“شاعرلر مجلسي” باره‌ده بیر خاطیره/ هاشيم ترلان

hashim-tarlan
“شاعرلر مجليسي” باره‌ده بیر خاطیره/‌هاشيم ترلان

1324-نجو ايل‌ آذر آيينين‌ 24ده‌ تبريز وارد اولموشدوم‌. گؤي‌ مسجددن‌ بير آز آشاغي‌ كؤهنه‌ بازارين‌ اوّلينده‌كي‌ غفاري‌ مسافرخاناسيندا يئرلشديم‌. شهري‌ دويونجا گؤرمك‌ ايسته‌ييرديم‌. تلسديگيمه‌ گؤره‌ صبحانه‌ يئييب‌ شهره‌ چيخديم‌. «وطن‌ يولوندا» قزئتينه‌ باش‌ وورمالي‌ ايديم‌. منيم‌ بو قزئتدن‌ آلديغيم‌ مكتوبدان‌ بير هفته‌دن‌ چوخ‌ كئچيردي‌. مسافرخانادان‌ چيخيب‌ كؤهنه‌ بازارا آدديم‌ قويدوم‌. بازار هميشه‌كي‌ كيمي‌ آچيق‌ ايدي‌. دوكاندارلار اؤز ايشلرينه‌ مشغول‌ ايديلر. كؤهنه‌ خيابانين‌ او تاييندا ايكي‌ نفر جاوان‌ آدام‌، چيينينده‌ توفنگ‌ جيگر كبابي‌ ساتانين‌ قاباغيندا دايانميشديلار. ياخيندان‌ اونلاري‌ گؤرندن‌ سونرا يقين‌ ائتديم‌ كي‌ اونلار 21 آذرين‌ يئتيرديگي‌ فدائيلردندير.

يولوما داوام‌ ائديب‌ ساعات‌ قاباغينا گئتديكجه‌ تبريزي‌ نئچه‌ آي‌ قاباق‌ گؤردويوم‌ تبريزه‌ اوخشادا بيلمه‌ديم‌. ساعات‌ قاباغينداكي‌ ميداندا جاماعات‌ چوخ‌ ايدي‌. او زامان‌ فیرقه‌نين‌ بير چوخ‌ ييغينجاقلاري‌ بو بینادا تشكيل‌ اولوردو. فدائيلر ايندي‌ بو بینانين‌ قاباغيندا كئشيك‌ وئريب،‌ نظم‌ انتظاما مشغول‌ ايديلر. گله‌جكده‌ ستارخان‌ آديني‌ قازانان‌ خيابانلا اوزو آشآغا گئتديكجه‌ معلوم‌ اولدو كي‌، كئچميش‌ پاسبانلارين‌ يئرينه‌ فدائيلر انجام‌ وظيفه‌ ائديرلر. نه‌ ايسه‌ فدائيلر شهرين‌ زينتي‌ اولموشدولار. هر يانا باخيردين‌ چيينلري‌ توفنگلي‌ فدائيلر گؤزه‌ چارپيردي‌. 21 آذر قياميندان‌ سونرا ظاهرده‌ تبريزده‌ اولان‌ دگيشيكليك‌ هر يئرده‌ فدائيلرين‌ اولماسي‌ ايدي‌. آمما فیرقه‌ رهبرلرينين‌ نظرينجه‌ قيام‌ هله‌ دوام‌ ائديردي‌. چونكي‌ آذربايجانين‌ بعضي‌ شهر و كندلرينده‌ اربابلار و خانلار هله‌ تسليم‌ اولماميشديلار. اونلار اؤز دار و دسته‌لري‌ ايله‌ داغلارا چكيليب‌ اؤز مبارزه‌لرينه‌ داوام‌ ائديرديلر. «تورپاق‌ كندليلريندير»، شعاري‌ فیرقه‌نين‌ گونده‌ليگينده‌ ايدي‌ و اربابلار آسانليقلا بو تورپاقلاردان‌ ال‌ چكمك‌ ايسته‌ميرديلر. بونون‌ اوچون‌ فیرقه‌نين‌ فعاللاري‌ شهر و كندلرده‌ فدائيلر دسته‌سيني‌ تشكيل‌ وئريب‌ خانلارلا مبارزه‌يه‌ يوللاييرديلار. تبريزده‌ و آذربايجانين‌ بؤيوك‌ شهرلرينده‌ اولان‌ اوباشلار، لوطولار، خالقين‌ حسابينا دولانان‌ بوينو يوغونلارلا مبارزه‌ فدائيلرين‌ اوزه‌رينده‌ ايدي‌. 21 آذردن‌ قاباق‌ دؤلت‌ مأمورلارينين‌ بو انگللرله‌ ايشي‌ يوخ‌ ايدي‌. چونكي‌ دؤلت‌ لازيم‌ اولاندا بونلارين‌ وجودوندان‌ استفاده‌ ائديب،‌ خالقين‌ جانينا ساليرديلار.

فردوسي‌ خيابانيله‌ گولوستان‌ باغينا طرف‌ يولوما داوام‌ ائديرديم‌. اطرافيمدا گؤردويوم‌ منظره‌لر تبريزده‌ يئني‌ حياتين‌ وجودونو گؤستريردي‌. نهايت‌ وطن‌ يولوندا قزئتينين‌ اداره‌سينه‌ چاتديم‌. گونشين‌ گؤيده‌ خومارلانماسينا باخماياراق‌‌هاوا سويوق‌ ايدي‌. يوبانماييب‌ پيلله‌لرله‌ اوزو يوخاري‌ چيخديم‌. اول‌ معلميم‌ قيلمان‌ موسايئوه‌ باش‌ وورماق‌ ايسته‌ديم‌. آمما او اوتاغيندا يوخ‌ ايدي‌. اودور كي‌، جعفر خندان‌ و قولويئوين‌ دفترينه‌ گلديم‌. اونلار سانكي‌ مني‌ گؤزله‌ييرديلر. جعفر خندان‌ گوله‌- گوله‌ دئدي‌:

 – اشّي‌‌هاردا قاليبسان‌ گل‌ چيخ ده‌. بيز گؤروشوب‌ حال‌ احوال‌ توتاندان‌ سونرا جعفر خندان‌ خبر آلدي‌:

 – بيزيم‌ گؤندرديگيميز مكتوب‌ الينه‌ چاتديمي‌؟

 – بلي‌ مكتوبونوزو آلديم‌.

 او سينه‌سيني‌ اوتوردوغو ميزه‌ سؤيكه‌ييب‌ دئدي‌:

 – بيز تبريزده‌ اولان‌ اكثر مكتب‌، كارخانا و اداره‌لره‌ قزئت‌ وئريريك‌. يعني‌ اونلار وطن‌ يولوندا قزئتينه‌ آبونه‌ديرلر. آمما آبونه‌ حاققيني‌ اؤده‌ميرلر. بو حاققي‌ آلماق‌ اوچون‌ بيزه‌ بير نفر فعال‌ آدام‌ لازيمدير. البته‌ بو ايشه‌ مشغول‌ اولان‌ بير نفر واردير. آمما او فعال‌ دئييل‌، بيزدن‌ خصوصي‌ ماشين‌ ايسته‌يير. بيزيم‌ ده‌ اونا وئرمه‌لي‌ ماشينيميز يوخدور. بيز سني‌ او آدامين‌ يئرينه‌ استخدام‌ ائديريك‌. حاضرسانمي‌؟.

 من‌ اؤز راضيليغيمي‌ بيلديرندن‌ سونرا جعفر خندان‌ سليمانوف‌ آدلي‌ بير كاپيتاني‌ چاغيريب‌ مني‌ اونا تاپشيريب‌ دئدي‌:

 – سنه‌ عايد اولان‌ ايشلري‌ سليمانوودان‌ آلارسان‌.

 بئله‌ليكله‌ من‌ وطن‌ يولوندا قزئتينده‌ ايشله‌مه‌لي‌ اولدوم‌. …….

 جمعه‌ گونلري‌ ده‌ ايشيم‌ اولماسايدي‌ قزئت‌ اداره‌سينده‌ اولارديم‌. بو دا ايشيمدن‌ راضي‌ اولماغيمي‌ بيلديريردي‌. بير گون‌ جمعه‌ اولدوغونا گؤره‌ شاعرلر مجلسينين‌ نوبتي‌ ييغينجاغي‌ جلسه‌سي‌ اولاجاقدي‌. من‌ تبريز شاعرلريني‌ ياخيندان‌ گؤرمه‌ديگيمه‌ گؤره‌ بو ييغينجاغين‌ تئز باشلانماسيني‌ گؤزله‌ييرديم‌. نهايت‌ شاعرلر ياواش‌-ياواش‌ مجلسه‌ گلمه‌يه‌ باشلاديلار. آمما من‌ اونلارين‌ هئچ‌ بيريني‌ تانيميرديم‌. نه‌ ايسه‌ مجلسي‌ جعفرخندان‌ آچدي‌. مجلس‌ اداره‌نين‌ بؤيوك‌ سالونوندا تشكيل‌ تاپميشدي‌. سالونون‌ دؤرد اطرافينا صندليلر دوزولموشدو. بوش‌ يئر يوخ‌ ايدي‌. من‌ شاعرلرين‌‌هاميسيني‌ گؤروردوم‌، آمما آدلاريني‌ بيلمديگيمه‌ گؤره‌ كيمين‌ كيم‌ اولدوغونو بيلميرديم‌. اونلار دا مني‌ تانييا بيلميرديلر. بير مدتدن‌ سونرا بيز‌هاميميز بير-بيريميزله‌ تانيش‌ اولدوق‌.

 1324-نجو ايلده‌ شاعرلر مجليسينده‌ دائيمي‌ شكيلده‌ اشتراك‌ ائدن‌ شاعرلر آشاغيداكيلاردان‌ عبارت‌ ايدي‌:

 علي‌ فطرت‌، ميرمهدي‌ اعتماد، صحاف‌، محمدعلي‌ محزون‌، يحيي‌ شيدا، هلال‌ ناصري‌، كاميل‌، مظفر درفشي‌، عباس‌ صابري، نجم‌ تبريزي‌، كاشف‌، محمدباقر نيكنام‌، سعدي يوزبندي‌، مظلومي‌، تقي‌زاده‌، آذراوغلو، ابراهيم‌ ذاكر، علي‌ توده‌، ميرمهدي‌ چاوشي‌،‌هاشم‌ حسن‌زاده‌ (هاشم‌ ترلان‌)، قهرمان‌ قهرمان‌زاده‌، مدينه‌ گولگون‌.

 البته‌ آدلاريني‌ يازديغيم‌ بو شاعرلر ياديمدا قالانلاردير. مومكوندور شاعرلر مجلسينده‌ باشقا شاعرلرده‌ اشتراك‌ ائتميش‌ اولسون‌. شاعرلر محلسينده‌ وطن‌ يولوندا قزئتينين‌ امكداشلاريندان‌ دا فعال‌ اشتراك‌ ائديرديلر. او جمله‌دن‌: سونرالار بؤيوك‌ آد قازانميش‌ يازيجي‌ انور ممد خانلي‌، غلام‌ ممدلي‌، قيلمان‌ ايلكين‌، نظرلي‌، عوض‌ صادق‌، جعفر خندان‌، رضا قولويئو و باشقالاري‌. او زامان‌ تبريزده‌ تشكيل‌ اولان‌ شاعرلر مجلسينده‌ اؤزونه‌ مخصوص‌ نظم‌ ترتيبي‌ وار ايدي‌. تنقيد مسئله‌سينه‌ آرتيق‌ اهميت‌ وئريليردي‌. شاعرلرين‌ اوخودوغو شعرلر تنقيد اولونوردو. جعفر خندان‌ تنقيده‌ آرتيق‌ اهميت‌ وئريردي‌. شعرلرده‌ اولان‌ ضعفلر اونون‌ نظريندن‌ يايينمازدي‌. ياخشي‌ ياديمدادير، بير گون‌ غزل‌ شاعرلريندن‌ آقاي‌ محزون‌ مجلسده‌ غزل‌ اوخويوب‌ قورتاراندان‌ سونرا جعفر خندان‌ دئدي‌:

 – آقاي‌ محزون‌، علي‌آقا واحدين‌ غزلينين‌ بير مصراسي‌ بئله‌دير: «او ملاحتلي‌ باخيشلار قوزو جيراندا اولور» آمما سن‌ اؤز غزلينده‌ بئله‌ يازيبسان‌ «آهو جيراندا اولور». بوردا قوزو سؤزو آهو سؤزونه‌ دؤنوبدور. بوردا نه‌ قدر ياخينليق‌ اوخشاييش‌ واردير… شاعر گره‌ك‌ ابتكار صاحیبي‌ اولسون‌. شاعر گرك‌ تكرارچيليقدان‌ اوزاق‌ دايانسين‌. شاعر اؤز خلاقيتينه‌ آرخالانسا اونون‌ گله‌جگ‌ خلاقيتي‌ اؤزونونكو اولاجاقدير.

 و ياخود تبريز شاعرلريندن‌ بيري‌ اوخودوغو شعرده‌ «ايسته‌يير» كلمه‌سينين‌ عوضينه‌ «ايستيري‌» كلمه‌سيني‌ ايشلتميشدي‌. جعفر خندان‌ شعريني‌ اوخويان‌ شاعره‌ دئدي‌:

 – باخين‌، بيزيم‌ ادبيّاتيميزدا «ايستيري‌» كلمه‌ميز يوخدور. بو كلمه‌ تبريزده‌ و دانيشيقدا ايشله‌ديلن‌ سؤزلردندير.  بيز شعري‌ بديعي‌ ادبيّات‌ بيليريكسه‌ هر سؤزون‌ ادبي‌ فورماسيني‌ ايشلتملي‌ييك‌. هر حالدا دئمه‌لييم‌ كي‌ بو شعرده‌ ايستيري‌ كلمه‌سينين‌ ايشلنمه‌سي‌ شعرين‌ بديعي‌ قدرتيني‌ده‌ آزالديبدير.

 هله‌ او زامان‌ 200 مين‌ اهاليسي‌ اولان‌ تبريز شهرينده‌ يارانان‌ بو شاعرلر مجلسي‌ ادبيّاتيميزا بؤيوك‌ نعمت‌ ايدي‌. بو مجلس‌ اؤز اعتباري‌ ايله‌ آذربايجان‌ شاعرلريني‌ اؤز باشينا توپلاييب‌ ادبيّاتيميزين‌ تاريخينده‌ گونش‌ كيمي‌ پارلادي‌. بو مجلس‌ يالنيز تبريزده‌ دئييل‌، خويدا، مرندده‌، اورميادا، اسكوده‌، سارابدا، ميانادا، اردبيلده‌، زنگاندا، اهرده‌، حتي‌ كندلرده‌ ياشايان‌ شاعرلرله‌ علاقه‌ده‌ ايدي‌. اونلارين‌ شعرلري‌ وطن‌ يولوندا قزئتينده‌ چاپ‌ اولوب‌ ياييليردي‌.

شاعرلر مجلسي‌ حياتينين‌ سون‌ چاغلاريندا يئنه‌ ده‌ ايلك‌ دفعه‌ اولاراق‌ آذربايجان‌ شاعرلريني‌ جامعه‌ميزه‌ تانيتديرماقلا شانلي‌ بير ابتكارا ال‌ آتيب‌ ادبيّات‌ تاريخيميزي‌ ايشيقلانديردي‌.و«شاعرلر مجلسي‌» آدلي‌ نفيس‌ بير كتاب‌ چاپ‌ ائديب‌ يايماقلا هله‌ تانينماميش‌ اديبلريميزي‌، شاعرلريميزي‌ بو صنعته‌ رغبت‌ بسله‌ين‌ هوسكارلاريميزي‌ ايشيقلي‌ دونيايا چيخارتدي‌. شاعرلر مجليسينين‌ تربيت‌ ائديب‌ ادبيّاتيميزا وئرديگي‌ اديبلر (ايندي‌ اونلارين‌ اكثريتي‌ حياتدا اولماسالار دا) اؤزلريندن‌ ادبي‌ ميراثلار قويوب‌ گئتميشلر. اينديكي‌ اديبلريميزين‌ وظيفه‌سي‌ همين‌ ميراثلاري‌ توز باسميش‌ تاقچالاردان‌ آييريب‌ ادبيّات‌ سئور خالقيميزا تقديم‌ ائتسينلر. شاعرلر مجلسينين‌ يئتيشديرديگي‌ اديب‌ و شاعرلردن‌ بيري‌ ده‌ يحيي‌ شيدادير. من‌ ايندي‌ بيلميرم‌  آقاي‌ يحيي‌ شيدا بو باره‌ده‌ نئجه‌ دوشونور. آمما من‌ بونو جسارتله‌ دئيه‌ بيلرم‌ كي‌ او دؤورده‌كي‌ شاعرلر مجلسي‌ اولماسايدي‌ اينديكي‌ يحيي‌ شيدا دا اولا بيلمزدي‌. يحيي‌ شيدا دوننكي‌ و بو گونكو ادبيّاتيميزين‌ قاباقچيل‌ اديب‌ و شاعرلريندن‌ بيريدير. او نئچه‌ جلدده‌ توپلاديغي‌ و چاپ‌ ائتديرديگي‌ «ادبيّات‌ اوجاغي‌» كتابي‌ ادبي‌ خزينه‌ميزه‌ داخل‌ اولماقلا 55 ايل‌ بوندان‌ قاباقكي‌ «شاعرلر مجلسي‌»نين‌ تكميلدير.

 يوخاريدا يازديغيم‌ كيمي‌ ايلك‌ دفعه‌ اولاراق‌ شاعرلر مجلسينده‌ اشتراك‌ ائديرديم‌. شاعرلر يازديقلاري‌ شعرلري‌ بوردا اوخويوردولار. نوبت‌ منه‌ چاتاندا جعفر خندان‌ دئدي‌:

 – تهراندان‌ بيزه‌ شعر يازيب‌ گؤنده‌رن‌ و ايندي‌ بيزيم‌ امكداشيميز اولان‌‌هاشم‌حسن‌زاده‌ اؤز شعريني‌ اوخوياجاقدير. بو آندا مجلسده‌كي‌ شاعرلرين‌ باخيشلاري‌ منه‌ طرف‌ يؤنلدي‌. ايندي‌ اونلار شعرلري‌ وطن‌ يولوندا قزئتينده‌ چاپ‌ اولان‌‌هاشم‌ حسن‌زاده‌ني‌ ياخيندان‌ تانيمآغا باشلاديلار. او زامان‌ تهراندان‌ تبريزه‌ شعر يازيب‌ وطن‌ يولوندا قزئتينه‌ گؤنده‌رن‌ فقط‌ من‌ ايديم‌. او گون‌ شاعرلر مجلسي‌ چوخ‌ طنطنه‌لي‌ كئچدي‌. تهراندان‌ تبريزه‌ گلديگيمه‌ گؤره‌ چوخ‌ شاد ايديم‌.

منيم‌ مسئولوم‌ اولان‌ سليمانوو ايشيمدن‌ چوخ‌ راضي‌ ايدي‌. آخي‌ بو اداره‌ني‌ اؤز ائويم‌ كيمي‌ حساب‌ ائديرديم‌. اؤزومه‌ عايد اولان‌ ايشدن‌ سونرا آخشاما كيمي‌ هر ايش‌ اولورسا اولسون‌ گؤروردوم‌. قزئتين‌ كاغيذلاري‌ رول‌ شكلينده‌ ايدي‌. عظيم‌ آدلي‌ تبريزلي‌ بير جاوان‌ اوغلان‌ رول‌ كاغيذلاري‌ كسيب‌ قزئت‌ كاغيذي‌ شكلينه‌ سالماسينين‌ مسئولي‌ ايدي‌. «شاعرلر مجلسي‌» كتابي‌ دا چاپ‌ آلتيندا اولدوغونا گؤره‌ كاغيذ مصرفي‌ گوندن‌ گونه‌ چوخاليردي‌. ملي‌ دؤلت‌ آذربايجان‌ اوردوسونون‌ تشكيلي‌ باره‌سينده‌ اعلانيه‌ وئرميشدي‌.

 بير گون‌ سحر كاغيذ كسن‌ عظيم‌ آقا اؤز ايشي‌ اوستونده‌ حاضر اولماميشدي‌. بونو بيلن‌ سليمانوو ال‌ آيآغا دوشموشدو. حتي‌ او جعفر خنداني‌، رضا قولويئوي‌ ده‌ بو ايشدن‌ خبردار ائتميشدي‌. اونلار دا چوخ‌ ناراحات‌ اولموشدولار. ائرته‌سي‌ گون‌ قزئت‌ منتشر اولاجاقدي‌. من‌ اداره‌ده‌ گون‌ اورتادان‌ سونرا بعضاً بوش‌ واختلاريمي‌ عظيم‌ آقانين‌ ايشله‌ديگي‌ كارگاه‌دا كئچيريرديم‌. اونون‌ نه‌ جور كاغيذلاري‌ كسديگيني‌ گؤرموشدوم‌. اودور كي‌، رول‌ حاليندا اولان‌ كاغيذي‌ آچيب‌ كسمه‌يه‌ باشلاديم‌. سليمانوو كارگاها وارد اولاندا من‌ ياريم‌ مئتر اوجاليغيندا كاغيذلاري‌ كسيب‌ بير-بيرينين‌ اوستونه‌ ييغميشديم‌. او اول‌ اعتراض‌ ائتمك‌ ايسته‌دي‌. آمما منيم‌ كسديگيم‌ كاغيذلاري‌ تميز و بير اندازه‌ده‌ گؤروب‌ بير نئچه‌سيني‌ اؤزو ايله‌ يوخاري‌ آپاردي‌. بير آزدان‌ سونرا رضا قولويئو، جعفر خندان‌ و اداره‌نين‌ بوتون‌ ايشچيلري‌ ايشله‌ديگيم‌ كارگاها گلمه‌يه‌ باشلاديلار. اونلار مني‌ آلقيشلاييب‌ ايشي‌ ادامه‌ وئرمگه‌ تشويق‌ ائديرديلر. بئله‌ليكله‌ قزئتين‌ نشري‌ ادامه‌ تاپدي‌. شاعرلر مجلسي‌نين‌ كتابي‌ لنگيمدي‌. ……..

Check Also

«تانیش افسر»ین یارادیجیلیغینا بیر باخیش/ افراسیاب نورالهی

«تانیش افسر»ین یارادیجیلیغینا بیر باخیش افراسیاب نورالهی ایضاح: بو یازینی، شاعرین دوسلاری طرفیندن، تهران ادبی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *