چئویرن: قنبر سیفی
ترجمه: قنبر سیفی
قنبر سیفی

سؤیله‌ین: کبری سیفی

گونلرین بیر گونونده بیر ویلایتده ایکی باجی یاشاییرمیشلار کی بو باجیلارین بیریسی دوزگون، بیریسی ایری یاشاییرمیش. بیر دفعه بو دوزگون یاشایان باجی دئییر:
– ای ایری یاشایان باجی، من ده ایستیرم کی سن گئدن یولو گئدم.
بو ایری گئدن باجی دئییر:
– بیری بو کی من راضی دئییلم کی سن بو یولا گله‌سن. ایکینجی بودور کی سن ائلییه بیلمزسن؛ بونا گوره سنین خمیرینده بوجور کژ و ایری ایشلر بوراجان اولماییب و سن ده بونو باجارماسان.
اما بو دوزگون باجی ال گوتورمور کی سن منی ده گره‌گ اؤرگده‌سن. او قدر اصرار ائدیر کی ایری باجی دئییر:
– من چوخ دئدیم سن آز ائشیتدین. من سنه بیر ایش اؤرگئدیرم. اگر بو ایشی گؤردون و ارین بیلمه‌دی، بیل کی او ایشی ده گؤره بیلرسن. گؤردون کی باجارمادین، گل بو ایشدن واز گئچ.
دوزگون باجی دئییر:
– سن او ایشی دئه، من اونو گؤروم.
ایری دئییر کی، سن گئت ائوده بیر آز حوررا پیشیر. اونو یئه. قابلاری دا یو و ییغیشدیر. ارین ده بیلمه‌سین. اگر بونو باجارسان اونودا باجارارسان. اگر گؤردون بونو ائلییه بیلمه‌دین، او ایشین دالیجا گئتمه. توتولارسان. ارین سنی اؤلدورر
بو دوزگون باجی گلیر ائوه تئز بیر آز حوررا پیشیریر یئییر و قاب- قاجاقی یویوب ییغیشدیریر. آخشام کیشی ائوه گلنده دئییر:
– آرواد حوررا پیشیرمیشدین، منه ده ساخلادین یا یوخ؟
آرواد او طرفه باخیب، بو طرفه باخیب، دئییب:
– آی کیشی! من حوررا پیشیرمه‌میشم.
کیشی جحره‌نین بویریندن قاشیقی گؤتوروپ آروادا گؤرسه‌دیر کی بس بو نه دی؟ آرواد باخیب گؤردی کی حوررا قاریشدیردیغی قاشیق یادیندان چیخیپ جحره‌نین یانیندا قالیب. دئییر:
– آی کیشی من پیشیرمه‌میشدیم. او حوررانی قونشو آروادی گتیرمیشدی. بئله آز اولدیغی ایچون سنه ساخلییا بیلمه‌دیم.
سحر تئزدن ایری باجی گلیر کی آی باجی نه اولدو؟ دئدیییمی باجاردین یا یوخ؟ دئییر:
– آی باجی ایشلر یاخشی قاباقا گئتمیشدی، هاما بیر یئرده سهو اولموشدو. کیشی حوررالی قاشیقی تاپدی.
ایری باجی دئدی:
– بس من سنه دئمه‌دیم بو ایش سنین ایشین دئییل.
دوزگون باجی دئییر:
– آی باجی او کی بیر شئی دئییل. هامیسینی ییغیشدیرمیشدیم، بیرجه قاشیق قالمیشدی، اونودا کیشینی چاشدیردیم.
ایری باجی دئییر:
– دای اوزین بیلرسن، ولی من قورخورام.
اما سحردن دوزگون باجی یولا دوشور ایشینی باشلاییر. بیرگون اویناشین گتیرمیشیمیش ائوه. اری گلر، آرواد تئز اویناشین ائوده گیزلر، قاچار باجیسینین اوستونه:
– آی  باجی ائوین ییخیلسین، ائله اولین دفعه اویناشیمی گتیرمیشدیم ائوه، کیشی گلدی، من اویناشی گیزله‌میشم. بس من نه قاییریم ایندی.
ایری باجی باجیسینا دئییر کی سن قونشونون آروادی‌لن ساواش. دوزگون باجی باشلاییب قونشونون آروادیلن ساواشماغا کی سن نییه منیم اریمه بئله دئییرسن. اری بو طرفدن سوروشور کی آز نه اولوب؟ بالدیزی دئیر کی قونشو آروادی باجیما دئییب کی ارینین باشی قازاندان یئکه‌دی. اودورکی باجیم اونونلا ساواشیر. اصلا هانی او قازان؟ او قازانی گتیریر. بالدیزی قازانی اونون الیندن آلیر قویور کیشینین باشینا. او طرفدن باجیسینا گوز ائیلر کی اویناشی بوراخ گئتسین. بوجور اویناشی یولا سالیرلار. سونرا بالدیزی قازانی کیشینین باشیندان گؤتورور دئییر:
– آی باجی ایندی سن دور او قونشونا دئه کی اوز ارینین باشی قازاندان یئکه‌دی.
سحر اولاندا باجیسی گلر دوزگون باجی‌یا دئیرکی آی باجی بس من سنه دئمه‌دیم کی بو ایش سنین ایشین دئییل. دوزگون باجی دئیر:
– آی باجی بیرده بوندان سورا بو ایشی گؤرمرم.
او ایری باجی دئیر:
– آی باجی یاخشی اولدو بو اتفاق دوشدو. آللاها شوکور کی سن بو ایشه بولاشمادین و یاری یولدا بو جور اولدو. خاراب اولمادین. منده بوننان سونرا بوایشی قویدوم کانارا. دوز یاشاماق هامیسیندان یاخشیدی.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایکی باجی‌لار

قنبر سیفی
www.ishiq.net

آذربایجان ادبیات و اینجه‌صنعت سایتی

ایکی باجی‌لار

قنبر سیفی
www.ishiq.net

آذربایجان ادبیات و اینجه‌صنعت سایتی

ایکی باجی‌لار

قنبر سیفی
www.ishiq.net

آذربایجان ادبیات و اینجه‌صنعت سایتی