مریم/ کریم قربانزاده

karim
مریم
کریم قربانزاده

بوگون ائوه گئتمه‌یه یامان تلسیردیم؛ آخی، دوز اوتوز ایل بوندان اوول بیر پاییز آخشامیندا, شاه‌گؤلونون پیلله‌لرینی ائنه- ائنه مریم‌له بیر- بیریمیزه جان دئییب, جان ائشیتمه‌یه سؤز وئرمیشدیک. یئلین, یارپاقلاری اویناتماغینا باخمادان، قارقالارین تر- تلسیک گل- ‌گئت‌لرینی گؤرمه‌دن، لپه‌له‌نن گؤلون کناریندا عهد و پیمان باغلامیشدیق. یوواسینا سیخیلان بیر قوش کیمی‌قلبینین دؤیونتوسونون سسینی ائشیدیردیم. شیمشک‌لی, دلی بولودلار‌های‌-کوی‌ایله باشیمیزین اوستونده گل- ‌‌گئت‌ده‌‌ایدیلر؛ سانکی بیزیم سئوگی پیچیلتی‌لاریمیزا پاخیل‌لیق ائدیردیلر.

ماسامین اوستونو تر-تلسیک ییغیشدیردیم. ایش یئریندن ائشییه چیخدیم. بازارا گئتمه‌لی‌‌ایدیم. بیرآی بوندان قاباقدان بیر زاد نیشانلامیشدیم. اورک شکیلینده بیر قوتو. آچیلاندا گؤزل بیر پیانو آهنگی چالیردی. قوتونون قاپاغی‌نین ایچ اوزونده شکیل سالماغادا بیر یئر وار‌یدی. شکیلمیزی اوره‌ک کیمی‌کسیب, اورا سالاجاغیدیم. سوروجونون سسی‌له اؤزومه گلدیم:

– آغا ! تربیت آغزی‌دیر.

آمانسیز یاغیش باشلادی. قاچا- قاچ دوشدو. اوتوز ایلدن سونرا همان گونده، همان ساعات‌دا، یئنه یاغیش یاغیر. دوداقلاریم قاچیر. یاغیش سن نه ظالیم‌میش‌سن. بو گون سحر بیر سؤز دئمه‌دن بیربیریمیزدن آیریلساقدا, آمما بیلیردیم اودا نه‌قده‌ر بو آخشاما تلسیر.

ساعات بئش میزانی‌‌ایدی. تک-‌توک باشماقچی‌لار ویترینلری‌نین چیراقلارینی یاندیرمیشدیلار. تربیتین آخیرینه قده‌ر پیادا گئتمه‌لی‌ایدیم . هله بیر آز یول گئتمه‌میشدیم کی گؤزوم خیاوانین او بیری طرفینده مریمه ساتاشدی. هرزامان اولدوغو کیمی‌چانتاسی قولوندا, باشی آشاغادا, یولونا دوام وئریردی. ائله‌بیل دونیانی وئردیلر منه؛ دئدیم نه یاخجی اولدو؛ گئدیب بیرلیک‌ده او سئو‌ن هدیه‌نی آلاریق. بیلمیرم نه‌دن شیطانلیغیم توتدو. یوخ, دالینجا گئدیب, نه آلدیغینی اؤیره‌نیب بیله‌جه‌یم، ائوده منه نه آلدیغینی دئیب, اونو لاپ تعجوب‌لندیرجه‌یم.

او گئتدیکجه من‌ده آردینجا گئدیردیم. دایاناندا، دایانیردیم. بیر آزدان باشا دوشدوم یاشیل تی‌شرت گئین گنج بیر اوغلان مریمین دالیجا گزیر. هردم ده اوغلان ائله یاخینلاشیردی کی دوز چی‌یین به‌چی‌یین گئدیردی‌لر. بعضاً ده اوغلان مریم‌دن قاباغا دوشوردو؛ مریم اونون آردینجا گئدیردی؛ مریم‌هارا, اودا اورا.

گوره‌سن بو کیمدی ایلاهی!؟ مریمین دالینجا نه دولانیر؟ گؤزلریم دؤرد اولموشدو. اؤز- اؤزومه دئییردیم گئچیم قویوم قولاغی‌نین دیبیندن. سونرا دئییردیم یوخ, نه اولوب‌کی؟ خیاوان‌دیر, او دا گئدیر دا. هئچ بیلمه‌دیم کیهان چاپخاناسینی نه زامان کئچدیم. روزنامه ساتان کیوسکون کناریندا بیر قیرمیزی یاماها موتور دایانمیشدی. یاشیل تی شرت گئین اوغلان مریم‌دن بیر آز آرالاندی. موتورچویا یاخینلاشیب، نسه پیچیلداشیردیلار. فوری اوندان آیریلیب, یئنه‌ده مریمین آردینجا یولا دوشدو. الیم گیرمیشدی اوره‌ییمه. آی آللاه بو نه ایشدی من راست گلمیشم؟ گؤره‌سن بس بو آرواد‌هارا گئدیر؟ اولمایا مریخ‌دن بیر شئی آلاجاق. بابا دؤن بیر طرفدن بیر زاد آل قورتار. لاپ زور- زوراکی اؤزومو ساخلامیشدیم.

-یوخ بو ایشه سون قویمالی‌یام!

خیاوانی آتلاییب, اؤزومو مریمه یئتیرمک اوچون بیر آز یئیین‌لدیم. هله خیاوانی کئچمه‌میشدیم کی همکارلاریمین بیرینه راست گلدیم.

-هن, ایداره‌ده او جور تلسیردین, ایندی تربیت‌ده دولانیرسان؟

هئچ بیلمه‌دیم آقای نجاتی‌دن نه‌جور آیریلدیم. بو دفعه‌ده اوغلان قاباغدا گئدیردی, مریم اونون دالینجا. من اؤزومه گلینجه اوغلان بیر بوتیکه سوخولدو. مریم‌ده اونون دالیجا همان بوتیکه داخیل اولدو. بوتیک دولویدو آرواد اوشاق‌لا. بیر لحظه‌ده اونلاری گؤزدن قویموردوم. بیر اوندا گؤردوم مریم اوغلان‌لا شیرین-‌شیرین دانیشیرلار. گؤزلریمه اینانا بیلمیردیم. گولوش‌لری زهرلی پیچاق کیمی‌قلبیمی‌پارچالاییردی. آز قالیردی باغریم چاتلاسین؛ اوره‌ییم یئریندن چیخسین. اوغلان تئز- تئز چی‌یینلرینی آتیردی. مین ادا- اطواردان چیخیردی. گؤره‌سن مریم منی بو حالدا باشقا بیر قادین‌لا گؤرسه‌یدی نه اولاردی؟ نئیلردی؟ کاش کور اولایدی گؤزلریم. آز قالیردی روحوم بدنیمدن چیخسین. قولاقلاریم کؤز کیمی‌یانیردی؛ یقین کی قیپ‌-قیرمیزی قیزارمیشدیلار. صوراتیم اود ‌توتوب, یانیردی. قلبیمین گوپ‌هاگوپ سسینی ائشیدیردیم. دیزلریم تیر-تیر تیتره‌ییردی. هردم ایچیمدن بیر سس گلیردی. بودا سنین طالعین؛ سئوگینه چوخ گووه‌نیردین؛ بیر نفر یوخودو سنه دئسین کیشی, بو زمانه‌ده نه سئوگی‌بازلیغی‌دیر.

دیل- دوداغیم قوپ‌- قورو قوروموشدو. ائله‌بیل قاینار قازانلاری باشیمدان آخیتمیشدیلار. دئییردیم به توکان- ‌بازار اهلی‌هامی‌منه باخیر. شیطان اؤلمه‌ییب کی, ایندی بو صحنه‌لری حتماً بیری گؤروب, گئدیب بوتون دونیایا جار سالاجاقدیر. اوندا گؤره‌سن اوشاقلاریم نئیله‌یه‌جکدیلر؟

تر باسمیشدی. آز قالیردی بوغولام. هر آن مین فیکره دالیردیم. کیمسه بو قئیرتسیزلییه دؤزه‌بیلمز. یوخ، نه شیکایت‌بازلیغی. ایشی ائله بوردا قورتارمالی‌یام.

بوتیکه طرف جلد یولا دوشدوم. ایکی خائین بوتیک‌‌دن چیخیب منه طرف گلیردیلر. بیرآن هئچ بیلمه‌دیم نه اولدو. بتر‌های-‌کوی قوپدو. جاماعات توکانلاردان ائشیه تؤکولدو. آغا توتون … آغا قویما … آغا …، بیر ایکی نفرده خیاوانا طرف گؤتورولدولر. سس‌لری بیر- بیریندن یاخچی آییرا بیلمیردیم. دونیا گؤزومون قاباغیندا قاپ- قارا قارالمیشدی.  توکان‌- بازار باشیما فیرلانیردی.

بیر قادین بوتیکین قاباغیندا یئره سره‌لنمیشدی. چانتاسی قولوندا ده‌ییلدی. پارتلاق بیر هدیه قوتوسوندان پیانو سسی گلیردی. بیر جوت تانیش گؤز سس‌سیز- سمیرسیز منه باخیردی.

آینالارین قاققیلتی سسی شه‌هری بوروموشدو. یاغیش یاغماغا باشلامیشدی. چیراقلار بوتون خیاوانی ایشیقلاندیرمیشدیلار…

Check Also

سویوق اوره‌ییمدن بئینیمه یوکسه‌لیر / سید رضا حسینی مرند

سویوق اوره‌ییمدن بئینیمه یوکسه‌لیر سید رضا حسینی مرند قار یاغیردی. ماشین سس‌سیزجه خیاباندا ایره‌لی‌له‌ییردی. سوروجو ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *