شعرلر
حسن صفورا
(۱)
سنی گؤزلریمه تپدیم
ایندی اوره‌ییمده بیر آغاج اولوبسان؛
گولورم
آغلیرام
اؤپورم
یازیرام؛
هئچ قورتارمیرسان…
(۲)
یئنی‌دن گل
بالکوندا بیر چای ایچک
دیمدیکله‌شک گئده‌ک
یارپاقلار نور سپه‌له‌سین
دوداقلاریمیزا…
(۳)
حیف اولسون-
باختی یئنی‌دن توخوماق اولماز
یوخسا
گول – چیچکلی ناخیش سالاردیم گؤزلرینه
رؤیادا آنلادیغیم بیر سئوگی تک…
(۴)
گؤزلریم سنه ایلیشدی
سن ده کی، منسیز
منی آپاردین؛
ایندی،
نه سنده‌یم
نه ده اؤزومده؛
گل
منی اؤزومه قایتار!
بو یوخوسوز یوخولار
اؤلدورور منی.
(۵)
آنجاق
بیرسن قالدین
بیرده حسرتلریم
بلکه
سن‌ده بیر حسرت اولوبسان مندن خبرسیز
یا بیرگون حسرت اولاجاقسان
بیر قوجا توت آغاجیندا…
