vahedi
ایبو، اورا تهراندی…
حسین واحدی

گونش باتی‌یا ساری گئدرکن، گؤزو آرخاسیندا قالاراق بیزدن آیریلماق ایسته‌مه‌ییردی. آخشامین لاپ شیرین چاغیندا، کندین قوزئینده اولان خرمن‌لیک‌ده فوتبال اویناییردیق. اویونون شیرین یئرینده آلای-قولای باش تاپدیم اوزاقدان بیری آدیمی‌سسله‌یه- سسله‌یه بیزه دوغرو گلیر.
ـ ممد… ممد…. ممد….
خرمنه یاخینلاشاندا، لاپ کیچیک قارداشیم، بایرام‌دیر گؤردوم! تئز مئیدان‌دان ائشییه چیخیب، بایراما دئدیم:
ـ نه‌دى بایرام؟ نه اولوب؟
نفس- نفس وورا-وورا، ممد! ایبو…
ـ آی اوغلان نفسینی آل، بیر آز دینجل سونرا دئ دا.
ـ ممد، ایبو گلیب! موشتولوغومو وئر!
ـ آی قادانی آلیم بایرام، خوش خبر اولاسان!
“یولداشلاریما ساری چؤنوب، آی اوشاقلار من گئدیرم ائوه، قارداشیم تهراندان گلیب”،- دئییب بایرام ایله بیرلیکده ائوه ساری گئتدیک. بایرامین ۱۲ یاشی وار ایدی. او ائویمیزین سون‌بئشییی ساییلیردی. ائوده ۵ اوشاق ایدیق. من ائوین اوچونجو اوشاقی‌یدیم. بایرام‌هامیدان چوخ من‌له آراسی ساز ایدی، منیم ده بایرام‌لا.
ایبو دا، ائوین ان بؤیوک اوشاغی ایدی. ۱۳۸۰ دان ایش اوچون اورمیه‌دن تهرانا گئتمیشدی. ایندی بئش ایل ایدی اوردا قالیردی. بو بئش ایلین ایچینده بیر دفعه ده اونو یاخیندا گؤرمه‌میشدیک. فقط سسینی ائشیتمیشدیک.
یولو گئده- گئده مینلرجه فیکیر بئینیمه گلدی. رؤیالارا گیرمیشدیم. لاپ او اوشاقلیغیمین شیرین چاغلارینا. ۱۳۷۵ ایدی. منیم یئددی یاشیم وار ایدی و ایبونون اون‌دؤرد یاشی. کندین اوشاقلاری هرگون بالیق توتماق اوچون، قودوق‌بوغان چایینا گئدردیک. من سویا دوشمزدیم. ائشیکدن ایبو گیله باخاردیم. بالیق توتاندا اورک‌دن‌هارای چکیب، گؤیه آتیلاردیم:
– یاشاسین ایبو، یاشاسین ایبو!
– ممد سن ده یاشا، بو بالیق‌لاری سنه توتورام.
سونرا آپاریب اود اوستونده بیشیریب یئیردیک. بئله- بئله خاطیره‌لرده یاشایا- یاشایا ائوه چاتدیم.
قاپی آچیق ایدی. قاپیدان ائیوان گؤرونوردو. ایبو آتا- آنام گیل ایله دانیشیردی. منی گؤروب گولومسه‌دی. من اؤزومو ساخلایانماییب اونا ساری قاچدیم. گؤز یاشلاریم آخیردی. ایبونو قوجاقلاییب اللریمی‌کوره‌یینه دویونله‌دیم:
– نه جورسان ایبو؟
– ایبو نمنه دی؟ ابراهیم! یئکه کیشی اولوبسان!
– ایبو بو نه سؤزدو! ایبو یانی بو بئش ایلده پیس اولوب؟!
– بله! دا دوباره بو واژه‌نی ایشله‌تمه‌ها!!
– هله بولاری بوراخ آی قارداش! تهران‌دان تعریف‌له؟ نه ائلیرسن؟ اورالاردا نه وار نه یوخ؟!
– هئچ، مشغولام شکر خدا!
آنام ایسه: ممد قارداشین یول یورغونودو داریخدیرما ال- آیاغین یوسون شامی‌گتیریم، ابراهیم ایکی گونه‌جن کندده‌دی دویونجا دانیشارسیز. هله سنه ده ایش تاپیب! – دئیه دانیشیغیمیزا قوشولودو.
آتام دا، همشه‌کی کیمی‌سس‌سیز- صداسیز چی‌چئست رادیوسونو دینله‌ییردی. آخشاملار، آتام فقط رادیویا قولاق آساردی. هئچ کیمنن ایشی اولمازدی.
هؤوولسک آنامدان سوروشدوم: نه ایشی آنا جان؟
– محمد تهراندا بیر خارِجی شرکت‌نن همکاری ائلیرم. بیلدیم لیسانس آلیبسان دانیشمیشام سنی ده اورا آپارام! – دئیه، ایبو آنامین عوضینه آچیقلادی.
قاش‌قاباق ساللاییب چوخ جدی دئدیم: یوخ من اورمیه ده ایش تاپاجایام. بورادا دا چوخ ایش وار. یازیچی‌لیغادا تازا باشلامیشام.
– خب نمنه یازیرسان؟‌هارالارا چاتیبسان؟ نه‌یین وار؟
– بیرزادلار یازیرام دا! کیتابیمی‌ دا حاضیرلاییرام اینشاا …. اوچ آیا قورتولار…
بیلمیرم نییه قاپیدان گیرمک همین بو سؤزلر باشلاندی. ائوده‌کیلر ده قیراقدا نئچه گؤز ده بورج آلیب بیزی دینله‌ییردیلر.
آنام بیر داها دا سؤزوموزه قوشولدو: اوشاقلار سوفرا گلدی. دانیشیق‌لارینیزی ساخلایین شامدان سونرایا.
شاما قیزارتما ایله ساریمساقلی‌ایدی. منیم ان چوخ سئودیییم یئمک‌لردن بیری. شامی‌یئییب ایبو ایله بالاخانایا گئتدیک.
ایبونون اوستو باشی دا ده‌ییشمیشدی. خط باشیلاری قولاغینی کئچمیشدی. توکلرینین بیر آزی ساغا، بیر آزی دا سولا، بیر آزی آلینینا، بیر آزی دا گؤیه ساری دارانمیشدی. دارانمیشدی نه دئییم، یالانمیشدی!
اؤز عالمینده فشن ائله‌میشدی! هره‌میز باشیمیزین آلتینا بیر یاستیق قویوب اوزاندیق. او من‌له اهمیت‌لی دانیشیق آپاراجاغی اوچون هئچ کیمی‌اوتاغا قویماییب، سیزلرله صاباح گؤروشوب- دانیشاریق سؤز ایله باشلارین اکدی!
– خب محمد سن تعریف ائله؟! نه خبر؟
– من ده هئچ خبر یوخدو، دئدیییم کیمی‌داها چوخ یازماغا مشغولام. ایش ده آختاریرام‌ها. بیر ایکی مجله‌دن سؤز وئریبلر یازی یازام اونلار، البته آللاه دئین اولسا. اینشاللاه علاقه‌مه گؤره ده بیر دوز- عمللی ایش تاپارام.
– بابا بی‌خیال! یازیرام کیلویی چنده؟!!
– اوجور دئمه، منه چوخ مهمدی…
– بابای من پول تهراندا، زندگی تهراندا، سنی ده آپاراجایام، مامان گیلی ده راضی سالمیشام. باور ائله‌میسن فقط بیر سئری گل…
او گئجه او قدر دئدی دانیشدی، بئینیمین دیبین قازیب مندن بیر دیل اوجو گلرم جاوابینی آلدی. صاباحیسی گون بیلمیرم کیملرله ایشی وار ایدی آخشاماجان شهرده قالدی، گئجه‌نی ده یورغون- آرغین قاییدیب، من شام یئمیرم، شهرده بیرزادلار یئمیشم دئییب یاتدی.
او گونون صاباحیسی، گئجه ساعات اونا من‌له اؤزونه تهرانا گئتمک اوچون بیلیت آلمیشدی، بیلمیرم نییه، آما قاییتماغا چوخ تله‌سیردی.
گون اورتادان سونرا‌هامیمیز بیر یئره ییغیشدیق.
ایبو ایله دانیشیب، کئچمیشلریمیزی دیریتدیک. زامان بیزه آمان وئرمه‌دن توو ایله قاناد چالیب اوچوردو. آخشام ساعات ۸:۳۰ دا آژانس دان تاکسی چاغیریب‌هامی‌ایله ساغوللاشیب تئرمینالا گئتدیک.
تئرمینالدا بیر آز اویانا گئت- بویانا گل، ایبو ایسه یولداشلارینا، رئیس‌لرینه جویز حالواسی ایله اورمو نوغولو آلاندان سونرا اوتوبوسا میندیک.
ساعات ۱۰ اولوب اوتوبوس تهرانا ساری یولا دوشدو. یولدا من بیر آز فیلم ایله مشغول اولدوم، قالانین دا مین بیر مصیبت ایله یالاندان یاتدیم.
آنجاق ایبو قولاقلاریندان هندزفئری‌نی هئچ چیخارتمادی. ساعات ۸ حدودوندا تهرانا یئتیشدیک. اوشاقلیغیمدان بو اوچونجو دؤنه ایدی تهرانا گلیردیم. قاباقجا ایکی دفعه تهرانین اولوسلار کیتاب سرگی‌سینه گؤره گلمیشدیم. آما بو دفعه اوره‌ییم هئچ خوش دئییلدی. یامان چیرپینیردی. تهرانین هر‌نه‌یی بیله‌مه آلا-بولا گلیردی. آزادلیق مئیدانی گؤزومه ایری-اویرو گؤرونوردو؛ کلله‌-مایاللاق دورموشدو ائله‌بیل. قوشلاری اوچماق یئرینه، سانکی بالیقدیلار دئیه اوزوردولر. آنجاق نئچه دقیقه‌یه کیمی‌من بو بولاندیریق حال-‌هاوادان آیریلا بیلمه‌دیم. بیر کیشی‌نین منه توققوشماسی ایله اؤزومه گلدیم. بلی من تهراندایدیم.
یئنه ترافیک، یئنه باساراق، یئنه کیفیر‌هاوا، یئنه غریبه آداملار، و…!
–‌هارا گئده‌جه‌ییک ابراهیم؟!
– محمد تحمل ائله، بیله‌جکسن!
ایبو آپاران یئره‌جن تاکسی‌دان خییاوانلارا، اوجا تیکینتی‌لره و …. باخدیم. اوره‌ییمده حسرت یئیییردیم. بیزیم گؤزه‌ل، یام- یاشیل، صفالی شهریمیز او جور، بورا دا باشکنددیر دئیه بو جور!
– محمد گؤزلرین چوخ خواب آلود‌دی. صبر ائله سنی بهشته آپاریرام. اورادا دا دویونجا استراحت ائله.
– ساغول ابراهیم- اینشاللاه…..
ایکی ساعات خیاوانلاردان یایین ایستی‌سین‌ده گزندن سونرا، یئتیشدیک ایبو آپاران یئره! تاکسی‌دان یئنیب اوزبه‌اوزوموزده اولان خییاوانا گئتدیک.
محمد بورا تهرانین بالا شهری‌دی، بیزگئدیریک او آسمان‌خراشا. گؤروسن؟
– هه گؤرورم.
– اورانین واحیدلرینین نصفی بیر شرکت خارجی‌نین نماینده‌لرینین الینده، من ده اورادا اولورام.
ایبو گؤرسه‌دن گؤی‌دلن تیکینتی‌یه چاتاندا، ایبو، آیفونون ۱۱-‌ جی قاتینین دویمه‌سین چالدی. آیفون گؤرونتولو و یئنی چیخان آیبفونلاردان ایدی.
– ابراهیم خوش اومدی بیا بالا!، دئیه، بیر قیرجانان سس ایله بیری دانیشدی.
قاپی آچیلدی. آسانسورا مینیب، ۱۱-‌ جی مرتبه‌یه گئتدیک.
اورادا اوچونجو واحیدین زنگین چالدیق. بیر قیسا مانتولو- عالمین بزه‌یین اؤز- گؤزونه یاخیب آداما بنزه‌مه‌ین- قادین بیزه خوش گلدین ائدیب، بیزی ایچه‌ری آلدی.
بیز موبل اوسته اوتوراندان سونرا، قادین منه ساری باخیب دئدی:
– محمد جان خیلی خوش اومدی. خوب کاری کردی اومدی. ابراهیم جون، تعریف شما رو خیلی کرده!
من دانیشمامیش، ایبو دئدی: خانم عزیزی‌ حالا کجاشو دید‌ی! برادرم کار نویسندگی رو هم شروع کرده. کتابشم ۳ ماه دیگه چاپ میشه.
– آفرین، از قیافش معلومه جوون با استعدادیه!
اوره‌ییمده دئدیم: هن ائششک اؤزنسن، قارپیز وئرمه قولتوقلاریما…
بونلارین بو موفته تعریفلری منه خوش گلمیردی. میز اوستده‌کی تاختانین یازیسیندان بیلدیم بو خانیم بورانین رئیسی‌دی. آنجاق هله بیلمیردیم نه ایش ائده‌جه‌یم. قادینا باخیب دئدیم:
– ممنونم، شما لطف دارید… (البته بیلمیردیم دارین دئیه‌م یا دارید، خولاصه آغزیما دارید گلدی)
– خواهش عزیزم! امیدوارم همکارای خوبی برا همدیگه باشیم…
– ابراهیم کارتو برات شرح داده؟
ایبو اؤزونو ایتیره‌رک دئدی:
آره خانم عزیزی، کم و بیش آشناس!
منده جینقیریمی‌چیخارتماییب، آلای- قولای باشیم‌لا ایبونون سؤزونو تأیید ائله‌دیم. سونرا قادین دئدی:
– پس بزار من تکمیلش کنم. آقا محمد! شرکت ما کارش بیزینسه، در کنار اون داره اعضا جمع می‌کنه تا با پول سهام اونا دست به انجام پروژه‌ها‌ی بزرگی بزنه. از امروز شما هم مسئول ثبت اسناد این اعضا هستید. هر سوال یا مشکلی هم داشتی با من تماس بگیر. شما در طبقه دوم واحد ۲ مشغول میشی. امیدوارم موفق باشی…
ضعیف سس تونویلا، ایچیمده راضی اولمایا- اولمایا دئدیم: خیلی ممنونم خانم عزیزی، همچنین .
– آقا ابراهیم، بقیه کارها هم با شماس، حالا میتونید برید…
خانیم عزیزی ایله ساغوللاشیب. آسانسور ایله ۲-‌جی مرتبه‌یه گئتدیک. اوراداکی ۵ واحید‌دن بیری دفتر، قالانی ایسه بو تیکینتی ده چالیشانلارین استراحت یئرلرییدی.
ایبونون یاتاق یئری ده ۳-جو واحید‌ده اولدوغو اوچون، منی ده اورا آپاردی. قاپینی آچیب ایچه‌ری کئچدیک. ایچه‌ری‌ده ۲۰ دنه یاتاق وار ایدی. فقط بئشی بوش ایدی. بیر آن عسگرلیییمی‌خاطیرلادیم.
اورادا اولان‌لار ایبو ایله اؤپوش- گؤروش ائدیب، ایبو ایسه منی اونلارا تانیتدیردی.
خئیلک دانیشاندان سونرا، یاتاغیمدا اوزانماغی مصلحت گؤردوم.
محمد، محمد… سسی ایله یوخودان اویاناندا، باش تاپدیم یورقونلوغومدان بیلمه‌دن یوخلامیشدیم.
– محمد پاشو- نهار اومده!
سونرا یاواشجا قولاغیما دئدی: « فارسی دانیش!» من ده هئچ‌زادان خبریم اولمادان فارسجا اوندان تشککور ائله‌ییب آیاغا قالخدیم.
سوفرا باشیندا ایله‌شیب ناهار یئدیک. زهرمار ایدی، ناهار دئییلدی کی! یئدیییم هر تیکه‌ده سانکی بیر آغیر داشی قارنیما اودورام. نه ائده‌ بیله‌جه‌ییمی‌هئچ بیلمیردیم. زامان منی اؤز ایچینده اوینادیردی. اللریمدن توتوب، اؤزونه مخصوص اولان دیوارینا میخلامیشدی. نه قورتولا بیلیردیم نه ده زامان ایچینده یوخ اولوردوم. من ایسته‌مه‌دن، بیلمه‌دن، آنلامادان یامان بیر یئرده دویونلن‌میشدیم…
او گونو، داریخمالاریملا، استرس‌لریمله گوندوزو آخشاما باغلادیم. اوره‌ییم کندیمیزه داریخدی، آنامین دئیینمه‌لرینه، آتامین ایکی یاستیغی بیر- بیرینین اوستونه قویوب بالاجا رادیوسونو قولاغینا توتوب رادیو دینله‌مه‌سینه داریخدیم، خرمنلییه، فوتبالیمیزا، اورمونون گون‌باتانینا، مش اسماعیل عمی‌نین کندین مسجیدینده دئدییی اذان‌لارا، اورمویا، اؤزومه داریخدیم.
ایلک آخشامدان باشیمی‌بالیشا قویوب یاتدیم. سحر چاغی یئنه‌ ده ممدین سسی ایله یوخودان اویاندیم.
– محمد پاشو صورتتو بشور، ساعت شش‌ونیم، صبحونه میدن. بعد ساعت ۷ میریم آفیس!
بیر نئچه قورو و دمیر آداملارنان قلیان‌آلتینی یئییب ساعات ۷ اولانا کیمی‌حاضیرلانیب، ایبو ایله ایش واحیدیمیزه گئتدیک. ایکی بالاجا اوتاق. بورادا فقط من‌له ایبو ایدیک.
– ایبو نه خبردی؟ بورا‌هارادی منی گتیریب آزدیردین؟!!
– یواش!! سسیمیزی ائشیدرلر. ائله دانیش بیلمه‌سینلر بیز فارس دئییلیک؟
– اوغلان قاچ آتیلماغییین دالیجا. بیرینجی‌سی هم سنین هم ده یولداشلاریین لهجه‌لری دئییر‌هارالیدیرلار. بو اوندان کیم اولدوغونو گیزله‌دیر او دا بوندان! عجایب ایشه راست گلدیک‌ها…
– برو بابا!! سنی ده بلا گتیردیم!
– آی قاراش بورا‌هانسی جهنم‌دی؟ بونلار دوز آداما اوخشاماییرلار‌ها، من‌نن دئمک. اوندان قورخمالیسی سنین ایشلریندی، ایبو من سن‌نن ده قورخورام…
– این حرفا کیلویی چنده!
– عیبی یوخ، سن دئین اولسون، ایندی ایشیمیزین آدی نه‌دی؟!
– برادر من، محمد صبرین اولسون. گؤره‌جکسن. آره اصلاً سن دئیندی. ایشیمیزین آدی یوخدی. بیز بورادا نئچه گروه‌دان تشکیل تاپمیشیق تا کی نفر تاپاق اعضامیزی بیشتر و بیشتر اولا پولوموزا سود گله!
– اوغلان‌هانسی پولا؟ اولمایا آتام گؤتورن ۵ میلیون وامی‌سنه گؤندردییینده بو آج قوردلارا وئریبسن؟!
– محمد نه قوردو؟! هئچ بیلیرسن بو ایشده نه سود وار. گؤره‌جکسن؟
– ایبو سن ده بیلیرسن بولار کیمدیلر، من ده!
– محمد هر کیم اولسالار دا من اعضامی‌۲۰ نفره افزایش وئرمه‌سم سودومو وئرمزلر. ایندی هله ۵ نفر تاپمیشام. سن ده کمک ائله‌سن درست اولار…
آی عزیز قارداشیم سن عاغلینی الدن وئریبسن هئچ دانیشیغین، پاتلئتین و… الدن گئدیب واللاه…
قاپی‌نین دؤیولمه‌سی ایله، ایبو: «بسدی، سس سالما گؤرک کیمدی» – دئییب قاپی‌نی آچدی.
ایکی نفر گنج اوغلان ۱۹-۲۰ یاشیندا ایچه‌ری گیردیلر. شهروز آدلی بیری اونلاری تورا سالمیشدی. گتیردیلر من اونلارین آفیس ایشلرین باشلایام. من یولا دوشوم دئیه ایبو میز دالینا گئدیب، کاغاذ- قلم چیخاردیب یازی پوزویا باشلادی.
اونلارین ایشی قورتولاندان سونرا، ایبو حیرصله منه باخیب دئدی:
– باخ باشی داشلی بورادا سن دئین سؤزلری آلان یوخدی! فقط پول و پول!! احمق اولسان اؤلرسن.
داها حیرص باشیما وورموشدو. هم جهنمه دوشوب هم ده عاغیللی‌لارین اداسین چیخاردیر، اوره‌ییمده آللاها یالواریردیم منی تئز بو جهنم‌دن قورتارا.
– بئش ایل ایدی اؤزومله دئییردیم ایندی ایبو تهران دا اوجا یئرلره چاتیب، آدلی-‌سانلی آدام اولوب، بئش ایل ایدی سنی گؤرمک حسرتینده ایدیم. نه اولوب سنه ایبراهیم! قارانلیقلار شهری سنین باشینا نه توی توتوب! سن کیم‌سن ایبراهیم؟ کیم اولوبسان؟‌هارا گئدیرسن؟ بئش ایل ایدی سنین خاطیره‌لرین‌له یاشامیشام. سن نه اولوبسان‌، من نه دوشونوردوم؟!
– بابا برو ببینم!
– نه تئز آنا دیلین ده‌ییشدی. نه تئز اورمیه‌لی اولدوغونو اونوتدون. نه تئز تورک اولدوغونا یاد اولدون؟ نه تئز……؟!
هویت کیلویی چنده؟
سنین بئینینی‌ هم یویوبلار هم ده بو اؤچ- دؤرد سؤز ایله دولدوروبلار. سن بیر گون بارماقلارینی ایکی گؤزونه سوخاجاقسان. اوندا گئج اولاجاق. بوسؤزلری دئییب چانتامی‌گؤتوروب اونلار دئین آفیسین قاپیسینی چیرپیب، تیکینتی‌دن چیخدیم.
ائشیکده، ایبونون سسینی پنجره‌دن دالیمجا آخا-آخا گلیردی. آنجاق من ده اثرلری یوخ ایدی. هئچ اؤزوم ده بیلمه‌دیم نه جور اولدو، آللاه طرفی اورادان قاچماق فیکری بئینیمه گلدی.
– محمد جان برگرد، همه چیز درست میشه … دئیه- او هله‌ ده باغیریردی!
بیر باشا تئرمینالا گئتدیم. ساعاتلارجا اوردا معطل اولاندان سونرا ایلک اوتوبوس ایله اورمویا دؤندوم.
یولدا مین بیر خیالا دالدیم. نه‌لر اولاجاق، نه‌لر اولمایاجاق، آتا- آناما نه‌ دئیه‌جه‌یم، نه‌لری دئمه‌یه‌جه‌یم. بو نه ایش ایدی منی تاپدی آی آللاه. آما بو عذاب وئریجی خیال‌لارلا یاناشی زامانین زیندانیندان آزاد اولموشدوم سانکی، آزاد‌هاوادا نفس چکیردیم. حتی اوتوبوس یوللاناندا، آزادلیق مئیدانی دوم-دوز یئرینده اوتورموشدو. قوشلار دا قاناد چالیب اوچوردولار. یاشاییش نه‌دیر تازا بیلمیشدیم. من یئنی‌دن اوتوبوس‌دا دوغولدوم.
***
هئچ اؤزوم ده بیلمه‌دیم نئجه ایکی ایل منیم تهرانا گئدیب گئری قاییتماغیمدان سوووشدو. ایبودان بو ایکی ایلده هئچ خبریم اولمادی. آما قزئته‌لرین بیرینده کئچن گونلر اوخوموشدوم کی، تهراندا نئچه بؤیوک خالقی چاپان باندی یاخالاییبلار. آللاه – آللاه ائلیردیم، ایبراهیما بیر شئی اولماسین. آما باشی داشا ده‌ییب گئری قاییتسین. بو فیکیرلرده اولارکن امکداشیم دفتریمه گلیب دئدی:
– ممد قارداش بیر نفر سیزی گؤرمه‌یه گلیب!
اوره‌ییم یئریندن چیخدی. آللاه ایبودو؟ گؤره‌سن کیمدی؟
قورخولو سس‌له دئدیم:
– کیمدی؟
– دئییر تانیشلاریندانام..
– دئ گلسین…
آنجاق ایچه‌ری گیرن آدامی‌گؤردوکده، اوره‌ییم بیردن- بیره اوزولدو و یئنه اؤزونه قاییتدی.
– بویورون اه‌یله‌شین آغا… خوش گلمیسیز…
سالام علیک ائدن‌دن سونرا بیلدیم کندیمیزده‌کی قونشوموزون اوغلو رسولون یولداشیدی. رسول دا کئچن ایل یایدا بیردن- بیره کنددن یوخ اولدو. آتا – آناسی دا بیلمیردی نه ائدیر و کیملرنن اوتوررو دورور. فقط بیر نئچه سئری تهراندان غریبه نؤمره ایله زنگ آچمیشدی.
– آقای محمدی بلی من رسولون یولداشییام. من ده تازا رسول‌گیله قوشولموشدوم. سیزین آغا ایبراهیم‌ده اورادایدی. فقط، من طاقت گتیره بیلمه‌دیییم اوچون ایکی آیدان سونرا اورادان قاچدیم…
من دؤره بیلمه‌ییب، سؤزونو کسه‌رک سوروشدوم:
– ایبراهیمدان نه خبر؟ سیز اون‌نان دا گؤروشوردوز؟ سن آللاه بیر سؤزلر دئیین، اوره‌ییم یئریندن چیخیر آخی!
رسولون یولداشی، قیریق- قیریق جاواب وئریردی. گاه دانیشیردی گاه دا، دام دیوارا زیلله‌نیردی. ائله بیل رهدن بو دونیادان قوپوب یئنی‌دن قاییدیردی.
– جناب سیزدن سوروشدوم‌ها؟ ایبراهیمدان نه خبر؟ تئز دئیین سن آللاه…
– واللاه … کئچن گونلر، رسول تهراندان منه زنگ آچدی دئدی پولیس دفتره تؤکولوب‌هامینی توتوب، شانسدان بو دا ائشیکدن دفتره قاییدان دا گؤروب ماجرانی، بئیناوا ایندی فراری دوشوب…
‌من پولیس کلمه‌سینی بیلدیم فقط. قالانین ائشیتمیردیم. ایبو… پولیس… زیندان … یازیق آنام، یازیق آتام…!
کیتابلاریمین‌هامیسی قفسه‌دن چیخیب پنجره‌دن قاچدیلار. قلم قابی‌داکی قلملریمین جؤوهرلری بیر آنین ایچینده یئره سوزدو… هر نه گؤزلریمده یوخ اولدو. من نازلی چایی‌نین قیراغیندا یئره سره‌لنمیشدیم، اوستومو قوملامیشدیم و فقط باشیم ائشیکده قالمیشدی. ایبو باشیم اوستده دایاندی و بیر دولو سطیلین سویونو باشیما بوشالتدی. من آیاغا قالخیب ایبونو قووالادیم. کؤرپو باشیندا اونو توتدوم، یعنی توتا بیلمز ایدیم، اؤزو دایاندی من اونو توتام. آخی من اوندان خیردا ایدیم و گوجوم چاتمیردی اونا چاتام. یئره ییخیلدی، سینه‌سینده اوتوردوم، ایبو گولمه‌یه باشلادی، اورکدن گولوردو. سونرا گولمه‌یینی کسیب دئدی:
– ممد بیلیسن نه وار، من ائله اوجا یئرلره چاتاجاغام، یعنی آرزومدو چاتام، رئیس اولاجاغام، سنی ده اؤزومه چایچی سئچه‌جه‌یم، دستور وئره‌جه‌یم تئز- تئز منه ککلیک اوتو چایی دمله‌یه‌سن، من شیرکته گلمه‌میش سن چایی حاضیرلایاسان…
سونرا قاهقاها ایله گولمه‌یه باشلادی و منی اوستوندن یئره ایته‌له‌ییب، چایا آتیلدی، اوزه – اوزه یئنه باغیریردی: منه ککلیک اوتو چایی دمله، ککلیک اوتو چایی…! و ککلیک اوتو چایی دئیه‌- دئیه اوزه-اوزه چایی باش یوخاری گئتدی و زامان یئنه منی چارمیخا چکدی…