اونودولماق/ زومرود ياغمور- كؤچورن: احد فرهمندي

 zumrud yagmur
اونودولماق
زومرود ياغموركؤچورن: احد فرهمندي
ahad farahmandi

بو گون قالخا بيلمه‌دي، ائله‌جه يوخوسوندا اؤلدو، نه ائتديلرسه، باشينين اوستونده‌کيلر نه قده‌ر قيشقيرسالار دا اويانمادي، روحو عناد ائتدي، بدنه قاييتمادي، سانکي يورغون دوشموشدو. الينه دوشن فرصتدن استفاده ائتدي، اوچدو گئتدي، بير ده گئري قاييتماق ايستمه‌دي. بدني اورتادا قالدي، کيم نه قده‌ر آغلاماغيندان آسيلي اولماياراق بدن اشيا کيمي ياتاقدان اورتاليغا ائنديريلدي. اونو دفن ائدنه قده‌ر چوخ يئره قويوب گؤتوردولر. بدني تورپاغا تاپشيرديلار، او گئتدي، قالانلارين درددن آز قاليردي اوره‌گي پارتلاسين، آما کيمسه‌نين اوره‌گي پارتلامادي، درد کيمسه‌ني بيردن اؤلدورمور، ايچيندن يئيير. بو دفعه‌ ده ايچيندن يئيه بيتيره‌جکلريني سئچيب سئچديکلرينين اوره‌گينده اوتوردو.
روحونسا بو اولانلارا نه عايدياتي واردي، نه ده بير قايغيسي، دونيانين بو واختيندا، بو قده‌ر گناهلارين ايچينده ساخلايا بيلميشدي اؤزونو، نه کيمسه‌نين قلبيني قيرميشدي، نه‌ده کيمسه‌نين چؤره‌گيني اليندن آلميشدي، ان باشليجاسيسا کيمه‌سه پيسليک ائتمه‌ميشدي…دونيانين قارالميش اوزونه داهادا بير لکه سورتمه‌ميشدي…  اونا گؤره ده آغ دونياسيندا سوزوردو…
انسان اولماق بو ايدي، بير گون گلير،‌هامي، ان آزيندان آتا-آناسي اونو گؤزله‌يير، سونرا دا کيمسه‌نين گؤزلمه‌ديگي بير واختدا گلديگي کيمي ده گئدير. گليش-گئديش آراسينداکي مسافه‌ده نه‌لر اولورسا او گليب گئدنله ده بيتير، بعضاً حتّي تو‌كه‌نير، سنين يوخلوق کدرين سندن سونرا جوخ آز مدّتده موجود اولور، دوغمالارين بير-بير گئديش يولونو توتدوقجا سنين يوخلوغوندا او قده‌ر گئرچکلشير… و نهايت بير گون سن تماماً بيتيرسن، کيمسه‌نين يادداشي، کدري، داريخماسي، خاطيره‌لرينده قالميرسان… سنين ياشادانلار، سنين موجود اولدوقلارين دا موجود اولمور… بونا دا حياتين قانونو دئييرلر. بئله‌جه هر شئي عوضلنمه‌لر و بيتمه‌لر اوزريندن يورودولور…
بو گون ده او چکيليب گئتميشدي، آرخاسيندا دا اونو خاطيرلاياجاق، کدرين، دردين، نيسگيلين، داريخمالارينا کؤچوره‌جک بيريسيني بوراخميشدي…
سئوديگي کيشي… والسالام…تکجه اونون اوچون موجود ايدي… باشقا کيمسه ‌مزاريندا گيزله‌ديلندن سونرا نيسگيلله اونو آختارمايشدي، کيمسه‌ده کيجيک بير اوتاغين پنجره‌سيندن باييردا ياغان ياغيشا باخا-باخا اونو آختارماميشدي. کيمسه اللري قوينوندا گئجه‌لرين قارانليغيندا اونو خاطيرلاماميشدي، کيمسه اونون قوخوسونو هله ده ساخلايان گئييملري بورنونا توتوب هؤنکور-هؤنکور آغلاماميشدي.بير او کيشيدن باشقا…
کيشينين وارليغي اونون توکنمه‌مه‌سي ايدي و بو اونو ممنون ائديردي، اؤلوموندن سونرا کيمينسه اونو گئجه‌نين قارانليغيندا آختارماسيني حسّ ائديردي، او کيجيک پنجره‌نين قارشيسينا گليردي، اونو آختاران کيشيني سئير ائديردي، کيشي اونو يوخ، او کيشي‌يه تاماشا ائديب بعضاً کدرله، بعضاً ده سئوينجله اورادان اوزاقلاشيردي. کيشيني سئويردي، اونون اوچون داريخاجاغيني دا بيليردي، آما بونون بو قده‌ر نيسگيللي، کدرلي، بعضاً ده مست ائديجي اولاجاغيني بيلميردي. او حياتين دونيا دئييلن مکانيندا بو کيشيدن باشقا کيمسه‌ني قلبينده اؤزو ايله آپارماميشدي، کيشي‌نين بونو بيلديگي‌نين فرقينده ايدي و اونو دا بيليردي کي، کيشي محض بونو بيلديگي اوچون گئجه‌نين قارانليغيندا اونو آختارير…
بو سئوگي ايدي… بو اونا ايندي داها چوخ بللي ايدي…
بير ده پشيماندي، بو سئوگيني داها باشقا ياشايا بيلردي، او کيشي‌نين اللريني هئج بوراخمادان، گؤزلريني گؤزلريندن آييرمادان…  آما نه ائتمک اولاردي، او بير انسان ايدي و انسانلار اؤلومله ياشاماديقلاري اوچون بونون دا فرقينده اولمورلار…
هر شئي بيتندن سونرا آنلاديقلاري ايسه آرتيق اونونکو دئييلدي، اونا توخونماق، يانيندا اولماق، اللرينين ايستيسيني دويماق، بوينوندا گزن هنيرتيني حسّ ائتمک…
بونلار بير انسانين ياشاديغي، آما ديريني بيلمه‌ديگي خوشبختليکلر ايدي. او ديريني ايندي آنلاميشدي، آما آنلاديقلاريني ياشايا بيلميردي…
انسان اولماقدا نه قده‌ر خوشبختليکلر وارميش…
بونو ايندي آنلادي، ائله اينديجه، سويوق گئجه‌نين آيازيندا کيشي‌نين قارانليغا ديکيلميش نظرلريني ايزله‌ينده، اوشوين کيشيني ايسيده، اووودا بيلميه‌جگيني، آغوشونا آليب عزيزله‌يه بيلميه‌جگيني آنلاياندا بيلدي…
کيشي نظرلريني قارانليغا ديکميشدي، اورادا سئوديگيني آختاريردي، اوشويوردو، آما ياتماق، ايسينمک ايستميردي، سئوديگي‌نين اونو اووودوب ايسيتمه‌سيني، آغوشونا آلماسيني ايسته‌ييردي، آما بونلار اولا بيلمزدي، بونو آنلاييردي، اما عنادلا دا پنجره‌ده سئوديگيني آختاريردي…  يوخاريدا کيشي دايانميشدي. آشاغيدا، او سويوغون ايجينده سئوديگي قادينين روحو…
عيني شئيلري ايستگي وئرديلر، آما ممکن‌سوز اولاني…
اصلينده ياشاديغلاري واختلار يانلاريندا، اللرينين آلتيندا اولان، آما ياشايا بيلمه‌ديکرينين حسرتيني چکيرديلر…  ايندي اللريني آلتيندا هئج نه يوخدو…
بير گون يئنه پنجره‌يه گلدي…کيشي يوخدو، پنجره‌دن باخيب اونو آختارميردي، گؤزله‌دي، کيمسه اونو گؤرموردو، گؤره‌مزدي ده…
ماشين سسي ائشيديلدي، باخدي، کيشي دوشدو، بير قادينلا يوخاري قالخدي. يئنه گؤزله‌دي، بللي اولانلارا اينانماق ايستمه‌دي، پنجره‌ده‌کي ايشيق ياندي، کيشي گؤزه دَيميردي، اما گؤزله‌ييردي… خئيلي ده گؤزله‌دي…
بللي اولانا اينانماق لازيم ايدي…
داها پنجره‌دن گئجه‌نين قارانليغيندا اونو آختاران يوخدو…
او بو گون اؤلدو، ايندي‌يه قده‌ر دونياسيني دَييشميشدي، بو گونسه اؤلدو…
داها کيمسه‌نين کدرينده، داريخمالاريندا، گؤزلرينده، نيسگيلينده، گئجه‌لرين قارانليغيندا پنجره‌دن باخان باخيشلاريندا يوخدو…
اونو دونياسيني دَييشمک يوخ، اونودولماق توکتميشدي…
اؤز مزاريني ايلک دفعه زيارت ائتدي، قبوللاندي يئني ائويني و کوسدويو بو دونياني هميشه‌ليک ترک ائتدي.

ایضاح:
زومرود ياغمور 1971-جي ايل مارتين 20-ده ماساللي رايونونون محمدخانلي کندينده آنادان اولموشدور. باکي دؤولت اونيوئرسيتئتينين فيلولوگييا فاکولته‌سينده تحصيل آلميشدير. 90-جي ايللردن ادبي ياراديجيليغا باشلاميشدير. دؤوري مطبوعاتدا حئکايه‌لري، علمي، فلسفي مقاله‌لري درج ائديلميشدير. 2009-جو ايلده “گوناهکارين اؤلوم” حئکايه‌لر کيتابي نشر اولونموشدور. بو کیتاب 2012-جي ايل تبريزده ده یاییلمیشدیر. ايلک روماني “آللاه قاييدير!؟” اثري سياسي روماندیر. 

Check Also

قولاغیمی هاردا گیزله‌دیم؟/ رقیه کبیری

قولاغیمی‌هاردا گیزله‌دیم؟ رقیه کبیری «قیزیم گؤزله‌ بیردن ونگوک زاد یادیوا دوشمه‌سین‌هاااا». منسه قهوه‌ای پاستل رنگینی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *