر. آیخان اوتانجدان دینیب_دانیشمیردی. یئمه‌گین آراسیندا لاچین گؤزلرینی اونا دیکدی.
لاچین ـ سیزجه سئوگی نه دیر؟
آیخان ّ اوزون بیر یولچولوق‌دور.
لاچین ـ نئجه؟
آیخان ـ چاتیلماز، چاتینجا بیتَن دیر.
لاچین گؤزلرینی آچیب _ نه اولدو_ سوراراق آیاغا قالخدی.
آیخان – تئز سهندله گؤروشمه‌لی‌ییک . سن آغاجدان ساللاندین. سونرا ییخیلدین. خاطیرلاییرسان می؟
لاچین ـ یوخ.
آیخان ـ بیر آزدان سونرا‌هاوا ایشیق‌لاناجاق. تئز یولا دوشمه‌لی‌ییک.