سئوگیدن سونرا ( پوئست؛ ۳)
قاسیم پناهی

آیلار پالتوسونو چیخاریب دیوارداکی آسقیدان آسدیقدان سونرا شالینی بوینونا آتیب سوبایا ساری گئتدی. چایدانین قاپاغینی گؤتوروب ایچینی قوخلادی.
آیلار ـ هوووم. خوروز قویروغو چایین دا حاضیر دیر. گؤروم ایسته‌کان‌لارین دا تمیز اولورسا اؤزوموزو ایکی چایا قوناق ائدیم.
کیتاب قفسه‌‌سی‌نین یانینداکی بالاجا ماسانین اوستوندن ایسته‌کان گؤتورورکن گؤزلری قفسه‌ده‌کی ایسته‌کانا دوشدو. اوزونو منه ساری چئویرمه‌دن گولومسه‌دی.
آیلار ـ سلیقه‌لی اولدوغونو سانمیشدیم. آما ساندیغیم قدر ده دئییلمیش‌سن.
باشیمی‌آشاغی سالیب هئچ بیر شئی سؤیله‌مه‌دیم. ایسته‌کانی گؤتوروب الینده فیرلاییب هر طرفینه باخدی.
آیلار ـ _گوله‌رَک_ باخ بوراسیندا دا دوداق روژو وار دیر. دئمک منیم کئچن دؤنه چای ایچدیگیم ایسته‌کانی یومادان ساخلاییبسان. ائله دئییل می؟ آما بئله ایش‌لره گرک یوخ‌دور. بوندان بئله من تئز_تئز بورادا چای ایچه‌جه‌یم. هر دؤنه ایسته‌کانی قیراغا قویسان سنه چوخا باخار.
ـ سن گؤزلرین‌له بو کاسیب‌یانا ائوه توختاق‌لیق گتیر گئریسینی بوش وئر.
آیلار ـ من ده بورایا گئریسینی دانیشماق اوچون گلدیم. باخ اوختای هر شئی سن گؤردوگون کیمی‌دئییل. اولا بیلسین من سنین گؤزونده زنگین، موتلو، قایغی‌سیز بیری کیمی‌گؤرونورم آنجاق تام عکسینه دیر. سئوینج چوخدان بیزیم عاییله‌دن کؤچوب گئدیب دیر. آتام‌لا آنامین سویو بیر یئره آخمیر. من لاپ بالاجا اولان چاغدان سانکی بیر_بیری ایله اؤزگه دیرلر کیمی‌کئچینیرلر. پول اونلارین گؤزلرینی ائله کور ائله‌ییب کی منی، جانلاریندان بیر پارچا، بیری‌جیک قیزلارینی بئله گؤرمورلر. آتام دا ، آنام دا کئف‌جیل آداملار دیرلار. من ده اونلارین کئف‌لرینین قوربانی اولموشام. آنام ایلین اون آیینی دوبایدا کئچیریر. آتام دا هر هفته ائویمیزده قوناق‌لیق سالیر. من ده اونون باسقیسی ایله قوناقلارا قوللوق ائتمک زوروندا قالیرام. بئلنچی بیر حیاتدا یاشاماماق اوچون اینتحار ائتمک ایسته‌ییردیم. آنجاق دوز پیلانلادیغیم اؤلومو گئرچک‌لشدیره‌جه‌گیم گون او قضا باش وئردی و سن‌له تانیش اولدوم.
ـ یاشاماغینا نه‌دن اولدوم‌سا نه موتلو منه.
آیلار ـ اینتحاردان واز کئچدیم. _بیر آز سس‌سیزلیکدن سونرا_ آنجاق بو قدر دئییل. آنام بیر نئچه گونه بورایا گله‌جک. اونلار منی باشلاریندان آچماق اوچون خالام اوغلو یاشارلا ائولندیرمک ایسته‌ییرلر.
سون نئچه جومله‌دن سونرا اؤزونو اَله آلا بیلمه‌دی. یاش داملالاری آزغین دالغالار کیمی‌چاغلاییب یاناقلارینی ایسلاتدی. اونون آغلاماسینا دؤزه بیلمیردیم. بیر یاندان دا بو ایشین‌هارا گئدیب چیخاجاغینی دوشونونجه اؤزومو قورخو باسیردی. دوغدوغوم گوندن هر آن یانیت‌سیز سورغولارین اؤنونده عاجیز قالان من یئنه ده چتین دورومدا قالمیشدیم. آلیشقانلیق اوزوندن اؤز_اؤزومه اوره‌گینین سسینی دینله دئدیم.
گؤزلریمی‌یوموب آیلارین باشینی چیگنیمه سؤیکه‌ییب گؤز یاشلارینی سیلدیم. ایچیمده او گونه قدر دویمادیغیم بیر سئوینج وار ایدی. سانکی او دا یاشادیغی آنین دادینی چیخاریر کیمی‌قیمیلدامیردی.
آیلار ـ اوختای من سنی سئویرم. نه اولار منی یالقیز بوراخما.
ـ بوراخمارام.
آیلار ـ سؤز وئریرسن می؟
ـ سؤز.
آیلار گئتدیکدن نئچه دقیقه سونرا قاپی چالیندی. چالیمیندان یوسیف اولدوغونو آنلادیم. قاپینی آچیب ایچری گیردیم.
یوسیف ـ قاباقلار قاپی آغزیندا خوش گلدین دئییب ایچری آلاردین. سنی قینامیرام.سئوگیلی جانان اولان یئرده اغیار ایله نه سلام علیک.
ـ نه دئییرسن اؤز _اؤزونه؟
یوسیف ـ اده مال مندن گیزلتمه‌گه چالیشما کی ، ایکی ساعات دیر گؤزله‌یرم آیلار چیخا گئده من گلیب بیر خوروز قویروغو چای ایچه‌م.
ـ چایین بیری نئچه‌ دیر به‌یم؟ خیاباندا دا ایچه بیلردین.
یوسیف ـ من چایا پول وئرسه‌م سنین کیمی‌پوتور اولارام. او زامان گرک گونده اوچ ائونه یئرآلما یومورتا یئیه‌م.
اونسوز دا سنین چایین هئچ یئرده یوخدور. دور گؤزل اوغلان ایکی چای گتیر گؤروم نه دانیشیردینیز.
ـ اؤزون سوز منیم کئیفیم یوخدور.
اولانلاری یوسیفه آنلاتدیم. او دا منیم سؤزلریمدن شاشیردی. بیر نئچه دقیقه منی اله سالیب گوله‌ندن سونرا بیر چیرتمیق ووروب تاپدیم دئیه‌رَک یئنه گولدو.
نه‌یی تاپدین؟
یوسیف ـ سنی بو فلاکتدن قورتاراجاق یولو تاپدیم. آتا_آنام همیشه سنین منه ائتدیگین یاخشیلیغی بیر شکیلده اؤده‌شمک ایسته‌ییرلر. گون بو گون‌دور. هم اونلار سنی ان آزی منیم قدر سئویرلر. من اونلارلا دانیشارام. آیلارین الینی سنین الینه قویماق آن ایچینده اولاجاق.
ـ آخی منیم ائولنمک اوچون هئچ بیر شئی‌ییم یوخدور. یوسیف ـ اده مال یئنه اؤزونو او یولا ووردون مو؟ آتام هر شئی‌یی یولونا قویاجاق. سن راحات اول. پولدو وار، ائودی وار. ایش ده دوزلر داها نه ایسته‌ییرسن؟ باخ آتام‌هاچاندان سنه دئییر بو ماغارانی بوراخ گل بیزیم اوست قاتدا یاشا آنجاق سن قبول ائتمیرسن.
یوسیف اوینایاراق دوروب حاضیرلاندی.

ـ‌هارا؟
یوسیف ـ گئدیم آنام‌لا دانیشیم ائلچی‌لیک ایش‌لرینی گؤرسون.
ـ دور. اولماز. قوی گؤرک نه اولور.
یوسیف ـ _ قاپیدان چیخاراق_ من گئتدیم چال اویناسین اژدر….
کئشکه اولانلاری یوسیفه آنلاتماسایدیم دئیه دوشوندوم. الیمی‌پالتومون جیبینه سالدیم. سیقارئتیم قورتارمیشدی. اورا_بورانی آختاریب بیر آز خیردا پول تاپدیم.‌هاوا آلیب سیقارئت چکمک اوچون ائشیگه چیخدیم. پیرتلاشیق دوشونجه‌لر ایچینده الیمی‌جیبیمه سالیب یولا دوشدوم.
تار سسی ایله اؤزومه گلدیم. یئریمده میخلانیب چئوره‌یه گؤز گزدیردیم. ان آزی ایکی ساعات یول یئریدیگیمین فرقینده اولمامیشدیم. دیوارین دیبینده آشاغی_یوخاری اون‌اوچ یاشلی ، ساچلاری بورما اوغلان اوشاغی تار چالیردی. اونو گؤرونجه قوجا یادیما دوشدو. بیر نئچه دقیقه دوردوغوم یئرده چالدیغی ماهنینی دینله‌دیم. سانکی اونونلا تانیشیق کیمی‌بیر_بیریمیزه باخیردیق. یاخینلاشیب سلاملاشدیم. آیاغا قالخیب من‌له گؤروشوب آدی‌نین صمد اولدوغونو سؤیله‌دی.
ـ چوخ گؤزل چالیرسان. اللرینه ساغلیق.
صمد ـ چوخ ساغ اولون.
ـ بو خییاباندا کیمسه یوخدور.‌هاوا دا چوخ سویوق‌دور. نه‌دن بورادا چالیرسان؟
صمد ـ چاره‌سیزلیکدن. باشقا خییابان‌لاردا چالماغی یاساقلاییب‌لار. _دولومساناراق_ باجیم خسته‌دیر. اونو حکیمه آپارماق گرک دیر.
ـ ائوینیز‌هاردا دیر؟
صمد ـ ائویمیز یوخدور. شهر قیراغیندا بالاجا بیر چادیردا یاشاییریق.
صمد دردلریمین اوستونه یئنی بیر درد آرتیردی. منیم طالئیمده بوتون آجیلاری، آغریلاری ، چتین‌لیک‌لری اؤزونه ساری چکن نه‌سه اولمالی دیر. یوخسا بو قدری ده آنورمال دیر.
یوسیفه زنگ آچیب تئز اؤزونو یئتیرمه‌سینی ایسته‌دیم. صمدله بیرلیکده چادیرلارینا دوغرو یولا دوشدوک. یول بویونجا یوسیف‌ین دیشی باغارساغینی کسیردی. آنجاق منه ده بیر سؤز دئمیردی. چاتدیغیمیزدا صمد ائنیب چادیرا گیردی. یوسیف‌له آرابادا اونو گؤزله‌دیک.
یوسیف ـ اده، مال سن بو بدبخت‌لیک‌لری‌هاردان تاپیرسان؟ سن اؤزون دونیانین ان بدبخت آدامیسان آخی سنه نه کیم نئجه یاشاییر. اونلارین وکیلی‌سن؟ نه‌چی‌سن؟
ـ حله بیر دؤز. یازیق‌لارین دورومونو گؤرمورسن می؟ بلکه الیمیزدن بیر ایش گلدی.
صمدی چادیردان چیخیب گلین دئیه ایشارت وئردی.
یوسیف‌ین آرخاسینجا من ده ایچری گیردیم. آی پارچاسی کیمی‌بیر قیز جیریق یورغان دؤشه‌گین ایچینده ایدی. باشی‌نین ایشارتی ایله بیزله سلام‌لاشدی.
صمد ـ باجیم زینب. ایگیرمی‌ایکی یاشی وار. آلتی آی دیر خسته دیر. بوغازیندا بادام‌جیق وار. هئچ بیر شئی یئیه بیلمیر. آز قالیر ایچ‌آلاتینی بئله قوسسون. حکیم‌لر عملییات لازیم اولدوغونو سؤیله‌ییب‌لر آنجاق پولوموز یوخ‌دور. اونون اوچون ده دورومو داها پیس اولوب.
یوسیف زینبین گؤزل‌لیگینه حئیران اولموشدو. گؤزلرینی اونا دیکیب اوندان باشقا هئچ کیمسه‌نی گؤرمز اولموشدو. اونا قیقاجی باخدیغیمدا سئودایا دوشدوگونو آنلادیم.
دیرسَگیم‌له بؤیرونه توخانیب زینبی گئجیکمه‌دن خسته‌خانایا گؤتوره‌جه‌گیمیزی سؤیله‌دیم.
یوسیف ـ هه، هه. هم ده بو دقیقه. بادامجیق دا خسته‌لیک دیر کی او اوجباتدان بیر اینسانین حیاتی تهلوکه‌یه دوشسون؟
صمد، هَمَن زینبی حاضیرلا خسته‌خانایا گئدیریک.
یوسیف‌له برابر چادیردان ائشیگه چیخدیق. او آنا قدر اونو او قدر جیددی گؤرمه‌میشدیم.
ـ ائله بیل تاپدیغیم بدبخت‌لیک چوخ دا پیس اولمادی.
یوسیف ـ نئجه یانی؟
ـ ائله بیل سونوندا دویون اولاجاق. گؤزلریندن زینبه وورلدوغون آنلاشیلیر.
یوسیف ـ نه…، نه سئوگی‌سی اده مال. من، من ساده‌جه یاردیم ائتمک ایسته‌ییرم.
ـ _ گوله‌رَک_ ائله مَ مَ مَ ایندن بللی دیر.
زینبی خسته‌خانایا گؤتوردوک. بوتون ایش‌لرینی یوسیف اوسته‌له‌نیب عملییات اولماسینی ساغلادی.
عملییاتدان ایکی گون سونرا زینبی بوراخاجاق‌دیرلار.
ایکی گونون ایچینده یوسیف‌له منیم ائویمین اوست قاتینی اونلار اوچون توتوب. یئنی آوادانلیق‌لار آلیب حاضیرلادیق.
ایکی گون سونرا یوسیف اونلاری یئنی ائولرینه گتیردی. قاپیدان ایچری گیردیک‌لرینده گؤزلرینده‌ سئوینجی گؤرمک اولوردو. صمد هیجاندان یئره‌_گؤیه سیغمایان قوشلار کیمی‌قانادلانماق ایسته‌ییردی. زینب ایسه سانکی حیاتی‌نین ان خوشبخت اولدوغو آنی یاشاییر کیمی‌ال_آیاغینی ایتیرمیشدی.
ائوه قورولدوقدان سونرا یوسیف گؤزلری ایله منه هیم ائله‌ییب اؤنجه‌دن پیلان‌لادیغیمیز حرکتی باشلا دئیه ایشارت وئردی. من ده باشیملا اونو اونایلادیم.
ـ زینب باجی ایندی ایسه سنین اللرین‌له حاضیرلانمیش چایی ایچیب ، دوزلتدیگین یئمه‌‌گی یئمک واختی گلدی. گؤروم بیزه نه بیشیره‌جک‌سیز؟
زینب ـ باش اوستونه، چای حاضیر دیر. آما بورادا یئمک دوزلتمک اوچون بیر شئی یوخدور.
یوسیف ـ _الی ایله آلنینا ووراراق_ آااخ، اونلار یادیمدان چیخیب. من صمد‌له گئدیم هم یئمه‌گه بیر شئی ، هم ده یئمک بیشیرمک اوچون بیر شئی‌لر آلیم. زینب خانیم بیزه شام یئمه‌گی دوزلت
سین.
اونلار گئتدیکدن سونرا زینب ایکی چای سوزوب مطبخدن گلدی. سؤزو‌هاردان باشلاییب نئجه دئیه‌جه‌گیمده قالمیشدیم. چایدان بیر قورتوم ایچدیم.
ـ هوووم. چوخ دادلی دیر.‌هامی‌منیم چاییمی‌اؤیور آنجاق سیزین دمله‌دیگینیز چای داها دادلی دیر.
زینب ـ چوخ ساغ اولون. سیزدن تشککور ائتمک گرک دیر، بیزیم حاققیمیزدا جؤمردلیک ائتدینیز.
ـ نه دئمک. اؤزل بیر ایش گؤرمه‌میشیک. زینب خانیم ایذین وئریرسه‌نیز سیزه بیر اؤنری سونماق ایسته‌ییرم.
زینب ـ بویورون.
ـ باخین من، من….
زینب ـ _گولومسه‌یه‌رَک_ سیز نه؟
ـ من سؤز بازلیق باجارمیرام. بوروشدورماق دا بیلمیرم. ریجا ائدیرم سؤزومدن اینجیمه‌یین. یوسیف، سیزله ائولنمک قرارینا گلیب دیر. مندن سیزین اونونلا ایلگیلی نه دوشوندوگونوزو سوروشماغیمی‌ایسته‌دی.
زینب بیر آز دوشوندوکدن سونرا کؤنوللو اولدوغونو بیلدیریب. چای ماهناسی ایله مطبخه دؤندو. ائله او آندا یوسیف گیلده ایچری گیردی‌لر. صمد باجی‌سینا یاردیم ائتمک اوچون بیزدن آیریلدی. یوسیف گؤزلری‌نین ایشارتی ایله نه اولدو دئیه سوردو.
ـ دئدی اونونکو منله توتماز. آختارسین تایین تاپسین.
بیر آندا رنگی گچ کیمی‌آغ_آپباق اولدو. سانکی دونیا باشینا ییخیلدی. گولومسه‌یبب اله سالاندان سونرا زینب‌ین قبول ائتدیگینی بیلدیردیم. یئمکدن سونرا اونلاردان آیریلیب قوجایا باش چکمک اوچون یولا دوشدوم.
بیر نئچه دؤنه قاپینی چالدیقدان سونرا قارا‌باشین سسینی دویدوم. قاپی آچیلدی. قوجا ایله قوجاقلاشیب اؤپوشدوم. قاراباش آیاقلاریما ساریلدی. اونو تومارلاییب قوجانین آردینجا یولا دوشدوم.
تاختا قاپیدان ایچری گیردیک. سول الده‌کی اوتاقدان ایکی چای سوزوب قوجانین یانینا دؤندوم.
قوجا ـ بیر دفعه‌لیک گئتدیگینی سانمیشدیم.
ـ اولور مو هئچ دایی. چوخ تئز گله‌جکدیم آما باشیما ایش‌لر گلدی. اونون اوچون گئجیکدیم.
قوجا ـ اولسون. کیشی‌نین باشینا ایش گلر. دئنن حله نه‌لر اولدو.
بو دؤنه دوشونمه‌دن هر شئی‌یی اونا سؤیله‌‌دیم. ماراقلا منیم سؤزلریمی‌دینله‌‌ییب. آرا_سیرا سیقارئت قوتوسونو منه ساری اوزادیردی. سؤزلریم بیتینجه درین بیر آه چکدی. بیر آز سس‌سیز قالیب سونرا اوزونو منه چئویردی.
قوجا ـ بو ائوده آنتیک آیین_اویون چوخ‌دور. بیرینی آپار سات. سئودیگین‌له عاییله قور.
ـ اولماز. من بورا یاردیم ایسته‌مک اوچون دئییل حئکایه‌نیزین آردینی ائشیتمک اوچون گلدیم.
قوجا ـ سنی اولمایان اوغلوم یئرینه قویدوم. یئنه ده نئجه اؤزون اویغون گؤرورسن. کئچن دؤنه‌هاردا قالدیق؟
ـ ایسکندرین سیز اوچون قویدوغو مکتوبدا قالمیشدیق.
قوجا ـ هه. یادیما گلدی.
او گوندن سونرا بیر داها یئتیم‌خانایا گئری دؤنمه‌دیم. هر گون خییابانلاردا تار چالیردیم. ایلک گونلرده یئمک پولومو بئله چیتین‌لیک‌له تاپیردیم. گئجه‌لری پارک‌لاردا، سس‌سیز کوچه‌لرده یاتیردیم. سونرالار خالق منی تانیدیقجا گلیریم چوخالدی. گئجه‌لری یاتماق اوچون شهرین آشاغی باشینداکی بیر موسافیر خانادا اوتاق توتموشدوم. گون‌لرین بیر گونونده موسافیرخانانین اؤنونده الی_اوزو کیرلی، پالتارلاری جیندیر بیر قیزی گؤردوم. دیوارین قیراغیندا اوزانیب قالمیشدی. اینسانلار گلیب یانیندان کئچسه‌لر ده باشلارینی بئله چئویریب اونا باخمیردیلار. یاخینلاشیب قیزی یئردن قالدیردیم. اؤلوم‌له پنجه‌لشدیگی آیدین ایدی. بیر آرابا توتوب اونو حکیم یانینا آپاردیم. حکیم تداوی اوچون بیر آی سوره‌جینده خسته خانادا یاتماسی لازیم اولدوغونو بیلدیردی. ایش‌لری گؤروب قیزی خسته‌خانایا یئرلشدیردیم. بیر آی ایشله‌دیگیم بوتون پوللاردان ساده‌جه یئمک پولومو گؤتوروب قالانینی اونا خرجله‌دیم. سونونجو گون اونون دورومونو گؤرمک اوچون یانینا گئتدیم. ایلک گون گؤردوگوم قارا _ جیلیز قیزین یئرینده جئیران گؤزلو ، ساچلاری قارا، باخیشلاری ایلا هر کسین دیققتینی چکن بیری وار ایدی. یاخینلاشیب سلام وئردیم. گؤزلریمین ایچینه باخدی آنجاق هئچ بیر شئی سؤیله‌مه‌دی. الینی الیمه آلیب بیر داها سلام سؤیله‌دیم آما یئنه ده هئچ بیر شئی دئمه‌دی. حکیم اوتاغا گیریب دورومو گؤرونجه اونون بیر آرا دانیشا بیلمه‌یه‌جه‌گینی بیلدیردی.
قیزی خسته‌خانادان آلیب توتدوغوم اوتاغا گؤتوردوم. ایلک هفته یاتاقدان بئله دورا بیلمیردی. بوتون ایش‌لرینده اونا یاردیم ائدیردیم. یئمک بیشیریردیم. پالتارلارینی یویوردوم. آرا_سیرا یانیندا اوتوروردوم. دقیقه‌لرجه گؤزلریمیزی بیر_بیریمیزه دیکیردیک. او دقیقه‌لر حیاتدا یاشادیغیم ان موتلو آنلار ایدی. ایچیمده اونا قارشی قوتسال بیر سئودا جوجرمکده ایدی.
بیر هفته سونرا تار چالماق اوچون ائشیگه چیخدیم. سحردن آخشاما دَک خییاباندا تار چالدیم. آخشام بیر چَلَنگ چیچک ، بیر ده اونا یئنی گئییم‌لر آلیب ائوه دؤندوم.
اون ایکی ساعات تار چالمیشدیم. گؤزلریم یئری بئله گؤرموردولر. آنجاق بو یورقونلوغون سونوندا ایچدن سئوینه‌جه‌گیمدن آرخایین ایدیم. قاپینی چالیب ایچری گیرمک ایسته‌دیم. تام بیر آیاغیم ای
چریده، بیر آیاغیم ائشیکده ایکن قورویوب قالدیم. ایچر‌ینی یئمک قوخوسو بوروموشدو. اوسته‌لیک هر یئر پاریلداییردی. قیز دا دیوانین اوستونده اوتورموشدو. منی گؤرجک قاپی‌نین اؤنونه گلدی. الی ایله منی میخلاندیغیم یئردن چکیب ایچری سالدی. بیر نئچه دقیقه بیر_بیریمیزه باخدیقدان سونرا عئینی آندا ایکیمیز ده گولومسه‌دیک. اونا ساریلیب یاناقلارینی اؤپمه‌مک اوچون اؤزومو زورلا ساخلادیم. چیچک‌لری ،پالتارلاری اونا وئریب دیواندا اگلشدیم. اونون چای سوزمه‌سینی سئیر ائده‌رَک تانریما بو موتلولوقلاری یاشاتدیغی اوچون تشککور ائتدیم.
تام او گوندن سونرا خییاباندا تار چالارکن علی آدلی بیر کافه رئستوران یی‌یه‌سی ایله تانیشدیم. منی کافه‌سینده تار چالماق اوچون دعوت ائتدی. بیر نئچه گون رئستوراندا چالدیقدان سونرا علی بَی ایله بیر ایل اورادا تار چالماق اوچون سؤزلَشدیک. دوروموم گئتدیک‌جه یاخشی اولوردو. هم آیلیق آلیردیم هم ده اورادا ایله‌نَن اینسانلار ایشیم یاخشی اولدوغو اوچون انعام وئریردی‌لر. قیسا زاماندان سونرا شهرین اورتالاریندان بیر ائو آلدیم. قیزلا بیرلیکده اورایا داشیندیق. گون‌لر بیر _بیری‌نین آردیندان گلیب کئچدی. هر شئی گونو_گوندن داها دا گؤزل اولوردو.
گون‌لرین بیرینده رحیم آدلی بیر موغننی ایله تانیش اولدوم. اونونلا دا ایش بیرلیگی آپاریب پول آلیردیم. دوستلوغوموز درینلَشدیک‌جه اونو قارداش بلله‌دیم. ماهنی‌لاری‌نین تارینی من چالیردیم. منیم چالغی‌لاریم سایه‌سینده ایکیمیز ده خالق آراسیندا تانینمیشدیق. یئنی ماهنی‌لاری هردن اونون ائوینده مشق ائتسه ایدیک ده چوخلو منیم ائویمده اولوردوق.
بیر گون کافه‌دن ائرکن چیخیب ائوه دؤندوم. حیط قاپیسیندان ایچری گیردیکده دوموتوب قالدیم. ایچریدن سانکی دونیانین ان گؤزل سسلی موغننیسی‌نین سسی گلیردی. قولاقلاریمی‌بیر آز ایتیلتدیم. بو ماهنی منیم یازیب بسله‌دیگیم ماهنی ایدی. آنجاق او گونه دَک رحیمدن باشقا هئچ کیمسه او ماهنینی اوخومامیشدی. اویسا ائشیتدیگیم سس بیر قادین سسی ایدی. یاواشجا ایچری گیردیم. گؤزلریمه اینانا بیلمیردیم. آیلارجا منله دانیشمایان قیز گؤزلرینی باغلاییب بولبول کیمی‌چه‌چه ووروب سئگاه چکیردی. غفیلدن گؤزلرینی آچیب منی گؤردو. اوزونون رنگی آتدی. باشینی آشاغی سالیب سوسدو. یاخینلاشیب اؤنونده اگلشدیم. دقیقه‌لرجه اونون اوزونه باخدیقدان سونرا اللرینی توتدوم.
ـ سن ، سن دانیشا بیلیرسن می؟
قیز ـ _ باشی‌نین ایشارتی ایله _ هه.
ـ بس نه‌دن …. نه‌دن من‌له دانیشمیردین. سنین بیر سؤزوندن اؤترو آلوولانیب یاندیغیمی‌گؤرمه‌دین می؟ سنه اینانا بیلمیرم. دانیشا بیلدیگین حالدا نه‌دن آدینی بئله منه سؤیله‌مه‌ییب سوسدون؟
قیز باشینی آشاغی سالدی. آرامیزا داریخدیریجی سس‌سیزلیک چؤکدو. اونا ائتدیگیم اونجا یاخشیلیقدان سونرا دوروم منی چوخ اینجیدیردی. حیطه چیخیب بیر سیقارئت یاندیرماق اوچون آیاغا قالخدیم. قیز سول الیمدن توتوب منی اؤزونه ساری چکیب بوینوما ساریلدی. بیر نئچه دقیقه هؤنکور_هؤنکور آغلاییب باشینی چیگنیمه یاسلادی.
قیز ـ قورخدوم. دانیشارسام سنی ایتیره‌رَم دئیه دوشوندوم. سن منی دامودان قورتاریب اوچماغا گؤتوردون. گئجه‌لری _گوندوزلری سنین‌له بیر کلمه کسه بیلمک اوچون تانری‌یا یالواردیم. آنجاق دیلیم آچیلدیقدان سونرا سنین سئوگینی، محببتینی ایتیرمکدن قورخدوم. اونون اوچون ده دوعالاریما باخمایاراق آیلارجا ساده‌جه سنین حیات باغیشلایان باخیشلارین‌لا کئچیندیم. دانیشماماق منیم اوچون دونیانین ان چتین ایشی اولسا دا آنجاق سنین یانیندا اولا بیلمک اوچون او ایشی گؤردوم.
ساچلارینی سیغاللاییب گؤز یاشلارینی سیله‌رَک گؤزلریمی‌گؤزلرینه دیکیب آلنیندان اؤپدوم.
ـ بو کاسیبا آدینی پای وئریرسن می؟
قیز ـ _سئوینه‌رَک_ آدیم اولدوز.
ـ سن گئرچکدن ده اولدوزسان.
او گوندن آیلار کئچدی. هر گئجه‌ گزمه‌گه چیخیردیق. من تار چالیردیم. او دا منیم بسله‌دیگیم ماهنی‌لاری اوخویوردو. بیر_بیریمیزی اؤلومونه سئویردیک. سونرالار اونا ائولی‌لیک اؤنردیم. او دا من‌له ائولنمه‌یی قبول ائتدی. اونونلا یووا قورماق اوچون دویون حاضیرلیق‌لارینا بئله باشلامیشدیم کی او اوغورسوز گئجه‌ده هر شئی قاریشدی.
منیم یازدیغیم ماهنی ان سئودیگی ماهنی ایدی. اونو هر گئجه اوخویاردی. او گئجه اونو اوخودوقدان سونرا من‌له اؤنملی بیر ایش دانیشاجاغینی سؤیله‌دی. همیشه‌کی کیمی‌سؤزلرینی ایچدن‌لیک‌له قارشیلادیم.
اولدوز ـ اوختای من موغننی اولماق ایسته‌ییرم. منده بو باجاریق وارکن نه‌دن اونو قوللانمیرام.
موسیقی‌نین ایچینده اولدوغوم اوچون موغننی‌لیگین اؤزللیک‌له ده قادینلار اوچون نئجه بیر چیرکین دونیا اولدوغونو بیلیردیم. او اوزدن اولدوزون ایسته‌گینه یوخ دئدیم. آنجاق او من موغننی اولماق ایسته‌ییرم دئیه‌رَک توتدورموشدو. بیر نئچه گون چکیش_پکیش‌له کئچدی. هر گئجه بو قونونون اوزرینده دانیشیردیق. نه قدر واز کئچمک اوچون اونا دانیشسام دا سؤزومون کَسَری اولمادی.سونوندا موغننی اولماق ایسته‌ییرسه مندن آیریلماسینی سؤیله‌دیم.
اوندان ایکی گون سونرا ائوه دؤندوکده اولدوزو ائوده گؤرمه‌دیم. گوزگویه یاپیشدیردیغی بیر مکتوبدا مندن امک‌لریم اوچون تشککور ائدیب آیریلدیغینی بیلدیرمیشدی. اوندان سونرا منیم قوردوغوم دوش‌لر باشیما ییخیلدی. ایشه گئتمه‌دیم. بیر زاماندان سونرا پوللاریم قورتاردی. ائوی ساتیب باشقا بیر ائو ایجاره ائتدیم. نه گئجه‌نی نه ده گوندوزو ائودن ائشیگه چیخمیردیم. گون‌لرین بیرینده کافه‌سینده ایشله‌دیگیم علی گؤروشومه گلدی. سؤزو اولوزدان سالیب اونون نئجه پوزغونلوغا دوشدوگونو ، اولدوزون رحیم طرفیندن بو ایشه چکیلدیگینی اصلینده آلداندیغینی آچیقلادی. اونون هر بیر سؤزو توخماق ضربه‌سی کیمی‌باشیما ائندی. حیاتین، یاشامین آنلامینی ایتیردیم. دوروم گئتدیکجه داها پیس اولدو. بیر نئچه آی سونرا یئنه ده اؤزومو یامان کؤکده خییابانلاردا گؤردوم. ائودن _ائشیکدن پولدان بیرجه تاریم منه قالمیشدی.
گون‌لرین بیرینده منه یاخینلاشان بیرینی گؤرونجه شاشیردیم. گؤزلریمه اینانا بیلمیردیم. ال‌لریمله گؤزلریمی‌اووخالاییب داها دیققت‌له باخدیم. دوغرو گؤروردوم. آیاغا قالخیب قوللاریمی‌آچیب ایسکندر دئیه‌رَک باغیریب اونو باغریما باسدیم. ایسکندر منی بو باغا گتیردی.
سون جومله‌دن سونرا سانکی قوجانین حئکایه‌سی قورتارمیش کیمی‌سوسدو. گؤز یاشلاری توکنمک بیلمیردی. اوزونون بویاسی سیقارئتی‌نین کولو رنگینه دؤنموشدو. سسی خیریلداییردی. سیقارئتینه داها درین بیر قوللاب ووروب باخیشلارینی گؤزومون ایچینه سالدی. نه ائده‌جه‌گیمی، نه دئیه‌جه‌گیمی‌بیلمیردیم.
قوجا ـ هه، ایسکندر یئنیدن منی دردلردن قورتاردی. اولدوزو اونوتماق اوچون الیندن گله‌نی اسیرگه‌مه‌دی. آنجاق سونوندا اوره‌گیمه دینمه‌ین بیر درد یوکله‌دی. اونون اؤلومو منیم بئلیمی‌سیندیردی. اونون یوخلوغونا حله ده اینانا بیلمیرم. گؤردوگون بو ائو اونون منه بوراخدیغی میراث دیر.اونا دا بیر باشقا جؤمرد کیشیدن قالمیشمیش. بو ائو یوز ایل‌لرجه بئله‌جه الدن_اله گلیب منه چاتیب دیر. اونون اوچون ده سنه دئییردیم ساده‌جه یاشاماق سیراسی منده دیر.
بو گون منیم اوره‌گیم چوخ بوشالدی. سون دفعه اولاراق تار چالماق ایسته‌ییرم. اولدوزون ان سئودیگی ماهنی‌نی سنه چالاجاغام.
آیاغا قالخیب تاری گتیریب یانینا قویدوم. قوجانین احوالاتی غریبه‌ ایدی. آردیجیل آه چکیب گؤز یاشی اله‌ییردی. تارینی باغرینا باسدی. گؤزلرینی یوموب میضرابی تارین تئل‌لرینده گزدیرمه‌گه باشلادی. او ماهنی‌نی ایندیه قدر چوخلو موغننی‌لردن ائشیتمیشدیم. من ده گؤزلریمی‌یوموب قوجا ایله اولدوزون سئوگی حئکایه‌سینی دوشوندوم. منیم ده گؤز یاشلاریم آخماغا باشلادی آنجاق اونو داها اوزمه‌ییم دئیه تئز یاشلاری یاناغیمدان سیلدیم.
ماهنی قورتاردی. قوجا گؤزلرینی آچیب درین بیر نفس آلیب تاری بؤیرونه بوراخدی. بئش_اون دقیقه ایکیمیز ده سوسدوق. نه‌سه سورماق اوچون باشیمی‌قالدیردیغیم دا قوجانی گؤزلرینین باغلی اولدوغونو گؤردوم. بیر آز یاخینلاشدیم. یوخویا گئتمیشدی. حالینا آجیدیغیم اوچون اوستونه بیر یورقان آتیب. یالقیزلیق اونا یاخشی گلر دئیه ائودن چیخدیم.
یول بویونجا اونون کدرلی حیاتینی دوشوندوم. اونون نه چتین‌لیک‌لره قاتلاندیغینی دوشونونجه اؤزومون دردلریمی‌اونودوردوم. ایستم‌سیزجه الیمه آچارلاری آلدیغیمدا اؤزومه گلدیم. قاپی‌نین آراسینداکی مکتوب دیققتیمی‌چکدی. کاغاذی قاپی‌نین آراسیندان چکیب قاتینی آچدیم.
آیلار آناسی‌نین گلدیگینی، هم ده تانیشماق اوچون منی آخشام یئمه‌گینه گؤزله‌دیک‌لرینی سؤیله‌میشدی.
واخت‌سیز بیر دعوت اولسا دا آیلاری قیرماییب اونلارا گئده‌جه‌گیمه قرار وئردیم. واخت ایتیرمه‌دن حاضیرلانیب یولا دوشدوم.
باهادیرلا سلاملاشیب ایچری گیردیم. منی صمیمیت‌له قارشیلادی. قوللوقچولاردان بیری چای گتیردی. بیر آز دانیشاندان سونرا آیلارلا آناسی دا گلدی‌لر.
قادینین قیرخ_قیرخ‌بئش یاشی اولدوغونو نه گؤوده بیچیمیندن، نه ده گؤزل‌لیگیندن تخمین ائتمک اولمازدی. دری‌سینه بیر قیریش بئله دوشمه‌میشدی. گوده دامن گئدیگی اوچون قیچلاری‌نین پاریلتیسی آدامین گؤزونو قاماشدیریردی. دؤش‌لرینین اوست حیصه‌سی یاخاسیز قارا گئییمیندن ائشیکده قالمیشدی.
یاخینلاشیب من‌له گؤروشدو. آیلار دا سلاملاشیب الی ایله منی گؤستردی.
آیلار ـ آنا سنه دانیشدیغیم اوغلان اوختای. اوختای سنه ده دانیشدیغیم آنام ایپک.
تانیشلیقدان سونرا آرامیزدا عادی دانیشیقلار گئتدی. یئمکدن سونرا ایپک خانیم صاباح منیم ائویمه گلیب آیلارلا منیم باره‌مده دانیشاجاغینی سؤیله‌دی.
بوتون گونو ائودن ائشگیه چیخماییب ایپک خانیمی‌گؤزله‌دیم. سونوندا آخشام باشی قاپی چالیندی. سلاملاشیب اونو ایچری دعوت ائتدیم. قاپی‌نین آراسیندان اوتاغا بیر باخیش سالدیقدان سونرا ایچری کئچمه‌دن منی شهر دیشیندا‌کی ویلالارینا گؤتورمک ایسته‌دیگینی سؤیله‌دی. بو سایغی‌سیزل
یغینی بگنمه‌سم ده آیلار اوچون قبول ائتدیم.
یاریم ساعات سونرا بؤیوک بیر باغا گیردیک. آرابانی بیر عیمارتین اؤنونده ساخلادی. ایچری گیردیک. اؤنجه زنگین‌لیک‌لرینی منه گؤسترمک اوچون عیمارتین هر یئرینی منه گؤستریب لوکس اشیاءلاریندان دانیشدی. سونرا قوناق سالونوندا‌کی شومینه‌نین اؤنونده‌کی ایکی اوتراجاغین بیرینده اگلشمه‌گیمی‌اؤنردی. سول یانداکی اوتراجاقدا اوتوردوم. شومینه‌دن بیر آز آرالی اولان دولابدان بیر شوشه گؤتوروب قیرجاناراق اوزونو منه ساری چئویردی.
ایپک ـ ویسکی می؟ ، یوخسا شاراب می‌ایچیرسن؟
ـ چوخ ساغ اولون من ایچمه‌یه‌جه‌یم.
ایپک ـ آاا! نه‌دن؟
ـ جانیم ایسته‌میر. تشککور.
ـ حاییف اولدو. ائله بیل بو گؤزل گئجه‌نین دادینی چیخارماق چتین اولاجاق.

بارداغیندان بیر آتیم ایچیب. اوست پالتارلارینی سویونودو. بارداغینی الینه آلیب دون گئجه گئیدیگی پالتارلارلا منیم اؤنومده اوتوردو. ساغ قیچینی سول قیچی‌نین اوستوندن آشیردی.
ایپک ـ باخ اوختای آیلار هر شئیی منه دانیشیب دیر. سن گنج‌سن گؤیچک اوغلانسان. ائولنمک سنین الینی چوخ شئی‌لردن کسیب حیاتیدا سنی چئشیدلی سیخینتیلار ایچینه آتاجاق. من بیله‌رَکدن سنی بو عیمارتده گزدیردیم کی آرامیزداکی چلیشکی‌لری گؤره بیله‌سن. آیلار دا سن ده آیری_آیری دونیانین آداملاری‌سیز. سیزده‌کی بو دویغو اؤتری دیر. ائولندیکدن سونرا بیر_بیرینیزله یولا گئتمه‌یه‌جک‌سیز. آیلارین بَزَک پولوسو سنین بیر آی گلیریندن چوخ‌دور. آنجاق سن اوزولمه، حله گنج‌سن اؤزونو یوخاری‌لارا چکه بیلرسن.
ایپک منله دانیشارکن گؤزلریمین ایچینه باخاراق نازلانیردی. الینی قیچی‌نین آچیق حیصه‌سینه چکه‌رَک منی اؤزونه ساری چکمک ایسته‌ییردی. قارانلیق اوتاقدا شومینه‌دن چیخیب اونون قصورسوز بدنینه یاییلان سیسقا ایشقلار دا اونا یاردیم ائدیردی.
اونو یانیتلاماق اوچون بیر آز دوشوندوم.
ـ من سیزین قدر وارلی اولماسام دا ویجدانیم وار دیر. من آیلاری اوره‌کدن سئویرم.
ایپک ـ _ قاه_قاها چکه‌رَک_ ویجدان… ، باخ گؤزل اوغلان بو دونیادا هر شئی پول‌لا اؤلچولور. بیز زنگین‌لر سیزین باشینیزی قاتماق اوچون بو سؤزلری دوزلتمیشیک. پولون اولماسا ویجدانین دا یوخدور. باخ سن گنج یاشیندا هر شئی‌یین صاحیبی اولا بیلرسن. آنجاق ایسته‌دیگین هر شئیی الده ائتمک اوچون ساده‌جه منیم اولمالیسان.
ایپک‌ین او سؤزوندن سونرا آیاغا قالخیب اورادان چیخدیم. بئینیم ایشله‌میردی. بیر آنا نئجه اؤز قیزی حاققیندا بو ایشی گؤره بیلردی. من اونون قیزینی ایسته‌ییردیم او ایسه منیم اونونلا اولماغیمی‌ایسته‌ییردی. سینیردن بوتون گؤوده‌م تیتره‌مه‌گه باشلامیشدی. باغدان چیخیب خییابانا دوغرو قاچدیم. کئچن آرابالارین بیری‌نین اؤنونه آتیلدیم. آدام سؤیوش وئرمک اوچون باشینی پنجره‌دن چیخاردی. منیم دورومومو گؤرونجه واز کئچدی. اونونلا شهره دؤندوم.
پالتارلاریمی‌چیخاریب یاتاغیمدا اوزاندیم. آیلاری،آناسینی،آتاسینی دوشونوب اؤزومو اونلارلا توتوشدوردوم. بیز گئرچکدن ده آیری دونیالارین آداملاری ایدیق. ایستم‌سیزجه گؤز یاشلاریم یاناقلاریمدان آخیب بوغازیما سوزدو.
بیر هفته ائودن ائشیگه چیخمادیم. نه گلن‌لره قاپینی آچدیم نه ده تئلفونومو یانیتلادیم.
قاپی چالیندی.
کیمسه‌نی گؤرمک ایسته‌میردیم. بیر داها چالیندی. یئنه ده آچمادیم. داها سرت چالیندی. سانکی بیری بوتون گوجو ایله قاپییا ضربه ائندیریردی. بیر آز سونرا ضربه‌لرله برابر یوسیف‌ین سسینی دویدوم.
یوسیف ـ آچما ، جانین جهنمه. من گئدیرم هئچ اولمازسا بوراخدیغیم مکتوبو گؤتور. اؤزونو اورایا دوستاق ائتمک یولو دئییلدی اوختای کوماندیر. آرتیق هر شئی بیتدی.
نئچه دقیقه سونرا آیاغا قالخیب قاپی‌نین آراسیندان مکتوبو گؤتوردوم. کاغاذین قاتینی آچدیم.
سئوگیلی اوختای. آنامین سنه سؤیله‌دیک‌لرینی اؤیرندیم. آچیقلاما وئرمک اوچون گلدیم.آنجاق قاپی‌نی آچمادین. عاییله‌م تام سنین دوشوندوگون کیمی‌اولسا دا من دوشوندوگون کیمی‌دئییلم. اولانلاری دویدوغومدا حیات منیم اوچون سونا چاتدی. بوندان اؤنجه ده سونا چاتمیشدی. سنین‌له تانیشماق منی یئنی‌دن حیاتا باغلاسا دا نه یازیق کی آلین یازیسینی سیلمک اولماز. دون گئجه یاشار زورلا منیم قیزلیغیمی‌پوزدو. من اؤنجه پلانلادیغیم اؤلومو گئرچک‌لشدیرمک اوچون یولا چیخیرام. یوکسک اولاسی‌لیق‌لا سن بو یازیلاری اوخویاندا من حیاتدا اولمایاجاغام. منی باغیشلا. سنی چوخ سئویرم.
گؤزلریم قارانلیق چالدی. اوتاق باشیما فیرلانیردی. اوخودوق‌لاریما اینانا بیلمیردیم. گئرچه‌گی اؤیرنمک اوچون آیلار گیلین ائولرینه گئتدیم. هر یئره قارا وورموشدولار. حیات منیم اوچون ده سونا چاتمیشدی. آلدیغیم هر نفس اوچون اؤزومدن آجیغیم گلیردی. سرسم کیمی‌خیابانلاری دولاشیردیم. آخشام باشی قوجانین ائوی‌نین اؤنونده ایدیم. دردلریمی‌اونونلا پایلاشماق اوچون قاپینی چالدیم. بیر آز کئچسه‌ ده اوندان خبر اولمادی. بیر داها دا چالدیم. نئچه دقیقه سونرا
قاراباشین سسینی دویدوم. یئنه قاپی‌نی چالدیم. قاراباش حیطده اؤلومونه هوروردو. بیر تاققا ووروب قاپینی آچدیم. یازیق ایت اولایاراق قاچیب آیاقلاریما ساریلدی. گؤزلرینده آغیر غم وار ایدی. قوجایا نه‌سه اولدوغونو آنلادیم. قاچیب اوتاغا گیردیم. قوجا یاتاقدا ایدی. یانیندا دا بیر مکتوب وار ایدی. سسله‌دیم آنجاق‌های وئرمه‌دی. یاخینلاشیب نبضینی توتدوم.
اوره‌گیم آز قالیردی سینه‌می‌یاریب ائشیگه چیخسین. باشیمی‌قوجانین دؤش‌لرینه یاسلاییب هؤنکوردوم. اؤزومه گلدیگیمده مکتوبو آچیب اوخودوم. ایسکندردن میراث قالان ائوی منیم آدیما ووردوغونو ،اونو بیر امانت اولاراق قورویوب باشقا بیرینه وئرمه‌گیمی‌ایسته‌میشدی. سونوندا دا حیطده بؤیوک چینار اطرافیندا بیر نئچه مزار اولدوغونو بیلدیریب اونو دا اورادا باسدیرماغیمی‌یازمیشدی. چتین‌لیک‌له وصییتی یئرینه یئتیریب گئجه‌نین قارانلیغیندا قوجانی باسدیردیم.
ائوی سنین آدینا وورماق اوچون بوتون ایشلرینی گؤرموشم. آرتیق بو ائو سنین دیر. اونو قورویوب باشقا بیرینه امانت ائدرسن.
صمد دفتری باغلادی. یاشلی گؤزلرله یوسیف‌له زینب‌ین اوچ یاشلاریندا اولان ائکیز اوشاقلاری‌ اوختای‌لا آیلارین الیندن توتوب قوجا چینارین یانیندان آیریلدی.
سون