سئوگیدن سونرا ( پوئست؛ ۲)
قاسیم پناهی

کؤچه‌نین تینیندن ایچری گیردیکده ائویمین اؤنونده اوچ_بئش قیزین بیرینی چئوره‌له‌دیک‌لرینی گؤردوم. نه اولدوغونو بیلمک اوچون یئگین یئریدیم. اوزو گؤرونمه‌سین دئیه قارا بؤرکونو گؤزلری‌نین اوستونه ، کاپشئنی‌نین یاخاسینی دا بورنونون اوجونا قدر چکمیش کیشی قیزلاردان بیرینی اؤنونده اوتورتموشدو. پالتارلاریندان یوسیف اولدوغونو آنلادیم.
یوسیف ـ آدین نه‌دیر؟
ـ آیدا.
یوسیف ـ نه قدر پولون وار؟
آیدا ـ بئش مین تومن.
یوسیف ـ پولونو الیمین ایچینه قویوب الینین آرخاسینی دا اوستونه قوی. گؤزلرینی یوم یالنیز سورغولاریمی‌یانیتلا. گؤزلرینی آچدیقدا گله‌جه‌گینی گؤرمک اولمایاجاق. تامام می؟
آیدا ـ تامام.
یوسیف ـ اون یئددی یاشینداسان می؟
آیدا ـ هه.
یوسیف ـ ایندیه دک ائلچین اولماییب.
آیدا ـ دوغرودور.
یوسیف ـ الینده گؤردوک‌لریم چوخ پیرتلاشیق دیر. بوندان بئله سورغولاریمی‌هه یاخود یوخ‌لا یانیتلا. محله‌نیزده قارپیز ساتان وار. اوجا بویلو، دانقیر بیر گنج دیر.
آیدا ـ _چاشقینلیقلا _ هه.
یوسیف ـ بیر_ایکی دؤنه سنه ساتاشیب دیر.
آیدا ـ هه.
یوسیف ـ آتان او اوغلانلا ایلگیده دیر.
آیدا ـ هه.
یوسیف ـ او اوغلان سنه ائلچی گله‌جک. آتان زورلا سنی اونونلا ائولندیره‌جک.
آیدا گؤزلرینی آچیب الینی چکدی. یوسیف پولو جیبینه باسدی. قیزلارین بیریسی اؤنه کئچیب _ نه اولار منیم ده طالعیمه باخ_دئدی.
یوسیف ـ من هر گون بیر اینسانین گلجه‌گینی اؤیرنه بیله‌رم. صاباح گلرسینیز.
الیمی‌آغزیما قویوب اؤسگوردوم. قیزلار آیدانین باشینا توپلانیب آرالاندیلار .
ـ سن‌هاچاندان طالعه باخان اولدون.
یوسیف ـ نه طالعی! من تکجه بیلدیک‌لریمدن پول چیخاریرام. کئچن هفته بو قیزلا آتاسینی او قارپیز ساتانین یانیندا گؤردوم. آتاسی قارپیز ساتانا تاپیشریقلاریمی‌یئرینه یئتردین می‌دئیه سوروردو. اوغلان دا هردن اونون گؤزونو اوغورلایبب قیزا قاش_گؤز ائله‌ییردی .
الینی سالیب جیبیندن بیر اوووج پول چیخاردی.
یوسیف ـ باخ سیزین محلله‌نیزده تانیدیقلاریم چوخدور. بئش، یئدی ،اون بئش، ایگیرمی‌بئش، بو دا اوتوز.
ـ بس قیزین یاشین‌هاردان بیلدین؟
یوسیف ـ دئدی اورتا مکتبین ایکینجی صینیفینده‌یم. دئمک اون‌یئددی یاشی وار دیر.
ـ چوخ بیج‌سن. بیر ده بو قاپیدا بو ایشی گؤرمه.
یوسیف ـ سن یوواندا اول من ده باشیمی‌قاتماق زوروندا اولماییم. اوچ ساعات دیر بوردایام.
قاپینی آچدیم. ائویمین بوتونو ایگیرمی‌بئش مئترلیک بیر اوتاق اولدوغونا باخمایاراق هر شئی هر زامان قایداسیندا اولوردو. یوسیف پالتوسونو چیخاربب یاتاغیمین اوستونه آتدی.
یوسیف ـ چوخ خوش گلمیشم. حله او خوروز قویروغو چایینی حاضیرلا سنه بیر خوش خبریم اولاجاق.
ـ سن ده کی موفته خورسان دا. نه خوش خبری؟
یوسیف ـ آتام آخشاما باهادیر گیلی قوناق چاغیریب. آیلار دا گله‌جک. آنام دئدی سنی ده چاغیریم. اؤزون بیلیرسن سنی مندن چوخ ایسته‌ییر. _قاققیلدایاراق_هم ده آناما دئمیشم سئودیگین شام یئرآلما یومورتا دیر قورخما.
چایی گتیریب آجیقلا اؤنونه قویدوم. آیلاری بیر داها گؤرمه‌گی چوخ ایسته‌ییردیم. آنجاق من‌هارا، اونلار‌هارا؟ یوسیف گیل ده ،اونلار دا میلیاردر آداملار دیر. من اورادا نه ائده‌جه‌یم. ایچیمده آیلارا قارشی دویغولار وار آنجاق اونلار عؤمور بویو ساده‌جه منیم ایچیمده قالمالی دیر. بیز آیری_آیری دونیانین آداملاری‌ییق… .
یوسیف ـ اده مال ائشیدیرسن می؟
ـ نه‌یی؟
یوسیف ـ بیر ساعات دیر توتون یانیر حله ایندی دئییر توستو نه توستوسو دور. دئدیم آیلار خالام قیزی نرگیزین یاخین یولداشی دیر. بو گون اوندان سنی سوروشوب. او دا تئلفون نومره‌نی مندن آلیب آیلارا وئردی .
ـ نه!؟ سن نه اوچون مندن خبرسیز او ایشی گؤروبسن؟
یوسیف ـ سانکی سنین ده آللاهیندان دئییل. خسته‌خانادا باخیشلارینی گؤردوم . حاضیرلان گئتمه‌لی‌ییک.
ـ من گله بیلمه‌رم.
یوسیف ـ نئجه یانی گله بیلمه‌رم !؟ آنام سنی گؤزله‌ییر. بوینوندا آنالیق حاققی وار. او قوجا قادینین اورگینی سیندیرماغا حاققین یوخدور. سن نئجه آجیماسیزسان. اونون دویغولاریلا اویناماق دا نه اولسون …
ـ یاخشی، یاخشی. گله‌جه‌یم. تئز حاماما گیریم گئده‌ک.
یوسیف ـ آی یاشا. مالیم منیم .
کوستیومومو گئییب قارا اینجه بویون باغیمی‌باغلادیم.
ـ نئجه دیر؟
یوسیف ـ یاخشی دیر بابا. جَلد اول آتام یئنه دئیینه‌جک.
یاریم ساعات سونرا یوسیف گیلین ائوینین اؤنونده ایدیک. ایچری گیریب آیلارلا قارشی_قارشی‌یا گلمکدن قورخوردوم. بیر یاندان دا یوسیف‌ین آتا_آناسینی چیگنه‌مه‌گه راضی گله بیلمیردیم. درین بیر نفس آلیب ایچری گیردیم. باهادیرلا قیزی دا یئنی یئتمیشدی‌لر. تام ایچری گیره‌جک‌لری آندا بیزی گؤروب دوردولار. اؤندن گئدیب سلاملاشدیم. یوسیف‌ین آتاسی هر کسی ایچری دعوت ائتدی.
آیلار ـ سیز بویورون. منیم اوختای بی جنابلارینا بیر تشککور بورجوم وار.
ال‌لریمیزی جیب‌لریمیزه باسیب حیطه دو
غرو آددیملادیق.‌هاوا آیازیمیشدی. باشیمی‌قالدیریب گؤی اوزونه باخدیم. ان بالاجا اولدوزلار بئله گؤرونودولر.
آیلار ـ دئییرلر هر کسین بیر اولدوزو وار. سنجه منیم اولدوزوم‌هانسی دیر؟
الیمی‌جیبیمدن چیخاریب بارماغیمین ایشاره‌سی ایله ان ایشیق، لاپ بؤیوک اولدوزو گؤستردیم.
ـ سنین اولدوزون او اولمالی دیر. او دا سنین کیمی‌گؤزل دیر.
آیلار ـ بس سنینکی؟
ـ منیم اولدوزوم یوخدور. اولسا دا او قدر بالاجا دیر کی گؤرونمور.
آیلار ـ دئمک اولماز. هر شئی گؤروندوگو کیمی‌اولمایا دا بیلر . نرگیزدن تئلفون نومره‌نی آلدیم. تشککور ائتمک اوچون سنه زنگ آچاجاقدیم. بورادا سنی گؤرمک چوخ یاخشی اولدو.
ـ نه دئمک. من اؤزل بیر ایش گؤرمه‌میشم.
آیلار ـ ایذین وئریرسن‌سه صاباح سنین ائوینه گلمک ایسته‌ییرم.
قورخدوغوم باشیما گلدی. من بونا نه دئییم؟ اونو جمعی ایگیرمی‌بئش مئتیرلیک ائویمه نئجه قوناق ائله‌ییم؟ بو گئجه بو گؤرکملی عیمارتین قوناغی، صاباح منیم ماغارامی‌گؤررسه منیم حاقیمدا نه‌لر دوشونر؟
آیلار ـ بیر شئی می‌اولدو؟
ـ یوخ، یوخ. اؤز ائوینیز دیر. هر زامان بویوروب گله بیلرسینیز.
آیلار ـ من اوشودوم. ایچری گئده‌ک.
یئمکدن سونرا یوسیف‌ین عاییله‌سی ایله باهادیرین دانیشیقلاری داها دا قیزیشدی. آرا سیرا اونلارین گؤزلرینی اوغورلاییب آیلارا باخیردیم. گؤزلرینی منه تیکدیگینه باخمایاراق گؤز_گؤزه گلینجه باشینی آشاغی سالیردی. ایچیمدن کئچن دویغولارا بیر تورلو اینانا بیلمیردم. نئجه اولاجاق سؤزجوگو بیر آن اولسون بئله دیلیمدن دوشموردو…
باهادیر ـ اوختای سن بیزیم بو یوسیف‌له نئجه تانیش اولدون؟
ـ اونیوئرسیتئتین ایلک کورسونون ایلک گون‌لری ایدی. یوسیف‌له سؤزوموز چیخدی. او منه بیر یومروق آتدی. من ده آرتیقلاماسی ایله قارشیلیق وئردیم. صاباحیندان ایکی اوچ گون یوسیف اونیوئرسیتئته گلمه‌دی. دؤزه بیلمه‌ییب ائولرینی آختاریب تاپدیم. فاطما خالا ایله دانیشدیم. خسته اولدوغونو، بؤیرک‌لرینین ایشدن دوشدوگونو اؤیرندیم. سونرا خسته خانایا گئدیب بؤیرگیمین بیرینی اونا وئردیم. ایندی ده یوسیف مندن بیر پارچا اولاراق قارشینیزدا دیر.
یوسیف ـ _ منه گؤز ووروب آیلاری گؤستره‌رَک_باهادیر بی بو اوغلان چوخ جؤمرد دیر. هئچ بیر شئی اوممادان منه یئنی بیر حیات باغیشلادی. اونون اوچون ده بیزیم عاییله‌دن بیری ساییلیر.
ساعات اون‌ایکیده آیلارلا باهادیر گئتمک قرارینا گلدی‌لر. من ده اونلارلا بیرگه ساغ اوللاشیب حیطه چیخدیم. یوسیف منی ائوه یئتیرمک اوچون آرابایا دوغرو گلدی. یئریمک ایسته‌دیگیمی‌سؤیله‌ییب یولا دوشدوم.
یئنه ده آیلار گؤزومون اؤنوندن گئتمیردی . آرا_سیرا اونو ، آرا_سیرا دا آرامیزدا اولان مین‌لر کیلومئتیرلیک مصافه‌نی دوشونوردوم. گاه ایسته‌ییردیم صاباح تئزدن ائودن چیخیب گئده‌م اونو گؤرمه‌یم، گاه دا اونو گؤرمک اوچون ثانیه‌لری ساییردیم. نه زامان ائوه چاتدیغیمین فرقینده اولمادیم. پالتارلاریمی‌چیخاریب یاتاغیما گیردیم.
یوخودان آییلدیم. ساعات ۰۹:۳۵ گؤستریردی. گؤزلریمی‌بیر داها یومماق ایسته‌دیگیمده آیلارین ائویمه گله‌جه‌گینی خاطیرلادیم. تله‌سیک یاتاقدان قالخیب اوتاغی ییغیشدیردیم. قابلاری تر_تمیز یویوب ائوی سوپوردوم. هر شئیی قایداسینا سالدیقدان سونرا ائشیگه چیخدیم. بیر آز مئیوه ایله شیرنی آلیب ائوه قاییتدیم. بو آیی کسکینلیک‌له پول باخیمیندان سیخینتی چکه‌جکدیم. آنجاق آیلاری گؤرمه‌گه دگردی. گئجه دوشوندوک‌لریمین هئچ بیرینی خاطیرلامیردیم. اونو بیر داها گؤرمک اوچون تله‌سیردیم. اؤزومو تئز ائوه یئتیریب شیرنی‌لری ، مئیوه‌لری قابا ییغیب چای دمله‌دیم. بیر آز ائوین ایچینده آددیملادیم. ساعات ۱۰:۱۵ گؤستریردی. گلمه‌مه‌سیندن قورخوردوم. یاتاق دیوانیندا اوتوروب کیتابلا باشیمی‌قاتدیم.
قاپی چالیندی. آیاغا قالخیب اوستومو دوزلدیب قاپینی آچدیم.
آیلار ـ سلام .
ـ سلام. چوخ خوش گلیبسن. بویور.
قاپی‌نین اؤنونده چکمه‌لرینی چیخاریب خالچانین اوستونه کئچدی. چئوره‌نی گؤزدن کئچیریب پالتوسونو چیخاریب سوبانین قیراغیندا اگلشدی.
آیلار ـ بو قدر سلیقه‌لی اولدوغونو سانمیردیم.
ـ لوطفونوز وار.
آغ شالینی بوینونا آتیب ساری ساچلارینی چیگنینه تؤکدو. او قدر گؤزل‌لیگین قارشیسیندا دالیب گئتمه‌مک اولموردو. چتین‌لیک‌له باخیشلاریمی‌اوندان آلیب بارماق‌لاریملا قورجالاندیم.
آیلار ـ یوسیف چایینی چوخ اؤیوردو. منی بیر چایا قوناق ائتمه‌یجک‌سن می؟
ـ اولورمو هئچ.
ایکی چای سوزوب اورتایا قویدوم. مئیوه‌لرله شیرنی‌لری ده گتیردیم.
آیلار ـ اؤزونوزو زحمته سالیب‌سیز. من ساده‌جه تشککور ائتمک اوچون گلمیشدیم. چوخ ساغ اولون.
ـ نه زحمتی. نوش اولسون.
آیلار ـ نرگیزدن تئلفون نومره‌نیزی ایسته‌میشدیم. چوخ ساغ اولسون تاپیب وئردی. _ جیبیندن بیر کاغاذ چیخاریب منه ساری اوزاتدی_ بو دا منیم نومره‌م دیر. آرا_سیرا تلگرامدا یازیشا بیله‌ریک می؟
ـ چوخ اوزگونم.
آیدا ـ نییه کی؟
ـ منیم تئلفونومدا او ایمکانلار
یوخ‌دور. منیمکی ساده دیر.
ـ آاا ! من ائله بیلیردیم بو تئلفونلارین نسیل‌لری کسیلیب دیر.
ـ _ گوله‌رَک _ منیم کیمی‌حله ده داش چاغیندا یاشایانلاردا دورور.
آیلار ـ بو گون ساعات نئچه‌ده درسینیز وار؟
ـ ۱۴:۰۰
آیلار ـ بیر شئی ایسته‌یه بیلرم می؟
ـ نییه اولماسین کی؟
آیلار ـ ایمکانی اولسا گون اورتا یئمه‌گینی بیرگه یئیه‌ک.
ـ تامام.
یئمه‌گه گئتمک اوچون ائشیگه چیخدیق. آیلار کوچه‌نین او تاییندا ساخلادیغی آرابایا ساری گئتدی. الیمی‌جیبیمه سالدیم. بئش _ آلتی مین پولوم وار ایدی. ایگیرمی‌مین ده کارتیمدا اولمالی ایدی. بیر آن سانکی باشیما بیر قازان قاینار سو تؤکولدو. اؤزومدن نیفرت ائتدیم. آیلارین ائویمه گلمه‌سینی، آردینجا دا یئمه‌گی بیرلیکده یئمک ایسته‌یینی قبول ائتدیگیم اوچون اؤزومدن آجیغیم گلدی. اونونلا منیمکی توتمازدی. اونون قاپیدا ساخلادیغی آرابانین آدینی بئله بیلمیردیم. اویسا جمعی ایگیرمی‌آلتی مین تومن‌له اونو یئمه‌گه گؤتوروردوم. بیر شئیی ماهنا ائله‌ییب اونونلا گئتمه‌مک بئینیمدن کئچدی .آنجاق سؤزومو توتماسام پیس اولار دئیه واز کئچدیم.
آیلار ـ نه‌سه اونوتموسان؟
ـ یوخ. گلدیم.
ائشیگه باخماقدان چکینیردیم. منی تانییان بیریسی بو لوکس آرابادا گؤررسه نه‌لر دوشونه‌جک دئیه قایغیلانیردیم.
آیلار ـ سنجه‌هانسی رئستورانا گئده‌ک؟
من شهرین رئستورانلارینین هئچ بیریسینده او گونه دک یئمک یئمه میشدیم. یئمه‌گینی داددیغیم ان یاخشی یئر کوچه‌میزین باشینداکی ساندویچی ایدی. بیر داها اؤزومدن نیفرت ائتدیم.
ـ‌هارا سن راحاتسان اورایا گئده‌ک.
آیلار ـ تامام.
اون_اون بئش دقیقه سونرا یئمک‌خانایا چاتدیق. چوخ تمیز، گؤرکملی بؤیوک سالونا گیردیک. هر طرف چیچک‌لرله بزنمیشدی. حیاتیمدا ایلک دؤنه او قدر گؤزل یئمک خانا گؤروردوم. سیفاریش ائتدیکدن سونرا یئمک‌لر گلدی. یئمک بویونجا حئساب نه قدر اولاجاق دئیه دوشونوب دوردوم. سونوندا دؤزه بیلمه‌ییب آیاق یولو ماهناسینا ماسادان آیریلدیم. آیلارین گؤزونو اوغورلاییب خزینه‌چی‌نین یانینا گئتدیم.
ـ باغیشلایین بیزیم حئساب نه قدر اولدو؟
خزینه‌چی ـ بویرون اگلشین قارسوندان حئسابی گؤندره‌جه‌یم.
ـ زحمت چکمه‌یین بویرون. بیز ده قالخیریق.
خزینه‌چی ـ جمعی یوز آلتی مین اولور.
الیمی‌جیبیمه سالیب آلتی مین تومنی پیش‌تاختانین اوزرینه بوراخدیم. ایگیرمی‌مین ده کارتیمدان چکدیردیم. عاییله‌مدن قالان تک وارلیغی قولومدان آچیب اونو دا پیش‌تاختانین اوستونه قویدوم.
ـ با…با… باغیشلایین منیم یانیمدا پول آز دیر. بو سیزده قالسین من صاباح پولو گتیریب گئری آلارام.
خزینه‌چی ـ بئله شئی اولماز کی جناب. پولونوز یوخدورسا بورایا گلمک ده نه دئمک دیر؟
ـ من چوخ عوذر ایسته‌ییرم. او خانیم منیم اونیوئرسیتئت آرخاداشیم دیر. خاهیش ائله‌ییرم. صاباح موطلق پولونوزو گتیریب ساعاتیمی‌گئری آلاجاغام.
خزینه‌چی کؤنول‌سوزلوک‌له قبول ائتدی. ماسایا دؤندوم. آیلار یئمه‌گینی بیتیرمیشدی.
ـ گئده‌ک می؟
آیلار ـ یئمه‌گینی بیتیرمه‌دین کی. هم ،حله حئساب دا گلمه‌ییب.
ـ یئمه‌گیم یوخدور. حئسابی من چوروتدوم.
آیلار ـ آخی من سیزی قوناق ائتمک ایسته‌ییردیم.
ـ گلن دؤنه‌یه قالسین.
رئستوراندان چیخدیقدان سونرا کیتابلاریمی‌ماهنا ائله‌ییب اوندان آیریلدیم. یولدان کئچن گنج اوغلاندان بیر گیله سیقارئت آلیب آلیشدیردیم. اونیوئرسیتئته واختیندا یئتیره بیلمزدیم. یولا دوزلیب ائوه گئتمک قرارینا گلدیم. نئچه دقیقه سونرا یوسیف‌ین سسی ایله اؤزومه گلدیم.
یوسیف ـ اده شئی، زاد …
ـ مال. بونو دئمک ایسته‌ییرسن می؟
یوسیف ـ آی ساغ اول. خوشوم گلیر باشا دوشن آدامسان. گل اگلش . دیرسگیمی‌پنجره‌نین قیراغینا سؤیکه‌ییب الیمی‌آلنیما وورموشدوم. سنه نه اولدو؟ نه‌دن اؤزونو بو قدر تئز اودوزدون؟ بوتون آرخاداشلارینا هر کس اؤز تایینی تاپمالی دیر دئیه‌رَک عاغیل قویان سن دئییلدین می؟ ایندی زنگین بیر قیزین پئشینه تاخیلماق دئدیک‌لرین‌له توتوشور مو؟
یوسیف یومروغونو گؤزومون اؤنونه گتیریب نئچه ثانیه‌دن سونرا آچدی. خزینه‌چی‌یه وئردیگیم ساعاتیم بارماقلاریندان آسلاندی.
ـ سن، سن بونو‌هاردان آلدین؟
یوسیف ـ آرخدان توتدوم. اشی توت گؤرک. سن بونو رئستوراندا حئساب یئرینه وئردین .من ده پولو وئریب ساعاتی آلدیم دا. ائله دئییر سانکی بیلمیر‌هاردان آلمیشام.
ـ سن نه بیلیردین من ساعاتی اورایا قویموشام.
یوسیف ـ من ده اورادا ایدیم. اونیوئرسیتئته گئتمک اوچون آرخانجا گلمیشدیم . قاپینیزدا آیلارلا بیرگه چیخدیغینیزی گؤردوم. سیز منی گؤرمه‌دن رئستورانا گلدیم. نه یاخشی دا گلمیشم. سنین بو ساعاتی نئجه اؤنمسه‌دیگینی بیلیرم.
تشککور ائدیب ساعاتی جیبیمه قویدوم. بیر یاندان سئوینیردیم .بیر یاندان دا اوتانیردیم. یوسیف‌له آرامیزدا او سؤزلر اولماسا دا اونون ساعاتی آلیب گتیرمه‌سی زوروما گئدیردی.
یوسیف ـ اونیوئرسیتئته گئدیرسن می؟
ـ یوخ من گله بیلمه‌یه‌جه‌یم. آیلارا گلمه‌یه‌جه‌یم دئدیم.
بوسیف ـ او زامان گئده‌ک بیر خوروز قویروغو چای ایچه‌ک منیم ده سنه بیر سئویندیریجی خبریم وار.
ـ یئنه نه خبری؟
یوسیف ـ اؤنجه چای، سونرا خبر.
ایکی چای تؤکوب یوسیف‌له قارشی_قارشی‌یا اوتوردوم.
ـ سؤیله سئویندیرجی خبرین نه دیر؟
یوسیف ـ صاباح آخشام عاییله‌وی اولاراق باهادیر گیله قوناغیق.
