«نرگيز آي نرگيز گولو…»/ هوشنگ آشورزاده – چئویرن: ع-آغ-گونئيلي

ashurzade«نرگيز آي نرگيز گولو…»
هوشنگ آشورزاده – چئویرن: ع-آغ-گونئيلي

ali agguneyli (2)

ماشين‌لار يوللانارکن، ماشينلارين قاباغيندان چکيليب خيياوانين قيراغيندا داياندي کیشی. ماشين‌لارين ايقزوزوندان چيخان توستو اونو اؤسکورتدو. بوش اليني، آغزينين قاباغيندا ترپه‌درک يول گؤستريجي چيراغا باخدي. قيرميزي چيراق يانان کيمي ماشين‌لار دايانديلار؛ تئز خيياوانين اورتاسينا گليب، الينده توتدوغو نرگيز گوللريني يوخاري قالديريب، ماشين‌لارين آراسيندا اويان-بويانا بورولارکن اوجادان سسلندي: «نرگيز، آي نرگيز گولو»
گوللري ائله يوخاري‌دا ساخلاميشدير کي هر يئردن گؤرونسون. گوللر آغ آپپاغ و ائله‌جه‌ده طراوتلي‌ايديلر. بؤيوک، قارا بير ماشينين يانيندا اوجادان سسلندي: «نرگيز گولودور آغا، نرگيز»
رولون آرخاسيندا ايله‌شن کيشي‌يه باخارکن دئدي: «آغا گول ايسته‌ييرسينيزمی؟»
کيشي ماشينين شوشه‌سيني يوخاري قالديريب، اوز دؤندردی و يانيندا اوتوران آداملا صؤحبتينه داوام ائتدي. قارا ماشينين قاباغيندان اؤتوب، رولونون آرخاسيندا گنج بير قادين اوتورموش خيردا بير ماشينين يانينا گئتدي.
–          «خانيم نرگيز گولو ايسته‌ميرسينيزمی؟»
قادين گوللره باخدي.
–          «گوللر تزه‌دير خانيم»
گوللرين ايچيندن خيردا بير دسته آييريب قادينا وئردي. قادين گوللري آليب اييله‌دي.
–          «عطيرلي‌دي خانيم»
قادين گوله-گوله گوللري يانينداکي بوش صندلين اوستونه قويدو.
–          «آهاي نرگيز نه اوچون گولورسن؟»
نرگيز، په‌يه‌ده يونجالارين اوزه‌رينده، ديزلري اوسته چؤکوب اينه‌يي ساغيردي.
–          «عابباس سن سن؟»
–          «هه»
نرگيز سوت دولچاسيني گؤتوروب گلدي قاپينين يانيندا داياندي.
–          «ائله بيل بوغازدير»
–          «دوز دئييرسن؟»
–          «اهه بلي»
گونش پارلاق شوعالاري ايله کندين اورتاسينداکي مئيدانليغي اوخشاييردي. کيشي‌لر چایخانانین قاباغيندا چومبه‌لن ايله‌شميشديلر.
–          «ياز يارييا چاتيبدير هله‌ده ياغيشدان خبره‌تر يوخدور؛ کالباي حئيدر دئييرم اير بئله گئتسه بو ايلده دئملريميز ياناجاقدير.»
کالباي حئيدر چوبوغونون کولونو بوشالداراق گويه باخيب دئدي:
–          «بلکه ياغدي…»
خيردا بير قيز اونونلا اوز به اوز دايانيب گوزلريني گوللره زيلله‌ميشدير. اونون باشينين توکلري قاپ-قارا شوه کيمي‌ايدي.
–          «بو گوللردن بيريني منه وئريرسن؟»
اونون قوجاغيندا خيرداجا بير گلينجک وارايدي. سانکي قيزين قوجاغيندا گلينجک يوخلاميشدير.
–          «کئچ گئت اويانا گوروم آ…»
قيزجيغاز ائله‌جه دايانيب گوللره باخيردي.
–          «آتا، آي آتا منيم اوچون بير گلينجک آلارسان؟»
روبابه ديزلريني قوجاقلاييب ائيواندا اوتورموشدو.
کيشي گوللردن بير بوتاسيني آييريب دئدي:
–          «آلا»
قيزجيغاز گولو آليب گولومسه‌دي. ماشينلار دايانديلار.
–          «نرگيز، آي نرگيز گولو»
ماشينلارين آراسيندا فيرلانيب اويان-بويانا گئديردي.
–          «نرگيز گولو…»
گوزلرينه گونش گؤزلويو تاخميش بير کيشي ماشيني‌نين ايچيندن اونو چاغيردي:
–          «آهاي گول ساتان»
–          «هه بلي»
–          «گوللري نئچه دئييرسن؟»
–          «قابيللي دئييل آغا، هر نئچه سئويرسينيز وئرين آغا»
کيشي جيبيندن پول آختاريردي.
–          «گوزل عطيري وار آغا»
ياشيل چيراق ياندي. ماشينلار يوللاندي. کيشي تله‌سيک جيبيندن بير اوووج خيردا پول چيخارديب، اونون آچيلميش اووجونا تؤکدو، گوللري آليب يوللاندي. الينده، عطيري، تزه سنگک چوره‌يي توتموش بير قادين اونلارين يانيندان اؤتوب گئتدي. تزه چؤره‌يين عطريني دويان کيمي اوره‌يي آخدي. آريق قارا بنيز، قوووق ساتان بير اوغلان اونا ساري گلدي.
کيشي گؤيه يوکسه‌ليب، اويان-بويان يئلله‌نن سالخيما اوخشار آل-الوان قوووق‌لارا باخدي. نازيک بير ايپين بير باشي قوووق‌لارا دويونله‌نيب، بير باشي ايسه اوغلانين الينده ايدي. کيشي گولدو. «عمي ايش-گوج نئجه‌دير؟» – دئيه اوغلان سوروشدو.
–          «آللاه روزو وئره‌ندير»
«گوللره بير آز سو سپ، اولوشگه‌ييرلر!» – اوغلان دئدي.
کيشي گوللره باخدي. اونلار گونون آلتيندا قالديقلاريندان اوولکي طراوتلريني ايتيرميشديلر.
–          «گرک قويموياسان سولالار»
گويون اوزو دوم-دورو ايدي. لاپ اوزاق‌لاردا بولوت تيکه‌لري داغلارا کؤلگه سالميشديلار. اؤز-اؤزونه فيکيرلشدي:
–          «اير‌هاوا بئله گئتسه، بو ايلده دئملريميز يانار»
اؤز-اؤزونه دئدي:
–          «کاش ياغا.»
–          «نرگيز، بورا باخ گور نئجه ياغير! ائله بيل آللاه بيزه بالام دئييب گومان ائديرم بو ايل حاصيليميز ياخشي اولار.»
ياغيش بوتون اوستو-باشيني ايسلاتميشدير. آنجاق او ائله‌جه‌ده ياغيشين آلتيندا دايانميشدي.
–          «اوردا نييه دايانيبسان کيشي؟ سويوق دير‌ها»
ياغيش ناريندان آنجاق چوخ ايتي ياغيردي. الينده‌کي بئلي يئره سانجيب، اللرين سيلکه‌رک دئدي:
–          «اير بو ايل حاصيليميز ياخشي اولسا داي سيزين يانيزدا قاللام. شه‌هري هئچده سئوميرم شه‌هر آدامي ديغلادير»
«اوز-اوزونه نه دئييرسن؟» – دئيه اوغلان سوروشدو
–          «دئييرم کي کاش بو ايل دويونجا ياغيش ياغايدي»
–          «ياغيشي نئينيرسن؟»
–          «ياغيش آللاهين برکتي‌دير»
–          «من ايسته‌ميرم ياغيش ياغا»
–          «سن آللاهين برکتيني سئوميرسن؟»
–          «هانکي برکت؟ ياغيش ياغاندا بوتون وار-يوخوموز سو آلير»
–          «دئمه‌لي بس سن ايسته‌ميرسن ياغيش ياغا؟»
–          «قوي جهننم اولسون ياغيشي. دينسيز ياغاندا،‌هامي گئديب تپيلير ائوينه بيزيمده ايش-گوجوموزو کاساتلايير. آللاه ائله‌سين هميشه گون چيخسين.»
–          «کوفر-ناسازا دانيشما اوغلان! ياغيش ياغماسا اولار به‌يم؟ آللاهين ايشلرينين هئچ بيريسي حئساب-کيتابسيز دئييل. ياغيش ياغماسا‌هامي آجيندان اولر.»
–          «هئچ بئله يوز ايلده ياغماسين.»
کيشي دايانديغي يئرده دبريلدي.
–          «اير جوما گونلري گون چيخسا پارکدا قييامت اولار. اوندا منده قوووقلاريمين‌هاميسيني ساتارام، آنجاق آللاه گورستمه‌سين کي ياغيش ياغا…»
الينده‌کي ايپي بوشالديب قوووقلاري‌هاوادا يئلله‌درکن سسله‌ندي:
–          «قوووقدور…»
خيياوانين او طرفيندن بير نفر قيزينان بير گنج اوغلان گلديلر.
قيز گوللري گورن کيمي دئدي:
–          «منيم اوچون گول آلميرسان؟»
کيشي اونا ساري گئتدي.
–          «گوللريوين تازاسيندان بير دسته وئر منه»
قيز دايانارکن قارا گوزلريني گوللره زيلله‌ميشدي. اونون باشيندا گوللو، گؤزل بير يايليق وارايدي. گوللري قيزا وئردي.
–          «نرگيز نه اولوبدور. نه اوچون منه بئله باخيرسان؟»
نرگيز قارا گؤزلريني اوندان آييرير، اييليب پامادور سبديني بوستاندان قالديريب چيينينه قويدو.
–          «اوهوي نرگيز سنينله‌يم‌ها»
نرگيز گوزونون آلتي ايلا اونا باخيب گولدو.
–          «منيم اوچون قيرميزي گوللو بير دون آلارسان…؟»
فيکيرلشدي:
–          «اير شانسيميز گتيرسه بو ايل دوز-عمللي بير ياغيش ياغسا اوندا اونادا گوللو چيت بير دون آلارام
بير دانا سيغار آليشديريب جوبون قيراغيندا اوتوردو. جوبونان آخان قارا لئهلي سو، پورتاقال و باشقا مئيوه‌لرين ازييي ايله دولو ايدي.
فيکيرلشدي:
–          «اير بو سو بيزيم کندين يانيب واغامناميش زمي‌لري‌نين يانيندان کئچسه‌يدي بوغدالار ديريلردي…»
الينده‌کي گوللره باخدي. گونشين آلتيندا ياواش-ياواش گوللر اؤلوشگه‌ييرديلر. برک بير يئل اسه‌رک توز-تورپاغي گؤيه قالديردي. داغلارا باخدي.
–          «ائله بيل ياغير»
الينده‌کي سيغارا درين بير قوللاب ووروب کئچدي خيياوانين او تايينا.
–          «نرگيز، آي نرگيز گولو»

Check Also

۱۰ شعر از اورهان ولی کانیک / ترجمه: مجتبی نهانی

۱۰ شعر از اورهان ولی کانیک ترجمه: مجتبی نهانی (برگرفته از کتاب «ترانه‌ی پشت بام‌ها ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *