چئویرن: ایشیق
ترجمه: ایشیق
ایشیق

ایکینجیسیز
کمال عبدالله‌۱

– سن منی داها سئومیرسن. . .
– ائله دئییل. -سامیرین یوخوسو قاچماغا باشلادی.
– یوخ. ائله‌دی. من بیلیرم. سئومیرسن. -جمیله‌نین آغزیندان کسیک-کسیک چیخان سس پارچالارینی حزین بیر اینیلتی بیر-بیرینه گوجله یاپیشدیردی.
یاتاقدا قورجوخا-قورجوخا قالمیشدیلار. نفسلری آز قالا بیر-بیرینه قاریشیردی. سامیر باشا دوشدو کی، صحبت بو دفعه‌‌ ده اوزاناجاق. آمما نسه ده اولسا دئمه‌لییدی:
– من. . . سئویرم -دئدی، آمما بو، ایناندیریجی چیخدیمی؟!
جمیله اونون سسینده‌کی آچیق-آشکار ترددودو قولاق‌آردینا ووردو و آرتیق هجوما باشقا موستویدن کئچدی:
– کیمی؟ -جمیله قاندوندوران فاجعه‌‌وی بیر پیچیلتی‌ایلا سوروشدو.
– سنی. . . اؤزومو. . .
– اؤزونو -هه! منی ایسه. . . سئومیرسن. سئومیرسن. . . سئومیرسن. . . سئومیرسن. . . سئو. . .
سامیر دریندن بیر «آه» چکدی. سئویملی عومور-گون یولداشینی یئنه ده عادی حقیقته -اونو چوخ، لاپ چوخ، دنیالار قدر سئودیینه ایناندیرماق لازیم گله‌جکدی. بو، آرتیق مشقته دؤنوردو. هر دفعه‌‌ یئنیدن، هر دفعه‌‌ یئنیدن! جمیله‌نین اؤزو لاپ چوخ عذاب چکیردی، صاباح تئزدن گئجه‌کی صحبت اوچون اوزولوردو، گنج گلینلر کیمی اوتانیب قیزاریردی، گؤزونو اوندان قاچیردیقجا قاچیریردی. بس سامیر؟ سامیر اوزولموردومو؟ سامیر ده عیناً اونون قدر اوزولوردو. چیخیش یولو، ائله بیل، یوخ ایدی.
بئله‌لیکله، سامیر دریندن بیر «آه» چکیب همیشه‌کی دلیللرینی (اونون عالمینده بو دلیللر چوخ ایناندیریجی ایدی) صبر و حوصله ایله آرتیق نئچه‌نجی گئجه اورتایا قویماغا باشلادی:
– بیلیرسن، منیم بالام، سن و من آخی بیر بوتؤوون ایچینده‌ییک. من ایکیمیزی بیر یئرده سئویرم، سنی و اؤزومو، باشا دوشورسن بونو؟!
– باشا دوشمورم. باشا دوشمک ایسته‌میرم. سن، سنسن، من ده منم. بیز بیر-بیریمیزین ایچینده دئییلیک. باخ، بونو من باشا دوشورم.
– واللاه و بیلاه کی، یوخ. یوخ، یوخ و بیر ده یوخ. . . تکجه بیز بیر-بیریمیزین ایچینده دئییلیک. دنیادا نه وارسا، هامیسی بیر-بیری‌نین ایچینده‌دی. بیر بوتؤودو. آنلا بونو نهایت. آنلاسان او زامان ایناناجاقسان، منیم سنی سئومه‌مه‌ییم امکانسیزدیر.
سامیر بونلاری دئییب غفلتاً ایچینده غریبه بیر یورغونلوق حس ائله‌دی. اصلینده بو، بیر یونگوللوک اولمالییدی، آمما یورغونلوق اولدو. عمللی-باشلی یورغونلوق. اونا گؤره بو یورغونلوق غریبه ایدی کی، آغیر بیر ایشله مشغول اولمامیشدی، یوک داشیمامیشدی، ایدمان زالیندا اؤزونه «ال» قاتمامیشدی. یورغونلوغون فیزیکی اساسی یوخ ایدی. ساده‌جه، حس ائله‌دی کی، بیردن سوستالدی. بوتون داخلی تاریمسیزلیغا بوروندو، عضله‌‌لری بوشالدی. وجودونون ایچینده اعضالارینی آیری-آیریلیقدا حس ائله‌دی. حس ائله‌دی کی، اوره‌یی سیخیلماغا باشلادی. نفسی آغیرلاشدی، هاواسی چاتمادی.
– اوره‌ییم سیخیلدی. . . -دئییب بو اوزوجو صحبتی بورادا کسمک، نهایت، یوخویا گئتمک ایسته‌دی. صاباح تئزدن دوراسی‌ایدی. «قادین اولماغا نه وار کی. . . ایش آدلی بیر آنلاییشلاری یوخدو. ایشلسه‌لر ده، ایشله‌مه‌سه‌لر ده، فرق ائله‌مز، ایش آنلاییشلاری یوخدو. »
سامیر یاتاقدا او بیری بؤیرو اوستونه چئوریلدی. ایندیجه دوشوندویونو، یعنی، قادینلارین ایش آنلاییشلاری‌نین اولماماسی فیکرینی دیلینه گتیرمک ایسته‌دی و گتیردی، آمما اونو سؤزلره چئویرمه‌دی، ائله‌جه، او فیکیر خفیف تبسومه دؤنوب دوداقلارینا قوندو. دوداقلارینداکی او تبسومله ده یوخویا گئتدی.
جمیله آرخاسینی اونا چئویرن ارینه نیفرتله (اما بو نیفرت او قدر بؤیوک ایدی کی، اؤز ایچینه ساده بیر سئوگی سئلینی ده ییغا بیلمیشدی) باخیب او دا هیکّه ایله آرخاسینی سامیره چئویردی. «کیشیلره نه وار کی. هر شئیی زارافاتا چؤندره بیلیرلر. آمما داریخما، سامیر معلم، بو صحبتیمیز بورادا بیتمه‌دی، هئچ بیتمه‌دی. »
سامیر یوخو گؤروردو. یوخودا هر شئی بیر-بیرینه قاریشمیشدی. . . رنگلر، چالارلار. . . اؤزونه‌مخصوصلوقلار لازیمسیز تفروعات کیمی ایتیب اریمیشدی. گؤیله یئر، داغلا دنیز، آغاجلا چای، انسانلار -قادینلار، کیشیلر، بالاجا اوشاقلار، کؤرپه‌لر، قوجالار، قاریلار، ائولر، بینالار، یوللار، تارلالار، مئشه‌لر، بولاقلار، ایتلر، پیشیکلر، آتلار، قویونلار، اؤکوزلر جامیشلار. . . هر شئی بیر-بیری‌نین ایچینده ایدی، هر شئی سانکی بیرنفسه دئییلمیش محتشم بیر سؤزه چئوریلمیشدی. بو سؤز اولدن وار ایدی، اولین ده اولینده وار ایدی، ساده‌جه، اونو گؤرمک، دویماق، هنیرتیسینی، ائشیتمک هامی‌یا هر زامان قسمت اولموردو. او سؤز آنلاشیلمازدان تدریجاً آنلاشیلانا چئوریلن موسیقی کیمی دوغولوردو. او وار ایدی، اونو هئچ کیم ائشیتمیردی.
سامیر غریبلی یوخونو حیات کیمی یاشاییردی. اونون ایندییه قدر گؤزلری سانکی قاپالی ایدی، ایندی-ایندی گؤرمه‌یه باشلامیشدی و گؤردوکلرینی اؤزوندن باشقا دا کیمسه گؤسترمک ایسته‌ییردی. «باخ، دقتله باخ، بودور سنه دئمک ایسته‌دیکلریم، گؤرورسن او بوتؤو یوخ دئییل، وار. سن بونو گؤرورسن؟ بس دئییردین سئومیرم سنی؟! ایندی ایناندین؟!»
یوخودا گؤردوکلری اول گؤردوکلریندن چوخ فرقلی ایدی. اما فرق نده ایدی -بونو درک ائده بیلمیردی. بونو سؤزه گتیرمک، سؤیله‌مک آسان دئییلدی. بلکه هئچ ممکن دئییلدی. هارداسا بئینی‌نین درینلیینده او حس ائدیردی کی، ایندی گؤردوکلری‌نین رنگی یوخدور. رنگ آنجاق بیردن چوخ اولان ندسه موجود اولا بیلر. ایکینجی اولماسا رنگلر مختلفلشمز، باشقا اولان نَیینسه اوستونو اؤرته بیلمز. یوخودا دا ایکینجی یوخ ایدی، هر شئی بیرین، واحدین ایچینده ایدی. ایکینجیسیز دنیا وارمیش. وارمیش. اولمایا بیلمزدی. اما بونا اینانانلار یوخدو.
جمیله ده یوخو گؤروردو. او، یوخوسوندا گؤروردو کی، عؤمور-گون یولداشی سامیر فضادا فیرلانا-فیرلانا اوندان اوزاقلاشیر، ایکیلشیر، حتی اوچلشیر، دؤردلشیر. . . «بو قدر سامیر منیم نَییمه گرکدیر؟! منه بیری بسدیر. بونلارین آخی بیری منیم سامیریمدیر، او بیریلر منیمکی دئییل. هانسیدی او؟! هانسیدی منیم سامیریم؟! منی سئون، منی دنیالار قدر سئون سامیریم هانسیدیر؟» بو سواللارین آراسیندا جمیله عمللی-باشلی چاشیب قالمیشدی.
یوخولار ائله اونا گؤره یوخودور کی، سحریسی گون اونودولماغا محکومدولار. گئجه گلدی و یئنه ده همن «سئویرم-سئومیرم» صحبتی یاتاقدا باشلامادیمی، باشلادی.
اوجسوز-بوجاقسیز فضادا ایسه بیر-بیری‌نین ایچینده ان مختلف ماهیتلر اوچور، بیرلشیر، آیریلیر، یئنه بیرلشیر، بیر محتشم واحد عمله گتیریردیلر. البته‌‌ کی، سامیرلرین هامیسی بو اوچان واحدین ایچینده ایدیلر. بیریندن باشقا. بو سامیر اؤز ائوینین مطبخینده اوتوروب سحر یئمه‌یینی یئییردی و جمیله‌نین دمله‌دیی چایی گؤزله‌یه-گؤزله‌یه گئجه گؤردویو یوخونی جدی-جهدله یادینا سالماغا چالیشیردی.

۱٫ بو حئکایه‌نی امکداشیمیز «ائلیار پولاد» عرب الیفباسینا کؤچوروبدور

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایکینجیسیز/ کمال عبدالله‌۱

ایشیق
www.ishiq.net

آذربایجان ادبیات و اینجه‌صنعت سایتی

ایکینجیسیز/ کمال عبدالله‌۱

ایشیق
www.ishiq.net

آذربایجان ادبیات و اینجه‌صنعت سایتی

ایکینجیسیز/ کمال عبدالله‌۱

ایشیق
www.ishiq.net

آذربایجان ادبیات و اینجه‌صنعت سایتی