کیمدی شاعر…؟
رسول آرانلی
یاشامی بیر هایلی- هارایلی قاطاردی شاعرین.
یوکو آغلی- قارالی، بیرنئچه قوجاق شعیر.
اینجه مقصدی ،
داش-دمیر اوسته سورونور !
اوزون گئجه‌لره-
لای‌لای چالا-چالا چیرپیر، شاعر اوره‌یی .
ایچین یییه‌ن قلمی-
آغ‌چلنگلی گله‌جکدن یازیر .
اؤزو سئویلمه‌یه‌جکسه ده بیرگون،
سئویر …، یاشادیر .
شام کیمی اریییب،
کپنک‌لرین اوچوشو قدر یاشاییر !
کیمدی شاعیر؟
هارادی سونوجو بو یولون …؟
اونو تانییم دییه-
قاچدیم بو قاطارین آرخاسینجا ،
اۆزۆمه چیرپیلان گوزیاشلارینی گوردوم !
چیچکله‌نیب پؤهره‌له‌ننده شعیری،
اوچدو آغزیندان کپنک‌لر …،
یتیم قالدی کیتابی ،
“گویدن دوشن اوچ آلمادی” عؤمرو شاعرین.
