چئویرن: ایشیق
ترجمه: ایشیق
ایشیق

بیز آراز اوشاقلاری…
ارسطو مجردی

آراز، تورکییه‌نین آغری داغلاریندان آخیب گلیر. اونون ساری داملالاری، چیلغین دالغالاری، نغمه‌لی شیریلتیسی همیشه بویلو موغان، چؤللریندن و بیزیم دامارلاریمیزدان‌دا اؤتور کئچیر. اؤتور کئچیر و سیغینیر ماوی آناسی خزرین قوینونا. بیزی یاشادان دا آراز، اؤلدورن ده آراز …
بیز آراز اوشاقلاری، بیز گرانیس اوشاقلاری، “تیکانلی تئل‌لرین” اوشاغی، دونوزلو سرحد مئشه‌سینده واخت آشیری دولاشان اوشاقلار؛
واختیلا چاستاوای و روس سالداتلارینا تانیق اوشاقلار، موروق اوشاقلاری، آدا اوشاقلاری. سرحدده یاشایان سرحدسیز اوشاقلار.
نه بو تایین، نه‌ده او تایین سیلاحلی عسکرلرینی وئجیمیزه بئله آلمازدیق. بعضن وحشی، گور آخان آرازی دالدالی اوزه‌ن اوشاقلاردیق.
میل – موغان بندیندن، “سوآباد”ا و “اولتان”‌دان “ایمیشلی” سرحدلرینه‌دک دالغالاری یاریب آرازی کئچیب، دفعه‌لرله “اس اس ائر”ی‌نین قورخولو سرحدلرینی پوزان اوشاقلاردیق. بیزی دایاندیران وارمی دی؟
سلیمان روستمین بو شئعرینی کُرواری اوخویاردیق:

آراز ساحیلیندن یولوم دوشنده
بیرآن هیجان‌سیز کئچه بیلمیرم
نه‌لر اولدوغونو او بیری تای دا
چوخ گؤزه‌ل بیلیرم نئجه بیلمیرم.

ائشیتسین سسیمی باجیم قارداشیم
آغاردی هیجران یوللاریندا باشیم
دامیر اوره‌ییمه یئنه گؤز یاشیم
گوندوزو گئجه‌دن سئچه بیلمیرم.

منیم او ساحیل‌سیز حیاتیم یوخدور
ویصالیندان بؤیوک مورادیم یوخدور
نییه قوشلار کیمی قانادیم یوخدور
نییه او ساحیله اوچا بیلمیرم …

اوشاقلیغیمیزی دوشوندورن بیر سورغو و سئودا داییما فیرلاناردی باشیمیزدا: او تای‌دان گئدن قاتار نه‌دیر؟ هارادان گلیر؟ کیم‌لری داشییر و هارا گئدیر او قاتار؟ بو، سرحد بویو آراز مئشه‌سینه گاه یاخینلاشیب، گاه اوزاقلاشان قاتارین سسی یئنی‌یئتمه یوخولاریمیزی آدلاییر، کئچردی …
بیز آراز اوشاقلاری، سرحد اوشاقلاری، دیوار کیمی سرحد بویو چکیلیب تپه‌لرین آرخاسیندا ایتن تیکانلی مفتیل‌لر اوشاغی‌ایدیق.
آراز دایانمادان آخارکن و بیز اونو جاندان سئورکن؛ نئچه‌میز بورولغانلاریندا بوغولدو و تاپیلمادی؛ نئچه‌میز دوستاقلاردا ایتگین دوشدو؛ نئچه‌میز شاعیر، یازیچی، رسسام اولدو؛ تارا قاپاندی. نئچه‌میز اؤزونه قصد ائتدی، نئچه‌میز سرحددی پوزوب، بیر داها گئری دؤنمه‌دی …
بیز آراز اوشاقلاری؛ سرحدده یاشایان سرحدسیز اوشاقلار …

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

بیز آراز اوشاقلاری… / ارسطو مجردی

ایشیق
www.ishiq.net

آذربایجان ادبیات و اینجه‌صنعت سایتی

بیز آراز اوشاقلاری… / ارسطو مجردی

ایشیق
www.ishiq.net

آذربایجان ادبیات و اینجه‌صنعت سایتی

بیز آراز اوشاقلاری… / ارسطو مجردی

ایشیق
www.ishiq.net

آذربایجان ادبیات و اینجه‌صنعت سایتی