Home / حئکایه / چولاق اسماعیل / مقصود تقی‌زاده هریس(نیسگیل)

چولاق اسماعیل / مقصود تقی‌زاده هریس(نیسگیل)

چولاق اسماعیل
مقصود تقی‌زاده هریس(نیسگیل)

ساغ الینی تاختا قاپینین کؤهنه چرچیوه‌سینه دایاق وئریب دورموشدو. یاش دامجیلاری قیریشیق یاناغیندان آشاغی سوزوردو. هردن ده دوداغینی دیشله‌یه‌رک ایسته‌ییردی آغلاماسینین قاباغینی آلسین، آنجاق ائله‌یه بیلمیردی. پاییز گونشینین سون شوعالاری پالچیق داملارینا دؤشنمیشدی…
عؤمرونون میوه‌سی بیر تک ائولادی «ائلناز» ایندی ایسه بخت ائوینه یوللانیردی. چولاق اسماعیل نه قدر اؤزونو اودا- کؤزه ووراندان سونرا دا ائله‌یه بیلمه‌میشدی قیزی اوچون- هئچ اولمازسا بیر آز قیویر- زیویر- جئهیزلیک آلسین. بونا گؤره ایچه‌ریده اؤز- اؤزونو دانلاییردی:«اؤله‌سن، ارییه‌سن بئله کیشی! عؤمرونده بیر ائولاد صاحیبی اولدون، آنجاق اونو اوزو سولو ار ائوینه یولا سالمادین!»
بو فیکیرلرله اونو لاپ آغلاماق توتوردو. آنجاق دیلینین آلتیندا- گلینین دالیسینجا آغلاماق اوغورسوز اولار- دییه‌رک، اؤزونو ساخلاشدیریری…
ائلناز ایری و قارا گؤزلرینی ماشینین شوشه‌سینین آرخاسیندان قوجا آتاسینا تیکمیشدی. کیشی‌نین یالقیز قالماغینی دوشونه‌رک، اونو دا آغلاماق توتوب، یاز بولودو کیمی‌دولموشدو. بو گون و ائله بو آنلار آناسی دا یادینا دوشوردو. اونون مهربان باخیشینی و دوداغینداکی تبسسومونو خاطیرلاییردی. یازیق آرواد اونون اوچون نه آرزیلار ائله‌میشدی:« آی بالا، بیر بخت ائوینه گئدن گونونو گؤرسئیدیم اؤلمزدیم!». آمما اجل اونا آمان وئرمه‌ییب، ۶ ایل اؤنجه اورک خسته‌لییی ایله دونیاسینی دییشمیشدی. آتاسی اسماعیل اونون داوا- درمانینا پول تاپمادی. او خسته قادین، ارینی و بیر تک قیزینی باشسیز قویوب گئتدی…
گونش داغلار دالیندا ایتیب و قارانلیق یاواش- یاواش شهره قاناد گریردی. ماشین یوللانیب و ائلنازی دا اؤزو ایله آپاردی. چولاق اسماعیل نملی باخیشلارلا اونو بیر آز ایزله‌ییب، سونرا گئری دؤنوب آخسایا- آخسایا ایچه‌ری گیردی. ائوه غریب بیر سکوت چؤکموشدو. اوتاغین قاپیسینی آچدی. قاپی جیریلداییب، چیرپیلدی. کیشی اؤزونو کؤهنه کیلیمین اوستونه سالیب، هؤنکور- هؤنکور آغلاماغا باشلادی. سویوق و سس سیز- سمیرسیز بیر ائوده تک باشینا قالماغینا هله ده اینانا بیلمیردی. آنجاق بیر او ایدی، بیر سکوتا دالمیش ائو، آروادینین اؤلومونون آجی خاطیره‌سی، قیزینین جئهیزسیز بخت ائوینه یوللانماسینین دردی و بیر ده یالقیز قالماغینین آغیر غمی…
چولاق اسماعیل هله ده تاوانین هیس باسمیش دیرک‌لرینه گؤز تیکمیشدی. گؤزلرینین دؤوره‌سی قیزاریب، گؤینه‌ییردی. نفسی تنگه دوشوب و اوره‌یی یارالی قوش کیمی‌چیرپینیردی. ائله کیرپیک‌لری لاپ تزه‌جه بیر- بیرینه یوووشماق ایسته‌ینده، کوچه‌دن ائشیدیلن‌های-‌هارای سس لری اونو اؤزونه گتیردی. باشینی یئردن قالدیریب اوتوردو. سس‌لر لاپ یاخینلاشیردی. الینی دووارا سؤیکه‌ییب، آیاغا قالخدی. اوتاقدان چیخیب، قیچینی چکه- چکه کوچه قاپیسینا ساری گئتدی. قاپینی یاری‌یا قده‌ر آچیب، کوچه‌یه بویلاندی… بیر دسته آدام کوچه‌نین باشینا ساری یول باشلامیشدیلار. چولاق اسماعیل گیلدن اوچ قاپی آشاغیدا یاشایان «حاجی جاواد» ایکینجی دفه «مکه»‌یه مشرّف اولدوغونا گؤره جاماعات اونو یولا سالیردی…
یای- ۱۳۸۱

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *