سنی دوشوننده / ائلدار موغانلی

eldar muganli
سنی دوشوننده
ائلدار موغانلی

گلدین، قانادلاندی عشقیم، امه‌لیم،
بولودلار سینه‌مه سیخدی کؤینه‌یین.
گونشین ساچینی اوخشادی الیم،
قلبیمله قول- بویون اولدو اوره‌یین.

گلدین، ماویلیکده غرق اولدو حیات،
ماوی دالغاسینی ایتیردی دنیز.
ائله یوموشاق اولدو بو سرت کائینات
بولودا چئوریلدی محبتیمیز.

فصیل‌لر ده‌ییشدی دوغما دونونو،
پاییز دا یاز اولدو، قیش دا یاز اولدو.
قیزیل گول بزه‌دی سئوگی قوینونو
قلبیمیز گونشه پای‌انداز اولدو….

ووصالین چکمه‌دی گؤز قیرپیمیجاق،
حسرتین داغ اولوب سینه‌م اوستونه.
گونلر دال با دالا کئچیر بو سایاق،
یانیرام، گلن یوخ قالخان توستومه.

قورقوشون آسیلیب سانکی گؤزومدن،
نه آغیر فیرلانیر ایندی زامان دا!
دؤزوم دیله‌ییرم اؤزوم اؤزومدن
سنی دوشوننده، سنی آناندا.
خرداد 1371-تهران

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

One comment

  1. علي تقي زاده لاريجان

    ائلدار معلم سالاملار. بو دويغو دولو شعرينه گورا چوخ ساغ اول .

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *