تیتره‌ییر…./ رقیه کبیری

rugayye
….تیتره‌ییر
رقیه کبیری   

یوخومون دیبینه آتدیغیم حب

توخوندو بو گئجه‌مین قیرجا باتاقلیغینا

باتاقلیغین داماغی قالخیب

قوخوسو، قورخوسو

دالاشیر اینام‌لاریم‌لا

کؤکوم، وارلیغیم‌لا

دیرناقلاریم قازیر

قبیرسیز اؤلولرین تورپاغینی

بیر چنگه خاوران تورپاغیندان

بیر چنگه قارا داغ

خاوران‌دا باسدیریلمیش نهنگ بدنلی کیشی‌لر

توخونمامیشدی دامارلاریمیزا

قارا داغ توخوندو.

تیتره‌دی…تیتره‌دی… تیتره‌دی

کؤکوموز،

تپیلدی گؤزوموزه

کیم‌ایسه وجدان قاینادی قانیندا

کیم‌ایسه اوره‌یی اوووجوندا

کیم‌ایسه تاریخ جوجردی بئینینده

کیم‌ایسه جغرافیا، مقاویله…

تیتره‌دی… تیتره‌دی… تیتره‌دی

قادین‌لارین بزه‌ک دوزه‌ییندن،

کیشی‌لری گوناها باتیردیقلاریندان تیتره‌دی دئدیلر

گؤزوموزه تپیلمیش تورپاق

بزه‌ک سیز قادین‌لاری

گوناه‌سیز کیشی‌لری

معصوم اوشاقلاری چکدی باغرینا

تیتره‌ییر… تیتره‌ییر… تیتره‌ییر

عاغیل‌لار، اینام‌لار جزالانیر

بولدوزرلر قازیر،

خاوران تیتره‌ییر

گوناه‌کارلار جزالانیر،

قاراداغ تیتره‌ییر

اوتاغیم تیتره‌ییر، یاتاغیم تیتره‌ییر…

یوخومون دیبنه آتدیغیم حب

ایلیشیب الیمه، آیاغیما

بوغولورام گئجه‌نین زهیم‌لی باتاقلیغینا…

یئر تیتره‌ییر، گؤی تیتره‌ییر

یئردن اوجا تورپاق بئله تیتره‌ییر!

92.5.22

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *