ارسلان بير آز ياواش اول!/ محمد خلیلی- چئویرن: ع. آغ گونئیلی

xalili
ارسلان بير آز ياواش اول!
محمد خليلي – چئويرن: ع. آغ. گونئيلي
ali agguneyli (2)

 ارسلان بير آز ياواش گئت. ساغ ديزيني چوخ زورا سالما, بلكه بير نئچه آنليق بو خيياوانين قيراغينداكي محجّريه سؤیكه‌نيب بير آز دينجله‌سن؟

– يوخ، داي «پاتوغا» ائله‌سن دئيه‌ن بير زاد قالماييب، بير تهر گئده‌رم. ارسلان آخي ايندي‌دن چوخ تئزدي. گومان كي هله «قهوه‌خانادا»دا كيم‌ ايسه يوخدور.

– ياخشي، گئديم اوردا اوتوروم. هم‌هاواسي ايستي‌دير، هم‌ده كي كونتراتچي‌لار گلنه كيمي بير- ايكي ايستيكان ايستي چاي ايچيم.

ائله ‌ايسه، بير آز ياواش يئري ارسلان. يوخسا ديزين شيشر؛ الينه ايش وئره‌ر. او، خيياوان اوستو پييادا كورپوسو چوخ يوخوش ايدي گرك‌ كي اوردان كئچمه‌ييدين. ايشدي ييخيليب ضربه- زاد گوررسن. بلكه بو داواخانادان بير ياغ «پماد» آليب گئجه ياتاندا ديزينه ياخيب اوستونو باغلاياسان؟

– يوخ،‌ گئجه اوستونو يون شال‌لا باغلاسام ياخشي اولار. تكي ‌درديم ديز دردي اولايدي. بؤيرك‌لر، تنگه نفس اولماق …‌هاميسي قاريشيب بير- بيرينه. ياخشي بو بوتكادان بير «روزنامه» آلمالي‌يام.

– آغا ايكيندي روزنامه‌سي وئرين!

تلسمه ارسلان «روزنامه»‌ني قاتلا وور قولتوغوونا كئچ اليني وئر او گئدن جاوانين الينه، قوي سني آسانجا كئچيرسين خيياوانين او تايينا.

ارسلان گؤردون كي هله قهوه‌خانا خلوت‌دي. كرامت قند سينديرير، رحمان‌دا چاي بوساتي‌نين آرخاسيندا، سماورلري ساهملانلايير.‌هاردا اوتورماق ايسته‌ييرسن؟

– بوردا، هميشه اوتوردوغوم بوجاق‌دا. كرامت بير ايستيكان منه چاي توك.

ارسلان! ايستي چاي ايستكانيني ايكي اووجوندا سيخيب، ياواش- ياواش ايچه- ايچه قهوه‌خانايا‌دا بير گؤز گزدير. آرا- سيرا اوردا- بوردا صندل‌لرده اوتوران واردي. باييرا باخ. بوغ باسميش شوشه‌لرين آرخاسيندان، ايكيندي‌نين بوز‌هاواسيندا يول‌دان كئچن‌لرين كؤلگه‌لرين گؤرمك اولار. رحمان «مهتابي‌»لري يانديرير، سن‌ ايسه روزنامه‌يه باخيرسان. ياخشي ديء گورك روزنامه‌ده نه يازيب‌دير ارسلان؟

– نه يازاجاق. يئر اوزونده هر يانا باخيرسان قان قوخوسو، باريت (باروت) قوخوسودور. آنجاق بو بلالي تورپاق‌دا ائله يئرلرده واركي اوردا، بير نئچه بيتگي گؤيرير. بو اؤزو اينسانا اوميد باغيشلايير.

ارسلان بو قده‌ر اؤزونو روزنامه‌لرده غرق ائله‌مه. باخ، هنده‌ورين نئجه شولوق‌لاشدي. قهوه‌خانا، دولودور آدام ايله. دوغروسو، سنه ساري گلن گنج فهله‌ني تانيييرسان مي؟

– ارسلان بابا سالام!

– سالام اوغلوم، ايشين- گوجون نئجه‌دير؟

– آي، آزدان- چوخ‌دان…

– كيمين يانيندا ايشله‌ييرسن؟

– فضل‌علي‌نين، كونتراتچي‌ فضل‌علي.

– ايندي او قهوه‌خانا دا دير؟

– بلي اوردا، باخ اوردا اوتوروب.

– ياخشي اولدو، گئت اونا دئيينن كي ارسلان دئيير بئكارام. گؤر فهله‌ لازيمي‌دير.

– ارسلان بابا سن كي نئچه دفه اونا اوز ووروبسان فايداسي يوخدور.

ايسته‌ييرسن يئنه قاييديب دئيه‌كي «آخي بو ايشدن دوشموش قوجانين نه جاني وار كي ايشله‌يه‌ده بيلسين؟»

ارسلان باخيش‌لارين نييه بئله سولغون‌دور؟ نييه بئله سينيخيبسان؟ مه‌ير بو شهرده تكجه سن‌مي بئله‌سن؟ گؤر بو شهرين مئيدانيندا،‌ قهوه‌‌خانالاريندا اولان بوتون فهله‌ “پاتوق”لاريندا نه قده‌ر قوجاليب ايشدن دوشموش فهله‌ وار. اؤزون ياخشي بيليرسن كي صاحيب‌كارلار هئچ اونلاري ايت‌ يئرينه‌ده قويمورلار. ايلك اؤنجه ايش‌چي‌لرين آغزينداكي ديش‌لريني سايير. قول‌لاري‌نين گوجونو يوخلاياندان سونرا، اونلاري ايشه گوؤورورلر. باخ ائله بيري قهوه‌خانا ايلان اوز به اوز پاساژ دا اولان سولئيمان دايي. يازيق قوجا كيشي هر گون، ايكيندي چاغي شهرين او باشيندان دورور گلير بورايا، نئچه ساعات گؤزله‌يندن سونرا بيري تاپيليركي اونو دينديرسين. ائله‌ سن ده سولئيمانا بير تاي‌سان. اؤزونو سينديرما، اونون كيمي باشيني يوخاري توت. هئچ اولمازسا هردن بير سنين ايشين اولور. بير تيكه چؤره‌ييني چيخاريرسان، سونراسينادا…

– آي بابا ! بوتون عؤموروم‌ده باشي اوجا ياشاميشام. ايل‌لر بويو فهله‌ليك ائله‌ميشم. واختي‌ ايلا كونتراتچي‌لار گليب مني شهرين بو باشيندان او باشينا ايشه آپارارديلار. موزدومودا ايشله‌مزدن اوّل وئرردي‌لر. اوندا، باشقالاري گؤره‌ بيلمه‌ين ان آغير و چتين ايشلري گؤرموشم. (اوجا دمير شيروانيلاري، هوندور ايشيق ديرك‌لريني و… رنگ‌له‌ميشم) آنجاق ايندي بير دري‌يم- بير سوموك؛ اونلارداكي بير- بيري‌نين اوستونده بند اولمور. بونلارا باخماياراق، يئنه‌ده باشي اوجايام. هميشه اؤز امه‌ييم‌له ياشاميشام كيمسه‌يه طوفئيلي اولماميشام. بوندان بئله‌ده كيمسه‌نين مينّتيني قبول ائتمه‌يه‌جم؛‌هاچانا كيمي نفسيم گلير كيمسه‌يه باش ايمه‌رم.

– ارسلان گؤروسن او اورتاليقداكي ماسانين باشيندا، اوتوران كونتراتچي‌نين هنده‌ورينه نه قده‌ر فهله ييغيليب‌دير؟ گئت اونا ديء بلكه سنه‌ده يونگول بير ايش وئردي.

– او باشيندا كپي پاپاغي اولاني دئييرسن؟ قادام اونون ساللانميش بوخاغينادا، ايشيم- ايشيم ايشيلدايان او بيچيم‌سيز آلنينادا. من اونون جيكيني‌ده- بؤكونوده بيليرم. ذرّه‌ قده‌ر اونون آدام‌ليغي يوخدور. بو آغا پولا چاتاندان بري آدامين سالاميني‌دا آلمير، هله قالسين كي…

ارسلان نه ائله‌مك ايسته‌ييرسن؟ هئچ جيب‌لرينه فيكير وئريب‌سن؟! گون خرجين، منزيلين دالا دوشموش كيرا‌سي، بؤيرك‌لرين، نفس تنگلي‌يين و پوزغون اووضان… هر گئجه‌يه تاي،‌ بو گئجه‌ده آتيلا- آتيلا قاييداجاقسان ائوه.

– بلي، سن ايسته‌ييرسن كي، منيم كيمي، سولئيمان دايي كيمي آداملارين، گونو بوندان ياخشي اولسون؟ داها بيز سيرادان چيخميشيق اله‌ييميز اله‌نيب، قلبيريميزده گوي‌ده فيرلانير. داها بيز ويدالاشمالي‌ييق. ائله واخت‌لار اولور كي آدام دونيانين هر زاديندان دويور. آنجاق بئله بير روزگار‌دا ائله آدام‌لاردا تاپيلير كي، گؤردوك‌لري ايش‌لر ايله آدامين روحونو اوخشاييب جلالانديرير. باياق منيم يانيمدا بير آز اوتوروب سونرا دوروب گئدن او گنج رنگ‌كاري گؤردون مي؟ من او «شئيطان توخومو»نا باخاندا گؤردوم كي اليني آپاردي مينم جيبيمه‌ ساري يقين كي او بو گونكو موزدوموزون ياري‌سيني قويوب منيم جيبيمه.

ارسلان آخي نه واختا كيمي بو كؤك‌ده قالاجاقسان؟ جانيم گئت اؤزونه باشقا بير ايش تاپ. گؤره بيله‌جه‌يين يونگول بير ايش.

– آخي منيم كي رنگ‌كارليقدان باشقا، بير ايش اليمدن گلمير. گؤزوم بو ايش‌ده آچيليب، ‌بو ايش‌ده جان قويوب سوموك ‌سينديرميشام. ايندي دئييرسن كي تزه‌دن گئديم باشقا ايش دالينجا…

ارسلان اؤزون نه اوچون كونتراتچيليغا گيرمه‌ميشدين؟ ايندي سنين‌ده اؤزون اوچون ايشين، فهله‌ن وار ايدي. باشقالارينادا مؤحتاج دئييلدين. روزگارين رسمي بئله‌ديركي، يا گرك چاپاسان ياداكي چاپيلاسان.

– نه ائله‌مك اولار. آدام‌لارين‌هاميسي بير اولمور آخي. منده گؤزومو بئله آچميشام، هميشه‌ده چاپيلماغي سئوميشم. بونو باشا دوشورسن مي يوخسا يوخ؟! جانيم ديء گؤروم آخي سن كيم‌سن منيم‌له بو جور باش- باشا وئريرسن؟ بوراخ جانيم، قوي من اؤز دردريمي چكيم. بئله من بيلميرم سن منيم روحومون‌هانسي بوجاغينداسان كي داييمن سسين قولاغيمدادير.

ارسلان نه يامان فيكيره گئديب سن؟ گئت داي قهوه‌خانا سايخيشيب‌هامي گئديب. كرامت‌ده گئديب، رحمان‌دا قاپيلاري باغلاييب، چيراق‌لاري سؤندورمك ايسته‌يير. سن ده دور گئت.

– آغا رحمان منيم حئسابيم نئچه اولار. دونن كي بورجوم دا قالير. آل اؤزونونكو.

ارسلان‌هاوا نه يامان قارانليق‌دير؟ يامان‌دا سويوق‌دور؛ گؤزله، يول‌لار دونوب‌لار، بير آز ياواش يئري، دووارلارين ديبي ايله گئت. پالتووون ياخاسيني آچ كي، بويون- بوغازيني سويوق‌دان ساخلاسين. ساغ‌ديزيني چوخ زورا سالما. كاش بير چلييين اولايدي.

ارسلان نئچه گوندور كي يورغان- دوشك‌ده ياتيرسان؟

– بيلميرم

نييه،‌ ايندي دؤرد گوندور دوشوب قاليبسان اوردا، بوغازيندان بير ايچيم سودا كئچمه‌ييب. تكي دونن آغزينا، ايكي قاشيق سود آليب مز- مزه ائله‌دين. سحردن ايندي‌يه كيمي بئله بير قورتوم سودا بوغازيندان كئچمه‌ييب. دونن گئجه‌ده كي سحره كيمي قيزديرمادان يانيردين. ايندي بير نئچه آنليق آياق‌لاريني، اوتاغين ياري‌يا قده‌ر آچيلميش قاپي‌سينا اوزالت، قوي بلكه ائشيكدن گلن سرين‌هاوا بدني‌نين حرارتيني آلسين.

– يوخ ائله‌يه بيلميرم، ‌ديزلريم آچيلمير. نفسيم چيخمير. سانكي جييه‌رلريم تام ايشدن دوشوبلر. سانكي سينه‌مين اوستونه گوپون‌له تاپداييرلار. كوره‌ييم، چييين‌لريم…

ارسلان اير بير آز قالخيب موتكّه‌يه سويكنسن بلكه بير آز نفسين آچيلدي. كئچيمين توختادي. سن گرك گونده آخشام سويوغوندا دوروب قهوه‌خانايا گئتمه‌ييدين، ائله بلكه بو يول‌لاردا، سني سويوق ووروبدي.

– نه بيليم، بلكه‌ده سويوق ديمه‌دي. آنجاق نفسيم چيخمير. سينه‌م پارتلايير. آخي ايل‌لر بويو سينه‌مه دولوب، لاي- لاي جييه‌رلريمده ياتميش بو توز- تورپاق نئجه…

ارسلان، ‌پيله‌ته‌نين اوستونده‌ كي ايليق سودان بير آز آغزيندا چالخا قوي بوغازين بير آز يوموشانيب آچيلسين. ائله بلكه او سينه‌نده كي خيلط نفسي‌نين يولونو توتوب.

قونشولار نئجه،‌ ارسلان؟ هئچ بو نئچه گونده سنه باش ووروب‌لار؟ اليندن توتوب‌لار- زاد…

– نه قويوبسان- نه آختاريرسان، بورادا،‌ بو اوجسوز – بوجاقسيز كاروان‌سرادا هره تپيليب اؤز كوماسينا، باشي‌دا قاريشيب اؤزونه. اوشاقلاري دا كي دئمه، سحردن آخشاما كيمي ياريم قارين،‌ آياق يالين بو قاپ- باجاسيز حيه‌طين تورپاغيندا، ‌قورد- قوش كيمي قايناشيب زارييـيرلار. اونلارين سس‌لري، ‌لاپ، حيه‌طين بوجاغيندا كي بو ائوجيييم كيمي گليب – چيخمير. مته كيمي بئينيمي دلير. آنجاق يئنه،‌ هردن بير، منه باش چكيب،‌ حاليمي سوروشورلار. هردن ده سوددن، ‌چايدان يا دا كي باشقا بير شئي‌لر منيم اوچون گتيريرلر.

ياخشي باخ بو بير شئي اولدو… عاييلن‌ نئجه ارسلان؟

–‌هانسي عاييله… آرواديم كي نئچه ايل اولار اؤلوب. تكي بير قيزيم وار. بيلميرم اودا اري ايله و اوشاق‌لاري ايلا‌هانسي شهرده چؤر‌ك اسيري‌ديلر. قيزيمنان ساري اوره‌ييم بير تيكه‌دي. اوشاق‌لاريني كي هئچ واخت گؤرمه‌ميشم.

هئي… ارسلان، ارسلان بير آز ياواش اول بير آز اؤزونه توختاق‌ليق وئر. باشيني موتكّه‌دن قالخيز، بير آز ديكه‌ل، چييين‌لريني مؤحكم ياپيشدير او آرخانداكي موتكّه‌يه. آخي بير تهر بو كئچينمه‌نينين قاباغيني آل. سينه‌نين خيسيلتیسي، بوغازي‌نين خيريلتي‌سي، ديش‌لري‌نين چاققاشماسي، قلبي‌نين گوببولتوسو، ال- آياغي‌نين سيچيراماسي، نفسين ارسلان… ارسلان… ارسلان…

Check Also

۱۰ شعر از اورهان ولی کانیک / ترجمه: مجتبی نهانی

۱۰ شعر از اورهان ولی کانیک ترجمه: مجتبی نهانی (برگرفته از کتاب «ترانه‌ی پشت بام‌ها ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *