چئویرن: ایشیق
ترجمه: ایشیق
ایشیق

سئوگیدن سونرا ( پوئست؛ ۱)
قاسیم پناهی

قورخونج اَیلَج سسی ایله اؤزومه گلیب باخیشیمی خیابانا ساری یؤنلتدیم. قارا گئیملی بیری آرابانین اؤنونده یئره سریلمیشدی. ال‌لریمی جیبیمدن چیخاریب اولای یئرینه دوغرو قاچدیم. آغ ساققالی کؤکسونه قدر اوزانمیش قوجا کیشی اؤلولر کیمی قیمیلدامیردی. باشینی دیزیمین اوستونه آلیب بارماقلاریمی بورنونا دایادیم. گیرسیز ، آنجاق آردیجیل نفس آلیردی.
آنسیزین آشاغی _ یوخاری ایگیرمی یاشلی قیز ـ من اؤلدورمه‌دیم، من اؤلدورمه‌دیم ـ باغیراراق آرابادان ائندی. قیزین سس یوکسک‌لیگیندن ائتکیله‌نیب چیغیراراق ـ اؤلمه‌ییب، یاردیم ائت آرابایا گؤتورَک ـ دئدیم. یازیق قیز خزان یارپاقلاری تکی تیر_تیر تیتره‌سه ده چتین‌لیک‌له اؤزونو آیاق اوسته ساخلاییب قوجانین آیاقلاریندان یاپیشدی. آرابانین آرخا قاپیلارینی هر ایکی یاندان آچدیم. کیشینین قولتوقلاریندان قالدیردیب اؤلوم_ظولوملا آرخا ایستوللاردا اوزاتدیم.
قیز ـ اللرینه هووخوراراق من سوره بیلمه‌رم.
ـ اگلش ، سورمک ایسته‌سن بئله من قویمارام.
اون دقیقه سونرا قوجانی خسته‌خانانین تعجیلی یاردیم باخیجی‌لارینا تاپشیریب گؤزله‌مه زالینین اوتراجاقلاریندا اگلشدیک.
قیز اللرینی اؤیکه‌له‌یه‌رَک تیتره‌ک ،دوشکون سسله ـ اؤله‌جک… بیلیرم اؤله‌… ـ میزیلداییردی.
گؤزلریمین آلتی ایلا اونو سوزدوم. بنیزی آلما کیمی سارالمیشدی. دولومساندی. ماوی گؤزلری فیرتینالی دنیز سایاغی کؤپوروب دالغالانماق ایسته‌‌سه ایدی ده اؤزونو گوجله ساخلاییب آغلاماماغی باجاردی. آیفون تئلفونونو چیخاریب کیمه‌سه زنگ آچماق اوچون آرالاندی. من ده نوکیا ۱۱۰۰ جیب تئلفونوملا یولداشیم یوسیف‌ین نومره‌سینی ییغدیم.
یوسیف ـ الو، اوبالی جئنتئلمن
ـ سارساقلانما، تئز اؤزونو رازی خسته‌خاناسینا یئتیر.
یوسیف ـ دایان گؤروم اده، نه اولوب.
ـ گلرسن آنلادارام.
یوسیف ـ اده ایگید دور گؤروم …
باغلانتینی کسیب تئز تئلفونومو جیبیمه باسدیم. قیز قاییدیب یانیمدا اگلشدی.
قیز ـ آتاما زنگ ائله‌دیم. منیم سوروجولوک بلگه‌م یوخدور. بیر آزدان اؤزونو یئتیره‌جک.
ائله بو آندا اوجا بویلو گؤوده‌لی بیر پولیس بیزه یاخینلاشدی.
پولیس ـ باغیشلایین، اولایی آراشدیرماق اوچون قوللوغونوزدایام. کیم رولون آرخاسیندا ایدی؟
قیز قایغی ایلا منه باخدی. گؤزلرینده قورخونو، پئشمانلیغی آیدینجا گؤرمک اولوردو.
پولیس ـ سوروجو هانسی‌نیزدی؟
ـ من ایدیم. آرابانی من سوروردوم.
چاشقینلیق‌لا اوزومه باخان قیز نه‌سه دئمک ایسته‌ییردی آنجاق منیم هیمیم‌له سوسدو. پولیسین سورغولارینی یانیتلاماق اوچون اوندان آیریلدیم.
یاریم ساعات سونرا گؤزله‌مه زالینا گئری دؤندوم. یوسیف ایله قیز، بیر ده گوده، یوغون، کئچل بیر کیشی دانیشیردیلار. کسکین‌لیکله قیزین آتاسی اولمالی ایدی. یاخینلاشیب سلام وئردیم. کیشی الیمی صمیمیت‌له سیخیب گؤروشدو. یوسیف آجیقلی باخسا دا مجبوریت اوزوندن الینی اوزادیب گؤروشدو. کیشی منه اوز توتوب خیشیلتیلی بوغونوق سسی ایله بو قیزیم آیلار من ده باهادیرام دئدی.
ـ تانیشدیغیمیزا سئویندیم. من ده اوختایام. بو دا بیریجیک یولداشیم …
باهادیر سؤزومون آراسینا گیردی. هه یوسیف بیزیم قونشوموزدور اونو یاخشی تانییرام.
یوسیف ـ یاخشی تانیماق دا دئمک اولماز. سونوجدا بو شهرین بیر جئنتئلمنی وار اونو دا هر کس تانیییر .
هر کس گولومسه‌دی.
باهادیر ـ قیزیمین حاققیندا کیشیلیک ائدیب‌سیز. آنجاق پلیس‌لره هر شئیی آچیقلامالی‌ییق. منیم بو شهرده تانیشیم چوخدور. پیروبلئم یارانماز.
ـ آیلارین یئرینده باشقا بیریسی ده اولسا ایدی من یئنه بو ایشی گؤره‌جکدیم. آچیقلاماغا گرک یوخدور.
آیلار ـ آما…
ـ آماسی، آنجاغی یوخدور. هم سؤزوموز ایکی اولورسا بیزه چوخا باخا بیلر.
یوسیف ـ اوختای کوماندیر بویودولار تامام دیر. اده ظالیم اوغلو بیر اینسانین حیاتی اورتادا دیر. (یاواشجا) مال.
یوسیفی باخیشیملا هده‌له‌دیم. الیمدن توتوب منی اونلاردان آرالاندیردی.
یوسیف ـ بابا سن جؤمرت ،کیشی تامام. اده اورتادا قتل وار باشا دوشورسن. مال. هئچ بیلیرسن او کیشی بو شهرین ان زنگین آدامی دیر؟ بیلیرسن او قیز گونده بیر مودئل آرابا ایله اونیوئرسیتئته گلیر؟ او قیزین قویماز بیر ساعات دا توتقولو قالسین. سن نه؟ یاتیب گون‌اورتا دوروسان خرجین آز چیخسین. هر هفته اون‌دؤرد، هر آی اللی آلتی هر ایل نم نئچه ائونه گون‌اورتایا یومورتا گئجه‌یه یئر‌آلما یومورتا یئییرسن. گئدیب دوستاغا دوشرسن‌سه کیم اوردان سنی چیخاراجاق؟
ـ سن ائله بیل یئنه ده ایت انگی یئییب‌سن. سن ده بو شهرین زنگین آدامینین اوغلو ایدین آما من بیر شئی اوممادان، بیر شئی آلمادان بؤیره‌گیمی سنه وئردیم. بوراخ بو سؤزلری اولان اولوب، توربا دولوب .
یوسیف ساغ الینی دوداغینین بو تاییندان، او تایینا سیییرمه چکیر کیمی چکیب سوسدو. دؤزمه‌ییب یئنه مال دئدی.
باهادیرا یاخینلاشارکن بیر آن آیلارلا گؤز گؤزه گلدیم. گونون گون‌اورتا چاغی گونش
ه باخینجا گؤزلریم قاماشان کیمی، اونون دا گؤزللیگی گؤزلریمی قاماشدیردی. ماوی گؤزلرینده دالیب گئتمه‌دن باخیشیمی اوندان آلیب باهادیرین اوزونه سالدیم. نه‌سه دئمک ایسته‌دیگیمده باخیجی‌لاردان بیریسی منی چاغیردی. دؤردوموز ده اونا ساری دؤندوک.
باخیجی ـ خسته اؤزونه گلیب دیر. سیزی گؤرمک ایسته‌ییر.
درین بیر نفس آلیب بوراخدیقدان سونرا اونون آرخاسینجا یولا دوشدوم.
قاپینی دؤیوب ایچری گیردیم . قوجا گؤزلرینی قاپادیب دیواندا اوزانمیشدی. یانیندا اگله‌شیب الینی اللریمین آراسینا آلدیم. آستاجا گؤزلرینی آچیب سلام دئدی.
ـ سلام مندن دیر دایی. نئجه‌سیز؟
قوجا ـ ساغ اول اوغلوم. سن می منه چارپدین ؟
نه دئیه‌جه‌گیمی بیلمه‌دیم. باشیمی آشاغی سالیب سوسدوم.
قوجا ـ منه دئدی‌لر سن‌سن . آنجاق سن دئییلدین. آرابانی بیر قیز سوروردو. یقین اونو سئودیگین اوچون اؤزونو اونون یئرینه قویوبسان. نه ایسه، حکیم‌لر اؤنملی بیر شئی‌ییم اولمادیغینی سؤیله‌دی‌لر من ده سورون اولمادیغینا گؤره داعوا آچمادان قیزی باغیشلادیم . سورون اولسا ایدی دا بئله من شیکایت ائده‌جک دئییلدیم. صاباح منی بوراخاجاقلار .سیز گئده بیلرسیز.
ـ دایی سیزی بوردا بوراخماق اولماز. عاییله‌نیزه خبر وئرسک باری!
قوجا ـ منیم کیمیم_کیمسه‌م یوخدور. بو حیاتدا یالقیزام.
ـ او زامان من بورادا قالاجاغام. صاباح سیزی ائوینیزه گؤتوره‌جه‌یم.
قوجا ـ راضی دئییلم، آنجاق سن ایسته‌ییرسن‌سه منیم سؤزوم یوخدور.
ـ تامام دایی ،تامام. سن دینجَل.
اوتاقدان چیخیب گؤزله‌مه زالینا دؤندوم. یوسیف‌له آیلار منی قارشیلادی‌لار.
یوسیف ـ نه اولدو؟
آیلار ـ اؤلمه‌ییب کی؟
ـ یوخ اؤلمه‌ییب.
هر شئیی اونلارا آنلاتدیقدان سونرا آیلارلا آتاسینین گئتمه‌سینی ایسته‌دیم. اونلار دا راضیلیق وئردی‌لر.
باهادیر منله ساغ اوللاشیب رولون آرخاسیندا اوتوردو. آیلار دا بیر آز گؤزلریمین ایچینه باخیب هر شئی اوچون چوخ ساغ اول دئییب آرابادا اوتوردو. اونلار یولا دوشدوکدن سونرا بیر سیقارئت چیخاریب اووجومون آراسیندا آلیشدیردیم. آرخامی خسته‌خانانین دیوارینا سؤیکه‌ییب سیقارئتیمه دال با دال درین قوللاب ووردوم.
قار دنه‌لری النمه‌گه باشلامیشدی. نئچه‌نجی سیقارئتی اؤنجه‌کینین اودو ایله یاندیردیغیمین فرقینده دئییلدیم. هارا باخیردیم آیلارین سوچ‌سوز باخیشلاری ایله، قایغیلی داورانیشی گؤزومون اؤنونده جانلانیردی. گئجه یاریسی فیرتینالی دنیزین اورتاسیندا یولونو ایتیرمیش بالیقچی کیمی پیرتلاشیق دوشونجه‌لریمی سیرالاماغا چالیشیردیم آنجاق ، سانکی آجیماسیز بورولقان منی سولارین دیبینده بوغماق ایسته‌ییردی. ایچیمده دوزگوسوز بیر سکسکه وار ایدی.
یوسیف تئز_تئز دانیشاراق منه یاخینلاشدی.
یوسیف ـ اده شئی، مال . من ده سنی آختاریرام. گئجه اولدو . گئدک بیر شئی زهرله‌نک. بورادا بیر فست فود وار . من اؤزومه همبرگر ،سنه ده یئرآلما قیزارتماسی دئدیم. هردن بیر دگیشیک‌لیک اولمالی دیر دا. بیردن بوغازیندان گئتمه‌سه بیر یومورتا دا دئییم. هه؟ من اؤلوم هه؟ سونوجدا سنین قارین_قورساغین یئرآلما یومورتایا آلیشیب. بیردن دگیشیک‌لیک اولسا ائرور وئرر.
قاشلاریمی دوگونله‌ییب آجیقلا باخدیم.
یوسیف ـ اده گل دا ظارافات ائتدیم. بیر دنه بؤیرک وئریبسن ده. ائله باخیر دئییرسن آتام دیر.
یئمکدن سونرا گؤزله‌مه زالینا دؤنوب بیر بوجاقدا بوزوشدوک. هاوا یاخشی‌جا سویوموشدو. باشیمی دیوارا سؤیکه‌ییب گؤزلریمی یومدوم.
بیرینین سسی ایله اؤزومه گلدیم. باخیجی‌لاردان بیریسی ایکی چای ایله قارشیمدا دورموشدو.
باخیجی ـ گئجه‌نی سحره دک تیتره‌ییب‌سیز. بویورون بیر چای ایچین. خسته‌نیز ده ییر نئچه دقیقه سونرا بوراخیلاجاق.
چای‌لاری آلیب تشککور ائتدیم. الیم‌له یوسیفی دبرتدیم.
یوسیف ـ اووی، اوووی،اووووی. ائوین ییخیلسین. ائوین ده یوخدور کی. آی ده‌ده بئلیم. یامان درده دوشه‌سن.
ـ مال دئنن قورتار. من کی بیلیرم اونا سانجیلانیبسان.
یوسیف ـ اده مالسان ده. وئر او چایی جانیم چیخدی.
چایلاری ایچدیگیمیزده قوجا دا گؤزلمه زالینا گیردی. آیاغا قالخیب گؤروشدوک. چوخ اینجیمه‌سین دئیه تئز بیر تاکسی توتوب ائوینه ساری یولا دوشدوک.
شهرین چیخیشیندا، بؤیوک بیر باغین اؤنونده بورا دیر دئدی. آرابادان ائندیک. یوسیف ایشی اولدوغونو بیلدیریب تاکسی ایله قاییداجاغینی سؤیله‌دی. قوجا ایله بیرلیکده قاپییا دوغرو یولا دوشدوک.
قوجا آچاری جیبیندن چیخاریب منه وئردی. بالاجا بیر تاققا ایله قاپینی آچدیم. آیاغیمی قوجانین قارا دوشن آیاق ایزلرینه باسیب ایچری گیردیم. حیطین اوجو بوجاغی گؤرونموردو. گؤز ایشله‌یینجه لوم_لوت آغاجلار گؤرونوردو.
ـ بورا سیزین دیر می؟ ائوینیز هانی بس؟
قوجا ـ منیم دئییل. ساده‌جه بوارادا یاشاماق سیراسی منده دیر. آرخامجا گل، ائو بیر آز ایره‌لیده دیر.
بیر نئچه دقیقه سونرا اسکی تیکیلیشی ایله دیم_دیک دوران ائو گؤرسندی. یاخینلاشارکن باشی قارا گؤوده‌سی آغ_آپباق بؤیوک بیر ایت هوره‌رَک اوستوموزه ج
ومدو. اگیلیب یئردن نه‌سه گؤتورمک ایسته‌دیم. قوجا الیمی توتدو.
قوجا ـ قورخما، او منیم ان یاخین دوستوم‌دور. قارا باش منیم حیاتدا‌کی تک وارلیغیم دیر. اونو لاپ بالاجالیغیندان بؤیوتموشم.
ایت قوجایا یاخینلاشدی. آیاقلارینا قاپانیب اوستونو قوخلادی. سانکی اونا داریخمیشدی. کیم بیلیر ،بلکه الی اولسایدی قوجانی باغرینا باسیب اوزوندن اؤپردی. نئچه کره قوجانین چئوره‌سینه دولاندیقدان سونرا منه ساری گلدی. قویروغونو بوللاییردی. الیمی باشینا چکدیم. منیم ده اوستومو قوخلاییب ائوه دوغرو قاچدی.
قوجا تاختا قاپییا وورلموش قیفیلی آچدی. اونون آرخاسینجا بالاجا کوریدورا گیردیم. هر ایکی یؤنده بیر اوتاق وار ایدی. ساغ قاپینی آچیب ایچری گیردیک. اوتاقدان یاشلیق قوخوسو گلیردی. پرده‌لر، دیوارداکی رسیم‌لر ،سؤیکه‌نه‌جک‌لر هامیسی آنتیک کیمی گؤرونوردو. اوتاغین دیبینده‌کی کیتاب قفسه‌سی ایلگیمی چکدی. یاخینلاشدیم. کیتابلاری گؤتوروب باخماغا ماراقلی اولسام دا اوتانجدان الیمی سورتمه‌دن قفسه‌نین اؤنونده بارداش قوروب اوتوردوم.
قوجا ـ چوخ خوش گلدین اوختای بالا. سن اگلش من چای گتیریم.
ـ نه‌یه اؤزونو زحمته سالیرسان دایی. گل اگلش، بوراخ.
قوجا ـ او دا نه دئمک دیر. اوندا سن دور ایکی چای سوز گتیر. ساماوار قارشی اوتاقدا دیر.
ـ باش اوستونه.
کوریدورون سول الینده‌کی اوتاغا گیردیم. بوردان دا اورداکی کیمی شئه قوخوسو گلیردی. آنجاق هر شئی اؤز یئرینده ایدی. اورداکی کیمی دوزن‌سیزلیک یوخ ایدی. دیواردا یوزه یاخین رسیم وار ایدی. بیرینه یاخینلاشدیم. ان آزی اوچ یوز ایل بوندان اؤنجه چکیلمیشدی. او بیری‌لری ده چوخ اسکی ایدی. قوجانین دیققتینی چکمه‌ییم دئیه تئز چای سوزوب اوتاقدان چیخدیم.
ـ بودا خوروز قویروغو چاییمیز.
قوجا ـ منده سوبایا اودون قویدوم. ایندی دینجه‌لیب دانیشا بیله‌ریک. حله دئنن گؤروم هاردانسان، کیم‌لردن‌سن؟
ایلک سورغوسو قورشون کیمی اورگیمی یارالادی. بیلمه‌دن آچیق یئریمدن ووردو. گؤزلریم دولدو . باشیمی آشاغی سالدیم. بیر نئچه دقیقه سس‌سیزلیک‌له کئچدی. قوجا بیر سیقارئت آلیشدیردی. ماراغیمی باشا دوشوب قوتونو منه ساری قویدو.
قوجا ـ آلیشدیر.
چاخماغی چالیب درین بیر قوللاب ووردوم.
نه‌دن دانیشماییم کی؟ ایللر سونرا منی باشا دوشه بیله‌جک بیری ایله قارشیلاشمیشام. نه‌دن ایللر بویو اورگیمده آغیرلیق ائدن یوکو اونونلا پایلاشماییم؟ هم اولا بیلر من اونو بیر داها گؤرمه‌ییم. گؤرسم ده نه ائدر؟
خالچانین اوستوندن خیریم_خیردا زبیبیل‌لری توپلاییردیم. حیاتیمدان سؤز آچیب_آچماماغا قرار وئره بیلمیردیم. گؤزوم اوتاغین بوجاغینداکی تارا دوشدو.
ـ دایی تار سنین‌دیر؟
گؤزلری دولدو. سانکی بو دؤنه من اونون آچیق یئرینه سیخمیشام کیمی اوزونون قانی قاچدی.
قوجا ـ هه .
ـ چالیرسان دا؟
قوجا ـ بیر زامانلار بیریجیک دوستوم، قارداشیم ،سیرداشیم بو تار ایدی. چوخدان دیر الیمه آلمامیشام.
ـ نییه کی؟
قوجا ـ حئکایه‌سی اوزون‌دور . ائشیتمه‌گه واختین وار می؟
ـ هه . نییه اولماسین کی.
قیش گئجه‌لریندن بیری ایدی. زیور خانیم یاتاق خانایا گیردی. هامی‌میز آیاغا قالخیب سیرادا دایاندیق. هئچ کیمسه او چیرکین قادینا خالا دئمک ایسته‌مه‌سه ده فالاققایا باغلانماق قورخوسوندان سلام خالا دئدیک. ال‌لرینی بئلینه ووروب فورسلا بیر_بیر اوزوموزه باخاراق اوتاغین باشینا کئچدی.
زیور ـ قولاق‌لارینیزی آچین منی دینله‌یین. ایکی گوندن سونرا چوخ دگرلی بیر عاییله اوشاق گؤتورمک اوچون بورایا گلجک‌لر. صاباح سیزه تمیز پالتارلار وئریله‌جک . هامینیز اونلاری گئیه‌جک‌سینیز. بیردن سورو وئریرلرسه بورادا دورومونوز نئجه‌دیر؟ میننت‌دار اولدوغونوزو آنلاداجاق‌سینیز. هر کیمسه دئدیک‌لریمه اویماییب اؤزباشینالیق ائدرسه سونراسینی اؤزو بیلیر. ایندی هامی یاتاغینا گیرسین.
زیور خانیم یاتاق اوتاغیندان چیخیب گئدیکدن سونرا یوخوم گلمه‌دی. قارانلیق دونیاما توز قدر اولسا دا اومود گلمیشدی. ایچیمدن بیر سس او عاییله سنی سئچه‌جک دئییب دوروردو. صاباح هامیدان تئز یوخودان دوروب ال_اوزومو یودوم. دیش‌لریمی تمیزله‌دیم. دیرناقلاریمی توتدوم. او عاییله‌نین منی سئچمه‌سی اوچون الیمدن گلن هر ایشی گؤرمه‌لی ایدیم. دوستوم احمد یانیما گلدی.
احمد ـ یئمه‌گه گئتمیرسن می ؟ ایندی قورتاراجاق ها.
ـ یوخ ـ سن گئت قارداش.
احمد ـ نه یامان اؤزونه یئتیشیرسن؟
ـ دئدی‌لر اوشاق گؤتورمک اوچون بیر عاییله گله‌جک . ائشیتمه‌دین می ؟
احمد ـ اولمایا سنی سئچه‌جک‌لرینی دوشونورسن؟
ـ نییه سئچمه‌سین‌لر کی؟
احمد ـ سندن _مندن کئچدی. اوشاق گؤتورن بو بالاجالاردان گؤتورر. بیزی گؤتورسه‌لر ده گونوموزون بوندان یاخشی اولاجاغینی دوشونمورم. بیزی آنجاق ایشلتمک اوچون آلارلار.
احمدین سؤزلری منی ائتکیله‌‌سه ده ایچیمده کؤزرن اومودو ایتیرمه‌دیم. بوتون گونو یاخشی گؤرونمک اوچون چالیشدیم. بیردن مندن بیر شئی سورارلارسا، نه دئیه‌جه‌گیمی ده دوشونوب مشق ائتدیم. آرتیق اونل
ارین منی سئچه‌جک‌لرینه اینانیردیم. گئجه‌نی سحره دک یاتا بیلمه‌دیم. سحر یئنه هامیدان تئز اویانییب اؤزومه یئتیشدیم.
عاییله‌نین اوشاقلارلا یالقیز دانیشا بیلمه‌لری اوچون بیزی بیر_بیر ایچری سالیردیلار. سیرا منه گلدی. اوره‌گیم سینه‌می یاریب ائشیگه چیخا بیله‌جک قدر سرت دؤیونوردو. زیور منی باخیشلاری ایله هده‌له‌ییب ایچری سالدی.
