چئویرن: نریمان ناظیم
ترجمه: نریمان ناظیم
نریمان ناظیم

اوزو کوله‌یه
نریمان ناظیم
(بو حیکایه ۱۳۹۲ینجی ایل، سایتیمیزدا ان چوخ اوخونان اثرلردندیر.)

قاپینی آچدی. بیر توپا شاختا‌ایلا برابر ایچه‌ری گیردی. کیمسه‌یه باخمادان دوم- دوز پئشخانا ساری گئتدی. سول دیرسگینه سؤیکه‌نیب، ساغ الی‌ایله پاپاغی باشی‌نین دالینا سوردو. کؤبود بارماقلاری‌ایلا یاپیخمیش چال ساچینی داراخلادی. پئشخانین آرخاسیندا دایانان قوجا ائرمنی “ها، نا وار اوروف؟ باس نییه آیلاشمیرسان؟”- دئیه، یاخینلاشدی. اوروف گولومسه‌دی. گؤزلری‌نین، دوداغی‌نین کونجونده کی قیریشلار درینله‌شیب، اوزانیب بیر- بیرینه قوووشدو. هئچ نه دئمه‌دن الین جیبینه سالیب ایکی دانا گوموش بئش قیرانلیق چیخارتدی. پئشخانین اوستونه ویریب، چاخیر وئر! – دئدی. قوجا ائرمنی بیر پولا، بیرده اوروفا باخدی:

–    آخی بونا مان نا وئریم اوروف؟
–    هر نه وئریرسن وئر! آنجاق سویوغو جانیمدان چیخارسین!
–    بابام بونا بیر شئی اولماز آخی!
–    چوخ دیبینه گئتمه ائدیک! گؤرورسن کی شاختادی. ایش یوخ، گلیر یوخ … اولمازسا آچیغین وئر!
–    مان چوخداندی آچیق آراخ ساتمام اوروف.

پئشخانا یاخین میزده ایله‌شن دؤره بؤرک کیشی بیژ- بیژ گولدو. سونرا اوجا سسله “ائدیک”ی سسله‌دی:

–    ائدیک، بیر چتول اونا وئر قوی ایچسین شاهین ساغلیغینا!

بیر آندا سس- سمیر کسیلدی. اوروف سسه ساری دؤندو. آجی- آجی گولومسه‌دی: “یوخ اولمادی امیر، بو اولمادی”- دئدی. دؤره بؤرک کیشی‌نین توربالانمیش گؤزو سه‌ییردی:
–    نئجه اولمادی، یانی سن شاهین ساغلیغینا ایچمک ایسته‌میرسن؟
–    سؤز اوندا دئییل امیراصلان‌خان. سؤز اوراسیندادیر کی بیری تاپیلار, بیر قاب آلار، دئیه‌ر ایچ پیشه‌وری‌نین ساغلیغینا. اوندا بس نئجه اولسون؟

امیر اصلان آجی‌دی:

–    او ده‌دن اؤلدو اوروف! دای ائله‌سی تاپیلماز …

اوروف امیراصلانین آجیماغین گؤروب گولومسه‌یه‌رک: تاپیلار امیر … تاپیلار! – دئدی.

آرخاداکی میزلردن کیمیسی سسلندی:

–    ائدیک، یاریم قاب وئر اوروفا! قوی ایچسین اؤز ساغلیغینا!

×××

اوروف دوردوغو یئرده یاریم قابدان بیرجه ایسته‌کان تؤکوب قالدیردی. کیمسه‌دن سس چیخمیردی. او معنالی باخیشی‌ایلا دؤره‌یه گؤز گزدیردی. سانکی بیر سؤز دئمک ایسته‌ییردی. آمما هئچ نه دئمه‌دی. بیر داها گولومسه‌دی؛ سونرا ایسته‌کانی باشینا چکدی. بوینونداکی شالی‌ایله بیغینی سیلیب قاپی ساری گئتدی.

قاپینی آچدیقدا دیشاری‌دان یوگورن شاختا اوروف‌ایلا دؤش- دؤشه گلدی. بو دؤنه آمما اوروفون قیزغین دؤشو سانکی شاختانی دالا قاهاریب، آرخاسین یئره گتیردی.

چاپ

2 پاسخ

  1. نریمان ناظم جنابلاری سلام. بو ایکینجی دفعه ایدی کی یاراتدیغین و اونا اؤلمز لیک باغیشلادیغین حکایه نی اوخودوم. همیشه تاسفلنیردیم کی بیزده قیسا حکایه ندن دیرچه لیش حالی تاپمیر؟! آما سیزین بو حکایه منی ایناندیردی کی، بیزده ، بیزیم بو گوجلو دیلیمیزده ، وار بلکه ده لاپ گوجلو، بیر یونولموش اینجی کیمی . سیزین حکایه نیزده نه بیر کلمه آرتیق، نه بیر کلمه اسکیک، هئچ نه گؤزه چارپمیر. هامیدان آرتیق بو حکایه نین مشدی لحنی دی. او احوالی آرتیق قدیم میخاناچیلار دویا بیلر. منی کئفلندیردی . اللرینیز وار اولسون.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوزو کوله‌یه

نریمان ناظیم
www.ishiq.net

آذربایجان ادبیات و اینجه‌صنعت سایتی

اوزو کوله‌یه

نریمان ناظیم
www.ishiq.net

آذربایجان ادبیات و اینجه‌صنعت سایتی

اوزو کوله‌یه

نریمان ناظیم
www.ishiq.net

آذربایجان ادبیات و اینجه‌صنعت سایتی