چئویرن: صدیار وظیفه (ائل‌اوغلو)
ترجمه: صدیار وظیفه (ائل‌اوغلو)
صدیار وظیفه (ائل‌اوغلو)

eloglu
یاریمچیلیق‌ شعرلریم‌
صدیار وظیفه (ائل اوغلو) 

  نییه ‌بئله‌ سوسوب ‌شعریم‌؟

سکوت‌ قونوب ‌دوداغیما آغیر ـ آغیر!

سوسوب ‌شعریم‌، کوسوب‌ شعریم‌.

شعر نه‌دیر؟

بلکه‌ده‌ شعر،

دفتریمده‌ قورتارمایان‌ میصراعلاردیر

بلکه‌ده‌ شعر،

اعتراضلی ‌بیلکلرین ‌آهنگیله‌

دوداغیمدا ائنیب، ‌قالخان ‌هجالاردیر.

بلکه‌ده ‌شعر،

 ائله‌ دئییل‌ من ‌گؤتوروب ‌یازام‌ قفیل‌

قاش‌ـ قاباقسیز کلمه‌لری‌

دفتریمده‌ سطیر ـ سطیر.

بلکه‌ده ‌شعر،

دفترده‌ یوخ‌،

غضبیمده‌، دوداقلانماز هجالاردیر.

ائله‌دیرسه‌،

باغیشلاسین ‌شاعرینی‌

یاریمچیلیق‌ میصراعلاریم‌،

گله‌جگین‌ چاغلایاجاق‌ دینرینده‌

تؤره‌نه‌جک ‌ندالاریم‌،

تؤره‌نه‌جک‌ هجالاریم‌.

آنجاق ‌سیز ‌آی‌ دوداغیمدا یاریم‌ قالان‌

یاریمچیلیق ‌شعرلریم‌!

دوداغیمدا، کیریدیلمیش‌ دینرلریم‌

سون‌ گونومده‌ سیزی‌، سیزی‌ دوداقلارام‌،

غملی‌ـ غملی ‌هجانیزی‌

بلکه‌ده‌ من ‌ایسته‌میشم‌ سون‌نفسده‌

بیر سیزینله ‌وداعلاشام‌،

بلکه‌ده‌ سیز قورتاریلمیش ‌اولسایدینیز ایندییه‌ده‌ک‌

اؤز عؤمرومون ‌هجاسینی‌،

دوداقلاییب ‌قورتارمیشدیم‌.

سیز آی ‌منیم‌ یاریم ‌قالان ‌شعرلریم‌!

من ‌نه ‌بیلیم‌

بلکه‌ده‌سیز قورتاراندا

بیر شاعرین ‌حیاتیندا فاجعه‌لر دوغاجاغمیش‌

دویغولارین ‌درینلیگی‌ بیر شاعری ‌بوغاجاغمیش‌؛

اگر سیزی ‌قورتارسایدیم‌

اوخوجولار مندن ‌سونرا دئیه‌ردیلر

بیر شاعرین ‌عؤمور بویو

دوشونجه‌سی‌ بویوموشمو؟

آنجاق‌،

سیزی‌ دفتریمده‌ یاریم‌ـ یاریم ‌اوخویاندا

اوخویانلار دئیه‌جلکر

شاعر فیکری ‌دنیزمیش‌می‌، یا قویویموش؟‌

آخی ‌دنیز یاریم‌ گره‌ک،‌

آخی‌ قویو یاریم‌ گره‌ک‌؛

یوخسا دونیا سویا باتار

سیله‌لنسه ‌بوش‌ قویولار، گؤی‌ دنیزلر.

سیز ای‌ منیم ‌دفتریمده‌ یاریم ‌قالان‌

یاریمچیلیق ‌شعرلریم‌!

سونسوزلوقلار اؤلکه‌سیندن ‌اوچوب‌ گلن‌

کلمه‌لریم‌، ندالاریم‌!

غضب‌ دولو، عصیان‌ دولو

دوداقلانماز هجالاریم‌!

من ‌نه ‌بیلیم‌

بلکه‌ده‌ سیز

غضبینی ‌اوره‌گینده ‌اووخارلامیش‌

اودلو – اودلو شیمشکلریم ‌اولاجاقسیز؛

بلکه‌ده ‌سیز

سون ‌میصراعسی‌، سون‌ هجاسی‌

بیرآنانین ‌دوداغیندا دونوب، ‌قالان‌

ندالاری ‌قانا باتان‌ بایاتیلار اولاجاقسیز؛

خیاللاردا یار باغینا قانادلانان‌

آللی‌- آللی‌ دورنالاریم‌ اولاجاقسیز؛

بیر ده‌ اومید سماسیندا

قاناد چالان‌ سونالاریم‌ اولاجاقسیز؛

بلکه‌ده ‌سیز

فیرتینالار مژده‌چیسی‌

شیهه‌سینده ‌عصیان‌ سسی‌

ایلخی‌ـ ایلخی ‌قیر آتلاریم ‌اولاجاقسیز؛

من‌ نه‌ بیلیم‌!

بلکه‌ده ‌سون ‌سطیرلرین‌

کلمه‌لری‌، هجالاری‌

آچیلمایان ‌غونچالارین‌ اووجوندا گیزله‌نیبدیر؟

آی‌ غونچالار!

آچین ‌بیر ـ بیر اووجونوزو،

دیله ‌گلسین‌ آل‌گئییملی ‌شعر قیزی‌!

بیر اوخونسون‌ چیچکلرین‌ طالعلری ‌اووجونوزدان‌

بیلینسین‌کی‌ هانسی ‌لاله‌،

هانسی ‌نرگیز،

هانسی‌ سحر آچیلاجاق‌؟

هانسی ‌آخشام‌ سولاجاقدیر؟

هانسی‌ سحر آچیلاجاق‌؟

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

یاریمچیلیق‌ شعرلریم‌ / صدیار وظیفه (ائل اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی

یاریمچیلیق‌ شعرلریم‌ / صدیار وظیفه (ائل اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی

یاریمچیلیق‌ شعرلریم‌ / صدیار وظیفه (ائل اوغلو)

صدیار وظیفه (ائل‌اوغلو)
www.ishiq.net

آذربایجان ادبیات و اینجه‌صنعت سایتی