اورتا یاشلی بیر اَر_آرواد یانلاریندا یئددی یاخود سکگیز یاشلی بیر قیزلا بیرلیکده دیواندا اوتورموشدولار. یاخینلاشدیق. سلام وئردیم. زیور خانیم منی تانیتدیریردی. قادینلا کیشی نه‌سه پیچیلدایاراق سئوگی ایله منی سوزوردولر.
خیالاریما دالیب گئتدیم. منی اوشاقلیغا گؤتوررلرسه دونیانین ان خوشبخت آدامی اولاجاغام. سؤز وئریرم اونلارا قارشی گئرچک آتا_آنام کیمی داورانام .الیمدن گلن هئچ بیر یاخشیلیغی اونلاردان اسیرگه‌مه‌رم… .
کیشینین سسی ایله اؤزومه گلدیم.
کیشی ـ یاخینلاش اوغول.
نئچه آددیم ایره‌لی گئتدیم. اللرینی توتا بیله‌جک قدر اونلارا یاخینلاشدیم. تام قادین الی ایله ساچلاریمی سیغاللایاجاق آندا قیز باغیردی.
قیز ـ باشیندا بؤجک وار ، باشیندا بؤجک وار. . یئیه‌جک منی قورخورام آتا.
آلنیمدا نه‌سه یئریییردی. الیمی باشیما آتدیم. الیمین ایچینده اوچ_دؤرد بیت گلدی. قیزجیغاز چیغیر_باغیر سالدی. قادین سانکی مندن ایرگنمیش کیمی زیور خانیما باخدی.
زیور ـ چیخ، چیخ ائشیگه.
قوردوغوم بوتون خیاللار، گؤردوگوم بوتون دوش‌لر باشیما اوچدو. آغلایاراق قاچیب اوتاقدان چیخدیم. آخشاما قدر یاتاغیمدا آغلادیم. تام بو جهننمدن قورتاراجاق آندا هر شئی آلت_اوست اولموشدو.
صاباح تئزدن دوردوم. چتین‌لیک‌له بیر دولچا سو تاپیب باشیمی یودوم. او گوندن سونرا تمیزلیگیم‌له چوخ ایلگی‌لنیردیم. هر گون باشیمی، پالتارلاریمیی یویوردوم. گون‌لرین بیرینده نادیر باشیما سو تؤکه‌رَک یئتیم خانادان ائشیگه چیخان بیر گیزلی یولون بیلدیگینی آنلادیب، دیوارلارین آرخاسیندا بیر پارک ، اوردا دا بیر گؤلمه‌چه اولدوغونو سؤیله‌دی. من هرگون چیخیب اورادا چیمیب قاییدا بیلردیم. نادیردن گیزلی یولون یئرینی اؤیرندیم. کسکینلیک‌له او یولو دنه‌مه‌گه قرار وئردیم. گون اورتانینین قیزمارلیغیندا یئتیم خانانین آرخا حیطینه کئچدیم. دیوارلارین دیبین آختاریب نادیر دئین دلیگی تاپدیم. اورا چوخ بالاجا اولسا دا، من اورادان کئچه بیله‌جک قدر آریق ایدیم. واخت ایتیرمه‌دن اوزانیب سورونه‌رَک دلیکدن او طرفه کئچدیم. ایلک دؤنه دؤرد دیوارین آراسیندان ائشیگه چیخمیشدیم. قفسدن قورتاران قوشلار کیمی بورالاردان چیخیب گئتمک بئینیمه گلیردی. آنجاق هارا؟ منیم او یئتیم‌خانادان باشقا هئچ کیمسه‌م یوخ ایدی. پارکدا اؤزگورجه‌سینه دولاندیقدان سونرا گؤلمه‌چه‌یه یاخینلاشدیم. پالتارلاریمی چیخاریب سویا گیردیم. ایندیه‌دک دویمادیغیم دادی حیاتدان آلیردیم. عاغلیما بیر چوخ پیلان گلیردی آنجاق هئچ بیریسینی گئرچک‌لشدیره‌جک گوجوم یوخ ایدی. اورتا یاشلی ،بیغلی بیر کیشی یاخینلاشیردی. الینده بیر شوشه بیر ده تار وار ایدی. سودان چیخیب پالتارلاریمی اگنیمه آلدیم. ایلک کره یاد بیری ایله قارشی_قارشییا گلیردیم. کیشی منه چاتدیقدا شوشه‌نی باشینا چکیب گؤلمه‌چه‌نین قیراغیندا اگلشدی. گؤزو ایله یئتیم‌خانی گؤسته‌ردی.
کیشی ـ قاچمیسان؟
ـ یو… ،یو…،یوخ.
کیشی ـ قاچمیسان . هاهاها.
کئچن گونلرده اولوب بیتن‌لری اونا آنلاتدیم. او دا بو یئتیم‌خانادا اولدوغونو آنلاتدی. سونرا او دوستاقدان چیخماق اوچون الیمده بیر هونر اولماسینی وورغولادی. تارینی منه ساری اوزاتدی.
کیشی ـ بورانین آیاقلارینا ووردوغو قاندالی آچاجاق آچار بودور. سنه تار چالماغی اؤیرده‌جه‌یم. اؤیرندیکدن سونرا بورادان قاچیب، هارداسا باشینین چاره‌سینه باخا بیلرسن. ایندی دوست اولمالی‌ییق. منیم آدیم ایسکندر دیر.
تاری آلیب باغریما باسدیم. او گوندن سونرا هر گون‌اورتا چاغی یئتیم خانادان چیخیب تار چالماق مشقی ائدیردیم. ایسکندر هر گون منه یئمک آلیب گتیریردی. او منیمله چوخ مئهریبان داورانیردی. ایکی آی سونرا ائشیگه چیخدیغیمدا دیکسیندیم. ایسکندر اورادا دئییلدی. هر گون اوتوردوغوموز یئرده بیر تار، تارین سیم‌لرینین آراسیندا دا بیر مکتوب وار ایدی.
سئوگیلی دوستوم
منیم سنه اؤیرده بیله‌جک‌لریم توکندی. سن آرتیق بو یولدان اؤزونه چؤرک چیخارا بیله‌جک قدر گؤزل چالیرسان. آنجاق اونوتما بو یولون سونو یوخ‌دور. الین میضراب توتانا دک اؤیرنمه‌گه داوام ائت. حیات نه یازیرسا یازسین سن جؤمرت‌لیکدن واز کئچمه . حیاتیندان گؤزللیک‌لر اسکیک اولماسین.
قوجا بیردن سوسدو. اوزو قاپ_قارا اولموشدو. گؤزلری یاز بولودلاری کیمی چات_چات اولموش یاناقلارینی ایسلادیردی. بللی کی کئچمیشیندن سؤز ائتمک ،او گون‌لری تکرار یاشاماق اورگینه آغیر گلیردی. یالقیزلیق اونا یاخشی گله بیلر دئیه دوشوندوم. آیاغا قالخیب حب‌لرینی گتیردیم. بیر بارداق دا سو یانینا بوراخدیم.
ـ دایی من گئتمه‌لی‌یم
. سنی کدرلندیردیگیم اوچون چوخ عوذر ایسته‌ییرم.
قوجا ـ نه دئمک اوغلوم. حئکایه‌م یارمچیق قالدی. سؤز وئر آردینی ائشیتمک اوچون گلجک‌سن.
ـ سؤزوم اولسون دایی. آرا_سیرا سنه باش چکیب حئکایه‌نی دینله‌یه‌جه‌یم. ایندی سن دینجلمه‌گینه باخ.
یئرینی راحاتلاییب اونونلا ساغ اوللاشیب ائودن چیخدیم…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

سئوگیدن سونرا ( پوئست؛ ۱) / قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی

سئوگیدن سونرا ( پوئست؛ ۱) / قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی

سئوگیدن سونرا ( پوئست؛ ۱) / قاسیم پناهی

ایشیق
www.ishiq.net

آذربایجان ادبیات و اینجه‌صنعت سایتی