ـ بونون منه نه دخلی وار؟
یوسیف ـ مال. نه یازیق کی سن ده بیزیم عاییله‌دن ساییلیرسان . بیلمیرم کی آتا_آنام سنده نه گؤروب‌لر.
ـ من گله بیلمه‌رم.
یوسیف ـ گله‌جک‌سن. بویروق یوخاریدان دیر. آنام…
ـ یاخشی ، یاخشی تامام.
یوسیف گئتدیکدن سونرا قاپی چالیندی. کیم اولا بیلر دئیه دوشونجه‌یه دالدیم. بیر داها قاپی چالیندی. آیاغا قالخیب قاپینی آچدیم. پوچت‌‌چو الینده‌کی قوطونو منه ساری اوزاداراق _ اوختای جنابلاری سیزسینیز می؟_
ـ بلی.
پوچت‌چو ـ بورایا بیر قول آتین.
قوطونو آلیب ایچری دؤندوم. منه بیر شئی گؤندره‌جک کیمسه‌م اولمادیغی اوچون چوخ شاشیردیم. قوطونونو آچدیم. ایچیندن بیر مکتوب بیر ده جیب تئلفونو قوطوسو چیخدی.
سلام اوختای بَی
دئسه‌یدیم بو پایی مندن آلمایاجاقدین. اونون اوچون ده ایذین‌سیزجه بونو آلیب سنه گؤندردیم. ساغلیقلا قوللاناسان.
آیلار
بیری‌نین منه یازیغی گلمه‌سیندن نیفرت ائدیردیم. تئلفونو همن قوطویا قویوب آغزینی باغلادیم. ایکی داملا یاش گؤزلریمدن یاناقلاریما آخدی. قوطونو دیوانین اوستونه توللاییب هؤنکور_هؤنکور آغلادیم.
بویون باغیمی‌باغلاییب قوطونو بیر نایلونا سالیب ائشیگه چیخدیم. یوسیف الینی سیگنالدان گؤتوروب باشینی پنجره‌دن ائشیگه چیخاردی.
یوسیف ـ اده مال گل قورتار دا. ایندی قوناقلیق باشلاناجاق.
ـ گلدیم، گلدیم.
یول بویونجا آیلارین منی آلچاقلادیغینی دوشونوب اونون منلیگینی سیندیراراق پایینی قایتارماغی پیلانلادیم. اوندان آیریلماغین، اونو اونوتماغین تک یولو بو ایدی.
بؤیوک بیر عیمارتین ایچینه گیردیک. هر یئر_هر شئی پار_پار پاریلداییردی. اوتوز_اوتوز بئش کیشیه یاخین قوناق وار ایدی. هر کس سوسلو پالتارلار گئیینمشدی . اورتادا نئچه قوللوقچو قوناقلارا سرویس وئریردی‌لر. اونلاردان بیریسی الینده‌کی سینی ایله بیزه یاخینلاشدی.
قوللوقچو ـ بویرون. بوغدا سویو، آبسولوت …
ـ بیز ایچمیریک.
یوسیف ـ نه ایچمیریگی؟ گل بورا.
الینی اوزادیب ایکی بارداق گؤتوردو. بیرینی منه وئردی.
یوسیف ـ باخ بورادا قادینلی_کیشیلی‌هامی‌ایچیر. ایندی سن ایچمه‌سن پیس اولار. هم بیر آزدان خوشون گله‌جک.
باهادیر بیزه یاخینلاشیب حالیمیزی سوردو. اونونلا نه دانیشدیغیمین فرقینده اولمادیغیم کیمی‌نه زامان بارداغی بوشالدیب باشقاسینی آلدیغیمین دا فرقینده دئییلدیم. گؤزلریم ساده‌جه آیلاری آختاریردی. یوسیف‌ین ایشاره‌سی ایله باخیشیمی‌پیلله‌کن‌لره ساری یؤنلتدیم. آیلار قیرمیزی دونونون اتگینی توپوغونا قدر یوخاری چکیب پیلله‌کن‌لردن آستا_آستا آشاغی ائنیردی. سانکی او دا منی آختاریر کیمی‌باخیشینی اورا_بورا گزدیریردی.
اوچونجو_ پیلله‌‌کنده دایانیب قوناقلارلا سلاملاشیب اونلاری صمیمییت‌له قارشیلاماغا چالیشدی. نه قدر چالیشسا دا ایچینده‌کی کدری گیزله‌یه بیلمه‌ییب گؤزلرینین بوجاغینی ایسلاتدی. یاخینلاشیب اونونلا سلاملاشدیم. اوره‌گینی سیندیرماغا راضی گله بیلمیردیم آنجاق او پایی هر نجور اولورسا قایتارماق زوروندا ایدیم یوخسا غرورومو سیندیراجاقدیم.
اوجا بویلو ، شیشمان بیر گنج یاخینلاشیب اوزونو آیلارا توتوب سلاملاشدی.
آیلار ـ بو گون کئیفیم یوخدور یاشار .
یاشار ـ گله‌جک ارینه ده‌هامی‌کیمی‌داورانیرسان می‌ملک اوزلوم؟
آیلار ـ ال چک یاشار. من سنین هئچ بیر شئیین دئییلم. سن‌له نه ایندی نه ده گله‌جکده هئچ بیر ایلگیم اولمایاجاق.
یاشار آیلارین قولوندان توتوب دارتدی. آن ایچینده یاشارین یاخاسیندان توتوب پیلله‌کن‌لرین آرخاسینا چکدیم. قولونو بوروب بوینونو قولتوغومون آراسینا سالدیم.
ـ باخ اجلاف بیر کز داها آیلارا توخانسان اللرینی قیرارام. آنلادین می؟
یاشار _بوغولاراق_ منه الینی اوزاتماغین بدلینی اؤده‌یه‌جک‌سن .
بیر آز داها بوینونو سیخدیم. یوسیف‌له آتاسی یئتیشیب اونو الیمدن آلدیلار. باهادیر دا اؤزونو یئتیردی.
باهادیر ـ نه اولوب اوختای؟ بو قیزیمین خالاسی اوغلو دور.
ـ کیم اولور اولسون. منیم سئودیگیمه الینی قالدیرارسا اونو حیاتدان سیله‌رم.
هامی‌شاشقین‌لیقلا منه باخیردی. آیلار آغلایاراق پیلله‌کن‌لردن یوخاری چیخدی. یاشار دا منی هه‌ده‌له‌یه‌رَک سالوندان چیخدی. یوسیف منی بیر قیراغا چکیب الیمه سو وئردی.
یوسیف ـ بو قدر گؤتوروم‌سوز اولدوغونو بیلمیردیم. اده مال ایکی آتیم ایچکی ایچیب‌سن خالقین قوناق‌لیغینی بیر_بیرینه ووراجاقدین.
ـ من سرخوش دئییلم. ساده‌جه آیلاری اینجیتمه‌سینه دؤزه بیلمه‌دیم .
یوسیف ـ هه سن اؤل. قالخ آیاغا بورادا قالماغیمیز خوش دئییل.
پالتارلاریمی‌چیخاریب دیوانین اوستونه تؤکدوم .یوسیف آتاسی گیلی ائوه گؤتوره‌جه‌یینی س
ؤیله‌ییب گئتدی. نه ائده‌جه‌گیمی‌بیلمیردیم. یئنه ده مین بیر سوروغونون اؤنونده عاجیز قالمیشدیم. تئلفونون زنگی ایله اؤزومه گلدیم.
ـ آلو.
ـ اوختای منم آیلار.
ـ آیلار سن یاخشی‌سان؟ منی باغیشلا .من…من بیر آن نه ائده‌جه‌گیمی‌بیلمه‌دیم .
آیلار ـ سن سوچ ایشله‌مه‌دین. صاباح ائوینه گله‌جه‌یم .هر شئی آیرینتی‌سی ایله سنه آچیقلایاجاغام. گئجه‌ن خئییره قالسین.
ـ تامام. اؤزونه یاخشی باخ.
آردی وار