حاخ چپيشيم، حوخ چپشيم / یازی‌یا آلان: قنبر سیفی

ganbar
حاخ چپيشيم، حوخ چپشيم/ سؤيله‌ين: مشدي زينال(70 یاشیندا- حیدرکانلی کندیندن)
یازی‌یا آلان: قنبر سیفی

بيري وار ايدي، بيري يوخ ايدي. آللاهدان سوواي هئچ کيم يوخ ايدي. کي بير ار و آرواد بير ویلايتده ياشایيرديلار . بو کيشي چوخ زحمتکش, تلاشلي و اوره‌يي تونوک بير آدام ايدي. آروادينی دا چوخ – چوخ ايستيردي. آرواد کيشيسينی چوخ ايسته‌ميردي و آديدا سرينه‌ایدي. بو آرواد او قدر بو کيشيه کنايه ويريردي کي دئيیردي سنين عاغلين يوخدو، بير شئي بيلميرسن و او قدر بو کيشیيه دئيینیردي کي بو کيشي بیلدیینی ده الدن وئرميشدي و قوجاليردي و ديشلرينی ده ياش-  ياش الدن وئريردي.

بيرگون کيشي گئتميشدي يئرلرين اکسين. چوخ يورغون ايدي. آخشام چاغي چؤلدن گلدي ائوه. بو آرواد بير آز قورو چؤره‌ک گتيردي قويدو بونون قاباغينا. اما بو کيشي چوخ عصباني اولدي دئدي آي بي مروت من بير بئله ايشله‌ییرم و ديشم ده يوخدو، آخي من بو قورو چؤره‌یي نه تهري يئيیم.؟ منيم اکديگيم- بيچديگيم چوخ ياخشي بوغدادير بو چؤره‌یی ائله بيل قره‌جه‌دن پيشيرميسن. چوخدا قره و برکدي. او واخت آرواد دئیير اصلا سن دانيشما. خوشوم گلمير. کيشي چوخ عصباني اولور ايستير کي آروادينی دؤيسون. آرواد دئير کي منيم گوناهيم دئيیل کي چؤره‌گيميز بئله اولور و اينک‌لريميزين سودي خراب اولور. سنين باجين بغداددا بيزيم ائويميزين بره‌کتين قاچيردیبدي. کيشي عصباني اولور بير آز يول آذوقه‌سي گؤتورور يوللانير بغدادا. بير آي- ايکي آي طول چکير يئتيشير باجيسينا. خبر آپاريرلار کي موشتولوق وئر نئچه ايلردن سونرا قارداشين گلير سني گؤره. کيشي‌نين باجيسي چوخ خوشحال اولور، دورور گئدير قارداشينين پيشوازينا. تا کي يئتيشير قارداشينا. قارداشي  بونو سالير آغاجين آلتينا کي سن او ايشي نیيه گؤروبسن کي منيم ائويمين برکتي قاچسين! باجيسي آغلايا آغلايا سوروشورکي آي قارداش باشيوا دولانيم آخي منيم گوناهيم ندير؟ دئيیر سنه دئديم کي او ايشي نییه گؤرميسن منيم ائويمين برکتي و اينک‌لريميزين سودو خراب اولوبدي. جاماحات ییغیشیر و اوضاعني گؤرور. اما کيشينين باجيسي چوخ هوشيار ايدي. دئيیر قارداش بو سؤزي سنه کيم دئییر؟ دئيیر منيم آرواديم. دئيیر:يورولوبسان کئچ گئدک ائوه اوردا دانيشاق. گليرلر ائوه.

 بو کيشينين باجيسي اولان محله ده بير دوعا يازان وار ايدي, گئجه اوني ائولرينه چاغيرير حال قضيه‌ني بونا دئيیر. بو درويش دئيیر آي کيشي سنين آروادين سنه کلک ويريبدي. سنين آروادینین اويناشي واردير. سنين ائوینین برکتي يئرينده‌دير و اينک‌لرينده سودي خراب دئيیل. او اونلاري اؤزو اويناشيلن يئیير، سنه ده آرتيق قير-مقيردي دان وئرير کي مريضله‌یيپ اؤله‌سن.

کيشي بيرآز فيکيرله شير دئيیر من بس نه ائله‌یيم؟. منه بير يول گؤستر. بو درويش کيشي بونا دئيیرکي من سنه بير دوعا يازارام و سنه بيرده چئپيش وئرم او چئپيشين آدي حاخ چئپيشيم و حوخ چئپيشيم دي. بو چئپيش ده چوخلو حیکمت واردي. سن بو چئپيشدن هرنه ايسته‌سن اولار. قضيه ده قورتاراندا گؤررسن چئپيشده دوشدو يولا گلدي.

کيشي بير ايکي گوندن سونرا باجيسيندان قدردانيق ائلر گويلون آلار. درويشدن ده تشکور ائدر، باربندلين جمع‌لر، چئپيشيده گؤتورر دوشر يولا. اوز ولايتينه طرف يوللانیر، گلير يولدا چوخ آجيیر، اوتورور دئيیر حاخ چپيشيم حوخ چپيشيم منه بير دست ياخچي لباس باشماق پاپاخ و بير دست آرواديما لباس باشماخ و بارماق اوزويو و بيردادا آجميشام ياغچي بير قوزولو پيلاو اول چئپيشيم. کيشي گوردو بلي  بير سوفرا آچيلدي بو ايسته‌ديگي طعام و وسايل‌لار و لباسلار يون به يونلن حاضير آمادا اولدو. کيشي اولده بيرشوکر ائلر و خوشحال اولور قوزولو پيلاودا يئير وسايل‌لاري دا گؤتورور يولا دوشنده گؤرور چپيشده هوپبيلدي يولا دوشدي بونين يانينا. داها کيشي مطمئن اولدي کي ايش ده حوققا يوخدو. شاد خورامان گلدي بير موددتدن سونرا يئتيشدي ائوينه. آروادا چوخلي ساوقات گتيرميشدي پالتاردان قيزيلدان باشماقدان…….

آروادا دئيیر آي آرواد سن دوز دئیيرسن من گئتديم باجيمي دا اؤلدوردوم برکت قايیتدي ائوه. ايندي بير چئپيش آليپ گئتيرميشم داها سن زحمته دوشميئسن هرنه يئماق ايچماق ايسته‌سک حاضير اولاجاق. داها هئچ غم و غصه اولميياجاق. بير نئچه دفعه ده امتحان ائدرلر حاضير اولار يئمک و ايچمک, اما بيرگون کيشي گئدير ائشيگه زمي‌لرينه باغينا باش ويرسين او واخت بو آروادين اويناشي دئیير واختي کي سن دوز دئيرسن ناهار چاغيدي بو چئپيشدن بير ياغچي شوربا و ايستي چؤره‌ک ايسته، ويراخ بير گئينه. آرواد دئيیر حاخ چئپيشيم حوخ چئپيشيم بير ياغچي شوربا و ايستي چؤره‌ک اول چئپيشيم. او زامان چئپيش مسخره حالتينده دئيیر يه يه ائلمه. آرواد عصباني اولور. چئپيشه بير اوخلاو ويرير, اوخلاو پاپيشير چئپيشه, آرواددا اوخلاوا. آروادين اويناشي توللانير آروادي قوجاقلایيرکي چئکسين چئپيشدن آرالاسين, اويناشدا ياپيشير آروادا.

او زامان آروادين قونشو آروادي باشيني يويوردي. قيزين يوللور بو آروادا کي بير يومورتا وئرسين باشيمي يويورام. قيز گئدير صحنه‌ني گؤرور. آرواد دئيیر آي قيز تئز اول بو کيشيني چک داليا, تا قيز گلير کيشيني دالدان قوجاقلير. قيزدا ياپيشير کيشيه. او زامان قونشو آروادي کي قيز يوللاميشدي کي گلسين ايکي دانا يومورتا آلسين، قیز يوبانميشدي آرواد ياپيشدي قيزينا. قضادان همان زمان بير درويش قاپيلاردان کؤمک‌لیک ييغيردي کي ماجراني گؤرور کي بوردا بير نئچه نفر ياپيشيبدي بير- بيرينه. اما آخيرداکي بيرگؤزه‌ل خانيم باشي آچيق و بدني ده آغ -آپباغ ائله بير مايادي. بو طرفه باخير او طرفه باخير گؤرورکي بيرکس يوخدي. گلير آروادي قوجاقلير کي بدنيندن بير اؤپوش گؤتورسين, اما درويشین آغزي ياپيشير آروادين بدنينه.

 اما سيزه کيمنن دئيیم ائو ييئه‌سي ايشدن گلير ائوه, ماجراني گؤرور, چوخ آرامليقلا اليني اوزونو يويور, چاريقلاريني چيخاردير, بير آز استراحت ائدیر. سونرا دورور دهره‌ني گؤتورور دئيیر حاخ چئپيشيم گوناهسيزلاری آت, گوناهليلاري توت. چئپيشيم چئپيش‌هاميني بوشلور, اما آروادي و اويناشي ساخلير. درويش, قيز, قونشي آروادي قاچيرلار و اما کيشي بوردا دهره‌ني چئکير آروادي اويناشي قول – بود دوغرايیر و اؤلدورور. وسايليني گؤتورور دئيیر حاخ چئپيشيم و حوخ چئپيشيم مني بغدادا قوي چئپيشيم. بير آزدان سونرا کيشي گؤزونو آچير گؤرور بغداددا دير.

Check Also

سارانین حئکایه‌سی/ رقیه علی قُلیان(لاله)

سارانین حئکایه‌سی رقیه علی قُلیان(لاله) قیرخینجی ایللرین بیرینده قیش فصلینده ائله بیر سویوق دوشدوکی کتدیلر ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *